Alkitab/Purwaning Dumadi/27

Kaca iki nganggo aksara Jawa. Yen perambanmu ora ndukung, kowé ora bakal isa ndeleng sauntara tulisan nganggo aksara Jawa ing halaman iki.
Kanggo mbeneraké, mangga diwaca Pitulung:Aksara Jawa.

^27:1 ꦏꦼꦕꦿꦶꦠꦤꦭꦶꦏꦮꦶꦱ꧀ꦠꦸꦮ꧈꧊ꦆꦱ꧀ꦏꦏ꧀ꦲꦶꦁꦱꦮꦶꦗꦶꦤꦶꦁꦢꦶꦤꦔꦸꦤ꧀ꦢꦁ꧊ꦌꦱꦲꦸ꧈ꦲꦤꦏ꧀ꦏꦺꦩ꧀ꦧꦉꦥ꧀꧈ꦢꦶꦏꦤ꧀ꦝꦤꦶ꧈"ꦔ꧀ꦒꦺꦂꦲꦤꦏ꧀ꦏꦸ꧉"ꦮꦁꦱꦸꦭ꧀ꦭꦤ꧀ꦤꦺ꧊ꦌꦱꦲꦸ꧈"ꦏꦸꦭ꧈ꦥꦏ꧀꧉"

^27:2 ꧊ꦆꦱ꧀ꦏꦏ꧀ꦧꦚ꧀ꦗꦸꦂꦏꦤ꧀ꦝꦩꦼꦁꦏꦺꦤꦺ꧈"ꦏꦺꦴꦮꦺꦔꦼꦂꦠꦶꦪꦺꦤ꧀ꦲꦏꦸꦮꦶꦱ꧀ꦠꦸꦮꦭꦤ꧀ꦩ꧀ꦧꦺꦴꦏ꧀ꦩꦼꦤꦮꦲꦺꦴꦫꦱꦸꦮꦺꦩꦼꦤꦺꦃꦧꦏꦭ꧀ꦩꦠꦶ꧉

^27:3 ꦩꦸꦭꦤꦺꦒꦼꦤ꧀ꦝꦺꦮꦭꦤ꧀ꦥꦤꦃꦩꦸꦗꦸꦥꦸꦏ꧀ꦏꦼꦤ꧀꧈ꦭꦤ꧀ꦭꦸꦔꦲꦩ꧀ꦧꦼꦧꦼꦝꦒ꧀ꦏꦺꦮꦤ꧀ꦲꦶꦁꦲꦭꦱ꧀꧉

^27:4 ꦲꦺꦴꦭꦃꦲꦼꦤ꧀ꦱꦶꦁꦲꦺꦤꦏ꧀ꦏꦪꦱꦶꦁꦢꦢꦶꦏꦉꦩ꧀ꦩꦤ꧀ꦏꦸ꧈ꦩ꧀ꦧꦚ꧀ꦗꦸꦂꦭꦢꦺꦏ꧀ꦤꦩꦿꦺꦤꦺ꧉ꦱꦮꦶꦱ꧀ꦱꦺꦢꦏ꧀ꦥꦁꦔꦤ꧀ꦏꦺꦴꦮꦺꦧꦏꦭ꧀ꦢꦏ꧀ꦧꦼꦂꦏꦃꦲꦶ;ꦏꦸꦮꦶꦧꦼꦂꦏꦃꦏꦸꦥꦸꦁꦏꦱ꧀ꦱꦤ꧀ꦏꦁꦒꦺꦴꦏꦺꦴꦮꦺꦱꦢꦸꦫꦸꦁꦔꦺꦲꦏꦸꦩꦠꦶ꧉"

^27:5 ꧊ꦫꦶꦧ꧀ꦏꦃꦏꦿꦸꦔꦸꦲꦥꦱꦶꦁꦢꦶꦏꦤ꧀ꦝꦏ꧀ꦏꦏꦺ꧊ꦆꦱ꧀ꦏꦏ꧀ꦩꦫꦁ꧊ꦌꦱꦲꦸ꧉ꦩꦸꦭꦤꦺꦧꦉꦁ꧊ꦌꦱꦲꦸꦮꦶꦱ꧀ꦩꦁꦏꦠ꧀ꦩ꧀ꦧꦼꦧꦼꦝꦒ꧀꧉

^27:6 ꧊ꦫꦶꦧ꧀ꦏꦃꦧꦚ꧀ꦗꦸꦂꦏꦤ꧀ꦝꦏꦫꦺꦴ꧊ꦪꦏꦸꦧ꧀꧈"ꦲꦏꦸꦩꦲꦸꦏꦿꦸꦔꦸꦧꦥꦏ꧀ꦩꦸꦏꦤ꧀ꦝꦏꦫꦺꦴꦏꦏꦁꦩꦸ꧊ꦌꦱꦲꦸꦩꦼꦁꦏꦺꦤꦺ꧈

^27:7 ‘ꦭꦸꦔꦲꦩ꧀ꦧꦼꦧꦼꦝꦒ꧀꧈ꦲꦏꦸꦲꦺꦴꦭꦺꦃꦤꦏꦺꦮꦤ꧀ꦲꦭꦱ꧀꧈ꦏꦸꦮꦶꦲꦺꦴꦭꦃꦲꦼꦤ꧀ꦭꦤ꧀ꦭꦢꦺꦏ꧀ꦤꦩꦿꦺꦤꦺ꧉ꦱꦮꦶꦱ꧀ꦱꦺꦫꦩ꧀ꦥꦸꦁꦲꦼꦁꦒꦺꦴꦤ꧀ꦏꦸꦩꦁꦔꦤ꧀꧈ꦲꦏꦸꦧꦏꦭ꧀ꦩ꧀ꦧꦼꦂꦏꦃꦲꦶꦏꦺꦴꦮꦺꦲꦤꦲꦶꦁꦔꦂꦱꦤꦺꦥꦔꦺꦫꦤ꧀꧈ꦱꦢꦸꦫꦸꦁꦔꦺꦲꦏꦸꦩꦠꦶ꧉’"

^27:8 ꧊ꦫꦶꦧ꧀ꦏꦃꦤꦼꦫꦸꦱ꧀ꦱꦏꦺꦲꦼꦁꦒꦺꦴꦤꦺꦔꦤ꧀ꦝꦤ꧀ꦤꦶ꧊ꦪꦏꦸꦧ꧀꧈ꦲꦤꦏ꧀ꦏꦺ꧈"ꦩꦸꦭꦤꦺ꧈ꦔ꧀ꦒꦺꦂ꧈ꦏꦤ꧀ꦝꦏꦸꦲꦶꦏꦶꦫꦸꦔꦺꦴꦏ꧀ꦤꦭꦤ꧀ꦭꦏꦺꦴꦤ꧀ꦤꦤ꧉

^27:9 ꦭꦸꦔꦲꦩꦼꦚꦁꦥꦤ꧀ꦛꦤꦶꦁꦮꦼꦝꦸꦱ꧀꧈ꦩꦶꦭꦶꦃꦲꦕꦼꦩ꧀ꦥꦺꦮꦼꦝꦸꦱ꧀ꦗꦮꦭꦺꦴꦫꦺꦴꦱꦶꦁꦊꦩꦸ꧈ꦩꦼꦁꦏꦺꦴꦢꦏ꧀ꦲꦺꦴꦭꦃꦲꦺꦏꦪꦱꦶꦁꦢꦢꦶꦏꦉꦩ꧀ꦩꦤ꧀ꦤꦺꦧꦥꦏ꧀ꦩꦸ꧉

^27:10 ꦧꦚ꧀ꦗꦸꦂꦲꦠꦸꦂꦤꦱꦸꦥꦪꦢꦶꦝꦲꦂ꧈ꦭꦤ꧀ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦏꦺꦴꦮꦺꦧꦏꦭ꧀ꦢꦶꦧꦼꦂꦏꦃꦲꦶꦱꦢꦸꦫꦸꦁꦔꦺꦧꦥꦏ꧀ꦩꦸꦠꦶꦭꦂꦢꦺꦴꦚ꧉"

^27:11 ꦤꦁꦔꦶꦁ꧊ꦪꦏꦸꦧ꧀ꦩꦁꦱꦸꦭ꧀ꦭꦶ꧈"ꦧꦸ꧈ꦏꦏꦁꦧꦢꦤ꧀ꦤꦶꦥꦸꦤ꧀ꦫꦏ꧀ꦏꦼꦧꦏ꧀ꦫꦩ꧀ꦧꦸꦠ꧀꧈ꦩꦁꦏꦏꦸꦭꦶꦠ꧀ꦏꦸꦭꦏ꧀ꦭꦶꦩꦶꦱ꧀꧉

^27:12 ꦩꦁꦏꦺꦪꦺꦤ꧀ꦧꦥꦏ꧀ꦔ꧀ꦒꦪꦁꦔꦶꦧꦢꦤ꧀ꦏꦸꦭꦭꦤ꧀ꦥꦶꦂꦱꦪꦺꦤ꧀ꦏꦸꦭꦲꦥꦸꦱ꧀ꦱꦶ꧈ꦏꦸꦭꦫꦏ꧀ꦧꦝꦺꦩ꧀ꦧꦺꦴꦠꦼꦤ꧀ꦢꦶꦥꦸꦤ꧀ꦧꦼꦂꦏꦃꦲꦶ꧈ꦩꦭꦃꦧꦝꦺꦢꦶꦥꦸꦤ꧀ꦲꦶꦥꦠ꧀ꦲꦶꦥꦠ꧀ꦠꦶ꧉"

^27:13 ꦥꦔꦸꦕꦥ꧀ꦥꦺꦲꦶꦧꦸꦤꦺ꧈"ꦔ꧀ꦒꦺꦂ꧈ꦲꦗꦏꦸꦮꦠꦶꦂ꧉ꦏꦉꦧꦺꦤ꧀ꦲꦏꦸꦱꦶꦁꦚꦁꦒꦲꦶꦥꦠ꧀ꦲꦶꦥꦠ꧀ꦠꦺ꧉ꦏꦺꦴꦮꦺꦔ꧀ꦭꦏꦺꦴꦤ꧀ꦤꦤꦲꦥꦱꦶꦁꦢꦏ꧀ꦏꦤ꧀ꦝꦏ꧀ꦏꦏꦺꦩꦲꦸ꧉ꦭꦸꦔꦲ꧈ꦚ꧀ꦗꦸꦥꦸꦏ꧀ꦏꦕꦼꦩ꧀ꦥꦺꦕꦼꦩ꧀ꦥꦺꦤꦺ꧉"

^27:14 ꧊ꦪꦏꦸꦧ꧀ꦧꦚ꧀ꦗꦸꦂꦭꦸꦔꦚ꧀ꦗꦸꦥꦸꦏ꧀ꦕꦼꦩ꧀ꦥꦺꦭꦺꦴꦫꦺꦴꦩꦲꦸꦭꦤ꧀ꦢꦶꦲꦠꦸꦂꦫꦏꦺꦩꦫꦁꦲꦶꦧꦸꦤꦺ꧉꧊ꦫꦶꦧ꧀ꦏꦃꦧꦚ꧀ꦗꦸꦂꦔꦺꦴꦭꦃꦩꦱꦏ꧀ꦏꦤ꧀ꦱꦼꦤꦼꦁꦔꦤ꧀ꦤꦺ꧊ꦆꦱ꧀ꦏꦏ꧀꧈

^27:15 ꦤꦸꦭꦶꦚ꧀ꦗꦸꦥꦸꦏ꧀ꦱꦤ꧀ꦝꦁꦔꦤ꧀ꦤꦺ꧊ꦌꦱꦲꦸꦱꦶꦁꦲꦥꦶꦏ꧀ꦝꦺꦮꦺ꧈ꦱꦶꦁꦢꦶꦱꦶꦩ꧀ꦥꦼꦤ꧀ꦲꦶꦁꦲꦺꦴꦩꦃꦲꦺ꧈ꦢꦶꦲꦼꦁꦒꦺꦴꦏ꧀ꦏꦏꦺ꧊ꦪꦏꦸꦧ꧀꧉

^27:16 ꦊꦔꦼꦤ꧀ꦭꦤ꧀ꦒꦸꦭꦸꦤꦺ꧊ꦪꦏꦸꦧ꧀ꦱꦶꦁꦏ꧀ꦭꦶꦩꦶꦱ꧀ꦏꦸꦮꦶꦢꦶꦠꦸꦠꦸꦥ꧀ꦥꦶꦔꦁꦒꦺꦴꦏꦸꦭꦶꦠ꧀ꦕꦼꦩ꧀ꦥꦺ꧉

^27:17 ꦢꦒꦶꦁꦱꦶꦁꦮꦶꦱ꧀ꦢꦶꦲꦺꦴꦭꦃꦩꦲꦸꦭꦤ꧀ꦫꦺꦴꦠꦶꦥꦁꦒꦁꦔꦤ꧀ꦧꦚ꧀ꦗꦸꦂꦢꦶꦏꦺꦴꦤ꧀ꦔ꧀ꦭꦢꦺꦏ꧀ꦏꦏꦺ꧉

^27:18 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ꧊ꦪꦏꦸꦧ꧀ꦧꦚ꧀ꦗꦸꦂꦩ꧀ꦭꦼꦧꦸꦲꦶꦁꦏꦩꦂꦫꦺꦧꦥꦏ꧀ꦤꦺꦭꦤ꧀ꦩꦠꦸꦂ꧈"ꦧꦥꦏ꧀!"ꦮꦁꦱꦸꦭ꧀ꦭꦤ꧀ꦤꦺ꧊ꦆꦱ꧀ꦏꦏ꧀꧈"ꦏꦺꦴꦮꦺꦏꦸꦮꦶꦱꦥ?꧊ꦌꦱꦲꦸꦲꦥ꧊ꦪꦏꦸꦧ꧀?"

^27:19 ꧊ꦪꦏꦸꦧ꧀ꦩꦁꦱꦸꦭ꧀ꦭꦶ꧈"ꦏꦸꦭ꧊ꦌꦱꦲꦸ꧈ꦥꦸꦠꦿꦤꦶꦥꦸꦤ꧀ꦧꦥꦏ꧀ꦲꦶꦁꦏꦁꦩ꧀ꦧꦗꦼꦁ꧉ꦝꦮꦸꦃꦲꦶꦥꦸꦤ꧀ꦧꦥꦏ꧀ꦮꦲꦸꦱꦩ꧀ꦥꦸꦤ꧀ꦏꦸꦭꦭꦩ꧀ꦥꦃꦲꦶ꧉ꦩꦁꦒꦏꦸꦭꦲꦠꦸꦂꦫꦶꦊꦁꦒꦃꦭꦤ꧀ꦝꦲꦂꦢꦒꦶꦁꦲꦶꦁꦏꦁꦱꦩ꧀ꦥꦸꦤ꧀ꦏꦸꦭꦩꦱꦏ꧀ꦩꦼꦤꦶꦏ꧉ꦱꦼꦱꦩ꧀ꦥꦸꦤꦶꦥꦸꦤ꧀ꦭꦗꦼꦁꦏꦸꦭꦲꦠꦸꦂꦫꦶꦩ꧀ꦧꦼꦂꦏꦃꦲꦶꦏꦸꦭ꧉"

^27:20 ꧊ꦆꦱ꧀ꦏꦏ꧀ꦧꦚ꧀ꦗꦸꦂꦕ꧀ꦭꦛꦸ꧈"ꦏꦺꦴꦏ꧀ꦒꦼꦭꦶꦱ꧀ꦠꦼꦩꦼꦤ꧀ꦲꦼꦁꦒꦺꦴꦤ꧀ꦩꦸꦲꦺꦴꦭꦺꦃꦧꦼꦝꦒꦤ꧀꧈ꦔ꧀ꦒꦺꦂ?"ꦮꦁꦱꦸꦭ꧀ꦭꦤ꧀ꦤꦺ꧊ꦪꦏꦸꦧ꧀꧈"ꦩꦼꦤꦶꦏꦩ꧀ꦧꦺꦴꦠꦼꦤ꧀ꦱꦤꦺꦱ꧀ꦩꦂꦒꦶꦱꦏꦶꦁꦧꦼꦂꦏꦃꦲꦶꦥꦸꦤ꧀ꦥꦔꦺꦫꦤ꧀꧈ꦄꦭ꧀ꦭꦃꦱꦼꦩ꧀ꦧꦃꦲꦤ꧀ꦤꦶꦥꦸꦤ꧀ꦧꦥꦏ꧀꧉"

^27:21 ꧊ꦆꦱ꧀ꦏꦏ꧀ꦧꦚ꧀ꦗꦸꦂꦲꦏꦺꦴꦤ꧀꧊ꦪꦏꦸꦧ꧀ꦚꦼꦝꦏ꧀꧈"ꦚꦼꦝꦏ꧀ꦏꦩꦿꦺꦤꦺ꧈ꦔ꧀ꦒꦺꦂ꧉ꦲꦮꦏ꧀ꦩꦸꦢꦏ꧀ꦒꦪꦁꦔꦤ꧀ꦤꦺ꧈ꦲꦥꦚꦠꦏꦺꦴꦮꦺꦏꦸꦮꦶꦲꦤꦏ꧀ꦏꦸ꧊ꦌꦱꦲꦸꦲꦥꦢꦸꦢꦸ꧉"

^27:22 ꧊ꦪꦏꦸꦧ꧀ꦧꦚ꧀ꦗꦸꦂꦚꦼꦝꦏ꧀꧈ꦤꦸꦭꦶꦢꦶꦒꦿꦪꦁꦔꦶꦧꦥꦏ꧀ꦤꦺ꧉ꦥꦔꦸꦕꦥ꧀ꦥꦺ꧊ꦆꦱ꧀ꦏꦏ꧀꧈"ꦱ꧀ꦮꦫꦩꦸꦏꦺꦴꦏ꧀ꦏꦪꦱ꧀ꦮꦫꦤꦺ꧊ꦪꦏꦸꦧ꧀꧈ꦤꦁꦔꦶꦁꦠꦔꦤ꧀ꦩꦸꦏꦪꦠꦔꦤ꧀ꦤꦺ꧊ꦌꦱꦲꦸ꧉"

^27:23 ꦲꦼꦁꦒꦺꦴꦤꦺꦥꦔ꧀ꦭꦶꦁꦏꦫꦺꦴ꧊ꦪꦏꦸꦧ꧀ꦏꦸꦮꦶꦩꦼꦂꦒꦠꦔꦤ꧀ꦤꦺ꧊ꦪꦏꦸꦧ꧀ꦩꦲꦸꦲꦸꦒꦝꦶꦮꦸꦠ꧀ꦝꦶꦮꦸꦠ꧀ꦏꦪꦠꦔꦤ꧀ꦤꦺ꧊ꦌꦱꦲꦸ꧉

^27:24 ꦱꦢꦸꦫꦸꦁꦔꦺꦩ꧀ꦧꦼꦂꦏꦃꦲꦶ꧈꧊ꦆꦱ꧀ꦏꦏ꧀ꦠꦏꦺꦴꦤ꧀ꦩꦼꦤꦺꦃꦏꦫꦺꦴ꧊ꦪꦏꦸꦧ꧀꧈"ꦲꦥꦏꦺꦴꦮꦺꦏꦸꦮꦶꦲꦤꦏ꧀ꦏꦸ꧊ꦌꦱꦲꦸꦠꦼꦩꦼꦤ꧀ꦤꦤ꧀?"ꦮꦁꦱꦸꦭ꧀ꦭꦤ꧀ꦤꦺ꧊ꦪꦏꦸꦧ꧀꧈"ꦲꦶꦁꦒꦶꦃ꧈ꦊꦉꦱ꧀!"

^27:25 ꧊ꦆꦱ꧀ꦏꦏ꧀ꦧꦚ꧀ꦗꦸꦂꦏꦤ꧀ꦝ꧈"ꦲꦏꦸꦗꦸꦥꦸꦏ꧀ꦤꦢꦒꦶꦁꦔꦺꦱꦲꦶꦫꦶꦱ꧀꧉ꦱꦮꦶꦱ꧀ꦱꦺꦢꦏ꧀ꦥꦁꦔꦤ꧀꧈ꦏꦺꦴꦮꦺꦤꦸꦭꦶꦧꦏꦭ꧀ꦢꦏ꧀ꦧꦼꦂꦏꦃꦲꦶ꧉"꧊ꦪꦏꦸꦧ꧀ꦧꦚ꧀ꦗꦸꦂꦔ꧀ꦭꦢꦺꦏ꧀ꦏꦏꦺꦢꦒꦶꦁꦔꦺ꧈ꦱꦮꦶꦱ꧀ꦱꦺꦏꦸꦮꦶꦢꦶꦲꦠꦸꦂꦫꦶꦔꦸꦚ꧀ꦗꦸꦏ꧀ꦲꦁꦒꦸꦂꦱꦼꦛꦶꦛꦶꦏ꧀꧉

^27:26 ꧊ꦆꦱ꧀ꦏꦏ꧀ꦲꦏꦺꦴꦤ꧀꧊ꦪꦏꦸꦧ꧀ꦚꦼꦝꦏ꧀꧈ꦥꦔꦸꦕꦥ꧀ꦥꦺ꧈"ꦚꦼꦝꦏ꧀ꦏꦩꦿꦺꦤꦺ꧈ꦔ꧀ꦒꦺꦂ꧉ꦲꦏꦸꦲꦩ꧀ꦧꦸꦁꦔꦼꦤ꧀꧉"

^27:27 ꦧꦉꦁ꧊ꦪꦏꦸꦧ꧀ꦚꦼꦝꦏ꧀ꦭꦤ꧀ꦔꦩ꧀ꦧꦸꦁꦧꦥꦏ꧀ꦤꦺ꧈꧊ꦆꦱ꧀ꦏꦏ꧀ꦔꦩ꧀ꦧꦸꦒꦤ꧀ꦢꦤꦺꦱꦤ꧀ꦝꦁꦔꦤ꧀ꦤꦺ꧊ꦌꦱꦲꦸ꧉꧊ꦪꦏꦸꦧ꧀ꦧꦚ꧀ꦗꦸꦂꦢꦶꦧꦼꦂꦏꦃꦲꦶ꧈ꦥꦔꦸꦕꦥ꧀ꦥꦺ꧈"ꦒꦤ꧀ꦢꦤꦺꦲꦤꦏ꧀ꦏꦸꦏꦸꦮꦶꦏꦪꦒꦤ꧀ꦢꦤꦺꦊꦩꦃꦱꦸꦧꦸꦂꦱꦶꦁꦧꦶꦤꦼꦂꦏꦃꦲꦤ꧀ꦲꦶꦁꦒꦸꦱ꧀ꦠꦶꦄꦭ꧀ꦭꦃ꧉

^27:28 ꦩꦸꦒꦄꦭ꧀ꦭꦃꦩꦫꦶꦁꦔꦤꦩꦫꦁꦏꦺꦴꦮꦺꦲꦼꦧꦸꦤ꧀ꦤꦶꦁꦭꦔꦶꦠ꧀꧈ꦭꦤ꧀ꦧꦸꦩꦶꦱꦶꦁꦲꦼꦭꦺꦴꦃ꧉ꦩꦸꦒꦥꦚ꧀ꦗꦼꦤꦼꦁꦔꦤ꧀ꦤꦺꦩꦫꦶꦁꦔꦶꦏꦺꦴꦮꦺꦒꦤ꧀ꦢꦸꦩ꧀ꦭꦤ꧀ꦲꦁꦒꦸꦂꦏ꧀ꦭꦮꦤ꧀ꦭꦸꦧꦺꦂ!

^27:29 ꦥꦫꦧꦁꦱꦥꦝꦔꦮꦸꦭꦲꦩꦫꦁꦏꦺꦴꦮꦺꦭꦤ꧀ꦤꦸꦁꦏꦸꦭ꧀ꦭꦲꦤꦲꦶꦁꦔꦉꦥ꧀ꦩꦸ꧉ꦏꦺꦴꦮꦺꦩꦼꦁꦏꦸꦮꦱꦏꦺꦃꦲꦺꦱꦤꦏ꧀ꦱꦼꦢꦸꦭꦸꦂꦩꦸꦭꦤ꧀ꦲꦤꦏ꧀ꦲꦤꦏ꧀ꦏꦺꦧꦶꦪꦸꦁꦩꦸꦥꦝꦔꦸꦂꦩꦠ꧀ꦠꦤꦩꦫꦁꦏꦺꦴꦮꦺ꧉ꦮꦺꦴꦁꦱꦶꦁꦚꦸꦥꦠꦤ꧀ꦤꦶꦏꦺꦴꦮꦺꦏꦼꦤꦲꦲꦶꦁꦱꦸꦥꦠ꧈ꦭꦤ꧀ꦮꦺꦴꦁꦱꦶꦁꦩ꧀ꦧꦼꦂꦏꦃꦲꦶꦏꦺꦴꦮꦺꦢꦶꦧꦼꦂꦏꦃꦲꦤꦢꦺꦤꦶꦁꦄꦭ꧀ꦭꦃ꧉"

^27:30 ꦧꦉꦁ꧊ꦆꦱ꧀ꦏꦏ꧀ꦮꦶꦱ꧀ꦫꦩ꧀ꦥꦸꦁꦲꦼꦁꦒꦺꦴꦤꦺꦩ꧀ꦧꦼꦂꦏꦃꦲꦶ꧈꧊ꦪꦏꦸꦧ꧀ꦧꦚ꧀ꦗꦸꦂꦩꦸꦤ꧀ꦢꦸꦂ꧉ꦲꦺꦴꦫꦊꦠ꧀ꦱꦸꦮꦺ꧊ꦌꦱꦲꦸꦠꦼꦏꦱꦏꦲꦼꦁꦒꦺꦴꦤꦺꦩ꧀ꦧꦼꦧꦼꦝꦒ꧀꧉

^27:31 ꦏꦺꦮꦤ꧀ꦧꦼꦝꦒꦤ꧀ꦤꦺꦧꦚ꧀ꦗꦸꦂꦢꦶꦲꦺꦴꦭꦃꦭꦤ꧀ꦢꦶꦭꦢꦺꦏ꧀ꦏꦏꦺꦩꦫꦁꦧꦥꦏ꧀ꦤꦺ꧉ꦲꦠꦸꦂꦫꦺ꧈"ꦩꦁꦒꦊꦁꦒꦃꦥꦏ꧀꧈ꦭꦤ꧀ꦝꦲꦂꦩꦱꦏ꧀ꦏꦤ꧀ꦢꦒꦶꦁꦲꦁꦱꦭ꧀ꦲꦁꦱꦭ꧀ꦭꦤ꧀ꦏꦸꦭꦩ꧀ꦧꦼꦧꦼꦝꦒ꧀꧈ꦠꦸꦩꦸꦤ꧀ꦠꦼꦤ꧀ꦏꦼꦂꦱꦲꦩ꧀ꦧꦼꦂꦏꦃꦲꦶꦏꦸꦭ!"

^27:32 ꧊ꦆꦱ꧀ꦏꦏ꧀ꦤꦸꦭꦶꦠꦏꦺꦴꦤ꧀꧈"ꦭ꧀ꦲꦺꦴ꧈ꦏꦺꦴꦮꦺꦏꦸꦮꦶꦱꦥ?"ꦮꦁꦱꦸꦭ꧀ꦭꦤ꧀ꦤꦺ꧊ꦌꦱꦲꦸ꧈"ꦏꦸꦭ꧊ꦌꦱꦲꦸ꧈ꦥꦸꦠꦿꦩ꧀ꦧꦗꦼꦁꦥꦚ꧀ꦗꦼꦤꦼꦁꦔꦤ꧀꧉"

^27:33 ꦲꦮꦏ꧀ꦏꦺ꧊ꦆꦱ꧀ꦏꦏ꧀ꦱꦼꦏꦺꦴꦗꦸꦂꦒꦼꦩꦼꦠꦼꦂ꧈ꦧꦚ꧀ꦗꦸꦂꦠꦏꦺꦴꦤ꧀꧈"ꦪꦺꦤ꧀ꦔꦺꦴꦤꦺꦴ꧈ꦱꦶꦁꦔ꧀ꦒꦮꦩꦱꦏ꧀ꦏꦤ꧀ꦏꦺꦮꦤ꧀ꦧꦼꦝꦒꦤ꧀ꦩꦿꦺꦤꦺꦩꦲꦸꦱꦥ?ꦩꦱꦏꦤ꧀ꦤꦺꦮꦶꦱ꧀ꦢꦏ꧀ꦥꦁꦔꦤ꧀ꦱꦢꦸꦫꦸꦁꦔꦺꦏꦺꦴꦮꦺꦠꦼꦏ꧉ꦧꦚ꧀ꦗꦸꦂꦲꦸꦒꦮꦶꦱ꧀ꦢꦏ꧀ꦧꦼꦂꦏꦃꦲꦶ꧈ꦧꦼꦂꦏꦃꦏꦸꦥꦸꦁꦏꦱ꧀ꦱꦤ꧀꧈ꦭꦤ꧀ꦧꦼꦂꦏꦃꦏꦸꦮꦶꦧꦏꦭ꧀ꦠꦼꦠꦼꦥ꧀ꦱꦼꦭꦮꦱ꧀ꦭꦮꦱ꧀ꦱꦺ꧉"

^27:34 ꦧꦉꦁꦏꦿꦸꦔꦸꦠꦼꦩ꧀ꦧꦸꦁꦔꦺꦧꦥꦏ꧀ꦤꦺꦩꦼꦁꦏꦺꦴꦤꦺꦴꦩꦲꦸ꧊ꦌꦱꦲꦸꦧꦚ꧀ꦗꦸꦂꦤꦔꦶꦱ꧀ꦏꦼꦭꦫꦭꦫꦩꦼꦂꦒꦏꦼꦕꦸꦮꦤ꧀꧉ꦲꦠꦸꦂꦫꦺꦩꦫꦁꦧꦥꦏ꧀ꦤꦺ꧈"ꦝꦸꦃꦧꦥꦏ꧀꧈ꦩꦸꦒꦶꦲꦶꦁꦒꦶꦃꦏꦼꦂꦱꦩꦫꦶꦁꦔꦶꦧꦼꦂꦏꦃꦝꦠꦼꦁꦏꦸꦭ꧉"

^27:35 ꦮꦁꦱꦸꦭ꧀ꦭꦤ꧀ꦤꦺ꧊ꦆꦱ꧀ꦏꦏ꧀꧈"ꦲꦝꦶꦩꦸꦮꦶꦱ꧀ꦩꦿꦺꦤꦺꦔꦥꦸꦱ꧀ꦱꦶꦲꦏꦸꦭꦤ꧀ꦔꦽꦧꦸꦠ꧀ꦧꦼꦂꦏꦃꦱꦶꦁꦗꦤꦺꦲꦉꦥ꧀ꦢꦏ꧀ꦮꦺꦤꦺꦃꦲꦏꦺꦏꦺꦴꦮꦺ꧉"

^27:36 ꦥꦔꦸꦕꦥ꧀ꦥꦺ꧊ꦌꦱꦲꦸ꧈"ꦩꦸꦭꦧꦼꦤꦼꦂꦗꦼꦤꦼꦁꦔꦺ꧊ꦪꦏꦸꦧ꧀꧉ꦮꦶꦱ꧀ꦥꦶꦁꦥꦶꦤ꧀ꦝꦺꦴꦲꦶꦏꦶꦝꦺꦮꦺꦏ꧀ꦏꦺꦔꦥꦸꦱ꧀ꦱꦶꦲꦏꦸ꧉ꦧꦶꦪꦺꦤ꧀ꦮꦶꦱ꧀ꦔꦏꦭ꧀ꦭꦶꦮꦼꦮꦼꦤꦁꦏꦸꦢꦢꦶꦥꦼꦩ꧀ꦧꦉꦥ꧀꧈ꦱꦲꦶꦏꦶꦧꦼꦂꦏꦃꦱꦶꦁꦩꦼꦱ꧀ꦛꦶꦤꦺꦏꦁꦒꦺꦴꦲꦏꦸꦢꦶꦉꦧꦸꦠ꧀꧉"ꦲꦠꦸꦂꦫꦺ꧊ꦌꦱꦲꦸꦩꦫꦁꦧꦥꦏ꧀ꦤꦺ꧈"ꦩꦼꦤꦥꦧꦥꦏ꧀ꦩ꧀ꦧꦺꦴꦠꦼꦤ꧀ꦏꦒꦸꦁꦔꦤ꧀ꦧꦼꦂꦏꦃꦱꦤꦺꦱ꧀ꦱꦶꦥꦸꦤ꧀ꦏꦁꦒꦺꦏꦸꦭ?"

^27:37 ꦮꦁꦱꦸꦭ꧀ꦭꦤ꧀ꦤꦺ꧊ꦆꦱ꧀ꦏꦏ꧀꧈"꧊ꦪꦏꦸꦧ꧀ꦮꦶꦱ꧀ꦢꦏ꧀ꦢꦢꦺꦏ꧀ꦏꦏꦺꦧꦼꦤ꧀ꦢꦫꦩꦸ꧈ꦭꦤ꧀ꦱꦤꦏ꧀ꦱꦼꦢꦸꦭꦸꦂꦫꦺꦏꦧꦺꦃꦧꦏꦭ꧀ꦔꦮꦸꦭꦩꦫꦁꦝꦺꦮꦺꦏ꧀ꦏꦺ꧉ꦒꦤ꧀ꦢꦸꦩ꧀ꦭꦤ꧀ꦲꦁꦒꦸꦂꦲꦶꦪꦮꦶꦱ꧀ꦢꦏ꧀ꦮꦺꦤꦺꦃꦲꦏꦺ꧉ꦏꦺꦴꦮꦺꦮꦶꦱ꧀ꦲꦺꦴꦫꦏꦺꦴꦩꦤ꧀ꦤꦤ꧀ꦲꦥꦲꦥ꧈ꦔ꧀ꦒꦺꦂ!"

^27:38 ꧊ꦌꦱꦲꦸꦲꦢꦽꦁꦥꦼꦚ꧀ꦗꦭꦸꦏ꧀ꦏꦺꦩꦫꦁꦧꦥꦏ꧀ꦤꦺ꧈"ꦩꦼꦤꦥꦧꦥꦏ꧀ꦤꦩꦸꦁꦏꦒꦸꦁꦔꦤ꧀ꦧꦼꦂꦏꦃꦩꦼꦤꦶꦏꦛꦺꦴꦏ꧀?ꦝꦸꦃꦧꦥꦏ꧀꧈ꦲꦺꦱ꧀ꦠꦸꦏꦸꦭꦲꦸꦒꦶꦚꦸꦮꦸꦤ꧀ꦥꦚ꧀ꦗꦼꦤꦼꦁꦔꦤ꧀ꦧꦼꦂꦏꦃꦲꦶ꧉"꧊ꦌꦱꦲꦸꦲꦼꦁꦒꦺꦴꦤꦺꦚ꧀ꦗꦭꦸꦏ꧀ꦩꦲꦸꦏꦫꦺꦴꦤꦔꦶꦱ꧀ꦏꦼꦫꦤ꧀ꦠꦫꦤ꧀ꦠ꧉

^27:39 ꧊ꦆꦱ꧀ꦏꦏ꧀ꦧꦚ꧀ꦗꦸꦂꦩꦁꦱꦸꦭ꧀ꦭꦶ꧈"ꦥꦥꦤ꧀ꦱꦶꦁꦧꦏꦭ꧀ꦏꦺꦴꦏ꧀ꦲꦼꦁꦒꦺꦴꦤ꧀ꦤꦶꦏꦸꦮꦶꦕꦼꦁꦏꦂ꧈ꦲꦺꦴꦫꦲꦤꦊꦩꦃꦲꦺꦲꦼꦭꦺꦴꦃꦭꦤ꧀ꦲꦼꦧꦸꦤ꧀ꦱꦶꦁꦠꦸꦩꦸꦫꦸꦤ꧀꧉

^27:40 ꦱꦿꦤꦤꦶꦁꦥꦔꦤ꧀ꦩꦸꦏꦸꦮꦶꦥꦼꦝꦁ꧈ꦤꦁꦔꦶꦁꦏꦺꦴꦮꦺꦧꦏꦭ꧀ꦔꦮꦸꦭꦩꦫꦁꦲꦝꦶꦩꦸ꧉ꦧꦶꦱꦤꦺꦭꦸꦮꦂꦱꦏꦥꦩꦼꦁꦏꦸꦤꦺ꧈ꦪꦺꦤ꧀ꦧꦿꦺꦴꦤ꧀ꦠꦏ꧀ꦔ꧀ꦭꦮꦤ꧀ꦝꦺꦮꦺꦏ꧀ꦏꦺ꧉"

^27:41 ꧊ꦌꦱꦲꦸꦒꦼꦛꦶꦁꦧꦔꦼꦠ꧀ꦏꦫꦺꦴ꧊ꦪꦏꦸꦧ꧀꧈ꦩꦼꦂꦒ꧊ꦪꦏꦸꦧ꧀ꦮꦶꦱ꧀ꦔꦽꦧꦸꦠ꧀ꦧꦼꦂꦏꦃꦱꦶꦁꦱꦏꦧꦥꦏ꧀ꦤꦺ꧉ꦥꦔꦸꦕꦥ꧀ꦥꦺ꧊ꦌꦱꦲꦸꦲꦶꦁꦧꦠꦶꦤ꧀꧈"ꦠꦶꦠꦺꦤ꧀ꦤꦤ꧈ꦲꦺꦴꦫꦱꦸꦮꦺꦩꦼꦤꦺꦃꦧꦥꦏ꧀ꦧꦏꦭ꧀ꦠꦶꦭꦂꦢꦺꦴꦚ꧉ꦱꦮꦶꦱ꧀ꦱꦺꦥꦼꦭꦪꦢ꧀ꦢꦤ꧀ꦤꦺꦫꦩ꧀ꦥꦸꦁ꧈꧊ꦪꦏꦸꦧ꧀ꦧꦏꦭ꧀ꦢꦏ꧀ꦥꦠꦺꦤ꧀ꦤꦶ꧉"

^27:42 ꦧꦉꦁ꧊ꦫꦶꦧ꧀ꦏꦃꦔꦼꦂꦠꦶꦫꦚ꧀ꦕꦁꦔꦤ꧀ꦤꦺ꧊ꦌꦱꦲꦸꦱꦶꦁꦩꦼꦁꦏꦺꦴꦤꦺꦴꦩꦲꦸ꧈꧊ꦪꦏꦸꦧ꧀ꦧꦚ꧀ꦗꦸꦂꦢꦶꦲꦸꦤ꧀ꦢꦁꦭꦤ꧀ꦢꦶꦏꦤ꧀ꦝꦤꦶ꧈"ꦫꦸꦔꦺꦴꦏ꧀ꦤ꧈ꦏꦏꦁꦩꦸ꧊ꦌꦱꦲꦸꦤꦶꦪꦠ꧀ꦲꦉꦥ꧀ꦩꦊꦱ꧀ꦏꦺꦴꦮꦺ;ꦏꦺꦴꦮꦺꦲꦉꦥ꧀ꦢꦶꦥꦠꦺꦤ꧀ꦤꦶ꧉

^27:43 ꦲꦺꦁꦒꦭ꧀ꦭꦸꦔꦲꦩꦼꦚꦁꦥꦁꦒꦺꦴꦤ꧀ꦤꦤ꧀ꦤꦺꦏꦏꦁꦏꦸ꧊ꦭꦧꦤ꧀ꦲꦶꦁ꧊ꦲꦫꦤ꧀꧈

^27:44 ꦭꦤ꧀ꦩꦺꦴꦤ꧀ꦝꦺꦴꦏ꧀ꦏꦲꦤꦲꦶꦁꦏꦺꦴꦤꦺꦴꦱꦮꦼꦠꦫꦩꦁꦱ꧈ꦔꦤ꧀ꦠꦶꦏꦏꦁꦩꦸꦭꦶꦭꦶꦃꦲꦠꦶꦤꦺ꧉

^27:45 ꦪꦺꦤ꧀ꦮꦶꦱ꧀꧈ꦩꦼꦁꦏꦺꦴꦲꦏꦸꦧꦏꦭ꧀ꦏꦺꦴꦁꦏꦺꦴꦤ꧀ꦤꦤ꧀ꦮꦺꦴꦁꦩꦿꦤꦩꦫꦤꦶꦏꦺꦴꦮꦺ꧉ꦲꦥꦲꦏꦸꦢꦶꦏꦺꦴꦤ꧀ꦏꦺꦭꦁꦔꦤ꧀ꦲꦤꦏ꧀ꦭꦺꦴꦫꦺꦴꦠꦸꦁꦒꦭ꧀ꦱꦼꦢꦶꦤ!"

^27:46 ꧊ꦫꦶꦧ꧀ꦏꦃꦧꦚ꧀ꦗꦸꦂꦩꦠꦸꦂꦩꦫꦁ꧊ꦆꦱ꧀ꦏꦏ꧀꧈"ꦏꦸꦭꦩ꧀ꦧꦺꦴꦠꦼꦤ꧀ꦧꦼꦠꦃꦔꦿꦲꦺꦴꦱ꧀ꦱꦏꦼꦤ꧀ꦱꦺꦩꦃꦱꦺꦩꦃꦲꦶꦥꦸꦤ꧀꧊ꦌꦱꦲꦸ꧈ꦠꦶꦪꦁꦠꦶꦪꦁꦧꦁꦱ꧊ꦏꦺꦤꦲꦤ꧀ꦩꦼꦤꦶꦏ꧉ꦩꦼꦤꦮꦶ꧊ꦪꦏꦸꦧ꧀ꦲꦶꦁꦒꦶꦃꦲꦁꦱꦭ꧀ꦭꦫꦺꦲꦺꦱ꧀ꦠꦿꦶ꧊ꦲꦺꦠ꧀ꦏꦢꦺꦴꦱ꧀ꦩꦼꦤꦶꦏ꧈ꦏꦸꦭꦲꦭꦸꦮꦸꦁꦥꦼꦗꦃꦏꦺꦩꦮꦺꦴꦤ꧀꧉"