Alkitab/Purwaning Dumadi/37

^37:1 ​꧊ꦪꦏꦸꦧ꧀ꦩꦁꦒꦺꦴꦤ꧀ꦲꦶꦁꦠꦤꦃ​꧊ꦏꦺꦤꦲꦤ꧀꧈​ꦠꦶꦭꦱ꧀ꦥꦁꦒꦺꦴꦤ꧀ꦤꦤ꧀ꦤꦺꦧꦥꦏ꧀ꦤꦺ꧉​

^37:2 ꦫꦶꦮꦪꦠ꧀ꦠꦺꦧꦿꦪꦠ꧀ꦠꦺ​꧊ꦪꦏꦸꦧ꧀ꦩꦲꦸꦩꦼꦁꦏꦺꦤꦺ:ꦲꦤꦏ꧀ꦏꦺ​꧊ꦪꦏꦸꦧ꧀ꦱꦶꦁꦗꦼꦤꦼꦁ​꧊ꦪꦸꦱꦸꦥ꦳꧀ꦏꦸꦮꦶꦤꦺꦴꦤꦺꦴꦩ꧀ꦩꦤ꧀꧈​ꦲꦸꦩꦸꦂꦥꦶꦠꦸꦭꦱ꧀ꦠꦲꦸꦤ꧀꧉​​꧊ꦪꦸꦱꦸꦥ꦳꧀ꦩꦲꦸꦒꦮꦺꦪꦤ꧀ꦤꦺꦲꦔꦺꦴꦤ꧀ꦮꦼꦝꦸꦱ꧀꧈​ꦧꦼꦧꦉꦁꦔꦤ꧀ꦏꦫꦺꦴꦏꦏꦁꦏꦏꦁꦤꦺ꧈​ꦪꦏꦸꦮꦶꦲꦤꦏ꧀ꦏꦺꦧꦶꦭ꧀ꦲꦭꦤ꧀​꧊ꦗ꦳ꦶꦭ꧀ꦥ꧈​ꦱꦼꦭꦶꦂꦫꦺꦧꦥꦏ꧀ꦤꦺ꧉​ꦏꦼꦤꦏꦭ꧀ꦭꦤ꧀ꦤꦺꦏꦏꦁꦏꦏꦁꦤꦺꦩꦲꦸꦒꦮꦺꦤꦺꦢꦶꦮꦢꦸꦭ꧀ꦭꦏꦺꦏꦫꦺꦴꦧꦥꦏ꧀ꦤꦺ꧉​

^37:3 ​꧊ꦪꦏꦸꦧ꧀ꦠꦽꦱ꧀ꦤꦏꦫꦺꦴ​꧊ꦪꦸꦱꦸꦥ꦳꧀꧈​ꦔꦸꦁꦏꦸꦭ꧀ꦭꦶꦏꦠꦽꦱ꧀ꦤꦤ꧀ꦤꦺꦏꦫꦺꦴꦲꦤꦏ꧀ꦲꦤꦏ꧀ꦭꦶꦪꦤꦺ꧈​ꦩꦼꦂꦒ​꧊ꦪꦸꦱꦸꦥ꦳꧀ꦭꦲꦶꦂꦫꦺꦤꦭꦶꦏꦧꦥꦏ꧀ꦤꦺꦮꦶꦱ꧀ꦠꦸꦮ꧉​ꦲꦶꦁꦱꦮꦶꦗꦶꦤꦶꦁꦢꦶꦤ​꧊ꦪꦸꦱꦸꦥ꦳꧀ꦢꦶꦒꦮꦺꦏ꧀ꦏꦏꦺꦗꦸꦧꦃꦲꦥꦶꦏ꧀ꦧꦔꦼꦠ꧀꧉​

^37:4 ꦧꦉꦁꦏꦏꦁꦏꦏꦁꦤꦺꦔꦼꦂꦠꦶꦪꦺꦤ꧀​꧊ꦪꦸꦱꦸꦥ꦳꧀ꦢꦶꦠꦽꦱ꧀ꦤꦤꦶꦔꦸꦁꦏꦸꦭ꧀ꦭꦶꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦏꦧꦺꦃ꧈​ꦧꦚ꧀ꦗꦸꦂꦥꦝꦒꦼꦛꦶꦁꦏꦫꦺꦴ​꧊ꦪꦸꦱꦸꦥ꦳꧀꧈​ꦠꦼꦩꦃꦥꦝꦢꦶꦗꦺꦴꦛꦏ꧀꧉​

^37:5 ꦲꦶꦁꦱꦮꦶꦗꦶꦤꦶꦁꦧꦼꦔꦶ​꧊ꦪꦸꦱꦸꦥ꦳꧀ꦔꦶꦩ꧀ꦥꦶ꧉​ꦤꦭꦶꦏꦲꦶꦩ꧀ꦥꦺꦤ꧀ꦤꦺꦢꦶꦕꦿꦶꦠꦏ꧀ꦏꦏꦺꦏꦫꦺꦴꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧈​ꦤ꧀ꦢꦢꦺꦏ꧀ꦏꦏꦺꦱꦪꦱꦼꦔꦶꦠ꧀ꦠꦺꦏꦫꦺꦴꦝꦺꦮꦺꦏ꧀ꦏꦺ꧉​

^37:6 ꦕꦿꦶꦠꦤꦺ​꧊ꦪꦸꦱꦸꦥ꦳꧀ꦩꦲꦸꦩꦼꦁꦏꦺꦤꦺ꧈​"ꦲꦏꦸꦔꦶꦩ꧀ꦥꦶ꧈​

^37:7 ꦏꦪꦤꦺꦲꦏꦸꦭꦤ꧀ꦏꦺꦴꦮꦺꦏꦧꦺꦃꦭꦒꦶꦥꦝꦲꦤꦲꦶꦁꦥꦠꦼꦒꦭ꧀ꦭꦤ꧀ꦩ꧀ꦧꦼꦤ꧀ꦠꦺꦭ꧀ꦭꦶꦒꦤ꧀ꦢꦸꦩ꧀꧉​ꦧꦼꦤ꧀ꦠꦺꦭ꧀ꦭꦤ꧀ꦏꦸꦔꦢꦼꦒ꧀ꦩ꧀ꦧꦼꦒꦼꦒꦼꦒ꧀꧉​ꦢꦺꦤꦺꦧꦼꦤ꧀ꦠꦺꦭꦤ꧀ꦧꦼꦤ꧀ꦠꦺꦭꦤ꧀ꦩꦸꦏꦧꦺꦃꦥꦝꦔꦿꦸꦧꦸꦁꦧꦼꦤ꧀ꦠꦺꦭ꧀ꦭꦤ꧀ꦏꦸꦭꦤ꧀ꦱꦸꦁꦏꦼꦩ꧀ꦲꦤꦲꦶꦁꦔꦉꦥ꧀ꦥꦤ꧀ꦤꦺꦧꦼꦤ꧀ꦠꦺꦭ꧀ꦭꦤ꧀ꦏꦸꦩꦲꦸ꧉"​

^37:8 ꦧꦚ꧀ꦗꦸꦂꦢꦶꦲꦸꦤꦺꦤ꧀ꦤꦶꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧈​"ꦲꦥꦏꦺꦴꦏ꧀ꦏꦶꦫ꧈​ꦏꦺꦴꦮꦺꦲꦉꦥ꧀ꦢꦢꦶꦫꦠꦸꦔꦼꦫꦺꦃꦲꦏꦸꦏꦧꦺꦃ?"ꦩꦼꦂꦒꦱꦏꦲꦶꦩ꧀ꦥꦺꦤ꧀ꦱꦶꦁꦢꦶꦕꦿꦶꦠꦏ꧀ꦏꦏꦺꦩꦲꦸꦏꦏꦁꦏꦏꦁꦤꦺꦱꦪꦤꦼꦩꦼꦤ꧀ꦒꦼꦛꦶꦁꦔꦺꦩꦫꦁ​꧊ꦪꦸꦱꦸꦥ꦳꧀꧉​

^37:9 ꦭꦶꦪꦢꦶꦤ​꧊ꦪꦸꦱꦸꦥ꦳꧀ꦔꦶꦩ꧀ꦥꦶꦩꦼꦤꦺꦃ꧈​ꦭꦤ꧀ꦲꦶꦪꦢꦶꦕꦿꦶꦠꦏ꧀ꦏꦏꦺꦏꦫꦺꦴꦏꦏꦁꦏꦏꦁꦤꦺ꧈​"ꦲꦏꦸꦔꦶꦩ꧀ꦥꦶꦩꦼꦤꦺꦃ꧉​ꦤꦁꦏꦤꦤꦺꦲꦏꦸꦮꦼꦫꦸꦃꦱꦽꦔꦺꦔꦺ꧈​ꦉꦩ꧀ꦧꦸꦭ꧀ꦭꦤ꧀ꦭꦤ꧀ꦭꦶꦤ꧀ꦠꦁꦱꦼꦮꦼꦭꦱ꧀ꦥꦝꦱꦸꦗꦸꦢ꧀ꦲꦤꦲꦶꦁꦔꦉꦥ꧀ꦏꦸ꧉"​

^37:10 ꦲꦶꦩ꧀ꦥꦺꦤ꧀ꦩꦲꦸꦲꦸꦒꦢꦶꦕꦿꦶꦠꦏ꧀ꦏꦏꦺꦧꦥꦏ꧀ꦤꦺ꧉​ꦧꦚ꧀ꦗꦸꦂꦢꦶꦱꦼꦤ꧀ꦝꦸꦧꦥꦏ꧀ꦤꦺ꧈​"ꦏꦸꦮꦶꦲꦶꦩ꧀ꦥꦺꦤ꧀ꦲꦥ?ꦲꦥꦏꦺꦴꦏ꧀ꦏꦶꦫꦲꦏꦸꦭꦤ꧀ꦲꦶꦧꦸꦩꦸꦱꦂꦠꦱꦼꦢꦸꦭꦸꦂꦱꦼꦢꦸꦭꦸꦂꦩꦸꦧꦏꦭ꧀ꦠꦼꦏꦭꦤ꧀ꦱꦸꦩꦸꦁꦏꦼꦩ꧀ꦱꦸꦗꦸꦢ꧀ꦲꦤꦲꦶꦁꦔꦉꦥ꧀ꦩꦸ?"

^37:11 ꦩꦼꦂꦒꦱꦏꦏꦸꦮꦶꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦥꦝꦱꦼꦫꦶꦏ꧀ꦲꦠꦶꦤꦺꦏꦫꦺꦴ​꧊ꦪꦸꦱꦸꦥ꦳꧀꧈​ꦤꦁꦔꦶꦁꦧꦥꦏ꧀ꦤꦺꦚꦛꦼꦠ꧀ꦥꦽꦏꦫꦏꦸꦮꦶꦩꦲꦸꦲꦶꦁꦱꦗꦿꦺꦴꦤꦶꦁꦲꦠꦶ꧉​

^37:12 ꦲꦶꦁꦱꦮꦶꦗꦶꦤꦶꦁꦢꦶꦤꦤꦭꦶꦏꦏꦏꦁꦏꦏꦁꦤꦺ​꧊ꦪꦸꦱꦸꦥ꦳꧀ꦥꦝꦲꦔꦺꦴꦤ꧀ꦮꦼꦝꦸꦱ꧀ꦱꦺꦧꦥꦏ꧀ꦤꦺꦲꦤꦲꦶꦁ​꧊ꦱꦶꦏꦺꦩ꧀꧈​

^37:13 ​꧊ꦪꦏꦸꦧ꧀ꦏꦤ꧀ꦝꦏꦫꦺꦴ​꧊ꦪꦸꦱꦸꦥ꦳꧀꧈​"ꦏꦺꦴꦮꦺꦢꦏ꧀ꦏꦺꦴꦁꦏꦺꦴꦤ꧀ꦩꦼꦚꦁ​꧊ꦱꦶꦏꦺꦩ꧀꧈​ꦥꦁꦒꦺꦴꦤ꧀ꦤꦤ꧀ꦤꦺꦏꦏꦁꦏꦏꦁꦩꦸꦥꦝꦲꦔꦺꦴꦤ꧀ꦮꦼꦝꦸꦱ꧀꧉"​ꦮꦁꦱꦸꦭ꧀ꦭꦤ꧀ꦤꦺ​꧊ꦪꦸꦱꦸꦥ꦳꧀꧈​"ꦲꦶꦁꦒꦶꦃ꧈​ꦥꦏ꧀꧉"​

^37:14 ꦕ꧀ꦭꦛꦸꦤꦺꦧꦥꦏ꧀ꦤꦺ꧈​"ꦏꦏꦁꦏꦏꦁꦩꦸꦠꦶꦭꦶꦏ꧀ꦏꦤꦲꦥꦥꦝꦱ꧀ꦭꦩꦼꦠ꧀꧈​ꦭꦤ꧀ꦮꦼꦝꦸꦱ꧀ꦮꦼꦝꦸꦱ꧀ꦱꦺꦲꦥꦏꦧꦺꦃꦥꦝꦧꦼꦕꦶꦏ꧀꧉​ꦧꦚ꧀ꦗꦸꦂꦲꦺꦁꦒꦭ꧀ꦧꦭꦶꦪ꧈​ꦲꦏꦸꦏꦧꦂꦫꦤ꧉"​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦩꦁꦏꦠ꧀ꦱꦏꦊꦩ꧀ꦧꦃ​꧊ꦲꦺꦧꦿꦺꦴꦤ꧀꧉​ꦲꦺꦴꦫꦮꦼꦠꦫꦱꦸꦮꦺꦧꦚ꧀ꦗꦸꦂꦠꦼꦏꦤ꧀​꧊ꦱꦶꦏꦺꦩ꧀꧉​

^37:15 ꦱꦏꦏꦤ​꧊ꦪꦸꦱꦸꦥ꦳꧀ꦩ꧀ꦭꦏꦸꦩꦼꦚꦁꦲꦫꦲꦫ꧉​ꦲꦶꦁꦢꦭꦤ꧀ꦏꦼꦥꦼꦛꦸꦏ꧀ꦏꦫꦺꦴꦮꦺꦴꦁꦭꦤꦁꦱꦶꦁꦤꦏꦺꦴꦤ꧀ꦤꦶ꧈​"ꦱꦩ꧀ꦥꦺꦪꦤ꧀ꦥꦢꦺꦴꦱ꧀ꦩꦼꦤꦥ?"

^37:16 ꦮꦁꦱꦸꦭ꧀ꦭꦤ꧀ꦤꦺ​꧊ꦪꦸꦱꦸꦥ꦳꧀꧈​"ꦏꦸꦭꦩꦢꦺꦴꦱ꧀ꦱꦶꦏꦏꦁꦏꦏꦁꦏꦸꦭꦲꦶꦁꦏꦁꦱꦩꦶꦲꦔꦺꦤ꧀ꦩꦺꦤ꧀ꦢ꧉​ꦩꦼꦤꦥꦱꦩ꧀ꦥꦺꦪꦤ꧀ꦱꦸꦩꦼꦉꦥ꧀ꦱꦩꦶꦮꦺꦴꦤ꧀ꦠꦼꦤ꧀ꦥꦸꦤ꧀ꦢꦶ?"

^37:17 ꦮꦁꦱꦸꦭ꧀ꦭꦤ꧀ꦤꦺꦮꦺꦴꦁꦩꦲꦸ꧈​"ꦱꦩ꧀ꦥꦸꦤ꧀ꦱꦩꦶꦧꦶꦝꦭ꧀ꦱꦏꦶꦁꦔꦿꦶꦏꦶ꧉​ꦏꦸꦭꦩꦶꦉꦁꦱꦩꦶꦧꦝꦺꦝꦠꦼꦁ​꧊ꦢꦺꦴꦠꦤ꧀꧉"​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦩꦁꦏꦠ꧀ꦤꦸꦱꦸꦭ꧀ꦏꦏꦁꦏꦏꦁꦤꦺꦩꦿꦤꦭꦤ꧀ꦏꦼꦠꦼꦩꦸꦲꦤꦲꦶꦁ​꧊ꦢꦺꦴꦠꦤ꧀꧉​

^37:18 ꦱꦏꦏꦢꦺꦴꦃꦲꦤ꧀ꦮꦶꦱ꧀ꦥꦝꦮꦼꦫꦸꦃꦏ꧀ꦭꦺꦝꦁꦔꦺ​꧊ꦪꦸꦱꦸꦥ꦳꧀꧉​ꦱꦢꦸꦫꦸꦁꦔꦺꦠꦼꦏꦤ꧀ꦥꦁꦒꦺꦴꦤ꧀ꦤꦤ꧀ꦏꦺꦴꦤꦺꦴ꧈​ꦏꦏꦁꦏꦏꦁꦤꦺꦥꦝꦉꦩ꧀ꦧꦸꦒꦤ꧀ꦲꦉꦥ꧀ꦩꦠꦺꦤ꧀ꦤꦶ​꧊ꦪꦸꦱꦸꦥ꦳꧀꧉​

^37:19 ꦕ꧀ꦭꦛꦸꦤꦺ꧈​"ꦭ꧀ꦲꦏꦲꦺꦠꦸꦏꦁꦔꦺꦔꦶꦩ꧀ꦥꦶꦩꦿꦺꦤꦺ꧉​

^37:20 ꦲꦪꦺꦴ꧈​ꦥꦝꦢꦶꦥꦠꦺꦤ꧀ꦤꦶ꧈​ꦧꦚ꧀ꦗꦸꦂꦢꦶꦧꦸꦮꦁꦲꦶꦁꦱꦸꦩꦸꦂꦱꦶꦁꦲꦱꦠ꧀꧉​ꦩꦼꦁꦏꦺꦴꦢꦶꦏꦤ꧀ꦝꦏ꧀ꦏꦏꦺꦪꦺꦤ꧀ꦧꦺꦴꦕꦃꦲꦺꦢꦶꦩꦁꦱꦏꦺꦮꦤ꧀ꦒꦭꦏ꧀꧉​ꦗꦗꦭ꧀꧈​ꦲꦶꦩ꧀ꦥꦺꦤ꧀ꦤꦺꦏꦼꦭꦏꦺꦴꦤ꧀ꦲꦥꦲꦺꦴꦫ꧉"​

^37:21 ꦏꦿꦸꦔꦸꦒꦸꦤꦼꦩ꧀ꦩꦺꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦩꦲꦸ​꧊ꦫꦸꦧꦺꦤ꧀ꦒꦺꦴꦭꦺꦏ꧀ꦫꦺꦏꦲꦉꦥ꧀ꦚ꧀ꦭꦩꦼꦠ꧀ꦠꦏꦺ​꧊ꦪꦸꦱꦸꦥ꦳꧀꧉​ꦕ꧀ꦭꦛꦸꦤꦺ꧈​"ꦲꦗꦢꦶꦥꦠꦺꦤ꧀ꦤꦶ꧉​

^37:22 ꦕꦸꦏꦸꦥ꧀ꦢꦶꦕꦼꦩ꧀ꦥ꧀ꦭꦸꦁꦔꦏꦺꦲꦶꦁꦱꦸꦩꦸꦂꦱꦶꦁꦲꦤꦲꦶꦁꦲꦫꦲꦫꦱꦩꦸꦤ꧀ꦏꦺꦤꦺ꧉​ꦲꦗꦥꦶꦱꦤ꧀ꦥꦶꦱꦤ꧀ꦢꦶꦥꦶꦭꦂꦫ꧉"​ꦲꦼꦁꦒꦺꦴꦤꦺꦩꦸꦤꦶꦩꦲꦸꦩꦼꦂꦒꦏꦼꦥꦺꦔꦶꦤ꧀ꦔꦼꦤ꧀ꦠꦱ꧀​꧊ꦪꦸꦱꦸꦥ꦳꧀꧈​ꦧꦚ꧀ꦗꦸꦂꦢꦶꦏꦺꦴꦤ꧀ꦧꦭꦶꦩꦼꦚꦁꦥꦁꦒꦺꦴꦤ꧀ꦤꦤ꧀ꦤꦺꦧꦥꦏ꧀ꦤꦺ꧉​

^37:23 ꦏꦼꦕꦿꦶꦠꦧꦉꦁꦠꦼꦏꦤ꧀ꦔꦉꦥ꧀ꦥꦺꦏꦏꦁꦏꦏꦁꦤꦺ꧈​​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦢꦶꦧ꧀ꦭꦺꦗꦺꦢ꧀ꦢꦶ꧈​ꦭꦤ꧀ꦱꦮꦶꦱ꧀ꦱꦺꦗꦸꦧꦃꦲꦺꦱꦶꦁꦲꦥꦶꦏ꧀ꦧꦔꦼꦠ꧀ꦩꦲꦸꦢꦶꦲꦸꦕꦸꦭ꧀ꦭꦶ꧈​

^37:24 ꦧꦚ꧀ꦗꦸꦂꦢꦶꦕꦤ꧀ꦝꦏ꧀ꦭꦤ꧀ꦢꦶꦕꦼꦩ꧀ꦥ꧀ꦭꦸꦁꦔꦏꦺꦲꦶꦁꦱꦸꦩꦸꦂꦲꦱꦠ꧀꧉​

^37:25 ꦧꦉꦁꦭꦒꦶꦥꦝꦩꦁꦔꦤ꧀꧈​ꦢꦸꦩꦢꦏ꧀ꦏꦤ꧀ꦥꦝꦮꦼꦫꦸꦃꦲꦶꦁꦏꦢꦺꦴꦃꦲꦤ꧀ꦲꦤꦮꦺꦴꦁꦮꦺꦴꦁ​꧊ꦆꦱ꧀ꦩꦲꦺꦭ꧀ꦱꦏ​꧊ꦒꦶꦭꦺꦪꦢ꧀ꦥꦝꦭꦶꦮꦠ꧀ꦲꦉꦥ꧀ꦩꦼꦚꦁꦠꦤꦃ​꧊ꦩꦺꦱꦶꦂ꧉​ꦲꦸꦤ꧀ꦠꦲꦸꦤ꧀ꦠꦤꦺꦥꦝꦢꦶꦩꦺꦴꦩꦺꦴꦠ꧀ꦠꦶꦉꦩ꧀ꦥꦃꦉꦩ꧀ꦥꦃꦭꦤ꧀ꦏꦶꦱ꧀ꦩꦶꦱ꧀꧉​

^37:26 ​꧊ꦪꦺꦲꦸꦢꦏꦤ꧀ꦝꦏꦫꦺꦴꦱꦼꦢꦸꦭꦸꦂꦱꦼꦢꦸꦭꦸꦂꦫꦺ꧈​"ꦲꦥꦒꦸꦤꦤꦺꦩꦠꦺꦤ꧀ꦤꦶ​꧊ꦪꦸꦱꦸꦥ꦳꧀ꦭꦤ꧀ꦚꦶꦝꦼꦩ꧀ꦥꦽꦏꦫꦤꦺ?

^37:27 ꦲꦥꦲꦺꦴꦫꦭꦸꦮꦶꦃꦧꦼꦕꦶꦏ꧀ꦢꦶꦲꦼꦢꦺꦴꦭ꧀ꦮꦲꦺꦩꦫꦁꦮꦺꦴꦁ​꧊ꦆꦱ꧀ꦩꦲꦺꦭ꧀ꦏꦲꦺ꧉​ꦢꦢꦶꦲꦺꦴꦫꦥꦽꦭꦸꦢꦶꦥꦶꦭꦂꦫ꧉​ꦧꦺꦴꦕꦃꦏꦸꦮꦶꦫꦏ꧀ꦏꦸꦭꦶꦠ꧀ꦢꦒꦶꦁꦏꦶꦠꦝꦺꦮꦺ꧉"​ꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦥꦝꦚꦫꦸꦗꦸꦏ꧀ꦏꦶ꧉​

^37:28 ꦧꦉꦁꦥꦫꦱꦸꦢꦒꦂ​꧊ꦩꦶꦢꦶꦪꦤ꧀ꦥꦝꦭꦶꦮꦠ꧀꧈​​꧊ꦪꦸꦱꦸꦥ꦳꧀ꦢꦶꦲꦼꦤ꧀ꦠꦱ꧀ꦱꦏꦲꦶꦁꦱꦸꦩꦸꦂ꧈​ꦧꦚ꧀ꦗꦸꦂꦢꦶꦲꦼꦢꦺꦴꦭ꧀ꦩꦼꦚꦁꦮꦺꦴꦁꦮꦺꦴꦁ​꧊ꦆꦱ꧀ꦩꦲꦺꦭ꧀꧈​ꦥꦪꦸꦫꦺꦴꦁꦥꦸꦭꦸꦃꦝꦸꦮꦶꦠ꧀ꦱ꧀ꦭꦏ꧉​ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ​꧊ꦪꦸꦱꦸꦥ꦳꧀ꦧꦚ꧀ꦗꦸꦂꦢꦶꦒꦮꦥꦫꦱꦸꦢꦒꦂꦩꦲꦸꦩꦼꦚꦁꦠꦤꦃ​꧊ꦩꦺꦱꦶꦂ꧉​

^37:29 ꦧꦉꦁ​꧊ꦫꦸꦧꦺꦤ꧀ꦩ꧀ꦧꦭꦺꦤ꧀ꦤꦶꦲꦶꦁꦱꦸꦩꦸꦂꦩꦲꦸꦭꦤ꧀ꦔꦼꦂꦠꦶꦪꦺꦤ꧀​꧊ꦪꦸꦱꦸꦥ꦳꧀ꦮꦶꦱ꧀ꦲꦺꦴꦫꦲꦤꦲꦶꦁꦏꦺꦴꦤꦺꦴ꧈​ꦤꦸꦭꦶꦚꦸꦮꦺꦏ꧀ꦱꦤ꧀ꦝꦁꦔꦤ꧀ꦤꦺꦩꦼꦂꦒꦱꦏꦱꦼꦝꦶꦃꦲꦺ꧉​

^37:30 ꦧꦚ꧀ꦗꦸꦂꦩꦫꦤꦶꦱꦼꦢꦸꦭꦸꦂꦱꦼꦢꦸꦭꦸꦂꦫꦺꦏꦫꦺꦴꦕ꧀ꦭꦛꦸ꧈​"ꦧꦺꦴꦕꦃꦲꦺꦏꦺꦴꦏ꧀ꦮꦶꦱ꧀ꦲꦺꦴꦫꦲꦤ!ꦒꦺꦏ꧀ꦚ꧀ꦗꦸꦂꦏꦼꦥꦿꦶꦪꦺꦲꦏꦸꦲꦶꦏꦶ?"

^37:31 ꦧꦚ꧀ꦗꦸꦂꦥꦝꦚꦼꦩ꧀ꦧꦼꦭꦺꦃꦮꦼꦝꦸꦱ꧀ꦧꦺꦫꦺꦴꦏ꧀꧉​ꦗꦸꦧꦃꦲꦺ​꧊ꦪꦸꦱꦸꦥ꦳꧀ꦤꦸꦭꦶꦢꦶꦕꦼꦭꦸꦥ꧀ꦥꦏꦺꦲꦶꦁꦒꦼꦠꦶꦃꦩꦲꦸ꧈​

^37:32 ꦭꦤ꧀ꦢꦶꦏꦶꦫꦶꦩ꧀ꦩꦏꦺꦩꦫꦁꦧꦥꦏ꧀ꦤꦺ꧈​ꦏꦫꦺꦴꦏꦤ꧀ꦝ꧈​"ꦏꦸꦭꦱꦩꦶꦩꦁꦒꦶꦃꦗꦸꦧꦃꦩꦼꦤꦶꦏ꧉​ꦩꦼꦤꦥꦩꦼꦤꦶꦏꦱꦤꦺꦱ꧀ꦗꦸꦧꦃꦲꦶꦥꦸꦤ꧀​꧊ꦪꦸꦱꦸꦥ꦳꧀꧈​ꦥꦸꦠꦿꦥꦚ꧀ꦗꦼꦤꦼꦁꦔꦤ꧀?"

^37:33 ​꧊ꦪꦏꦸꦧ꧀ꦧꦚ꧀ꦗꦸꦂꦤꦶꦠꦶꦏ꧀ꦗꦸꦧꦃꦩꦲꦸ꧈​ꦥꦔꦸꦕꦥ꧀ꦥꦺ꧈​"ꦲꦶꦪ꧈​ꦲꦶꦏꦶꦗꦸꦧꦃꦲꦺꦲꦤꦏ꧀ꦏꦸ!ꦲꦤꦏ꧀ꦏꦸꦩꦼꦱ꧀ꦛꦶꦢꦶꦠꦸꦧꦿꦸꦏ꧀ꦏꦺꦮꦤ꧀ꦒꦭꦏ꧀ꦭꦤ꧀ꦢꦶꦥꦺꦴꦛꦺꦁꦥꦺꦴꦛꦺꦁ꧉"​

^37:34 ​꧊ꦪꦏꦸꦧ꧀ꦚꦸꦮꦺꦏ꧀ꦱꦤ꧀ꦝꦁꦔꦤ꧀ꦤꦺꦩꦼꦂꦒꦱꦏꦱꦼꦝꦶꦃꦲꦺꦭꦤ꧀ꦔꦁꦒꦺꦴꦱꦤ꧀ꦝꦁꦔꦤ꧀ꦤꦺꦮꦺꦴꦁꦏꦼꦥꦠꦺꦤ꧀꧉​ꦥꦶꦫꦁꦥꦶꦫꦁꦢꦶꦤꦭꦮꦱ꧀ꦱꦺ​꧊ꦪꦏꦸꦧ꧀ꦤꦔꦶꦱ꧀ꦱꦶ​꧊ꦪꦸꦱꦸꦥ꦳꧀꧉​

^37:35 ꦲꦤꦏ꧀ꦲꦤꦏ꧀ꦏꦺꦏꦧꦺꦃ꧈​ꦭꦤꦁꦭꦤ꧀ꦮꦢꦺꦴꦤ꧀ꦥꦝꦠꦼꦏꦲꦉꦥ꧀ꦔ꧀ꦭꦶꦥꦸꦂ꧈​ꦤꦁꦔꦶꦁꦲꦺꦴꦫꦏꦺꦒꦸꦃ꧉​ꦥꦔꦸꦕꦥ꧀ꦥꦺ꧈​"ꦱꦼꦭꦮꦱ꧀ꦱꦺꦲꦸꦫꦶꦥ꧀ꦲꦏꦸꦧꦏꦭ꧀ꦤꦔꦶꦱ꧀ꦱꦶꦲꦤꦏ꧀ꦏꦸ꧉"​ꦩꦼꦁꦏꦺꦴꦤꦺꦴ​꧊ꦪꦏꦸꦧ꧀ꦲꦼꦁꦒꦺꦴꦤꦺꦤꦔꦶꦱ꧀ꦱꦶ​꧊ꦪꦸꦱꦸꦥ꦳꧀꧈​ꦲꦤꦏ꧀ꦏꦺ꧉​

^37:36 ꦢꦺꦤꦺꦱꦠꦼꦏꦤꦺꦲꦶꦁꦠꦤꦃ​꧊ꦩꦺꦱꦶꦂ​꧊ꦪꦸꦱꦸꦥ꦳꧀ꦢꦶꦲꦼꦢꦺꦴꦭ꧀ꦢꦺꦤꦶꦁꦮꦺꦴꦁꦮꦺꦴꦁ​꧊ꦩꦶꦢꦶꦪꦤ꧀ꦩꦫꦁ​꧊ꦥꦺꦴꦠꦶꦥ꦳ꦂ꧈​ꦏꦺꦴꦩꦤ꧀ꦝꦤ꧀ꦏꦼꦲꦩꦤ꧀ꦤꦤ꧀ꦏꦿꦠꦺꦴꦤ꧀꧉​