Alkitab/Purwaning Dumadi/28

^28:1 ​꧊ꦆꦱ꧀ꦏꦏ꧀ꦧꦚ꧀ꦗꦸꦂꦔꦸꦤ꧀ꦢꦁ​꧊ꦪꦏꦸꦧ꧀꧉​ꦱꦮꦶꦱ꧀ꦱꦺꦢꦶꦧꦼꦂꦏꦃꦲꦶꦧꦚ꧀ꦗꦸꦂꦢꦶꦮꦼꦭꦶꦁꦩꦼꦁꦏꦺꦤꦺ꧈​"ꦔ꧀ꦒꦺꦂ꧈​ꦲꦗꦥꦶꦱꦤ꧀ꦥꦶꦱꦤ꧀ꦏꦺꦴꦮꦺꦲꦩꦺꦏ꧀ꦧꦺꦴꦗꦺꦴꦮꦺꦴꦁ​꧊ꦏꦺꦤꦲꦤ꧀꧉​

^28:2 ꦭꦸꦔꦲꦩꦼꦚꦁꦠꦤꦃ​꧊ꦩꦺꦱꦺꦴꦥꦺꦴꦠꦩꦶꦪ꧈​ꦲꦶꦁꦲꦺꦴꦩꦃꦲꦺꦲꦼꦩ꧀ꦧꦃꦩꦸ​꧊ꦧꦺꦠꦸꦮꦺꦭ꧀꧈​ꦧꦥꦏ꧀ꦤꦺꦲꦶꦧꦸꦩꦸ꧈​ꦭꦤ꧀ꦲꦩꦺꦏꦧꦺꦴꦗꦺꦴꦱꦏꦥꦤꦸꦁꦒꦭ꧀ꦭꦤ꧀ꦤꦺꦲꦤꦏ꧀ꦏꦺ​꧊ꦭꦧꦤ꧀꧈​ꦏꦏꦁꦤꦺꦲꦶꦧꦸꦩꦸ꧉​

^28:3 ꦄꦭ꧀ꦭꦃꦏꦁꦩꦲꦏ꧀ꦮꦱꦩꦸꦒꦩꦸꦒꦩ꧀ꦧꦼꦂꦏꦃꦲꦶꦲꦼꦁꦒꦺꦴꦤ꧀ꦩꦸꦗꦼꦗꦺꦴꦝꦺꦴꦮꦤ꧀ꦭꦤ꧀ꦩꦫꦶꦁꦔꦶꦲꦤꦏ꧀ꦥꦸꦠꦸꦥꦶꦫꦁꦥꦶꦫꦁ꧈​ꦔꦤ꧀ꦠꦶꦏꦺꦴꦮꦺꦢꦢꦶꦊꦭꦸꦲꦸꦂꦫꦺꦧꦁꦱꦲꦏꦺꦃ!

^28:4 ꦩꦸꦒꦩꦸꦒꦥꦔꦺꦫꦤ꧀ꦩ꧀ꦧꦼꦂꦏꦃꦲꦶꦏꦺꦴꦮꦺꦭꦤ꧀ꦲꦤꦏ꧀ꦠꦸꦫꦸꦤ꧀ꦩꦸ꧈​ꦏꦪꦲꦼꦁꦒꦺꦴꦤꦺꦩ꧀ꦧꦼꦂꦏꦃꦲꦶꦩꦫꦁ​꧊ꦄꦧꦿꦲꦩ꧀꧉​ꦩꦸꦒꦩꦸꦒꦠꦤꦃꦱꦶꦁꦏꦺꦴꦏ꧀ꦲꦼꦁꦒꦺꦴꦤ꧀ꦤꦶꦲꦶꦏꦶꦢꦢꦶꦢꦸꦮꦺꦏ꧀ꦩꦸ꧈​ꦏꦪꦱꦶꦁꦢꦶꦗꦚ꧀ꦗꦺꦏ꧀ꦏꦏꦺꦢꦺꦤꦶꦁꦄꦭ꧀ꦭꦃꦩꦫꦁ​꧊ꦄꦧꦿꦲꦩ꧀!"

^28:5 ꦩꦼꦁꦏꦺꦴꦤꦺꦴ​꧊ꦆꦱ꧀ꦏꦏ꧀ꦲꦼꦁꦒꦺꦴꦤꦺꦔ꧀ꦭꦸꦔꦏ꧀ꦏꦏꦺ​꧊ꦪꦏꦸꦧ꧀ꦩꦼꦚꦁꦠꦤꦃ​꧊ꦩꦺꦱꦺꦴꦥꦺꦴꦠꦩꦶꦪ꧈​ꦩꦼꦚꦁꦥꦁꦒꦺꦴꦤ꧀ꦤꦤ꧀ꦤꦺ​꧊ꦭꦧꦤ꧀꧈​ꦲꦤꦏ꧀ꦏꦺ​꧊ꦧꦺꦠꦸꦮꦺꦭ꧀꧈​ꦮꦺꦴꦁ​꧊ꦄꦫꦩ꧀꧉​​꧊ꦫꦶꦧ꧀ꦏꦃ꧈​ꦲꦶꦧꦸꦤꦺ​꧊ꦪꦏꦸꦧ꧀ꦭꦤ꧀​꧊ꦌꦱꦲꦸ꧈​ꦏꦸꦮꦶꦲꦝꦶꦤꦺ​꧊ꦭꦧꦤ꧀꧉​

^28:6 ​꧊ꦌꦱꦲꦸꦔꦼꦂꦠꦶꦪꦺꦤ꧀​꧊ꦆꦱ꧀ꦏꦏ꧀ꦮꦶꦱ꧀ꦩ꧀ꦧꦼꦂꦏꦃꦲꦶ​꧊ꦪꦏꦸꦧ꧀ꦭꦤ꧀​꧊ꦪꦏꦸꦧ꧀ꦢꦶꦏꦺꦴꦤ꧀ꦭꦸꦔꦩꦼꦚꦁꦠꦤꦃ​꧊ꦩꦺꦱꦺꦴꦥꦺꦴꦠꦩꦶꦪ꧈​ꦱꦸꦥꦪꦒꦺꦴꦭꦺꦏ꧀ꦧꦺꦴꦗꦺꦴꦮꦺꦴꦁꦱꦏꦏꦤ꧉​ꦭꦤ꧀ꦲꦶꦪꦔꦼꦂꦠꦶꦪꦺꦤ꧀ꦲꦼꦁꦒꦺꦴꦤꦺꦩ꧀ꦧꦼꦂꦏꦃꦲꦶ​꧊ꦪꦏꦸꦧ꧀ꦩꦲꦸꦏꦫꦺꦴꦢꦶꦮꦼꦭꦶꦁꦱꦸꦥꦪꦲꦗꦥꦶꦱꦤ꧀ꦥꦶꦱꦤ꧀ꦲꦺꦴꦭꦺꦃꦧꦺꦴꦗꦺꦴꦮꦺꦴꦁ​꧊ꦏꦺꦤꦲꦤ꧀꧈​

^28:7 ꦱꦂꦠ​꧊ꦪꦏꦸꦧ꧀ꦔ꧀ꦒꦸꦒꦸꦩꦫꦁꦥꦶꦠꦸꦠꦸꦂꦫꦺꦧꦥꦏ꧀ꦭꦤ꧀ꦲꦶꦧꦸꦤꦺꦭꦤ꧀ꦭꦸꦔꦩꦼꦚꦁꦠꦤꦃ​꧊ꦩꦺꦱꦺꦴꦥꦺꦴꦠꦩꦶꦪ꧉​

^28:8 ꦩꦼꦂꦒꦱꦏꦏꦸꦮꦶ​꧊ꦌꦱꦲꦸꦔꦼꦂꦠꦶꦪꦺꦤ꧀​꧊ꦆꦱ꧀ꦏꦏ꧀ꦱꦠꦼꦩꦼꦤ꧀ꦤꦺꦲꦺꦮꦏꦫꦺꦴꦮꦺꦴꦁꦮꦺꦴꦁꦮꦢꦺꦴꦤ꧀ꦧꦁꦱ​꧊ꦏꦺꦤꦲꦤ꧀꧉​

^28:9 ꦩꦸꦭꦤꦺ​꧊ꦌꦱꦲꦸꦧꦚ꧀ꦗꦸꦂꦭꦸꦔꦤꦼꦩꦺꦴꦤ꧀ꦤꦶ​꧊ꦆꦱ꧀ꦩꦲꦺꦭ꧀꧈​ꦲꦤꦏ꧀ꦏꦺ​꧊ꦄꦧꦿꦲꦩ꧀꧈​ꦭꦤ꧀ꦔꦼꦥꦺꦏ꧀ꦧꦺꦴꦗꦺꦴꦲꦤꦏ꧀ꦏꦺ​꧊ꦆꦱ꧀ꦩꦲꦺꦭ꧀꧈​ꦱꦶꦁꦗꦼꦤꦼꦁꦔꦺ​꧊ꦩꦲꦭꦠ꧀꧈​ꦲꦝꦶꦤꦺ​꧊ꦤꦺꦧꦪꦺꦴꦠ꧀꧈​ꦢꦶꦮꦪꦸꦃꦏꦫꦺꦴꦧꦺꦴꦗꦺꦴꦤꦺꦠꦸꦮ꧉​

^28:10 ​꧊ꦪꦏꦸꦧ꧀ꦩꦁꦏꦠ꧀ꦱꦏ​꧊ꦧꦺꦂꦱꦾꦺꦧꦩꦼꦚꦁꦠꦤꦃ​꧊ꦲꦫꦤ꧀꧉​

^28:11 ꦧꦉꦁꦱꦽꦔꦺꦔꦺꦤꦺꦱꦸꦫꦸꦥ꧀꧈​​꧊ꦪꦏꦸꦧ꧀ꦠꦼꦏꦤ꧀ꦲꦶꦁꦱꦮꦶꦗꦶꦤꦶꦁꦥꦁꦒꦺꦴꦤ꧀ꦤꦤ꧀꧈​ꦧꦚ꧀ꦗꦸꦂꦔꦶꦤꦼꦥ꧀ꦲꦤꦲꦶꦁꦏꦺꦴꦤꦺꦴ꧉​ꦱꦮꦶꦱ꧀ꦱꦺꦚ꧀ꦗꦸꦥꦸꦏ꧀ꦮꦠꦸꦢꦶꦲꦼꦁꦒꦺꦴꦧꦤ꧀ꦠꦭ꧀꧈​​꧊ꦪꦏꦸꦧ꧀ꦧꦚ꧀ꦗꦸꦂꦔ꧀ꦒꦺꦛꦏ꧀ꦩꦥꦤ꧀ꦠꦸꦫꦸ꧉​

^28:12 ꦤꦸꦭꦶꦔꦶꦩ꧀ꦥꦶ꧈​ꦭꦤ꧀ꦱꦗꦿꦺꦴꦤꦶꦁꦔꦶꦩ꧀ꦥꦶꦮꦼꦫꦸꦃꦲꦤꦲꦤ꧀ꦝꦔꦢꦼꦒ꧀ꦲꦶꦁꦧꦸꦩꦶ꧈​ꦥꦸꦕꦸꦏ꧀ꦏꦺꦱꦸꦤ꧀ꦝꦸꦭ꧀ꦭꦔꦶꦠ꧀꧉​ꦲꦸꦒꦮꦼꦫꦸꦃꦩꦭꦲꦺꦏꦠ꧀ꦠꦺꦄꦭ꧀ꦭꦃꦥꦝꦩꦸꦁꦒꦃꦩꦸꦝꦸꦤ꧀ꦲꦶꦁꦲꦤ꧀ꦝꦩꦲꦸ꧉​

^28:13 ꦢꦸꦩꦢꦏ꧀ꦏꦤ꧀ꦒꦸꦱ꧀ꦠꦶꦄꦭ꧀ꦭꦃꦥꦶꦪꦩ꧀ꦧꦏ꧀ꦗꦸꦩꦼꦤꦼꦁꦲꦤꦲꦶꦁꦱꦶꦱꦶꦃꦲꦺꦭꦤ꧀ꦔꦤ꧀ꦢꦶꦏ꧈​"ꦲꦏꦸꦲꦶꦏꦶꦲꦭ꧀ꦭꦃꦲꦺ​꧊ꦄꦧꦿꦲꦩ꧀ꦭꦤ꧀​꧊ꦆꦱ꧀ꦏꦏ꧀꧉​ꦠꦤꦃꦱꦶꦁꦏꦺꦴꦏ꧀ꦠꦸꦫꦺꦴꦤ꧀ꦤꦶꦲꦶꦏꦶꦧꦏꦭ꧀ꦢꦏ꧀ꦥꦫꦶꦁꦔꦏꦺꦩꦫꦁꦏꦺꦴꦮꦺꦭꦤ꧀ꦲꦤꦏ꧀ꦠꦸꦫꦸꦤ꧀ꦩꦸ꧉​

^28:14 ꦲꦤꦏ꧀ꦠꦸꦫꦸꦤ꧀ꦩꦸꦕꦕꦃꦲꦺꦧꦏꦭ꧀ꦏꦪꦊꦧꦸꦤꦶꦁꦧꦸꦩꦶ;ꦧꦏꦭ꧀ꦥꦝꦔꦩ꧀ꦧꦿꦲꦩ꧀ꦧꦿꦱꦸꦩꦼꦧꦂꦠꦼꦏꦤ꧀ꦔꦼꦤ꧀ꦢꦶꦲꦼꦤ꧀ꦢꦶ꧉​ꦥꦫꦧꦁꦱꦧꦏꦭ꧀ꦥꦝꦏꦧꦼꦂꦏꦃꦲꦤ꧀ꦩꦼꦂꦒꦱꦏꦏꦺꦴꦮꦺꦭꦤ꧀ꦲꦤꦏ꧀ꦠꦸꦫꦸꦤ꧀ꦩꦸ꧉​

^28:15 ꦱꦥꦫꦤ꧀ꦥꦫꦤ꧀ꦩꦸꦧꦏꦭ꧀ꦢꦏ꧀ꦏꦤ꧀ꦛꦶ꧉​ꦏꦺꦴꦮꦺꦧꦏꦭ꧀ꦢꦏ꧀ꦲꦸꦭꦶꦃꦲꦏꦺꦩꦿꦺꦤꦺ꧉​ꦭꦤ꧀ꦏꦺꦴꦮꦺꦲꦺꦴꦫꦧꦏꦭ꧀ꦢꦏ꧀ꦠꦶꦁꦒꦭ꧀꧈​ꦔꦤ꧀ꦠꦶꦲꦥꦱꦶꦁꦢꦏ꧀ꦗꦚ꧀ꦗꦺꦏ꧀ꦏꦏꦺꦩꦫꦁꦏꦺꦴꦮꦺꦲꦶꦏꦶꦏꦼꦭꦏꦺꦴꦤ꧀ꦏꦧꦺꦃ꧉"​

^28:16 ​꧊ꦪꦏꦸꦧ꧀ꦧꦚ꧀ꦗꦸꦂꦔ꧀ꦭꦶꦭꦶꦂ꧈​ꦥꦔꦸꦕꦥ꧀ꦥꦺ꧈​"ꦚꦠꦄꦭ꧀ꦭꦃꦲꦤꦲꦶꦁꦏꦺꦤꦺ꧉​ꦩꦁꦏꦲꦏꦸꦲꦺꦴꦫꦚꦤ!"

^28:17 ꦱꦏꦮꦼꦢꦶꦤꦺꦝꦺꦮꦺꦏ꧀ꦏꦺꦩꦸꦤꦶ꧈​"ꦥꦁꦒꦺꦴꦤ꧀ꦤꦤ꧀ꦲꦶꦏꦶꦮꦶꦔꦶꦠ꧀꧈​ꦲꦮꦶꦠ꧀ꦄꦭ꧀ꦭꦃꦢꦼꦢꦊꦩ꧀ꦲꦶꦁꦏꦺꦤꦺ꧉​ꦲꦶꦏꦶꦩꦼꦱ꧀ꦛꦶꦒꦥꦸꦫꦤꦶꦁꦱ꧀ꦮꦂꦒ!"

^28:18 ꦲꦺꦱꦸꦏ꧀ꦏꦺ꧈​ꦲꦶꦱꦶꦃꦲꦸꦩꦸꦤ꧀ꦲꦸꦩꦸꦤ꧀​꧊ꦪꦏꦸꦧ꧀ꦮꦶꦱ꧀ꦠꦔꦶ꧉​ꦮꦠꦸꦱꦶꦁꦢꦶꦲꦼꦁꦒꦺꦴꦧꦤ꧀ꦠꦭ꧀ꦠꦸꦫꦸꦧꦚ꧀ꦗꦸꦂꦢꦶꦲꦼꦢꦼꦒꦏꦺꦏꦁꦒꦺꦴꦠꦤ꧀ꦝꦥꦼꦔꦺꦭꦶꦁꦲꦺꦭꦶꦁ꧈​ꦱꦂꦠꦢꦶꦲꦼꦱꦺꦴꦏ꧀ꦏꦶꦊꦔꦗ꦳ꦲꦶꦠꦸꦤ꧀꧉​

^28:19 ꦥꦁꦒꦺꦴꦤ꧀ꦤꦤ꧀ꦩꦲꦸꦢꦶꦗꦼꦤꦼꦁꦔꦶ:​꧊ꦧꦺꦠꦺꦭ꧀꧉​ꦲꦶꦁꦩꦲꦸꦤꦺꦗꦼꦤꦼꦁꦔꦺ​꧊ꦭꦸꦱ꧀꧉​

^28:20 ​꧊ꦪꦏꦸꦧ꧀ꦧꦚ꧀ꦗꦸꦂꦗꦚ꧀ꦗꦶꦲꦤꦲꦶꦁꦔꦂꦱꦤꦺꦥꦔꦺꦫꦤ꧀ꦩꦼꦁꦏꦺꦤꦺ꧈​"ꦪꦺꦤ꧀ꦒꦸꦱ꧀ꦠꦶꦄꦭ꧀ꦭꦃꦚꦠꦔꦶꦫꦶꦢ꧀ꦭꦏꦸꦏꦸ꧈​ꦭꦤ꧀ꦔꦽꦏ꧀ꦱꦩꦫꦁꦲꦏꦸ꧈​ꦩꦫꦶꦁꦔꦶꦲꦏꦸꦥꦔꦤ꧀ꦭꦤ꧀ꦱꦤ꧀ꦝꦁꦥꦼꦔꦁꦒꦺꦴ꧈​

^28:21 ꦲꦥꦢꦺꦤꦺꦔꦸꦭꦶꦃꦲꦏꦺꦲꦏꦸ꧈​ꦱ꧀ꦭꦩꦼꦠ꧀ꦠꦼꦏꦤ꧀ꦲꦺꦴꦩꦃꦲꦺꦧꦥꦏ꧀ꦏꦸ꧈​ꦥꦚ꧀ꦗꦼꦤꦼꦁꦔꦤ꧀ꦤꦺꦢꦏ꧀ꦲꦏꦺꦴꦤ꧀ꦤꦶꦢꦢꦶꦄꦭ꧀ꦭꦃꦭꦤ꧀ꦥꦼꦥꦸꦤ꧀ꦝꦺꦤ꧀ꦏꦸ꧉​

^28:22 ꦲꦏꦸꦧꦏꦭ꧀ꦚꦲꦺꦴꦱ꧀ꦱꦏꦺꦱꦥꦿꦱꦼꦥꦸꦭꦸꦃꦲꦺꦲꦥꦮꦲꦺ꧈​ꦱꦶꦁꦢꦶꦥꦫꦶꦁꦔꦏꦺꦩꦫꦁꦲꦏꦸ꧉​ꦢꦺꦤꦺꦮꦠꦸꦱꦶꦁꦢꦏ꧀ꦢꦼꦒꦏꦺꦲꦶꦏꦶꦧꦏꦭ꧀ꦢꦢꦶꦥꦥꦤ꧀ꦥꦩꦸꦗꦤ꧀ꦩꦫꦁꦄꦭ꧀ꦭꦃ꧉"​