ꦧꦧ꧀ꦠꦠꦤꦺꦤ꧀
꧋ꦩꦺꦴꦁꦱꦏꦥꦶꦠꦸ꧉
꧄ ꦭꦶꦂꦮꦶꦱꦏꦼꦤ꧀ꦠꦂꦩꦫꦸꦠꦶ꧈ ꦤ꧀ꦢꦿꦤꦶꦁꦩꦺꦴꦁꦱꦏꦱꦥ꧀ꦠ꧈ ꦢꦲꦠ꧀ꦩꦮꦺꦃꦲꦱ꧀ꦩꦫꦤꦼ꧈ ꦠꦼꦝꦸꦃꦥꦼꦠꦼꦁꦔꦶꦁꦲꦏꦱ꧈ ꦱꦶꦤꦼꦫꦁꦲꦶꦁꦩꦫꦸꦠ꧈ ꦠꦼꦩꦃꦮꦫꦠꦔꦼꦤ꧀ꦝꦤꦸ꧈ ꦪꦪꦃꦚꦽꦠꦸꦏꦁꦧꦸꦮꦤ꧉ ꧄ ꦱꦸꦩꦼꦫꦁꦔꦶꦁꦲꦔꦶꦤ꧀ꦲꦔꦶꦤ꧀꧈ ꦠꦤ꧀ꦥꦏꦼꦤ꧀ꦝꦠ꧀ꦏꦮꦶꦱ꧀ꦠꦫ꧈ ꦮꦺꦃꦫꦸꦫꦸꦤꦶꦁꦫꦺꦴꦤꦿꦺꦴꦤ꧀ꦤꦤ꧀ꦤꦼ꧈ ꦱꦸꦩꦮꦸꦂꦢꦢꦾꦏꦊꦱ꧈ ꦊꦱꦃꦲꦩꦺꦴꦂꦲꦶꦁꦏꦶꦱ꧀ꦩ꧈ ꦠꦤ꧀ꦩꦼꦤ꧀ꦝꦲꦁꦒꦸꦁꦠꦶꦤꦶꦪꦸꦥ꧀꧈ ꦥꦤꦿꦁꦔꦶꦁꦏꦁꦧꦪꦸꦧꦗꦿ꧈ ꧄ ꦲꦸꦩꦮꦸꦠ꧀ꦏꦺꦴꦩ꧀ꦧꦸꦭ꧀ꦩꦿꦠꦤ꧀ꦤꦶ꧈ ꦩꦮꦺꦴꦂꦊꦧꦸꦤꦶꦁꦏꦁꦏꦶꦱ꧀ꦩ꧈ ꦠꦤ꧀ꦥꦶꦭꦶꦃꦥꦽꦤꦃꦠꦶꦧꦤꦼ꧈ ꦱꦠꦼꦩꦃꦮꦫꦠꦤꦶꦫ꧈ ꦭꦶꦂꦤꦮꦸꦂꦩꦮꦮꦶꦱ꧀ꦮ꧈ ꦲꦶꦁꦥꦸꦮꦫꦢꦢꦾꦠꦸꦮꦸꦃ꧈ ꦱꦫꦱ꧀ꦱꦤ꧀ꦤꦶꦁꦏꦁꦫꦺꦴꦒꦂꦢ꧉ ꧄ ꦮꦠꦸꦏ꧀ꦥꦶꦊꦏ꧀ꦲꦤꦸꦩꦸꦱ꧀ꦱꦶ꧈ ꦏꦼꦏꦼꦱ꧀ꦱꦶꦁꦲꦮꦲꦏꦱ꧈ ꦥꦿꦶꦪꦁꦥꦿꦶꦪꦁꦲꦶꦁꦫꦱꦤꦼ꧈ ꦲꦩꦸꦁꦏꦭꦏꦭꦩꦼꦤ꧀ꦝ꧈ ꦢꦼꦤꦶꦁꦲꦢꦽꦱ꧀ꦱꦶꦁꦮꦂꦱ꧈ ꦏꦁꦫꦸꦫꦸꦃꦥꦶꦤ꧀ꦝꦥꦚꦥꦸ꧈ ꦔ꧀ꦭꦫꦸꦠ꧀ꦏꦁꦉꦉꦒꦼꦢ꧀ꦱꦶꦂꦤ꧉ ꧄ ꦏꦸꦩ꧀ꦥꦸꦭ꧀ꦭꦶꦁꦠꦺꦴꦪꦲꦸꦩꦶꦭꦶ꧈ ꦭꦶꦫꦥ꧀ꦭꦶꦫꦥ꧀ꦧꦧꦚꦏ꧀ꦏꦤ꧀꧈ ꦲꦚ꧀ꦗꦺꦴꦒ꧀ꦩꦫꦶꦁꦏꦭꦶꦒꦼꦝꦼ꧈ ꦠꦼꦩꦃꦏꦭꦶꦠꦤ꧀ꦏꦸꦮꦒꦁ꧈ ꦔꦤ꧀ꦝꦸꦁꦲꦒꦸꦁꦔꦶꦁꦠꦶꦂꦠ꧈ ꦲꦩ꧀ꦧꦭꦸꦢꦒ꧀ꦲꦩ꧀ꦧꦺꦂꦥꦼꦤꦸꦃ꧈ ꦔꦼꦊꦧ꧀ꦲꦶꦁꦱꦕꦏꦼꦠ꧀ꦠꦶꦫ꧉ ꧄ ꦗꦤ꧀ꦩꦲꦭꦺꦴꦏ꧀ꦧꦚ꧀ꦗꦶꦂꦧꦚ꧀ꦗꦶꦂ꧈ ꦗꦤ꧀ꦩꦏꦁꦕꦏꦼꦠ꧀ꦲꦸꦱꦽꦒ꧀ꦒꦤ꧀꧈ ꦠꦤ꧀ꦧꦸꦃꦠꦤ꧀ꦧꦸꦃꦥꦔꦶꦭꦶꦤꦼ꧈ ꦮꦼꦤꦺꦃꦭꦩ꧀ꦥꦃꦲꦶꦫꦺꦁꦠꦶꦂꦠ꧈ ꦤꦫꦗꦁꦱꦮꦃꦝꦝꦭ꧀꧈ ꦠꦤ꧀ꦢꦸꦂꦠꦤ꧀ꦢꦸꦂꦱꦩꦾꦭꦫꦸꦠ꧀꧈ ꦩꦮꦺꦃꦒꦼꦁꦔꦶꦁꦏꦁꦥꦶꦠꦸꦤ꧉ ꧄ ꦩꦸꦁꦠꦸꦩꦿꦥ꧀ꦥꦶꦁꦥꦫꦠꦤꦶ꧈ ꦏꦲꦤꦤ꧀ꦤꦶꦁꦩꦺꦴꦁꦱꦮꦂꦱ꧈ ꦲꦶꦔꦁꦒꦼꦥ꧀ꦤꦸꦒꦿꦲꦒꦼꦝꦼ꧈ ꦠꦤ꧀ꦩꦶꦫꦶꦱ꧀ꦠꦶꦧꦤꦶꦁꦲꦸꦢꦤ꧀꧈ ꦫꦱꦭꦶꦂꦏꦤꦶꦏ꧀ꦩꦠ꧀ꦠꦤ꧀꧈ ꦢꦺꦤꦺꦮꦸꦱ꧀ꦥꦶꦤꦶꦤ꧀ꦠꦢꦔꦸ꧈ ꦲꦾꦁꦮꦂꦱꦩꦿꦶꦃꦠꦸꦩꦸꦫꦸꦤ꧀ꦤ꧉ ꧄ ꦭꦤ꧀ꦏꦤ꧀ꦛꦶꦥꦶꦤꦼꦠꦁꦠꦶꦠꦶ꧈ ꦲꦤꦤꦶꦁꦥꦿꦤꦠꦩꦺꦴꦁꦱ꧈ ꦲꦗꦼꦒ꧀ꦠꦼꦠꦼꦥ꧀ꦠꦸꦩꦶꦧꦤꦼ꧈ ꦩꦂꦩꦫꦶꦮꦸꦱ꧀ꦱꦶꦁꦏꦮꦂꦱꦤ꧀꧈ ꦲꦂꦱꦪꦺꦁꦠꦾꦱ꧀ꦏꦫꦱ꧈ ꦩꦫꦶꦁꦱꦧꦶꦤ꧀ꦔꦼꦤ꧀ꦛꦸꦲꦼꦤ꧀ꦛꦸ꧈ ꦠꦤ꧀ꦮꦼꦒꦃꦠꦸꦩꦤ꧀ꦢꦁꦏꦂꦪ꧉ ꧄ ꦏꦼꦱꦼꦭꦏ꧀ꦤꦚ꧀ꦗꦏ꧀ꦏꦼꦤ꧀ꦮꦶꦤꦶꦃ꧈ ꦲꦔꦤ꧀ꦠꦶꦢꦶꦮꦱꦤꦶꦫ꧈ ꦥꦤ꧀ꦲꦶꦁꦩꦁꦏꦾꦮꦸꦱ꧀ꦩꦁꦱꦤꦼ꧈ ꦱꦸꦩꦼꦧꦂꦤꦺꦁꦱꦮꦃꦮꦿꦠ꧈ ꦢꦺꦤꦺꦲꦤꦤꦶꦁꦠꦶꦂꦠ꧈ ꦲꦶꦁꦏꦁꦏꦼꦭꦺꦴꦢꦏ꧀ꦏꦼꦭꦢꦸꦏ꧀꧈ ꦲꦫꦤ꧀ꦭꦒꦾꦩꦁꦱꦤꦶꦫ꧉ ꧄ ꦤꦔꦶꦁꦮꦠꦼꦏ꧀ꦏꦼꦮꦺꦴꦁꦠꦤꦶꦠꦤ꧀ꦏꦒꦺꦠ꧀ꦲꦤꦤꦶꦁꦠꦶꦂꦠ꧈ ꦏꦁꦔ꧀ꦭꦸꦧꦺꦂꦫꦶꦲꦶꦁꦱꦮꦃꦲꦼ꧈ ꦲꦮꦶꦠ꧀ꦮꦸꦱ꧀ꦲꦫꦤ꧀ꦏꦼꦭꦸꦩꦿꦃ꧈ ꦲꦶꦁꦏꦁꦊꦝꦺꦴꦏ꧀ꦏꦶꦊꦤ꧀ꦤꦤ꧀꧈ ꦤꦔꦶꦁꦩꦤꦮꦮꦸꦱ꧀ꦭꦫꦸꦠ꧀꧈ ꦱꦸꦫꦸꦠ꧀ꦭꦩ꧀ꦥꦃꦲꦼꦏꦁꦠꦶꦂꦠ꧉ ꧄ ꦪꦼꦏ꧀ꦠꦶꦲꦤꦶꦁꦒꦭ꧀ꦭꦶꦊꦩꦶ꧈ ꦥꦶꦒꦸꦤꦏꦒꦶꦭꦒꦶꦭ꧈ ꦩꦿꦶꦁꦲꦫꦶꦠꦼꦩ꧀ꦧꦼꦧꦸꦫꦶꦤꦼ꧈ ꦫꦶꦮꦸꦱ꧀ꦱꦶꦁꦤꦼꦩꦃꦲꦶꦩꦺꦴꦁꦱ꧈ ꦲꦗꦼꦒ꧀ꦲꦮꦤꦶꦁꦏꦶꦱ꧀ꦩ꧈ ꦠꦶꦧꦤꦶꦁꦮꦂꦱꦠꦸꦩꦿꦸꦤ꧀ꦠꦸꦤ꧀꧈ ꦢꦠꦤ꧀ꦩꦮꦶꦩꦶꦭꦶꦃꦩꦺꦴꦁꦱ꧉ ꧄ ꦩꦶꦮꦃꦱꦫꦱ꧀ꦱꦤ꧀ꦤꦶꦁꦱꦏꦶꦠ꧀꧈ ꦏꦁꦱꦸꦩꦼꦫꦁꦩꦫꦁ
