Alkitab/Purwaning Dumadi/22

^22:1 ꦱꦮꦶꦱ꧀ꦱꦺꦊꦭꦏꦺꦴꦤ꧀ꦏꦸꦮꦶꦩꦲꦸꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦤ꧀ꦢꦢꦂꦥꦽꦕꦪꦤꦺ​꧊ꦄꦧꦿꦲꦩ꧀꧈​ꦥꦔꦤ꧀ꦢꦶꦏꦤꦺ꧈​"​꧊ꦄꦧꦿꦲꦩ꧀!"ꦲꦸꦚ꧀ꦗꦸꦏ꧀ꦏꦺ​꧊ꦄꦧꦿꦲꦩ꧀꧈​"ꦏꦮꦸꦭ꧈​ꦒꦸꦱ꧀ꦠꦶ!"

^22:2 ꦝꦮꦸꦃꦲꦺꦒꦸꦱ꧀ꦠꦶꦄꦭ꧀ꦭꦃ꧈​"ꦔꦗꦏ꧀ꦏ​꧊ꦆꦱ꧀ꦏꦏ꧀꧈​ꦲꦤꦏ꧀ꦩꦸꦲꦺꦴꦤ꧀ꦠꦁꦲꦤ꧀ꦠꦶꦁꦱꦶꦁꦏꦺꦴꦏ꧀ꦠꦽꦱ꧀ꦤꦤꦶ꧈​ꦩꦼꦚꦁꦔꦠꦤꦃ​꧊ꦩꦺꦴꦫꦶꦪ꧉​ꦲꦤꦲꦶꦁꦏꦤꦲꦤꦏ꧀ꦩꦸꦒꦮꦺꦤꦼꦤ꧀ꦏꦸꦂꦧꦤ꧀ꦲꦶꦁꦒꦸꦤꦸꦁꦏꦁꦧꦏꦭ꧀ꦢꦏ꧀ꦠꦸꦢꦸꦃꦲꦏꦺꦩꦫꦁꦏꦺꦴꦮꦺ꧉"​

^22:3 ꦲꦺꦱꦸꦏ꧀ꦏꦺꦲꦸꦩꦸꦤ꧀ꦲꦸꦩꦸꦤ꧀​꧊ꦄꦧꦿꦲꦩ꧀ꦧꦚ꧀ꦗꦸꦂꦔ꧀ꦭꦥꦏ꧀ꦏꦶꦏꦸꦭ꧀ꦢꦶꦤꦺ꧈​ꦔꦗꦏ꧀ꦲꦧ꧀ꦢꦶꦭꦺꦴꦫꦺꦴꦭꦤ꧀ꦲꦤꦏ꧀ꦏꦺ꧈​​꧊ꦆꦱ꧀ꦏꦏ꧀꧈​ꦏꦫꦺꦴꦔ꧀ꦒꦮꦏꦪꦸꦱꦶꦁꦮꦶꦱ꧀ꦢꦶꦱꦶꦒꦂꦫꦶ꧈​ꦱꦶꦁꦲꦉꦥ꧀ꦏꦁꦒꦺꦴꦱꦲꦺꦴꦱ꧀ꦏꦸꦂꦧꦤ꧀ꦲꦺꦴꦧꦺꦴꦁꦔꦤ꧀꧉​ꦧꦚ꧀ꦗꦸꦂꦥꦝꦧꦸꦝꦭ꧀ꦩ꧀ꦭꦏꦸꦩꦼꦚꦁꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦝꦮꦸꦃꦲꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧉​

^22:4 ꦲꦶꦁꦠꦼꦭꦸꦁꦢꦶꦤꦤꦺ​꧊ꦄꦧꦿꦲꦩ꧀ꦮꦼꦫꦸꦃꦥꦁꦒꦺꦴꦤ꧀ꦤꦤ꧀ꦩꦲꦸꦱꦏꦏꦢꦺꦴꦃꦲꦤ꧀꧉​

^22:5 ꦤꦸꦭꦶꦏꦤ꧀ꦝꦏꦫꦺꦴꦲꦧ꧀ꦢꦶꦲꦧ꧀ꦢꦶꦤꦺ꧈​"ꦏꦺꦴꦮꦺꦏꦺꦫꦶꦪꦲꦤꦲꦶꦁꦏꦺꦤꦺꦏꦫꦺꦴꦏꦸꦭ꧀ꦢꦶꦤꦺ꧉​ꦲꦏꦸꦏꦫꦺꦴ​꧊ꦆꦱ꧀ꦏꦏ꧀ꦢꦏ꧀ꦠꦼꦫꦸꦱ꧀ꦩꦿꦤꦱꦲꦺꦴꦱ꧀ꦏꦸꦂꦧꦤ꧀ꦩꦫꦁꦄꦭ꧀ꦭꦃ꧉​ꦪꦺꦤ꧀ꦮꦶꦱ꧀ꦫꦩ꧀ꦥꦸꦁꦲꦏꦸꦢꦏ꧀ꦧꦭꦶꦩꦿꦺꦤꦺꦩꦼꦤꦺꦃ꧉"​

^22:6 ꦏꦪꦸꦱꦶꦁꦲꦉꦥ꧀ꦏꦁꦒꦺꦴꦱꦲꦺꦴꦱ꧀ꦏꦸꦂꦧꦤ꧀ꦢꦶꦏꦺꦴꦤ꧀ꦩꦁꦒꦸꦭ꧀​꧊ꦆꦱ꧀ꦏꦏ꧀꧉​​꧊ꦄꦧꦿꦲꦩ꧀ꦝꦺꦮꦺꦔ꧀ꦒꦮꦒꦼꦤꦶꦭꦤ꧀ꦭꦢꦶꦁꦔꦺ꧉​ꦤꦭꦶꦏꦭꦒꦶꦥꦝꦩ꧀ꦭꦏꦸꦧꦉꦁ꧈​

^22:7 ​꧊ꦆꦱ꧀ꦏꦏ꧀ꦩꦠꦸꦂ꧈​"ꦥꦏ꧀"꧉​ꦮꦁꦱꦸꦭ꧀ꦭꦤ꧀ꦤꦺ​꧊ꦄꦧꦿꦲꦩ꧀꧈​"ꦲꦥꦔ꧀ꦒꦺꦂ?"ꦥꦶꦠꦏꦺꦴꦤ꧀ꦤꦺ​꧊ꦆꦱ꧀ꦏꦏ꧀꧈​"ꦭꦠꦸꦭꦤ꧀ꦏꦗꦼꦁꦔꦶꦥꦸꦤ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀꧈​ꦤꦁꦔꦶꦁꦕꦼꦩ꧀ꦥꦺꦲꦶꦁꦏꦁꦧꦝꦺꦏꦢꦩꦼꦭ꧀ꦏꦸꦂꦧꦤ꧀ꦥꦸꦤ꧀ꦢꦶ?"

^22:8 ꦮꦁꦱꦸꦭ꧀ꦭꦤ꧀ꦤꦺ​꧊ꦄꦧꦿꦲꦩ꧀꧈​"ꦄꦭ꧀ꦭꦃꦥꦶꦪꦩ꧀ꦧꦏ꧀ꦱꦶꦁꦧꦏꦭ꧀ꦩꦫꦶꦁꦔꦶ꧉"​ꦱꦼꦏꦫꦺꦴꦤꦺꦧꦚ꧀ꦗꦸꦂꦤꦼꦫꦸꦱ꧀ꦱꦏꦺꦭꦏꦸꦤꦺ꧉​

^22:9 ꦱꦠꦼꦏꦤꦺꦥꦁꦒꦺꦴꦤ꧀ꦤꦤ꧀ꦱꦶꦁꦢꦶꦔꦤ꧀ꦢꦶꦏꦏ꧀ꦏꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧈​​꧊ꦄꦧꦿꦲꦩ꧀ꦧꦚ꧀ꦗꦸꦂꦒꦮꦺꦩꦼꦱ꧀ꦧꦺꦃꦭꦤ꧀ꦤꦠꦏꦪꦸꦤꦺ꧉​​꧊ꦆꦱ꧀ꦏꦏ꧀ꦧꦚ꧀ꦗꦸꦂꦢꦶꦧꦤ꧀ꦢ꧈​ꦢꦶꦠꦸꦩ꧀ꦥꦁꦔꦏꦺꦲꦶꦁꦱꦤ꧀ꦝꦸꦮꦸꦂꦫꦺꦏꦪꦸꦲꦶꦁꦩꦼꦱ꧀ꦧꦺꦃ꧉​

^22:10 ꦤꦸꦭꦶꦚ꧀ꦗꦸꦥꦸꦏ꧀ꦭꦢꦶꦁꦔꦺ꧈​ꦲꦉꦥ꧀ꦢꦶꦲꦼꦁꦒꦺꦴꦚꦼꦩ꧀ꦧꦼꦭꦺꦃꦲꦤꦏ꧀ꦏꦺ꧉​

^22:11 ꦤꦁꦔꦶꦁꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦔꦸꦮꦸꦃꦱꦏꦲꦶꦁꦭꦔꦶꦠ꧀꧈​"​꧊ꦄꦧꦿꦲꦩ꧀꧈​​꧊ꦄꦧꦿꦲꦩ꧀!"ꦲꦠꦸꦂꦫꦺ​꧊ꦄꦧꦿꦲꦩ꧀꧈​"ꦏꦸꦭ꧈​ꦒꦸꦱ꧀ꦠꦶ꧉"​

^22:12 ꦥꦔꦤ꧀ꦢꦶꦏꦤꦺꦩꦭꦲꦺꦏꦠ꧀꧈​"ꦧꦺꦴꦕꦃꦏꦸꦮꦶꦲꦗꦏꦺꦴꦏ꧀ꦠꦠꦺꦴꦤ꧀ꦤꦶ꧈​ꦲꦗꦏꦺꦴꦏ꧀ꦏꦥꦏ꧀ꦏꦥꦏ꧀ꦏꦏꦺ꧉​ꦱꦲꦶꦏꦶꦲꦏꦸꦔꦼꦂꦠꦶꦪꦺꦤ꧀ꦏꦺꦴꦮꦺꦧꦼꦏ꧀ꦠꦶꦭꦤ꧀ꦩꦤꦸꦠ꧀ꦩꦫꦁꦱꦝꦮꦸꦃꦲꦺꦄꦭ꧀ꦭꦃ꧈​ꦔꦤ꧀ꦠꦶꦲꦺꦴꦫꦔꦺꦩꦤ꧀ꦲꦤꦏ꧀ꦩꦸꦲꦺꦴꦤ꧀ꦠꦁꦲꦤ꧀ꦠꦶꦁꦏꦥꦸꦤ꧀ꦝꦸꦠ꧀ꦏꦢꦢꦺꦏ꧀ꦏꦏꦺꦏꦸꦂꦧꦤ꧀꧉"​

^22:13 ​꧊ꦄꦧꦿꦲꦩ꧀ꦤꦺꦴꦭꦺꦃꦔꦶꦮꦤꦼꦔꦼꦤ꧀꧈​ꦮꦼꦫꦸꦃꦲꦤꦮꦼꦝꦸꦱ꧀ꦒꦺꦩ꧀ꦧꦺꦭ꧀ꦭꦤꦁꦱꦸꦔꦸꦤꦺꦏꦼꦕꦤ꧀ꦛꦺꦴꦭ꧀ꦲꦶꦁꦒꦿꦸꦩ꧀ꦧꦸꦭ꧀꧉​ꦮꦼꦝꦸꦱ꧀ꦩꦲꦸꦧꦚ꧀ꦗꦸꦂꦢꦶꦗꦸꦥꦸꦏ꧀ꦭꦤ꧀ꦢꦶꦒꦮꦺꦱꦲꦺꦴꦱ꧀ꦏꦸꦂꦧꦤ꧀꧈​ꦭꦶꦫꦸꦤꦺꦲꦤꦏ꧀ꦏꦺ꧉​

^22:14 ​꧊ꦄꦧꦿꦲꦩ꧀ꦚ꧀ꦗꦼꦤꦼꦁꦔꦏꦺꦥꦁꦒꦺꦴꦤ꧀ꦤꦤ꧀ꦩꦲꦸ:"ꦄꦭ꧀ꦭꦃꦚꦮꦶꦱ꧀ꦱꦶ"꧉​ꦠꦼꦏꦤ꧀ꦱꦼꦥꦿꦺꦤꦺꦲꦤꦲꦸꦤꦺꦤ꧀ꦲꦸꦤꦺꦤ꧀:"ꦒꦸꦱ꧀ꦠꦶꦄꦭ꧀ꦭꦃꦮꦶꦱ꧀ꦚꦮꦶꦱ꧀ꦱꦶꦲꦤꦲꦶꦁꦒꦸꦤꦸꦁꦔꦺ꧉"​

^22:15 ꦩꦭꦲꦺꦏꦠ꧀ꦠꦺꦥꦔꦺꦫꦤ꧀ꦔꦸꦮꦸꦃꦩꦼꦤꦺꦃꦱꦏꦲꦶꦁꦭꦔꦶꦠ꧀ꦩꦫꦁ​꧊ꦄꦧꦿꦲꦩ꧀꧈​

^22:16 "ꦲꦏꦸꦱꦸꦥꦲꦺꦴꦱ꧀ꦢꦼꦩꦶꦲꦱ꧀ꦩꦏꦸ ꦥꦶꦪꦩ꧀ꦧꦏ꧀꧈​ꦫꦺꦃꦤꦺꦏꦺꦴꦮꦺꦲꦺꦴꦫꦲꦺꦴꦮꦼꦭ꧀ꦚꦲꦺꦴꦱ꧀ꦱꦏꦺꦲꦤꦏ꧀ꦩꦸꦲꦺꦴꦤ꧀ꦠꦁꦲꦤ꧀ꦠꦶꦁ꧈​

^22:17 ꦩꦸꦭꦤꦺꦲꦏꦸꦧꦏꦭ꧀ꦔ꧀ꦭꦸꦧꦺꦂꦫꦏꦺꦧꦼꦂꦏꦃꦏꦸꦩꦫꦁꦏꦺꦴꦮꦺ꧉​ꦲꦤꦏ꧀ꦠꦸꦫꦸꦤ꧀ꦩꦸꦧꦏꦭ꧀ꦢꦢꦶꦲꦏꦺꦃꦧꦔꦼꦠ꧀ꦏꦪꦭꦶꦤ꧀ꦠꦁꦲꦶꦁꦭꦔꦶꦠ꧀ꦭꦤ꧀ꦏꦪꦮꦼꦝꦶꦲꦶꦁꦒꦶꦱꦶꦏ꧀ꦏꦶꦁꦱꦼꦒꦫ꧉​ꦲꦤꦏ꧀ꦠꦸꦫꦸꦤ꧀ꦩꦸꦧꦏꦭ꧀ꦤꦼꦭꦸꦏ꧀ꦏꦏꦺꦥꦫꦩꦸꦁꦱꦸꦃꦲꦺꦭꦤ꧀ꦔꦽꦧꦸꦠ꧀ꦏꦸꦛꦏꦸꦛꦤꦺ꧉​

^22:18 ꦭꦤ꧀ꦠꦂꦫꦤ꧀ꦠꦸꦫꦸꦤ꧀ꦩꦸꦱꦏꦺꦃꦲꦶꦁꦧꦁꦱꦲꦶꦁꦧꦸꦩꦶꦧꦏꦭ꧀ꦥꦝꦧꦶꦤꦼꦂꦏꦃꦲꦤ꧀꧈​ꦩꦼꦂꦒꦏꦺꦴꦮꦺꦮꦶꦱ꧀ꦔ꧀ꦭꦏꦺꦴꦤ꧀ꦤꦶꦲꦥꦱꦶꦁꦢꦏ꧀ꦝꦮꦸꦃꦲꦏꦺ꧉"​

^22:19 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴ​꧊ꦄꦧꦿꦲꦩ꧀ꦧꦚ꧀ꦗꦸꦂꦩꦫꦤꦶꦲꦧ꧀ꦢꦶꦲꦧ꧀ꦢꦶꦤꦺ꧈​ꦤꦸꦭꦶꦥꦝꦧꦼꦧꦉꦁꦔꦤ꧀ꦩꦸꦭꦶꦃꦩꦼꦚꦁ​꧊ꦧꦺꦂꦱꦾꦺꦧ꧉​​꧊ꦄꦧꦿꦲꦩ꧀ꦱꦠꦼꦫꦸꦱ꧀ꦱꦺꦩꦁꦒꦺꦴꦤ꧀ꦲꦤꦲꦶꦁꦏꦺꦴꦤꦺꦴ꧉​

^22:20 ꦱꦮꦶꦱ꧀ꦱꦺꦊꦭꦏꦺꦴꦤ꧀ꦩꦲꦸ​꧊ꦄꦧꦿꦲꦩ꧀ꦲꦺꦴꦭꦺꦃꦏꦧꦂꦪꦺꦤ꧀​꧊ꦤꦲꦺꦴꦂ꧈​ꦲꦝꦶꦤꦺ꧈​ꦢꦸꦮꦺꦲꦤꦏ꧀ꦭꦤꦁꦮꦺꦴꦭꦸꦥꦠꦸꦠ꧀ꦠꦤ꧀ꦱꦏ​꧊ꦩꦶꦭ꧀ꦏ꧈​ꦧꦺꦴꦗꦺꦴꦤꦺ꧈​ꦪꦏꦸꦮꦶ:

^22:21 ​꧊ꦈꦱ꧀꧈​ꦱꦶꦁꦩ꧀ꦧꦉꦥ꧀꧈​ꦧꦚ꧀ꦗꦸꦂꦲꦝꦶꦲꦝꦶꦤꦺ:​꧊ꦧꦸꦱ꧀꧈​​꧊ꦏꦺꦩꦸꦮꦺꦭ꧀꧈​ꦱꦶꦁꦢꦢꦶꦊꦭꦸꦲꦸꦂꦫꦺꦧꦁꦱ​꧊ꦄꦫꦩ꧀꧈​

^22:22 ꦏꦺꦱꦺꦢ꧀꧈​​꧊ꦲꦗ꦳ꦺꦴ꧈​​꧊ꦥꦶꦭ꧀ꦢꦱꦾ꧈​​꧊ꦪꦶꦢ꧀ꦭꦥ꦳꧀꧈​ꦭꦤ꧀​꧊ꦧꦺꦠꦸꦮꦺꦭ꧀꧉​

^22:23 ​꧊ꦧꦺꦠꦸꦮꦺꦭ꧀ꦏꦸꦮꦶꦧꦥꦏ꧀ꦤꦺ​꧊ꦫꦶꦧ꧀ꦏꦃ꧉​

^22:24 ​꧊ꦤꦲꦺꦴꦂꦢꦸꦮꦺꦱꦼꦭꦶꦂꦗꦼꦤꦼꦁꦔꦺ​꧊ꦫꦺꦪꦸꦩ꧈​ꦱꦶꦁꦔ꧀ꦭꦲꦶꦂꦫꦏꦺ​꧊ꦠꦺꦧꦃ꧈​​꧊ꦒꦲꦩ꧀꧈​​꧊ꦠꦲꦱꦾꦭꦤ꧀​꧊ꦩꦲꦏ꧉​