Alkitab/Purwaning Dumadi/29

Saka Wikisumber

29:1 ​꧊ꦪꦏꦸꦧ꧀ꦧꦚ꧀ꦗꦸꦂꦤꦼꦫꦸꦱ꧀ꦱꦏꦺꦭꦏꦸꦤꦺ꧈​ꦔꦼꦤꦼꦂꦲꦶꦁꦠꦤꦃꦱꦮꦺꦠꦤ꧀ꦤꦺ​꧊ꦏꦺꦤꦲꦤ꧀꧉​
29:2 ꦢꦸꦩꦢꦏ꧀ꦏꦤ꧀ꦮꦼꦫꦸꦃꦲꦤꦱꦸꦩꦸꦂꦲꦶꦁꦲꦫꦲꦫ꧈​ꦭꦤ꧀ꦲꦶꦁꦱꦕꦼꦝꦏ꧀ꦏꦺꦏꦺꦴꦤꦺꦴꦲꦤꦮꦼꦝꦸꦱ꧀ꦠꦼꦭꦸꦁꦥꦤ꧀ꦛꦥꦝꦚ꧀ꦗꦼꦫꦸꦩ꧀꧈​ꦩꦼꦂꦒꦲꦶꦁꦱꦸꦩꦸꦂꦏꦺꦴꦤꦺꦴꦥꦁꦒꦺꦴꦤ꧀ꦤꦤ꧀ꦤꦺꦮꦺꦴꦁꦥꦝꦔꦺꦴꦩ꧀ꦧꦺꦏ꧀ꦏꦏꦺꦮꦼꦝꦸꦱ꧀ꦱꦺ꧉​ꦱꦸꦩꦸꦂꦩꦲꦸꦲꦤꦠꦸꦠꦸꦥ꧀ꦥꦺꦮꦠꦸꦒꦼꦝꦺ꧉​
29:3 ꦪꦺꦤ꧀ꦮꦼꦝꦸꦱ꧀ꦱꦺꦮꦶꦱ꧀ꦔ꧀ꦭꦸꦩ꧀ꦥꦸꦏ꧀ꦏꦧꦺꦃ꧈​ꦭꦒꦶꦥꦫꦥꦔꦺꦴꦤ꧀ꦚꦶꦁꦏꦶꦂꦫꦏꦺꦮꦠꦸꦱꦶꦁꦤꦸꦠꦸꦥ꧀ꦥꦶꦕꦁꦏꦼꦩ꧀ꦩꦺꦱꦸꦩꦸꦂꦩꦲꦸ꧈​ꦭꦤ꧀ꦮꦼꦝꦸꦱ꧀ꦱꦺꦥꦝꦢꦶꦲꦺꦴꦩ꧀ꦧꦺꦤ꧀ꦤꦶ꧉​ꦪꦺꦤ꧀ꦮꦶꦱ꧀ꦫꦩ꧀ꦥꦸꦁꦮꦠꦸꦠꦸꦠꦸꦥ꧀ꦩꦲꦸꦢꦶꦧꦭꦺꦏ꧀ꦏꦏꦺꦩꦼꦤꦺꦃ꧉​
29:4 ​꧊ꦪꦏꦸꦧ꧀ꦧꦚ꧀ꦗꦸꦂꦔꦫꦸꦃꦲꦫꦸꦃꦲꦶꦥꦫꦥꦔꦺꦴꦤ꧀ꦱꦶꦁꦲꦤꦲꦶꦁꦏꦺꦴꦤꦺꦴ꧈​"ꦱꦩ꧀ꦥꦺꦪꦤ꧀ꦤꦶꦏꦸꦠꦶꦪꦁꦥꦸꦤ꧀ꦢꦶ?"ꦮꦁꦱꦸꦭ꧀ꦭꦤ꧀ꦤꦺꦥꦫꦥꦔꦺꦴꦤ꧀꧈​"ꦠꦶꦪꦁ​꧊ꦲꦫꦤ꧀꧉"​
29:5 ꦥꦶꦠꦏꦺꦴꦤ꧀ꦤꦺ​꧊ꦪꦏꦸꦧ꧀ꦩꦼꦤꦺꦃ꧈​"ꦤꦥꦱꦩ꧀ꦥꦺꦪꦤ꧀ꦠꦼꦥꦁꦏꦭꦶꦃ​꧊ꦭꦧꦤ꧀꧈​ꦲꦤꦏ꧀ꦏꦺ​꧊ꦤꦲꦺꦴꦂ?"ꦮꦁꦱꦸꦭ꧀ꦭꦤ꧀ꦤꦺ꧈​"ꦲꦶꦁꦒꦶꦃꦠꦼꦥꦁ꧉"​
29:6 ꦥꦶꦠꦏꦺꦴꦤ꧀ꦤꦺ​꧊ꦪꦏꦸꦧ꧀ꦩꦼꦤꦺꦃ꧈​"ꦤꦥꦥꦏ꧀​꧊ꦭꦧꦤ꧀ꦠꦏ꧀ꦱꦶꦃꦮꦶꦭꦸꦗꦼꦁ?"ꦮꦁꦱꦸꦭ꧀ꦭꦤ꧀ꦤꦺ꧈​"ꦲꦶꦁꦒꦶꦃ꧉​ꦭ꧀ꦲꦤꦶꦏ꧈​ꦭꦫꦺꦲꦺꦱ꧀ꦠꦿꦶꦱꦶꦁꦔ꧀ꦒꦶꦫꦶꦁꦩꦺꦤ꧀ꦢꦤꦺꦩꦿꦶꦏꦶ꧈​ꦤꦶꦏ​꧊ꦫꦲꦺꦭ꧀꧈​ꦥꦸꦠꦿꦤꦺꦥꦏ꧀​꧊ꦭꦧꦤ꧀꧉"​
29:7 ꦥꦔꦸꦕꦥ꧀ꦥꦺ​꧊ꦪꦏꦸꦧ꧀꧈​"ꦤꦶꦏꦶꦫꦏ꧀ꦠꦏ꧀ꦱꦶꦃꦱꦶꦪꦁ꧈​ꦏꦺꦴꦏ꧀ꦩꦺꦤ꧀ꦢꦤꦺꦲꦼꦩ꧀ꦥꦸꦤ꧀ꦢꦶꦒꦶꦫꦶꦁꦮꦁꦱꦸꦭ꧀꧈​ꦤꦶꦏꦸꦱꦼꦧꦧ꧀ꦧꦺꦤꦥ?ꦤꦥꦩ꧀ꦧꦺꦴꦠꦼꦤ꧀ꦱꦲꦺꦢꦶꦲꦺꦴꦩ꧀ꦧꦺꦤ꧀ꦤꦶ꧈​ꦭꦗꦼꦁꦢꦶꦲꦼꦔꦺꦤ꧀ꦩꦭꦶꦃ?"
29:8 ꦮꦁꦱꦸꦭ꧀ꦭꦤ꧀ꦤꦺ꧈​"ꦢꦺꦫꦺꦁꦱꦒꦼꦢ꧀ꦱꦩꦶꦔꦺꦴꦩ꧀ꦧꦺꦤ꧀ꦤꦶ꧈​ꦪꦺꦤ꧀ꦢꦺꦫꦺꦁꦱꦼꦢꦪꦱꦩꦶꦔ꧀ꦭꦼꦩ꧀ꦥꦏ꧀꧉​ꦱꦼꦧꦧ꧀ꦱꦺꦭꦱꦶꦁꦤꦸꦠꦸꦥ꧀ꦥꦶꦱꦸꦩꦸꦂꦤꦶꦏꦸꦏꦼꦢꦃꦢꦶꦲꦁꦏꦠ꧀ꦱꦼꦱꦉꦁꦔꦤ꧀꧈​ꦢꦶꦒꦺꦴꦭꦶꦁꦔꦏꦺ꧈​ꦩꦺꦤ꧀ꦢꦩꦺꦤ꧀ꦢꦭꦗꦼꦁꦢꦶꦲꦺꦴꦩ꧀ꦧꦺꦤ꧀ꦤꦶ꧉​ꦩꦼꦤꦮꦶꦩ꧀ꦧꦺꦴꦠꦼꦤ꧀ꦱꦼꦱꦉꦁꦔꦤ꧀ꦏꦭꦶꦃꦏꦚ꧀ꦕꦏꦛꦃꦏꦶꦠꦩ꧀ꦧꦺꦴꦠꦼꦤ꧀ꦏꦶꦪꦠ꧀ꦔꦁꦏꦠ꧀ꦱꦺꦭꦤꦺ꧉"​
29:9 ꦱꦗꦿꦺꦴꦤꦺꦲꦶꦱꦶꦃꦕꦠꦸꦂꦫꦤ꧀ꦏꦫꦺꦴꦥꦫꦥꦔꦺꦴꦤ꧀ꦩꦲꦸ꧈​​꧊ꦫꦲꦺꦭ꧀ꦠꦼꦏꦔ꧀ꦒꦶꦫꦶꦁꦮꦼꦝꦸꦱ꧀ꦱꦺꦧꦥꦏ꧀ꦤꦺ꧉​
29:10 ꦧꦉꦁꦮꦼꦫꦸꦃ​꧊ꦫꦲꦺꦭ꧀꧈​​꧊ꦪꦏꦸꦧ꧀ꦧꦚ꧀ꦗꦸꦂꦩꦼꦚꦠ꧀ꦩꦼꦚꦁꦱꦸꦩꦸꦂ꧉​ꦮꦠꦸꦤꦺꦢꦶꦲꦁꦏꦠ꧀ꦭꦤ꧀ꦢꦶꦱꦶꦱꦶꦃꦲꦏꦺ꧉​ꦮꦼꦝꦸꦱ꧀ꦮꦼꦝꦸꦱ꧀ꦱꦺꦤꦸꦭꦶꦢꦶꦲꦺꦴꦩ꧀ꦧꦺꦤ꧀ꦤꦶ꧉​
29:11 ꦱꦮꦶꦱ꧀ꦱꦺꦏꦸꦮꦶꦧꦚ꧀ꦗꦸꦂꦔꦩ꧀ꦧꦸꦁ​꧊ꦫꦲꦺꦭ꧀꧈​ꦏꦫꦺꦴꦤꦔꦶꦱ꧀ꦩꦼꦂꦒꦱꦏꦧꦸꦔꦃꦲꦺ꧉​
29:12 ꦠꦼꦩ꧀ꦧꦸꦁꦔꦺ​꧊ꦪꦏꦸꦧ꧀꧈​"ꦲꦏꦸꦲꦶꦏꦶꦲꦤꦏ꧀ꦏꦺ​꧊ꦫꦶꦧ꧀ꦏꦃ꧈​ꦲꦝꦶꦤꦺꦧꦥꦏ꧀ꦩꦸ꧉"​
29:13 ​꧊ꦫꦲꦺꦭ꧀ꦧꦚ꧀ꦗꦸꦂꦲꦺꦁꦒꦭ꧀ꦲꦺꦁꦒꦭ꧀ꦩꦸꦭꦶꦃ꧈​ꦔꦤ꧀ꦝꦤ꧀ꦤꦶꦧꦥꦏ꧀ꦤꦺ꧉​
29:14 ꦧꦉꦁ​꧊ꦭꦧꦤ꧀ꦏꦿꦸꦔꦸꦕꦿꦶꦠꦤꦺꦲꦤꦏ꧀ꦏꦺꦧꦧ꧀​꧊ꦪꦏꦸꦧ꧀꧈​ꦏꦼꦥꦺꦴꦤꦏ꧀ꦏꦤ꧀ꦤꦺ꧈​ꦧꦚ꧀ꦗꦸꦂꦲꦺꦴꦫꦱꦿꦤ꧀ꦠ꧈​ꦩ꧀ꦭꦪꦸꦩꦼꦚꦁꦱꦸꦩꦸꦂ꧈​ꦲꦉꦥ꧀ꦩ꧀ꦧꦒꦺꦏ꧀ꦏꦏꦺ꧉​​꧊ꦪꦏꦸꦧ꧀ꦧꦚ꧀ꦗꦸꦂꦢꦶꦫꦁꦏꦸꦭ꧀ꦭꦤ꧀ꦢꦶꦲꦩ꧀ꦧꦸꦁꦔꦶ꧈​ꦱꦂꦠꦢꦶꦲꦗꦏ꧀ꦩ꧀ꦭꦼꦧꦸꦲꦶꦁꦲꦺꦴꦩꦃꦲꦺ꧉​ꦱꦮꦶꦱ꧀ꦱꦺ​꧊ꦪꦏꦸꦧ꧀ꦚꦿꦶꦠꦏ꧀ꦏꦏꦺꦱꦏꦺꦃꦲꦺꦊꦭꦏꦺꦴꦤꦺ꧈​​꧊ꦭꦧꦤ꧀ꦧꦚ꧀ꦗꦸꦂꦕ꧀ꦭꦛꦸ꧈​"ꦱꦼꦗꦠꦶꦤꦺꦏꦺꦴꦮꦺꦏꦸꦮꦶꦲꦶꦱꦶꦃꦏꦸꦭꦶꦠ꧀ꦢꦒꦶꦁꦏꦸꦝꦺꦮꦺ꧉"​​꧊ꦪꦏꦸꦧ꧀ꦩꦺꦴꦤ꧀ꦝꦺꦴꦏ꧀ꦲꦤꦲꦶꦁꦏꦺꦴꦤꦺꦴꦭꦮꦱ꧀ꦱꦺꦔꦤ꧀ꦠꦶꦱꦼꦱꦱꦶ꧉​
29:15 ꦲꦶꦁꦱꦮꦶꦗꦶꦤꦶꦁꦢꦶꦤ​꧊ꦭꦧꦤ꧀ꦏꦤ꧀ꦝꦏꦫꦺꦴ​꧊ꦪꦏꦸꦧ꧀ꦩꦼꦁꦏꦺꦤꦺ꧈​"ꦱꦼꦤꦗꦤ꧀ꦏꦶꦠꦲꦶꦏꦶꦲꦶꦱꦶꦃꦥꦝꦱꦼꦢꦸꦭꦸꦂ꧈​ꦏꦸꦮꦶꦲꦺꦴꦫꦲꦠꦼꦒꦼꦱ꧀ꦪꦺꦤ꧀ꦏꦺꦴꦮꦺꦚꦩ꧀ꦧꦸꦠ꧀ꦒꦮꦺꦲꦶꦁꦏꦺꦤꦺꦠꦤ꧀ꦥꦢꦏ꧀ꦲꦺꦴꦥꦃꦲꦶ꧉​ꦱꦲꦶꦏꦶꦏꦤ꧀ꦝꦲꦮꦲꦺ꧈​ꦏꦺꦴꦮꦺꦚ꧀ꦗꦭꦸꦏ꧀ꦲꦺꦴꦥꦃꦥꦶꦫ?"
29:16 ꦢꦺꦤꦺ​꧊ꦭꦧꦤ꧀ꦩꦲꦸꦢꦸꦮꦺꦲꦤꦏ꧀ꦮꦢꦺꦴꦤ꧀ꦭꦺꦴꦫꦺꦴ;ꦱꦶꦁꦩ꧀ꦧꦉꦥ꧀ꦗꦼꦤꦼꦁꦔꦺ​꧊ꦭꦺꦪ꧈​ꦭꦤ꧀ꦲꦝꦶꦤꦺꦗꦼꦤꦼꦁꦔꦺ​꧊ꦫꦲꦺꦭ꧀꧉​
29:17 ​꧊ꦭꦺꦪꦩꦿꦶꦥꦠ꧀ꦠꦺꦩ꧀ꦧ꧀ꦭꦭꦏ꧀꧈​ꦢꦺꦤꦺ​꧊ꦫꦲꦺꦭ꧀ꦥꦮꦏ꧀ꦏꦤ꧀ꦤꦺꦲꦥꦶꦏ꧀ꦭꦤ꧀ꦫꦸꦥꦤꦺꦲꦪꦸ꧉​
29:18 ​꧊ꦪꦏꦸꦧ꧀ꦔꦼꦱꦶꦂ​꧊ꦫꦲꦺꦭ꧀꧈​ꦩꦸꦭꦤꦺꦏꦤ꧀ꦝꦏꦫꦺꦴ​꧊ꦭꦧꦤ꧀꧈​ꦠꦼꦩ꧀ꦧꦸꦁꦔꦺ꧈​"ꦏꦸꦭꦱꦒꦃꦔꦺꦔꦺꦂꦥꦚ꧀ꦗꦼꦤꦼꦁꦔꦤ꧀ꦥꦶꦠꦸꦁꦠꦲꦸꦤ꧀꧈​ꦲꦁꦒꦼꦂꦏꦸꦭꦢꦶꦥꦸꦤ꧀ꦥꦉꦁꦔꦏꦼꦤ꧀ꦏꦮꦶꦤ꧀ꦏꦭꦶꦪꦤ꧀​꧊ꦫꦲꦺꦭ꧀꧉"​
29:19 ꦮꦁꦱꦸꦭ꧀ꦭꦤ꧀ꦤꦺ​꧊ꦭꦧꦤ꧀꧈​"ꦪꦏꦼꦤ꧉​ꦭꦸꦮꦶꦃꦧꦼꦕꦶꦏ꧀ꦢꦏ꧀ꦮꦺꦤꦺꦃꦲꦏꦺꦏꦺꦴꦮꦺꦏꦼꦠꦶꦩ꧀ꦧꦁꦢꦏ꧀ꦮꦺꦤꦺꦃꦲꦏꦺꦮꦺꦴꦁꦭꦶꦪ꧉​ꦩꦸꦭꦤꦺꦮꦶꦱ꧀ꦩꦺꦭꦸꦮꦲꦏꦸꦮꦲꦺ꧉"​
29:20 ​꧊ꦪꦏꦸꦧ꧀ꦔ꧀ꦭꦏꦺꦴꦤ꧀ꦤꦶꦔꦺꦔꦺꦂꦥꦶꦠꦸꦁꦠꦲꦸꦤ꧀ꦱꦸꦥꦪꦲꦺꦴꦭꦺꦃ​꧊ꦫꦲꦺꦭ꧀꧉​ꦏꦁꦒꦺꦴꦤꦺ​꧊ꦪꦏꦸꦧ꧀ꦥꦶꦠꦸꦁꦠꦲꦸꦤ꧀ꦩꦲꦸꦩꦸꦁꦏꦪꦱꦮꦼꦠꦫꦢꦶꦤ꧈​ꦏꦒꦮꦱꦏꦠꦽꦱ꧀ꦤꦤꦺꦩꦫꦁ​꧊ꦫꦲꦺꦭ꧀꧉​
29:21 ​꧊ꦪꦏꦸꦧ꧀ꦧꦚ꧀ꦗꦸꦂꦩꦠꦸꦂꦩꦫꦁ​꧊ꦭꦧꦤ꧀꧈​"ꦮꦼꦏ꧀ꦢꦭ꧀ꦏꦸꦭꦔꦺꦔꦺꦂꦱꦩ꧀ꦥꦸꦤ꧀ꦫꦩ꧀ꦥꦸꦁ꧉​ꦏꦼꦥꦉꦁꦔꦏꦸꦭꦱꦩꦼꦤꦶꦏꦏꦮꦶꦤ꧀ꦏꦭꦶꦪꦤ꧀ꦏꦁꦥꦸꦠꦿ​꧊ꦫꦲꦺꦭ꧀꧉"​
29:22 ​꧊ꦭꦧꦤ꧀ꦧꦚ꧀ꦗꦸꦂꦩꦤ꧀ꦠꦸꦒꦼꦝꦺꦤ꧀ꦭꦤ꧀ꦔꦸꦊꦩ꧀ꦩꦶꦏꦼꦤꦭ꧀ꦭꦤ꧀ꦤꦺꦏꦧꦺꦃ꧉​
29:23 ꦧꦼꦔꦶꦏꦸꦮꦶꦱꦶꦁꦢꦶꦠꦼꦩꦺꦴꦏ꧀ꦏꦏꦺꦏꦫꦺꦴ​꧊ꦪꦏꦸꦧ꧀ꦢꦸꦢꦸ​꧊ꦫꦲꦺꦭ꧀꧈​ꦤꦁꦔꦶꦁ​꧊ꦭꦺꦪ꧈​ꦭꦤ꧀ꦏꦸꦮꦶꦱꦶꦁꦢꦶꦏꦸꦩ꧀ꦥꦸꦭ꧀ꦭꦶ​꧊ꦪꦏꦸꦧ꧀꧉​
29:24 ​꧊ꦭꦧꦤ꧀ꦔ꧀ꦒꦮꦤꦶ​꧊ꦭꦺꦪꦧꦠꦸꦂꦮꦢꦺꦴꦤ꧀꧈​ꦗꦼꦤꦼꦁꦔꦺ​꧊ꦗ꦳ꦶꦭ꧀ꦥ꧉​
29:25 ꦭꦒꦶꦲꦺꦱꦸꦏ꧀ꦏꦺ​꧊ꦪꦏꦸꦧ꧀ꦔꦺꦴꦤꦁꦔꦶ꧈​ꦪꦺꦤ꧀ꦱꦶꦁꦢꦶꦏꦸꦩ꧀ꦥꦸꦭ꧀ꦭꦶꦠꦸꦫꦸꦏꦸꦮꦶ​꧊ꦭꦺꦪ꧉​ꦧꦚ꧀ꦗꦸꦂꦩꦫꦤꦶ​꧊ꦭꦧꦤ꧀ꦭꦤ꧀ꦩꦠꦸꦂ꧈​"ꦩꦼꦤꦶꦏꦏꦢꦺꦴꦱ꧀ꦥꦸꦤ꧀ꦢꦶ?ꦲꦼꦁꦒꦺꦤ꧀ꦏꦸꦭꦤ꧀ꦝꦺꦫꦺꦏ꧀ꦥꦚ꧀ꦗꦼꦤꦼꦁꦔꦤ꧀ꦩꦼꦤꦶꦏꦫꦏ꧀ꦱꦸꦥꦢꦺꦴꦱ꧀ꦲꦁꦱꦭ꧀​꧊ꦫꦲꦺꦭ꧀?ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦔꦥꦸꦱ꧀ꦱꦶꦏꦸꦭ?"
29:26 ꦮꦁꦱꦸꦭ꧀ꦭꦤ꧀ꦤꦺ​꧊ꦭꦧꦤ꧀꧈​"ꦩꦶꦠꦸꦫꦸꦠ꧀ꦲꦢꦠ꧀ꦲꦶꦁꦏꦺꦤꦺꦱꦶꦁꦲꦼꦤꦺꦴꦩ꧀ꦲꦺꦴꦫꦏꦼꦤꦢꦶꦤꦶꦁꦏꦃꦲꦏꦺꦝꦶꦱꦶꦏ꧀ꦔ꧀ꦭꦁꦏꦃꦲꦶꦱꦶꦁꦠꦸꦮ꧉​
29:27 ꦔꦼꦤ꧀ꦠꦺꦤ꧀ꦤꦤꦔꦤ꧀ꦠꦶꦏꦿꦩꦺꦪꦤ꧀ꦥꦶꦠꦸꦁꦢꦶꦤꦲꦶꦏꦶꦫꦩ꧀ꦥꦸꦁ꧉​ꦩꦼꦁꦏꦺꦴ​꧊ꦫꦲꦺꦭ꧀ꦲꦸꦒꦢꦏ꧀ꦮꦺꦤꦺꦃꦲꦏꦺꦩꦫꦁꦏꦺꦴꦮꦺ꧈​ꦲꦁꦒꦼꦂꦏꦺꦴꦮꦺꦒꦼꦊꦩ꧀ꦔꦺꦔꦺꦂꦲꦏꦸꦥꦶꦠꦸꦁꦠꦲꦸꦤ꧀ꦭꦮꦱ꧀ꦱꦺ꧉"​
29:28 ​꧊ꦪꦏꦸꦧ꧀ꦩꦤꦸꦠ꧀꧉​ꦱꦮꦶꦱ꧀ꦱꦺꦏꦿꦩꦺꦪꦤ꧀ꦩꦤ꧀ꦠꦸꦫꦩ꧀ꦥꦸꦁ꧈​​꧊ꦭꦧꦤ꧀ꦩꦺꦤꦺꦃꦲꦏꦺ​꧊ꦫꦲꦺꦭ꧀꧈​ꦲꦤꦏ꧀ꦏꦺ꧈​ꦢꦢꦶꦧꦺꦴꦗꦺꦴꦤꦺ​꧊ꦪꦏꦸꦧ꧀꧉​
29:29 ꦏꦼꦗꦧꦏꦸꦮꦶ​꧊ꦭꦧꦤ꧀ꦩꦺꦤꦺꦃꦲꦏꦺꦧꦠꦸꦂꦠꦸꦏꦺꦴꦤ꧀ꦱꦶꦁꦗꦼꦤꦼꦁꦔꦺꦧꦶꦭ꧀ꦲ꧉​
29:30 ​꧊ꦫꦲꦺꦭ꧀ꦲꦸꦒꦢꦶꦏꦸꦩ꧀ꦥꦸꦭ꧀ꦭꦶ꧈​ꦩꦭꦃꦭꦸꦮꦶꦃꦢꦶꦠꦽꦱ꧀ꦤꦤꦶꦏꦼꦠꦶꦩ꧀ꦧꦁ​꧊ꦭꦺꦪ꧉​​꧊ꦪꦏꦸꦧ꧀ꦚꦩ꧀ꦧꦸꦁꦲꦼꦁꦒꦺꦴꦤꦺꦚꦩ꧀ꦧꦸꦠ꧀ꦒꦮꦺꦩꦺꦭꦸ​꧊ꦭꦧꦤ꧀ꦥꦶꦠꦸꦁꦠꦲꦸꦤ꧀ꦭꦮꦱ꧀ꦱꦺ꧉​
29:31 ꦧꦉꦁꦒꦸꦱ꧀ꦠꦶꦄꦭ꧀ꦭꦃꦩꦶꦂꦱ꧈​ꦪꦺꦤ꧀​꧊ꦭꦺꦪꦲꦺꦴꦫꦥꦠꦶꦢꦶꦠꦽꦱ꧀ꦤꦤꦶꦏꦪ​꧊ꦫꦲꦺꦭ꧀꧈​​꧊ꦭꦺꦪꦢꦶꦥꦫꦶꦁꦔꦶꦲꦤꦏ꧀꧈​ꦤꦁꦔꦶꦁ​꧊ꦫꦲꦺꦭ꧀ꦲꦺꦴꦫ꧉​
29:32 ​꧊ꦭꦺꦪꦔꦤ꧀ꦝꦼꦒ꧀ꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁ꧉​ꦠꦼꦩ꧀ꦧꦸꦁꦔꦺ꧈​"ꦄꦭ꧀ꦭꦃꦮꦶꦱ꧀ꦩꦶꦂꦱꦤꦶꦏꦱꦸꦱꦃꦲꦤ꧀ꦏꦸ꧈​ꦭꦤ꧀ꦱꦲꦶꦏꦶꦧꦺꦴꦗꦺꦴꦏꦸꦧꦏꦭ꧀ꦠꦽꦱ꧀ꦤꦏꦫꦺꦴꦲꦏꦸ꧉"​ꦩꦸꦭꦤꦺꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ​꧊ꦫꦸꦧꦺꦤ꧀꧉​
29:33 ꦱꦮꦶꦱ꧀ꦱꦺꦏꦸꦮꦶ​꧊ꦭꦺꦪꦔꦤ꧀ꦝꦼꦒ꧀ꦩꦼꦤꦺꦃꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁ꧉​​꧊ꦭꦺꦪꦧꦚ꧀ꦗꦸꦂꦩꦸꦤꦶ꧈​"ꦥꦔꦺꦫꦤ꧀ꦮꦶꦱ꧀ꦩꦶꦝꦔꦼꦠ꧀ꦪꦺꦤ꧀ꦲꦏꦸꦢꦶꦏꦶꦮꦏ꧀ꦏꦏꦺ꧈​ꦩꦸꦭꦤꦺꦲꦏꦸꦢꦶꦠꦩ꧀ꦧꦃꦲꦶꦲꦤꦏ꧀꧉"​ꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ:​꧊ꦱꦶꦩꦺꦪꦺꦴꦤ꧀꧉​
29:34 ​꧊ꦭꦺꦪꦔꦤ꧀ꦝꦼꦒ꧀ꦩꦼꦤꦺꦃꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁ꧉​ꦠꦼꦩ꧀ꦧꦸꦁꦔꦺ꧈​"ꦧꦺꦴꦗꦺꦴꦏꦸꦧꦏꦭ꧀ꦭꦸꦮꦶꦃꦏꦼꦕꦚ꧀ꦕꦁꦩꦫꦁꦲꦏꦸ꧈​ꦲꦮꦶꦠ꧀ꦱꦲꦶꦏꦶꦲꦤꦏ꧀ꦏꦸꦭꦤꦁꦠꦼꦭꦸ꧉"​ꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ:​꧊ꦭꦺꦮꦶ꧉​
29:35 ꦱꦮꦶꦱ꧀ꦱꦺꦏꦸꦮꦶ​꧊ꦭꦺꦪꦔꦤ꧀ꦝꦼꦒ꧀ꦩꦼꦤꦺꦃꦭꦤ꧀ꦩ꧀ꦧꦧꦂꦲꦤꦏ꧀ꦭꦤꦁ꧉​ꦠꦼꦩ꧀ꦧꦸꦁꦔꦺ꧈​"ꦱꦲꦶꦏꦶꦲꦏꦸꦲꦉꦥ꧀ꦩꦼꦩꦸꦗꦶꦩꦫꦁꦥꦔꦺꦫꦤ꧀꧉"​ꦧꦺꦴꦕꦃꦩꦲꦸꦧꦚ꧀ꦗꦸꦂꦢꦶꦗꦼꦤꦼꦁꦔꦏꦺ:​꧊ꦪꦺꦲꦸꦢ꧉​ꦱꦮꦶꦱ꧀ꦱꦺꦏꦸꦮꦶ​꧊ꦭꦺꦪꦲꦺꦴꦫꦢꦸꦮꦺꦲꦤꦏ꧀ꦩꦼꦤꦺꦃ꧉​