ꦊꦧꦺꦴꦤ꧀ꦮꦶꦱ꧈ꦠꦤ꧀ꦥꦱꦩ꧀ꦧꦠ꧀ꦱꦛꦶꦛꦶꦏ꧀꧉ ꧅ꦏꦁꦗꦼꦁꦫꦠꦸꦱꦸꦩ꧀ꦧꦂꦱꦸꦩ꧀ꦧꦂꦱꦏꦗꦧ꧈ꦩꦠꦶꦠꦼꦤꦤ꧀ꦱꦲꦶꦏꦶ꧈ꦏꦺꦴꦮꦼꦩꦼꦟꦸꦂꦱꦼꦠ꧈ꦲꦪꦺꦴꦏꦺꦴꦮꦼꦱꦩ꧀ꦧꦠ꧀ꦠ꧈ꦥꦝꦪꦺꦤ꧀ꦥꦝꦲꦲꦶꦏꦶ꧈ꦒꦂꦮꦤꦶꦁꦫꦗ꧈ꦱꦶꦁꦲꦪꦸꦔ꧀ꦭꦸꦭꦸꦮꦶꦃꦲꦶ꧉꧃ꦮꦶꦱ꧀ꦱꦼꦔꦺꦴꦤꦺꦴꦧꦚ꧀ꦗꦸꦂꦏꦺꦴꦤ꧀ꦢꦸꦂꦚꦁꦤꦒꦫ꧈ꦲꦚ꧀ꦗꦸꦗꦸꦒ꧀ꦭꦤ꧀ꦤꦏꦺꦴꦤ꧀ꦤꦶ꧈ꦲꦶꦁꦏꦕꦏꦩꦪꦤ꧀꧈ꦮꦶꦱ꧀ꦱꦲꦶꦏꦶꦏꦺꦴꦤ꧀ꦝꦲ꧈ꦱꦥꦱꦶꦁꦲꦪꦸꦔꦸꦁꦏꦸꦭ꧀ꦭꦶ꧈ꦩꦁꦱꦸꦭ꧀ꦭꦶꦏꦕ꧈ꦱꦩ꧀ꦥꦸꦤ꧀ꦠꦼꦠꦼꦥ꧀ꦩꦸꦁꦒꦸꦱ꧀ꦠꦶ꧉꧃ꦲꦶꦁꦱꦲꦶꦏꦶꦒꦭꦶꦃꦲꦼꦮꦶꦱ꧀ꦊꦒꦠꦼꦤꦤ꧀꧈ꦏꦺꦴꦕꦥ꧀ꦥꦩꦼꦟꦸꦂꦥꦸꦠꦶꦃ꧈ꦏꦫꦶꦒꦶꦭꦁꦒꦶꦭꦁ꧈ꦭꦪꦺꦴꦤ꧀ꦤꦼꦲꦩꦼꦩꦼꦭꦱ꧀꧈ꦲꦺꦴꦫꦲꦤꦱꦶꦁꦔꦺꦴꦥꦺꦤ꧀ꦤꦶ꧈ꦤꦸꦭꦶꦮꦺꦴꦁꦭꦶꦩ꧈ꦱꦸꦫꦸꦥ꧀ꦫꦸꦚ꧀ꦕꦸꦁꦔꦤ꧀ꦩꦸꦭꦶꦃ꧉
ꦏꦧꦂꦮꦂꦤꦶꦮꦂꦤꦶ꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀ꦦ
꧋ꦱꦱꦏꦶꦠ꧀ꦥꦺꦱ꧀ꦲꦶꦁꦏꦁꦔꦩ꧀ꦧꦃꦠꦤꦃꦱꦸꦤ꧀ꦝꦤ꧀ꦮꦼꦠꦤ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦦꦤꦸꦩ꧀ꦧꦁꦔꦤ꧀꧈ꦱꦕꦼꦭꦏ꧀ꦏꦶꦥꦸꦤ꧀ꦠꦱꦶꦏ꧀ꦩꦭꦪ꧈ꦢꦸꦩꦸꦒꦶꦱꦥꦸꦤꦶꦏꦱꦩ꧀ꦥꦸꦤ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦠꦶꦏ꧀ꦏꦶꦥꦸꦤ꧀ꦩꦭꦶꦃ꧉ꦱꦸꦏꦸꦂ꧉
꧋ꦲꦶꦁꦲꦺꦴꦠꦺꦭ꧀ꦱ꧀ꦭꦩꦼꦠ꧀ꦕꦶꦪꦚ꧀ꦗꦸꦂ꧈ꦮꦺꦴꦤ꧀ꦠꦼꦤ꧀ꦱꦮꦼꦤꦺꦃꦲꦶꦁꦠꦶꦪꦁꦔꦏꦼꦤ꧀ꦤꦩꦏꦗꦶꦔꦸꦱ꧀ꦩꦤ꧀꧈ꦲꦱ꧀ꦭꦶꦱꦏꦶꦁꦦꦏꦭꦺꦴꦁꦔꦤ꧀꧈ꦩꦁꦒꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦲꦺꦴꦠꦺꦭ꧀ꦔꦿꦶꦏꦸꦱꦲꦱꦩ꧀ꦥꦸꦤ꧀ꦲꦩ꧀ꦧꦪꦂꦱꦼꦮꦤ꧀ꦱꦮꦸꦭꦤ꧀ꦧꦧꦂꦥꦶꦱꦤ꧀꧉ꦏꦠꦿꦁꦔꦤ꧀ꦤꦶꦥꦸꦤ꧀ꦏꦗꦶꦮꦲꦸꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦔꦥꦸꦱ꧀ꦱꦶ꧈ꦕꦫꦶꦪꦺꦴꦱ꧀ꦱꦒꦼꦢ꧀ꦲꦔꦼꦤ꧀ꦢꦩ꧀ꦲꦂꦠ꧈ꦱꦶꦤ꧀ꦠꦼꦤ꧀ꦲꦶꦁꦏꦁꦠꦶꦠꦶꦥ꧀꧈ꦲꦂꦠꦤꦶꦥꦸꦤ꧀ꦧꦝꦼꦩꦶꦤ꧀ꦝꦏ꧀ꦏꦛꦃ꧉ꦏꦭꦩ꧀ꦥꦃꦲꦤ꧀ꦏꦛꦃꦠꦶꦪꦁꦠꦶꦠꦶꦥ꧀꧈ꦢꦭꦃꦲꦶꦁꦏꦁꦒꦝꦃꦲꦺꦴꦠꦺꦭ꧀ꦲꦶꦁꦒꦶꦃꦤꦶꦠꦶꦥ꧀ꦥꦏꦼꦤ꧀ꦲꦂꦠ f 70,-꧈ꦤꦔꦶꦁꦮꦸꦱꦤꦤꦶꦥꦸꦤ꧀ꦠꦶꦪꦁꦮꦲꦸꦭꦗꦼꦁꦏꦼꦱꦃꦠꦤ꧀ꦥꦭꦫꦶ꧉
꧋ꦲꦮꦶꦠ꧀ꦱꦏꦶꦁꦠꦸꦩꦶꦤ꧀ꦢꦏ꧀ꦏꦶꦁꦏꦺꦴꦩꦶꦠꦼꦥꦫꦱꦲꦄꦤ꧀ꦲꦸꦩꦠ꧀ꦆꦱ꧀ꦭꦩ꧀꧈ꦲꦶꦁꦱꦥꦸꦤꦶꦏꦠꦸꦩꦿꦥ꧀ꦠꦺꦴꦏꦺꦴꦠꦺꦴꦏꦺꦴꦆꦱ꧀ꦭꦩ꧀ꦲꦶꦁꦨꦠꦮꦶ꧈ꦲꦶꦁꦏꦁꦏꦭꦫꦸꦩꦶꦪꦶꦤ꧀ꦩꦤꦮꦶꦢꦶꦤ꧀ꦠꦼꦤ꧀ꦲꦒꦼꦁꦆꦱ꧀ꦭꦩ꧀ꦧꦺꦴꦠꦼꦤ꧀ꦠꦸꦠꦸꦥ꧀꧈ꦏꦭꦢꦶꦤ꧀ꦠꦼꦤ꧀ꦲꦒꦼꦁꦏꦥꦼꦁꦏꦼꦂꦥꦸꦤꦶꦏꦠꦺꦴꦏꦺꦴꦠꦺꦴꦏꦺꦴꦲꦶꦁꦠꦤꦃꦲꦧꦁ꧈ꦏꦿꦩꦠ꧀꧈ꦱꦼꦤꦺꦤ꧀꧈ꦥꦠꦼꦏꦺꦴꦮꦤ꧀ꦠꦸꦮꦶꦤ꧀ꦥꦏꦺꦴꦗꦤ꧀꧈ꦱꦩꦶꦠꦸꦠꦸꦥ꧀꧉
꧋ꦏꦭꦢꦶꦤ꧀ꦠꦼꦤ꧀ꦩꦊꦩ꧀ꦔꦲꦢ꧀ꦏꦥꦼꦁꦏꦼꦂ꧈ꦠꦶꦪꦁꦤꦩꦩꦃꦩꦸꦢ꧀꧈ꦲꦸꦥ꧀ꦧꦼꦱ꧀ꦠꦶꦂꦫꦶꦁꦏꦺꦴꦩ꧀ꦩꦸꦤꦶꦱ꧀ꦲꦶꦁꦯꦸꦫꦧꦪ꧈ꦏꦼꦕꦼꦥꦼꦁꦮꦺꦴꦤ꧀ꦠꦼꦤ꧀ꦲꦶꦁꦗꦺꦴꦩ꧀ꦧꦁ꧈ꦲꦺꦚ꧀ꦗꦶꦁꦔꦶꦥꦸꦤ꧀ꦭꦗꦼꦁꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦝꦠꦼꦁꦯꦸꦫꦧꦪ꧉
꧋ꦱꦏꦶꦁꦩꦼꦝꦤ꧀ꦏꦮꦂꦠꦺꦴꦱ꧀ꦱꦏꦼꦤ꧀꧈ꦲꦶꦁꦯꦸꦔꦶꦫꦩ꧀ꦥꦃꦩꦼꦤ꧀ꦠꦱ꧀ꦏꦼꦧꦼꦱ꧀ꦩꦺꦤ꧀꧈ꦠꦼꦭꦱ꧀ꦒꦿꦶꦪꦕꦕꦃꦮꦸꦮꦸꦁ 21꧈ꦢꦔꦸꦤꦶꦁꦏꦼꦧꦼꦱ꧀ꦩꦺꦤ꧀ꦔꦤ꧀ꦠꦺꦴꦱ꧀ꦱꦲꦼꦗꦩ꧀꧈ꦏꦥꦶꦠꦸꦤ꧀ꦤꦤ꧀ꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ f 60,000꧉
꧋ꦱꦮꦼꦤꦺꦃꦠꦶꦪꦁꦄꦫꦧ꧀ꦤꦩꦲꦧꦶꦧ꧀ꦲꦸꦩꦂ꧈ꦲꦶꦁꦏꦢꦏ꧀ꦮꦱꦢꦼꦗꦶꦩꦠ꧀ꦱꦫꦤꦏꦁꦒꦼꦚꦫꦱ꧀ꦱꦏꦼꦤ꧀ꦱꦱꦏꦶꦠ꧀꧈ꦏꦕꦼꦥꦼꦁꦥꦸꦭꦶꦱꦶꦲꦶꦁꦦꦱꦸꦫꦸꦮꦤ꧀꧈ꦱꦲꦱꦩ꧀ꦥꦸꦤ꧀ꦢꦶꦥꦸꦤ꧀ꦥꦿꦶꦏ꧀ꦱꦲꦶꦁꦥꦔꦢꦶꦭ꧀ꦭꦤ꧀꧈ꦏꦫꦩ꧀ꦥꦸꦁꦔꦤ꧀ꦤꦶꦥꦸꦤ꧀ꦏꦝꦼꦤ꧀ꦝ f 100꧈ꦲꦸꦠꦮꦶꦏꦲꦸꦏꦸꦩ꧀ꦏꦸꦚ꧀ꦗꦫ 14 ꦢꦶꦤ꧀ꦠꦼꦤ꧀꧉ꦏꦗꦮꦶꦥꦿꦏꦮꦶꦱ꧀ꦮꦲꦸꦲꦸꦒꦶꦏꦢꦏ꧀ꦮꦥꦿꦏꦮꦶꦱ꧀ꦱꦭꦶꦁꦏꦸꦃꦲꦶꦁꦏꦿꦠꦺꦴꦤ꧀ꦦꦱꦸꦫꦸꦮꦤ꧀꧉
꧋ꦲꦶꦁꦥꦕꦶꦤꦤ꧀ꦱꦸꦫꦏꦂꦠꦮꦺꦴꦤ꧀ꦠꦼꦤ꧀ꦠꦶꦪꦁꦩꦶꦠꦺꦴꦁꦠꦺꦴꦤ꧀ꦤꦏꦼꦤ꧀ꦭꦉꦧꦺꦴꦁꦱꦡꦶꦪꦺꦴꦁꦲ꧀ꦮꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦲꦸꦩꦸꦂ 5 ꦠꦲꦸꦤ꧀ꦲꦱꦸꦏꦸꦠꦶꦒ꧈ꦩꦮꦶꦧꦪꦫꦤ꧀ 24 ꦱꦺꦤ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦺꦴꦠꦼꦤ꧀ꦢꦔꦸꦩꦭꦶꦃꦱꦼꦠꦠ꧀ꦱꦶꦪꦸꦤ꧀ꦲꦶꦁꦓꦩ꧀ꦧꦶꦂ꧈ꦮꦺꦭ꧀ꦠꦼꦦꦿꦺꦝꦼꦤ꧀꧈ꦧꦝꦼꦢꦶꦥꦸꦤ꧀ꦲꦒꦼꦁꦔꦏꦼꦤ꧀꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦧꦝꦼꦫꦩ꧀ꦥꦸꦁꦱꦊꦧꦼꦠ꧀ꦠꦶꦥꦸꦤ꧀ꦤꦼꦩ꧀ꦮꦸꦭꦤ꧀꧉꧋ꦲꦶꦁꦱꦊꦧꦼꦠ꧀ꦠꦶꦥꦸꦤ꧀ꦮꦸꦭꦤ꧀ꦝꦼꦱꦺꦩ꧀ꦧꦼꦂꦏꦼꦥꦼꦁꦏꦼꦂ꧈ꦲꦶꦁꦎꦤ꧀ꦢꦼꦂꦄꦥ꧀ꦝꦺꦭꦶꦁꦩꦸꦯꦶꦲꦶꦭꦶꦂ꧈ꦦꦊꦩ꧀ꦧꦁ꧈ꦏꦛꦃꦧꦼꦤ꧈ꦠꦺꦴꦪꦤꦶꦥꦸꦤ꧀ꦔꦤ꧀ꦠꦺꦴꦱ꧀ꦭꦸꦧꦺꦂꦝꦠꦼꦁꦮꦤꦮꦤ꧈ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦧꦶꦔꦸꦁꦔꦶꦁꦱꦶꦩꦱꦶꦩꦲꦶꦁꦮꦤ꧈ꦠꦸꦮꦶꦤ꧀ꦱꦶꦩꦮꦲꦸꦭꦗꦼꦁꦱꦩꦶꦩꦊꦧꦼꦠ꧀ꦲꦶꦁꦥꦏꦩ꧀ꦥꦸꦁꦔꦤ꧀꧈ꦩꦺꦴꦁꦱꦠꦶꦪꦁ 2꧈ꦊꦩ꧀ꦧꦸ 29꧈ꦩꦲꦼꦱ 6 ꦠꦸꦮꦶꦤ꧀ꦩꦲꦼꦤ꧀ꦢ 7꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦓꦸꦥꦼꦂꦤꦸꦂꦙꦼꦤ꧀ꦢꦿꦭ꧀ꦲꦶꦁFransch Indo China ꦲꦸꦒꦶꦏꦒꦸꦁꦔꦤ꧀ꦏꦂꦱꦧꦝꦼꦝꦠꦼꦁꦠꦤꦃꦗꦮꦶ꧈ꦱꦊꦧꦼꦠ꧀ꦠꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦠꦤꦃꦗꦮꦶ꧈ꦲꦶꦁꦏꦁꦢꦔꦸꦧꦝꦼꦊꦉꦩ꧀ꦲꦶꦁꦥꦺꦴꦂꦱ꧀ꦠꦼꦤ꧀ꦭꦤ꧀ꦝꦼꦤ꧀꧉ꦲꦸꦒꦶꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀ꦩꦭꦶꦃ꧈ꦧꦶꦭꦶꦃꦮꦺꦴꦤ꧀ꦠꦼꦤ꧀ꦧꦺꦴꦁꦱꦲꦒꦸꦁꦄꦤꦩ꧀ꦱꦏꦭꦶꦪꦤ꧀ꦲꦸꦒꦶꦧꦝꦼꦔꦗꦮꦶ꧉
꧋ꦠꦸꦮꦤ꧀ F.A.C. Halkema ꦄꦩ꧀ꦠꦼꦤꦂꦲꦶꦁꦏꦁꦠꦏ꧀ꦱꦶꦃꦱꦊꦧꦼꦠ꧀ꦠꦶꦥꦸꦤ꧀ꦥꦼꦂꦭꦺꦴꦭꦺꦴꦥ꧀ꦲꦶꦁꦤꦒꦫꦶꦮꦭꦤ꧀ꦢꦶ꧈ꦫꦸꦩꦶꦪꦶꦤ꧀ꦄꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀ꦡꦼꦩꦼꦁꦒꦸꦁ꧈ꦧꦝꦼꦏꦠꦼꦠꦼꦥ꧀ꦥꦏꦼꦤ꧀ꦢꦢꦺꦴꦱ꧀ꦄꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀ꦠꦺꦂꦧꦼꦱ꧀ꦏꦶꦏ꧀ꦑꦶꦁꦉꦒꦺꦉꦁꦏꦺꦴꦩꦶꦱꦫꦶꦱ꧀꧈ꦠꦸꦩꦿꦥ꧀ꦲꦺꦮꦃꦲꦺꦮꦲꦤ꧀ꦧꦼꦱ꧀ꦠꦶꦂ꧈ꦢꦶꦥꦸꦤ꧀ꦮꦗꦶꦧ꧀ꦧꦏꦼꦤ꧀ꦱꦩ꧀ꦧꦼꦠ꧀ꦏꦭꦶꦪꦤ꧀ꦱꦝꦶꦪꦤ꧀ꦥꦶꦭꦶꦃꦲꦤ꧀ꦉꦒꦺꦤ꧀ꦱꦼꦏꦥ꧀ꦱꦼꦫꦢ꧀ꦗꦗꦲꦤ꧀ꦗꦮꦶꦮꦼꦠꦤ꧀꧉
꧋ꦲꦲꦶꦁꦝꦸꦱꦸꦤ꧀ꦙꦶꦁꦗꦶꦔꦿꦶꦒꦶꦭ꧀꧈ꦖꦶꦩꦲꦶ꧈ꦏꦛꦃꦒꦁꦒꦸꦢꦩꦼꦭ꧀ꦭꦶꦁꦱꦶꦩꦲꦶꦁꦏꦁꦥꦶꦤꦁꦒꦶꦃ꧈ꦱꦥꦿꦶꦏꦶꦠꦶꦠꦶꦪꦁꦢꦺꦫꦺꦁꦱꦒꦼꦢ꧀ꦩꦼꦗꦃꦲꦶꦱꦶꦩꦤꦶꦥꦸꦤ꧀꧉ꦲꦶꦁꦝꦸꦱꦸꦤ꧀ꦖꦶꦧꦧꦠ꧀꧈ꦮꦺꦴꦤ꧀ꦠꦼꦤ꧀ꦩꦼꦤ꧀ꦢ 7 ꦲꦶꦁꦏꦁꦏꦒꦺꦴꦤ꧀ꦝꦺꦴꦭ꧀ꦲꦶꦁꦱꦶꦩ꧉
꧋ꦱꦩ꧀ꦥꦸꦤ꧀ꦭꦁꦏꦸꦁꦏꦮꦤ꧀ꦩꦶꦁꦒꦸꦱꦱꦏꦶꦠ꧀ꦥꦺꦱ꧀ꦠꦸꦮꦸꦃꦲꦶꦁꦯꦸꦫꦏꦂꦠ꧈ꦲꦶꦁꦏꦁꦏꦠꦿꦗꦁꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦱꦏꦮꦤ꧀꧉
