Alkitab/Purwaning Dumadi/20

Saka Wikisumber

20:1 ​꧊ꦄꦧꦿꦲꦩ꧀ꦥꦶꦤ꧀ꦝꦃꦱꦏꦲꦶꦁ​꧊ꦩꦩꦿꦺꦩꦼꦚꦁꦲꦶꦁ​꧊ꦏꦺꦤꦲꦤ꧀ꦱꦶꦱꦶꦃ​꧊ꦏꦶꦢꦸꦭ꧀꧈​ꦱꦂꦠꦩꦁꦒꦺꦴꦤ꧀ꦲꦶꦁ​꧊ꦒꦺꦫꦂ꧈​ꦲꦤ꧀ꦠꦫꦤꦺꦏꦸꦛ​꧊ꦏꦢꦺꦱ꧀ꦭꦤ꧀​꧊ꦱꦸꦂ꧈​ꦢꦢꦶꦮꦺꦴꦁꦤꦼꦤꦼꦏ꧉​
20:2 ​꧊ꦱꦫꦃ꧈​ꦧꦺꦴꦗꦺꦴꦤꦺ꧈​ꦢꦶꦲꦏꦺꦴꦏ꧀ꦏꦏꦺꦱꦼꦢꦸꦭꦸꦂꦫꦺꦮꦢꦺꦴꦤ꧀꧉​ꦔꦤ꧀ꦠꦶ​꧊ꦄꦧꦶꦩꦺꦭꦺꦃ꧈​ꦫꦗ​꧊ꦒꦺꦫꦂ꧈​ꦲꦸꦠꦸꦱ꧀ꦱꦤ꧀ꦤꦶꦩ꧀ꦧꦭ꧀ꦭꦶ​꧊ꦱꦫꦃ꧈​ꦲꦉꦥ꧀ꦢꦶꦥꦸꦤ꧀ꦝꦸꦠ꧀ꦒꦂꦮ꧉​
20:3 ꦤꦁꦔꦶꦁꦒꦸꦱ꧀ꦠꦶꦄꦭ꧀ꦭꦃꦔꦿꦮꦸꦃꦲꦶ​꧊ꦄꦧꦶꦩꦺꦭꦺꦃꦱꦗꦿꦺꦴꦤꦶꦁꦲꦶꦩ꧀ꦥꦺꦤ꧀꧈​ꦥꦔꦤ꧀ꦢꦶꦏꦤꦺ꧈​"ꦏꦺꦴꦮꦺꦧꦏꦭ꧀ꦩꦠꦶꦩꦼꦂꦒꦱꦏꦮꦺꦴꦁꦮꦢꦺꦴꦤ꧀ꦱꦶꦁꦏꦺꦴꦏ꧀ꦥꦺꦏ꧀ꦧꦺꦴꦗꦺꦴꦲꦶꦏꦸ꧈​ꦩꦼꦂꦒꦝꦺꦮꦺꦏ꧀ꦏꦺꦮꦶꦱ꧀ꦢꦸꦮꦺꦧꦺꦴꦗꦺꦴ꧉"​
20:4 ​꧊ꦱꦫꦃꦥꦚ꧀ꦕꦺꦤ꧀ꦢꦸꦫꦸꦁꦢꦶꦏꦥꦏ꧀ꦏꦥꦏ꧀ꦏꦏꦺ꧉​ꦩꦸꦭꦤꦺ​꧊ꦄꦧꦶꦩꦺꦭꦺꦃꦩꦠꦸꦂ꧈​"ꦝꦸꦃꦥꦔꦺꦫꦤ꧀꧈​ꦏꦸꦭꦩ꧀ꦧꦺꦴꦠꦼꦤ꧀ꦊꦥꦠ꧀꧉​ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦧꦝꦺꦩꦼꦗꦃꦲꦶꦏꦸꦭ?
20:5 ꦩꦼꦤꦥꦩ꧀ꦧꦺꦴꦠꦼꦤ꧀​꧊ꦄꦧꦿꦲꦩ꧀ꦥꦶꦪꦩ꧀ꦧꦏ꧀ꦲꦶꦁꦏꦁꦕꦿꦶꦪꦺꦴꦱ꧀ꦝꦠꦼꦁꦏꦸꦭ꧈​ꦧꦶꦭꦶꦃ​꧊ꦱꦫꦃꦩꦼꦤꦶꦏꦱꦼꦝꦺꦫꦺꦏ꧀ꦏꦶꦥꦸꦤ꧀ꦲꦺꦱ꧀ꦠꦿꦶ?ꦭꦤ꧀​꧊ꦱꦫꦃꦥꦶꦪꦩ꧀ꦧꦏ꧀ꦫꦏ꧀ꦲꦶꦁꦒꦶꦃꦮꦶꦕꦤ꧀ꦠꦼꦤ꧀꧈​ꦧꦶꦭꦶꦃ​꧊ꦄꦧꦿꦲꦩ꧀ꦩꦼꦤꦶꦏꦱꦼꦝꦺꦫꦺꦏ꧀ꦏꦶꦥꦸꦤ꧀ꦗꦊꦂ꧉​ꦢꦢꦺꦴꦱ꧀ꦲꦼꦁꦒꦺꦤ꧀ꦏꦸꦭꦠꦸꦩꦶꦤ꧀ꦢꦏ꧀ꦩꦼꦏꦠ꧀ꦠꦼꦤ꧀ꦩꦼꦤꦶꦏꦏꦭꦪꦤ꧀ꦩꦤꦃꦉꦱꦶꦏ꧀꧉"​
20:6 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏꦩꦼꦤꦺꦃꦱꦗꦿꦺꦴꦤꦶꦁꦥꦔꦶꦩ꧀ꦥꦺꦤ꧀꧈​ꦝꦮꦸꦃꦲꦺ꧈​"ꦥꦚ꧀ꦕꦺꦤ꧀ꦲꦏꦸꦔꦼꦂꦠꦶꦪꦺꦤ꧀ꦠꦸꦩꦶꦤ꧀ꦢꦏ꧀ꦩꦸꦏ꧀ꦭꦮꦤ꧀ꦲꦠꦶꦏꦁꦉꦱꦶꦏ꧀꧈​ꦩꦸꦭꦤꦺꦏꦺꦴꦮꦺꦢꦏ꧀ꦕꦼꦒꦃꦱꦸꦥꦪꦲꦺꦴꦫꦔ꧀ꦭꦏꦺꦴꦤ꧀ꦤꦶꦢꦺꦴꦱ꧉​ꦏꦺꦴꦮꦺꦲꦗꦔ꧀ꦒꦼꦥꦺꦴꦏ꧀ꦮꦺꦴꦁꦮꦢꦺꦴꦤ꧀ꦏꦸꦮꦶ꧉​
20:7 ꦱꦲꦶꦏꦶ​꧊ꦱꦫꦃꦧꦭꦺꦏ꧀ꦤ꧉​ꦱꦶꦁꦭꦤꦁꦲꦶꦏꦸꦤꦧꦶ꧈​ꦏꦉꦧꦺꦤ꧀ꦝꦺꦮꦺꦏ꧀ꦏꦺꦤ꧀ꦢꦺꦴꦔꦏ꧀ꦏꦏꦺꦏꦼꦱ꧀ꦭꦩꦼꦠ꧀ꦠꦤ꧀ꦩꦸ꧉​ꦢꦺꦤꦺꦪꦺꦤ꧀ꦲꦺꦴꦫꦏꦺꦴꦏ꧀ꦧꦭꦺꦏ꧀ꦏꦏꦺ꧈​ꦔꦼꦂꦠꦶꦪꦪꦺꦤ꧀ꦏꦺꦴꦮꦺꦩꦼꦱ꧀ꦛꦶꦧꦏꦭ꧀ꦩꦠꦶ꧈​ꦪꦏꦺꦴꦮꦺ꧈​ꦪꦮꦺꦴꦁꦱꦲꦶꦱꦶꦤꦺꦲꦺꦴꦩꦃꦩꦸ!"
20:8 ꦲꦺꦱꦸꦏ꧀ꦏꦺꦲꦸꦩꦸꦤ꧀ꦲꦸꦩꦸꦤ꧀​꧊ꦄꦧꦶꦩꦺꦭꦺꦃꦠꦔꦶꦠꦸꦫꦸ꧈​ꦧꦚ꧀ꦗꦸꦂꦔ꧀ꦭꦸꦩ꧀ꦥꦸꦏ꧀ꦏꦏꦺꦧꦠꦸꦂꦫꦺꦏꦧꦺꦃ꧈​ꦥꦝꦢꦶꦕꦿꦶꦠꦤꦶꦲꦶꦩ꧀ꦥꦺꦤ꧀ꦤꦺ꧈​ꦠꦼꦩꦃꦲꦤ꧀ꦮꦺꦴꦁꦱꦏꦼꦝꦠꦺꦴꦤ꧀ꦥꦝꦮꦼꦢꦶꦧꦔꦼꦠ꧀꧉​
20:9 ​꧊ꦄꦧꦿꦲꦩ꧀ꦲꦶꦪꦢꦶꦠꦶꦩ꧀ꦧꦭ꧀ꦭꦶꦭꦤ꧀ꦢꦶꦔꦤ꧀ꦢꦶꦏꦤꦶ꧈​"ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦏꦺꦴꦏ꧀ꦠꦸꦩꦶꦤ꧀ꦢꦏ꧀ꦩꦼꦏꦠ꧀ꦠꦼꦤ꧀ꦝꦠꦼꦁꦏꦸꦭ?ꦊꦥꦠ꧀ꦏꦸꦭꦩꦼꦤꦥ꧈​ꦢꦺꦤꦺꦏꦸꦭꦭꦤ꧀ꦤꦼꦒꦫꦶꦏꦸꦭꦔꦤ꧀ꦠꦺꦴꦱ꧀ꦥꦚ꧀ꦗꦼꦤꦼꦁꦔꦤ꧀ꦝꦮꦃꦲꦶꦏꦊꦥꦠ꧀ꦠꦤ꧀ꦱꦼꦩꦤ꧀ꦠꦼꦤ꧀ꦲꦒꦼꦁꦔꦶꦥꦸꦤ꧀?ꦠꦸꦩꦶꦤ꧀ꦢꦏ꧀ꦥꦚ꧀ꦗꦼꦤꦼꦁꦔꦤ꧀ꦲꦶꦁꦏꦁꦏꦢꦺꦴꦱ꧀ꦩꦼꦏꦠ꧀ꦠꦼꦤ꧀ꦩꦼꦤꦶꦏꦩ꧀ꦧꦺꦴꦠꦼꦤ꧀ꦥꦤ꧀ꦠꦼꦱ꧀꧉​
20:10 ꦏꦺꦁꦔꦶꦁꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦔ꧀ꦭꦩ꧀ꦥꦃꦲꦶꦏꦢꦺꦴꦱ꧀ꦩꦼꦏꦠ꧀ꦠꦼꦤ꧀?"
20:11 ꦮꦁꦱꦸꦭ꧀ꦭꦤ꧀ꦤꦺ​꧊ꦄꦧꦿꦲꦩ꧀꧈​"ꦏꦸꦭꦒꦝꦃꦥꦔꦶꦤ꧀ꦠꦼꦤ꧀꧈​ꦧꦶꦭꦶꦃꦠꦶꦪꦁꦲꦶꦁꦔꦿꦶꦏꦶꦩ꧀ꦧꦺꦴꦠꦼꦤ꧀ꦱꦩꦶꦲꦗꦿꦶꦃꦝꦠꦼꦁꦒꦸꦱ꧀ꦠꦶꦄꦭ꧀ꦭꦃ꧉​ꦩꦶꦭꦏꦸꦭꦲꦗꦿꦶꦃꦩ꧀ꦧꦺꦴꦏ꧀ꦧꦶꦭꦶꦃꦏꦸꦭꦢꦶꦥꦸꦤ꧀ꦥꦼꦗꦃꦲꦶꦢꦺꦤꦶꦁꦠꦶꦪꦁꦲꦶꦁꦏꦁꦩꦺꦭꦶꦏ꧀ꦝꦠꦼꦁꦱꦺꦩꦃꦏꦸꦭ꧉​
20:12 ꦠꦸꦂ​꧊ꦱꦫꦃꦩꦼꦤꦶꦏꦥꦚ꧀ꦕꦺꦤ꧀ꦲꦶꦁꦒꦶꦃꦱꦼꦝꦺꦫꦺꦏ꧀ꦏꦸꦭꦱꦲꦺꦱ꧀ꦠꦸ;ꦥꦽꦤꦃꦲꦶꦥꦸꦤ꧀ꦏꦭꦶꦪꦤ꧀ꦏꦸꦭꦤꦸꦁꦒꦶꦭ꧀ꦧꦥꦏ꧀ꦱꦤꦺꦱ꧀ꦧꦶꦪꦸꦁ꧉​ꦭꦗꦼꦁꦏꦸꦭꦥꦼꦤ꧀ꦝꦼꦠ꧀ꦢꦢꦺꦴꦱ꧀ꦱꦺꦩꦃꦏꦸꦭ꧉​
20:13 ꦱꦫꦺꦃꦤꦺꦏꦸꦭꦢꦶꦥꦸꦤ꧀ꦏꦼꦂꦱꦏ꧀ꦏꦏꦼꦤ꧀ꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃꦏꦺꦱꦃꦔ꧀ꦭꦼꦩ꧀ꦧꦂꦫꦩꦿꦶꦏꦩꦿꦶꦏꦶ꧈​ꦠꦼꦧꦶꦃꦱꦏꦶꦁꦱꦤꦏ꧀ꦱꦼꦝꦺꦫꦺꦏ꧀꧈​ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦭꦗꦼꦁꦏꦸꦭꦏꦼꦛꦶꦏ꧀꧈​‘ꦪꦺꦤ꧀ꦲꦮꦏ꧀ꦏꦺꦝꦺꦮꦺꦲꦤꦲꦶꦁꦥꦫꦤ꧀꧈​ꦏꦺꦴꦮꦺꦔꦺꦠꦺꦴꦏ꧀ꦤꦏꦠꦽꦱ꧀ꦤꦤ꧀ꦩꦸꦩꦫꦁꦲꦏꦸꦱꦿꦤꦔꦏꦸꦪꦺꦤ꧀ꦲꦏꦸꦲꦶꦏꦶꦱꦼꦢꦸꦭꦸꦂꦩꦸꦭꦤꦁ꧉’"​
20:14 ꦱꦮꦶꦱ꧀ꦱꦺꦏꦸꦮꦶ​꧊ꦄꦧꦶꦩꦺꦭꦺꦃꦩ꧀ꦧꦭꦺꦏ꧀ꦏꦏꦺ​꧊ꦱꦫꦃꦩꦫꦁ​꧊ꦄꦧꦿꦲꦩ꧀꧈​ꦩꦭꦃꦢꦶꦒꦮꦤꦶꦧꦠꦸꦂꦠꦸꦏꦺꦴꦤ꧀꧈​ꦮꦼꦝꦸꦱ꧀ꦭꦤ꧀ꦱꦥꦶ꧉​
20:15 ꦥꦔꦤ꧀ꦢꦶꦏꦤꦺꦩꦫꦁ​꧊ꦄꦧꦿꦲꦩ꧀꧈​"ꦠꦤꦃꦏꦸꦭꦠꦏ꧀ꦱꦶꦃꦮꦶꦪꦂ꧈​ꦏꦸꦭꦲꦠꦸꦂꦫꦶꦩꦶꦭꦶꦃꦥꦸꦤ꧀ꦢꦶꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦉꦩꦼꦤ꧀ꦤꦶ꧈​ꦭꦗꦼꦁꦢꦼꦢꦊꦩ꧀ꦩꦲꦶꦁꦔꦿꦶꦏꦸ꧉"​
20:16 ꦢꦺꦤꦺ​꧊ꦱꦫꦃꦢꦶꦥꦔꦤ꧀ꦢꦶꦏꦤꦶ꧈​"​꧊ꦄꦧꦿꦲꦩ꧀꧈​ꦱꦺꦩꦃꦥꦚ꧀ꦗꦼꦤꦼꦁꦔꦤ꧀꧈​ꦱꦩ꧀ꦥꦸꦤ꧀ꦏꦸꦭꦱꦸꦏꦤꦶꦲꦂꦠꦱꦺꦮꦸꦥꦺꦫꦏ꧀꧈​ꦩꦶꦤꦁꦏꦧꦸꦏ꧀ꦠꦶꦝꦠꦼꦁꦱꦼꦢꦪꦠꦶꦪꦁꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦏꦊꦥꦠ꧀ꦠꦤ꧀꧉​ꦱꦧꦼꦤ꧀ꦠꦶꦪꦁꦧꦝꦺꦩꦔꦼꦂꦠꦺꦴꦱ꧀ꦧꦶꦭꦶꦃꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦏꦊꦥꦠ꧀ꦠꦤ꧀ꦩꦼꦤꦥꦩꦼꦤꦥ꧉"​
20:17 ​꧊ꦄꦧꦿꦲꦩ꧀ꦧꦚ꧀ꦗꦸꦂꦱꦲꦺꦴꦱ꧀ꦱꦸꦏꦸꦂꦩꦫꦁꦄꦭ꧀ꦭꦃ꧈​ꦤ꧀ꦢꦺꦴꦔꦏ꧀ꦏꦏꦺ​꧊ꦄꦧꦶꦩꦺꦭꦺꦃ꧈​ꦠꦼꦩꦃꦲꦤ꧀​꧊ꦄꦧꦶꦩꦺꦭꦺꦃꦏꦥꦫꦶꦁꦔꦤ꧀ꦮꦫꦱ꧀꧈​ꦭꦤ꧀ꦒꦂꦮꦤꦺꦠꦸꦮꦶꦤ꧀ꦥꦫꦧꦠꦸꦂꦫꦺꦮꦢꦺꦴꦤ꧀ꦥꦝꦧꦶꦱꦢꦸꦮꦺꦲꦤꦏ꧀ꦩꦼꦤꦺꦃ꧉​
20:18 ꦩꦲꦸꦤꦺ꧈​ꦤꦭꦶꦏ​꧊ꦱꦫꦃ꧈​ꦧꦺꦴꦗꦺꦴꦤꦺ​꧊ꦄꦧꦿꦲꦩ꧀꧈​ꦲꦤꦲꦶꦁꦏꦼꦝꦠꦺꦴꦤ꧀꧈​ꦥꦫꦮꦺꦴꦁꦮꦢꦺꦴꦤ꧀ꦩꦲꦸꦥꦝꦢꦶꦒꦮꦺꦒꦧꦸꦒ꧀ꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃ꧉​