Kaca:Kajawen 50 1927-12-15.pdf/18

ꦛ​ꦲꦶꦁ​ꦏꦁ​ꦚꦩꦺꦤ꧀ꦤꦶ꧈​ꦩꦤꦃꦲꦶꦥꦸꦤ꧀ꦭꦗꦼꦁ​ꦒꦼꦭ꧈​ꦲꦶꦁ​ꦮꦸꦱꦤ​ꦭꦗꦼꦁ​ꦥꦢꦺꦴꦱ꧀ꦩꦺꦴꦝꦺꦭ꧀ꦥꦔꦁ​ꦒꦺ​ꦲꦶꦁ​ꦏꦁ​ꦢꦺꦫꦺꦁ​ꦮꦺꦴꦤ꧀ꦠꦼꦤ꧀ꦠꦶꦪꦁ​ꦲꦶꦁ​ꦏꦁ​ꦔꦁ​ꦒꦺ꧉​ꦲꦶꦁ​ꦩꦺꦴꦁ​ꦏ​ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁ​ꦱꦤ꧀ꦝꦁ​ꦥꦔꦁ​ꦒꦺꦤ꧀ꦤꦶꦥꦸꦤ꧀ꦠꦶꦪꦁ​ꦥꦸꦤꦶꦏ꧈​ꦧꦶꦭꦶꦃ​ꦢꦶꦥꦸꦤ꧀ꦒꦿꦺꦗꦃ​ꦥꦚ꧀ꦕꦺꦤ꧀ꦏꦛꦃ​ꦱꦪꦼꦏ꧀ꦠꦺꦴꦱ꧀꧈​ꦏꦢꦺꦴꦱ꧀ꦠ꧇​ꦫꦱꦸꦏ꧀ꦏꦤ꧀꧈​ꦱꦶꦚ꧀ꦗꦁ​꧈​ꦲꦸꦝꦼꦁ​꧈​ꦠꦺꦴꦥꦶ꧈​ꦝꦱꦶ꧈​ꦫꦁ​ꦏꦼꦥ꧀ꦥꦤ꧀꧈​ꦠꦸꦮꦶꦤ꧀ꦱꦥꦤꦸꦁ​ꦒꦶꦭ꧀ꦭꦤ꧀ꦤꦶꦥꦸꦤ꧀ꦠꦏ꧀ꦱꦶꦃ​ꦏꦛꦃ꧉​ꦮꦺꦴꦤ꧀ꦢꦺꦤꦺ​ꦱꦠꦸꦁ​ꦒꦭ꧀ꦱꦠꦸꦁ​ꦒꦭ꧀ꦭꦶꦥꦸꦤ꧀ꦲꦶꦁ​ꦒꦶꦃ​ꦲꦁ​ꦒꦝꦃꦲꦶ​ꦩꦺꦴꦝꦺꦭ꧀ꦥꦶꦪꦩ꧀ꦧꦏ꧀ꦥꦶꦪꦩ꧀ꦧꦏ꧀꧉​ꦲꦶꦁ​ꦏꦁ​ꦥꦸꦤꦶꦏ​ꦧꦶꦭꦶꦃ​ꦱꦧꦼꦤ꧀ꦮꦺꦴꦤ꧀ꦠꦼꦤ꧀ꦩꦺꦴꦝꦺꦭ꧀ꦥꦔꦁ​ꦒꦺ​ꦢꦶꦥꦸꦤ꧀ꦥꦶꦠꦸꦫꦸꦠ꧀ꦠꦶ​ꦭꦗꦼꦁ​ꦠꦸꦩ꧀ꦧꦱ꧀꧈​ꦱꦲꦺꦱ꧀ꦠꦸꦤꦶꦥꦸꦤ꧀ꦲꦶꦁ​ꦒꦶꦃ​ꦧꦝꦺ​ꦧꦺꦴꦫꦺꦴꦱ꧀ꦱꦪꦼꦏ꧀ꦠꦺꦴꦱ꧀꧉​

꧋ꦩꦼꦁ​ꦒꦃ​ꦥꦔꦁ​ꦒꦺ​ꦲꦶꦁ​ꦏꦁ​ꦠꦸꦩꦿꦥ꧀ꦏꦁ​ꦒꦺ​ꦭꦫꦺ​ꦗꦊꦂ꧈​ꦥꦸꦤꦶꦏ​ꦧꦺꦴꦠꦼꦤ꧀ꦥꦿꦪꦺꦴꦒꦶ​ꦧꦶꦭꦶꦃ​ꦏꦲꦁ​ꦒꦺꦏ꧀ꦲꦏꦼꦤ꧀ꦲꦶꦁ​ꦭꦫꦺ​ꦲꦺꦱ꧀ꦠꦿꦶ꧉​ꦲꦩꦂꦒꦶ​ꦮꦺꦴꦤ꧀ꦠꦼꦤ꧀ꦲꦸꦔꦼꦭ꧀ꦲꦸꦔꦼꦭ꧀ꦭꦤ꧀꧇​ꦱꦭꦶꦤ꧀ꦧꦸꦱꦤ​ꦱꦭꦶꦤ꧀ꦮꦶꦫꦒ꧈​ꦥꦸꦤꦶꦏ​ꦥꦚ꧀ꦕꦺꦤ꧀ꦱꦪꦼꦏ꧀ꦠꦺꦴꦱ꧀꧉​ꦏꦸꦭ​ꦤꦠꦺ​ꦱꦸꦩꦼꦉꦥ꧀ꦭꦫꦺ​ꦲꦺꦱ꧀ꦠꦿꦶ​ꦲꦶꦁ​ꦏꦁ​ꦱꦺꦴꦭꦃ​ꦧꦮꦤꦶꦥꦸꦤ꧀ꦏꦢꦺꦴꦱ꧀ꦭꦫꦺ​ꦗꦊꦂ꧈​ꦥꦸꦤꦶꦏ​ꦏꦠꦿꦁ​ꦔꦤ꧀ꦤꦶꦥꦸꦤ꧀ꦭꦫꦺ​ꦮꦲꦸ​ꦱꦏꦶꦁ​ꦱꦩ꧀ꦥꦸꦤ꧀ꦩꦤꦸꦃ꧈​ꦱꦧꦼꦤ꧀ꦱꦧꦼꦤ꧀ꦢꦶꦥꦸꦤ꧀ꦲꦁ​ꦒꦺꦤ꧀ꦲꦁ​ꦒꦺꦤ꧀ꦤꦶ​ꦭꦸꦁ​ꦱꦸꦂꦫꦤ꧀ꦥꦔꦁ​ꦒꦺꦤ꧀ꦤꦶꦥꦸꦤ꧀ꦱꦝꦺꦫꦺꦏ꧀ꦏꦶꦥꦸꦤ꧀ꦗꦊꦂ꧉​ꦢꦢꦺꦴꦱ꧀ꦠꦼꦠꦺꦭ​ꦱꦔꦼꦠ꧀꧈​ꦧꦶꦭꦶꦃ​ꦥꦔꦁ​ꦒꦺ​ꦥꦸꦤꦶꦏ​ꦲꦶꦁ​ꦒꦶꦃ​ꦲꦁ​ꦒꦝꦃꦲꦶ​ꦢꦪ​ꦲꦶꦔꦠꦱ꧀ꦱꦶꦥꦸꦤ꧀ꦭꦫꦺ꧉​ꦢꦺꦤꦺ​ꦥꦔꦁ​ꦒꦺ​ꦲꦶꦁ​ꦏꦁ​ꦱꦒꦼꦢ꧀ꦏꦲꦁ​ꦒꦺ​ꦲꦶꦁ​ꦭꦫꦺ​ꦗꦊꦂ​ꦲꦸꦠꦮꦶ​ꦲꦺꦱ꧀ꦠꦿꦶ꧈​ꦥꦸꦤꦶꦏ​ꦭꦶꦩꦿꦃꦲꦶꦥꦸꦤ꧀ꦢꦶꦥꦸꦤ꧀ꦮꦱ꧀ꦠꦤ꧀ꦤꦶ꧇​ꦩꦺꦴꦚꦺꦠ꧀ꦠꦤ꧀꧉​

꧋ꦲꦶꦁ​ꦔꦶꦁ​ꦒꦶꦭ꧀ꦱꦩ꧀ꦥꦸꦤ꧀ꦏꦥꦿꦠꦺꦭꦏ꧀ꦲꦏꦼꦤ꧀ꦧꦶꦭꦶꦃ​ꦥꦔꦁ​ꦒꦺ​ꦥꦸꦤꦶꦏ​ꦒꦝꦃ​ꦢꦪ​ꦲꦶꦔꦠꦱ꧀ꦱꦶꦥꦸꦤ꧀ꦭꦫꦺ꧈​ꦲꦩꦶꦭ​ꦥꦔꦁ​ꦒꦺꦤ꧀ꦤꦶꦥꦸꦤ꧀ꦭꦫꦺ​ꦥꦸꦤꦶꦏ꧈​ꦩꦺꦴꦝꦺꦭ꧀ꦭꦶꦥꦸꦤ꧀ꦥꦿꦪꦺꦴꦒꦶ​ꦲꦶꦁ​ꦏꦁ​ꦩꦭꦶꦒꦶ​ꦥꦚ꧀ꦕꦺꦤ꧀ꦏꦁ​ꦒꦺ​ꦭꦫꦺ꧉​ꦢꦢꦺꦴꦱ꧀ꦧꦺꦴꦠꦼꦤ꧀ꦥꦿꦪꦺꦴꦒꦶ​ꦲꦸꦥꦩꦶ​ꦭꦫꦺ​ꦮꦲꦸ​ꦢꦶꦥꦸꦤ꧀ꦲꦁ​ꦒꦺꦤ꧀ꦲꦁ​ꦒꦺꦤꦶ​ꦗꦱ꧀ꦏꦢꦺꦴꦱ꧀ꦗꦱ꧀ꦱꦶꦥꦸꦤ꧀ꦠꦶꦪꦁ​ꦱꦼꦥꦸꦃ꧈​ꦱꦲ​ꦩꦮꦶ​ꦢꦶꦥꦸꦤ꧀ꦲꦁ​ꦒꦺꦤ꧀ꦲꦁ​ꦒꦺꦤ꧀ꦤꦶ​ꦗꦩ꧀ꦢꦭꦃ​ꦏꦂꦱꦺꦠ꧀ꦠꦶꦥꦸꦤ꧀꧈​ꦥꦸꦤꦥꦢꦺꦤꦺ​ꦲꦁ​ꦒꦺꦤ꧀ꦤꦶꦥꦸꦤ꧀ꦱꦶꦚ꧀ꦗꦁ​ꦔꦤ꧀ꦲꦶꦁ​ꦒꦶꦃ​ꦏꦮꦶꦫꦸ​ꦕꦫ​ꦱꦼꦥꦸꦃ꧈​ꦲꦩꦂꦒꦶ​ꦏꦗꦮꦶ​ꦝꦠꦼꦁ​ꦱꦮꦁ​ꦔꦤ꧀ꦧꦺꦴꦠꦼꦤ꧀ꦥꦤ꧀ꦠꦼꦱ꧀꧈​ꦲꦶꦁ​ꦒꦶꦃ​ꦲꦸꦒꦶ​ꦲꦤ꧀ꦝꦱꦂꦫꦶ​ꦚꦼꦁ​ꦏꦏ꧀ꦲꦏꦼꦤ꧀ꦝꦠꦼꦁ​ꦩꦤꦃ​ꦱꦸꦩꦼꦥꦸꦃ꧈​ꦠꦺꦴꦤ꧀ꦝ​ꦱꦏ꧀ꦱꦶꦤꦶꦥꦸꦤ꧀꧈​ꦭꦫꦺ​ꦲꦶꦁ​ꦥꦝꦸꦱꦸꦤ꧀ꦤꦤ꧀ꦥꦸꦤꦶꦏ​ꦫꦸꦥꦶ​ꦱꦲ​ꦭꦒꦺꦴꦤ꧀ꦤꦶꦥꦸꦤ꧀ꦱꦩ꧀ꦥꦸꦤ꧀ꦱꦩꦶ​ꦏꦠꦶꦔꦭ꧀ꦱꦼꦥꦸꦃ꧉​ꦗꦭꦂꦫꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦱꦤꦺꦱ꧀ꦲꦶꦁ​ꦒꦶꦃ​ꦲꦮꦶꦠ꧀ꦱꦏꦶꦁ​ꦲꦭꦶꦠ꧀ꦩꦶꦭ​ꦱꦩ꧀ꦥꦸꦤ꧀ꦩꦔꦁ​ꦒꦺ​ꦕꦫ​ꦱꦼꦥꦸꦃ​(ꦲꦸꦝꦼꦁ​ꦲꦸꦝꦼꦁ​ꦔꦤ꧀)꧉​ꦲꦺꦮꦢꦺꦤꦺ​ꦮꦺꦴꦤ꧀ꦠꦼꦤ꧀ꦏꦭꦤꦶꦥꦸꦤ꧀꧈​ꦭꦫꦺ​ꦮꦲꦸ​ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦥꦏꦺꦮꦼꦢ꧀ꦢꦶꦥꦸꦤ꧀꧈​ꦢꦶꦥꦸꦤ꧀ꦥꦔꦁ​ꦒꦺꦤ꧀ꦤꦶ​ꦕꦫ​ꦱꦼꦥꦸꦃ꧈​ꦏꦢꦺꦴꦱ꧀ꦠ꧇​ꦕꦫ​ꦗꦺꦴꦁ​ꦏꦶ꧈​ꦕꦫ​ꦩꦠꦿꦸꦱ꧀ꦠꦸꦮꦶꦤ꧀ꦱꦥꦤꦸꦁ​ꦒꦶꦭ꧀ꦭꦤ꧀ꦤꦶꦥꦸꦤ꧀꧉​ꦲꦩꦂꦒꦶ​ꦥꦔꦁ​ꦒꦺ​ꦲꦶꦁ​ꦏꦁ​ꦩꦏꦠꦼꦤ꧀ꦮꦲꦸ꧈​ꦱꦒꦼꦢ꧀ꦲꦤ꧀ꦝꦱꦂꦫꦶ​ꦩꦤꦃꦲꦶꦥꦸꦤ꧀ꦭꦫꦺ​ꦏꦥꦺꦔꦶꦤ꧀ꦝꦠꦼꦁ​ꦧꦁ​ꦱꦤꦶꦁ​ꦏꦫꦺꦴꦱꦤ꧀꧈​ꦥꦸꦤꦥꦢꦺꦤꦺ​ꦝꦠꦼꦁ​ꦱꦮꦁ​ꦔꦤ꧀ꦏꦠꦶꦔꦭ꧀ꦭꦶꦥꦸꦤ꧀ꦲꦶꦁ​ꦒꦶꦃ꧇​ꦲꦚ꧀ꦗꦊꦂꦫꦶ꧉​ꦩꦤꦮꦶ​ꦱꦲꦺꦱ꧀ꦠꦸ​ꦤꦼꦩꦃꦲꦶ​ꦉꦩꦼꦤ꧀ꦝꦠꦼꦁ​ꦏꦫꦺꦴꦱꦤ꧀ꦱꦪꦼꦏ꧀ꦠꦺꦴꦱ꧀꧈​ꦥꦶꦏꦤ꧀ꦠꦸꦏ꧀ꦏꦶꦥꦸꦤ꧀ꦝꦠꦼꦁ​ꦧꦢꦤ꧀ꦤꦶꦁ​ꦭꦫꦺ​ꦧꦝꦺ​ꦢꦢꦺꦴꦱ꧀ꦗꦼꦤ꧀ꦛꦺꦴꦠ꧀ꦱꦲ​ꦱꦫꦱ꧀꧉​ꦱꦲꦺꦱ꧀ꦠꦸꦤꦶꦥꦸꦤ꧀ꦥꦫ​ꦱꦼꦥꦸꦃ​ꦤꦶꦔꦭ꧀ꦭꦶ​ꦥꦸꦠꦿꦤꦶꦥꦸꦤ꧀ꦲꦶꦁ​ꦏꦁ​ꦗꦼꦤ꧀ꦛꦺꦴꦠ꧀ꦮꦲꦸ꧈​ꦠꦼꦩ꧀ꦠꦸ​ꦉꦩꦼꦤ꧀ꦩꦤꦃꦲꦶꦥꦸꦤ꧀꧉​ꦕꦼꦏꦏ꧀ꦏꦶꦥꦸꦤ꧀ꦚꦤ꧀ꦝꦁ​ꦔꦶ​ꦭꦫꦺ​ꦥꦸꦤꦶꦏ꧈​ꦧꦶꦭꦶꦃ​ꦱꦒꦼꦢ꧀꧈​ꦏꦥꦶꦭꦶꦃꦤ​ꦲꦶꦁ​ꦏꦁ​ꦱꦒꦼꦢ꧀ꦲꦤꦸꦤ꧀ꦠꦸꦤ꧀ꦤꦶ​ꦝꦠꦼꦁ​ꦧꦸꦧꦸꦢꦺꦤ꧀ꦱꦲꦺ꧉​ꦏꦢꦺꦴꦱ꧀ꦠ​꧇​ꦕꦫ​ꦥꦢ꧀ꦥꦶꦤ꧀ꦝꦼꦂ​ꦠꦸꦮꦶꦤ꧀ꦱꦥꦤꦸꦁ​ꦒꦶꦭ꧀ꦭꦤ꧀ꦤꦶꦥꦸꦤ꧀꧉​

ꦠꦏ꧀ꦱꦶꦃ​ꦮꦺꦴꦤ꧀ꦠꦼꦤ꧀ꦱꦩ꧀ꦧꦼꦠ꧀ꦠꦶꦥꦸꦤ꧀꧈​

ꦢꦂꦦ꧉