ꦏꦲꦼꦥꦝꦥꦁꦏꦠ꧀ꦝꦼꦮꦼ꧈ꦏꦧꦺꦃꦩꦲꦸꦫꦏ꧀ꦩꦸꦁꦧꦁꦱꦤꦼꦢꦸꦂꦗꦤꦧꦲꦼ꧉ꦢꦼꦊꦔꦼꦤ꧀꧈ꦭꦺꦴ꧈ꦏꦲꦼꦱꦶꦔꦤꦼꦧꦫꦺꦴꦁ꧈ꦧꦿꦁꦏꦁꦔꦤ꧀ꦩꦔꦶꦮ꧈ꦪꦺꦤ꧀ꦲꦏꦸꦏꦧꦺꦃꦔꦸꦧꦼꦁꦔꦶꦒꦸꦩꦸꦏ꧀ꦥꦱꦶꦂꦏꦲꦼ꧈ꦧꦏꦭ꧀ꦏꦼꦥꦼꦛꦸꦏ꧀ꦝꦺꦮꦺꦏ꧀ꦏꦼ꧉
꧋ꦱꦭꦗꦼꦁꦔꦶꦥꦸꦤ꧀ꦏꦸꦭꦱꦢꦪꦭꦗꦼꦁꦔꦸꦧꦼꦁꦔꦶꦒꦸꦩꦸꦏ꧀ꦥꦱꦶꦂꦮꦲꦸ꧈ꦲꦤꦔꦶꦁꦧꦺꦴꦠꦼꦤ꧀ꦏꦼꦠꦶꦔꦭ꧀ꦱꦶꦔꦤꦶꦥꦸꦤ꧀ꦧꦫꦺꦴꦁ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦸꦭꦩꦢꦺꦴꦱ꧀ꦱꦶꦱꦮꦠꦮꦶꦱ꧀ꦢꦔꦸ꧈ꦱꦮꦼꦒ꧀ꦩꦁꦒꦶꦃꦠꦥꦏ꧀ꦫꦃꦫꦃꦲꦺꦁꦒꦭ꧀꧈ꦲꦶꦁꦏꦁꦏꦸꦭꦱꦢꦪꦭꦗꦼꦁꦔ꧀ꦭꦕꦏ꧀꧈ꦮꦶꦮꦶꦠ꧀ꦠꦶꦥꦸꦤ꧀ꦔꦸꦫꦸꦠ꧀ꦲꦶꦁꦏꦁꦱꦠꦸꦁꦒꦭ꧀꧈ꦭꦗꦼꦁꦔꦸꦫꦸꦠ꧀ꦱꦤꦺꦱ꧀ꦱꦶꦥꦸꦤ꧀꧈ꦔꦤ꧀ꦠꦺꦴꦱ꧀ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦒꦸꦩꦸꦤ꧀ꦤꦶꦁꦩꦤꦃꦲꦶꦥꦸꦤ꧀ Orme ꦏꦭꦶꦪꦤ꧀ꦏꦸꦭ꧈ꦥꦿꦺꦴꦥꦼꦱꦺꦴꦂ Higgs ꦠꦤ꧀ꦱꦃꦩꦼꦩ꧀ꦥꦼꦁꦏꦼꦩꦮꦺꦴꦤ꧀꧉ꦱꦉꦁꦥꦿꦺꦴꦥꦼꦱꦺꦴꦂ Higgs ꦢꦔꦸꦢꦔꦸꦲꦶꦕꦭ꧀ꦥꦔꦗꦼꦁꦲꦗꦼꦁꦔꦶꦥꦸꦤ꧀꧈ꦢꦸꦩꦢꦏ꧀ꦏꦤ꧀ꦱꦶꦔꦧꦫꦺꦴꦁꦮꦲꦸꦥꦶꦤꦁꦒꦶꦃꦮꦺꦴꦤ꧀ꦠꦼꦤ꧀ꦱꦊꦧꦼꦠ꧀ꦠꦶꦁꦗꦸꦒꦁꦔꦤ꧀꧉ꦱꦉꦁꦱꦶꦔꦧꦫꦺꦴꦁꦧꦝꦼꦩꦶꦁꦒꦃ꧈ꦏꦸꦭꦱꦢꦪꦭꦗꦼꦁꦚꦚ꧀ꦗꦠꦱꦱꦉꦁꦔꦤ꧀ꦩꦫꦩ꧀ꦧꦃꦫꦩ꧀ꦧꦃ꧉ꦩꦶꦩꦶꦱ꧀ꦱꦠꦸꦁꦒꦭ꧀ꦲꦤꦠꦺꦴꦤ꧀ꦤꦶꦱꦶꦔꦧꦫꦺꦴꦁꦮꦲꦸ꧈ꦠꦤ꧀ꦝꦤꦶꦥꦸꦤ꧀ꦱꦶꦔꦧꦫꦺꦴꦁꦭꦗꦼꦁꦝꦮꦃ꧈ꦲꦤꦔꦶꦁꦭꦗꦼꦁꦠꦔꦶꦩꦭꦶꦃꦏꦤ꧀ꦛꦶꦲꦁꦒꦼꦫꦺꦴ꧉ꦱꦩ꧀ꦥꦸꦤ꧀ꦠꦩ꧀ꦠꦸꦏꦼꦩꦮꦺꦴꦤ꧀꧈ꦲꦶꦁꦏꦁꦔꦺꦔꦶꦁꦔꦶꦮꦲꦸꦩꦶꦩꦶꦱ꧀ꦱꦶꦥꦸꦤ꧀ꦏꦥꦶꦠꦤ꧀ Orme꧈ꦲꦤꦔꦶꦁꦥꦿꦺꦴꦥꦼꦱꦺꦴꦂ Higgs ꦏꦢꦺꦴꦱ꧀ꦲꦢꦠ꧀ꦠꦶꦁꦠꦶꦪꦁꦲꦶꦁꦏꦁꦩꦶꦮꦶꦠꦮꦶꦠ꧀ꦠꦶꦧꦼꦧꦼꦝꦒ꧀ꦤꦶꦏ꧈ꦭꦗꦼꦁꦧꦼꦤ꧀ꦠꦺꦂꦩꦤꦃꦲꦶꦥꦸꦤ꧀꧈ꦱꦲꦲꦔꦁꦒꦼꦥ꧀꧈ꦧꦶꦭꦶꦃꦲꦶꦁꦏꦁꦔꦺꦔꦶꦁꦔꦶꦮꦲꦸꦩꦶꦩꦶꦱ꧀ꦱꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs ꦥꦶꦪꦩ꧀ꦧꦏ꧀꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦧꦺꦴꦠꦼꦤ꧀ꦥꦽꦭꦸꦏꦸꦭꦠꦶꦠꦶꦪꦁꦏꦭꦶꦃꦲꦩꦧꦼꦤ꧀ꦤꦶ꧉
꧋ꦏꦤ꧀ꦛꦶꦉꦏꦲꦺꦴꦱ꧀꧈ꦏꦸꦭꦱꦢꦪꦭꦗꦼꦁꦔ꧀ꦭꦗꦼꦁꦔꦏꦼꦤ꧀ꦔꦺꦴꦪꦏ꧀ꦱꦶꦔꦧꦫꦺꦴꦁꦮꦲꦸ꧈ꦲꦶꦁꦏꦁꦠꦠꦸꦱꦔꦼꦠ꧀꧈ꦔꦤ꧀ꦠꦺꦴꦱ꧀ꦧꦺꦴꦠꦼꦤ꧀ꦱꦒꦼꦢ꧀ꦭꦸꦩꦩ꧀ꦥꦃ꧈ꦤꦩꦸꦁꦲꦁꦒꦼꦉꦁꦔꦶꦏꦸꦭꦱꦢꦪ꧈ꦠꦸꦮꦶꦤ꧀ꦤꦏꦸꦂꦤꦏꦸꦂꦫꦏꦼꦤ꧀ꦱꦸꦏꦸꦤꦶꦥꦸꦤ꧀ꦩꦔꦶꦁꦒꦶꦭ꧀꧈ꦩꦶꦩꦶꦱ꧀ꦲꦶꦁꦏꦁꦤꦺꦴꦩꦼꦂꦏꦭꦶꦃꦭꦁꦏꦸꦁꦠꦶꦠꦶꦱ꧀ꦲꦁꦱꦭ꧀ꦭꦶꦥꦸꦤ꧀꧈ꦗꦭꦂꦫꦤ꧀ꦱꦶꦔꦤꦶꦥꦸꦤ꧀ꦧꦫꦺꦴꦁꦭꦗꦼꦁꦝꦮꦃꦥꦼꦗꦃ꧉
꧋ꦥꦿꦺꦴꦥꦼꦱꦺꦴꦂ Higgs ꦲꦚ꧀ꦗꦼꦔꦺꦏ꧀꧇ꦲꦪꦺꦴꦱꦶꦔꦧꦫꦺꦴꦁꦏꦲꦼꦥꦝꦢꦶꦏꦼꦭꦺꦠ꧀ꦠꦶ꧈ꦝꦺꦮꦺꦏ꧀ꦏꦼꦮꦶꦱ꧀ꦲꦔ꧀ꦭꦶꦁꦒꦶꦃꦲꦶꦲꦮꦏ꧀ꦏꦸ꧈ꦭꦤ꧀ꦲꦏꦸꦤꦼꦢꦾꦔ꧀ꦭꦶꦁꦒꦶꦃꦲꦶꦲꦮꦏꦼꦏꦥꦶꦁꦥꦶꦫꦁꦥꦶꦫꦁ꧉ꦏꦸꦭꦱꦢꦪꦭꦗꦼꦁꦲꦩꦶꦮꦶꦠ꧀ꦠꦶꦔꦼꦭꦺꦠ꧀ꦠꦶꦱꦶꦔꦧꦫꦺꦴꦁꦮꦲꦸ꧈ꦱꦤꦢꦾꦤ꧀ꦠꦏꦸꦭꦱꦩ꧀ꦥꦸꦤ꧀ꦱꦸꦏꦥꦶꦠꦼꦢꦃꦱꦸꦥꦢꦺꦴꦱ꧀ꦲꦺꦁꦒꦭ꧀ꦭꦮꦁꦱꦸꦭ꧀ꦝꦠꦼꦁꦥꦏꦩ꧀ꦥꦸꦁꦔꦤ꧀꧈ꦲꦮꦶꦠ꧀ꦏꦭꦥꦸꦤꦶꦏꦏꦸꦭꦔꦸꦮꦠꦺꦴꦱ꧀ꦱꦏꦼꦤ꧀ꦝꦠꦼꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦲꦮ꧉ꦥꦔꦼꦭꦺꦠ꧀ꦠꦶꦥꦸꦤ꧀ꦭꦩꦶ꧈ꦗꦭꦂꦫꦤ꧀ꦤꦩꦸꦁꦏꦸꦭꦥꦶꦪꦩ꧀ꦧꦏ꧀ꦲꦶꦁꦏꦁꦩꦔꦽꦠꦺꦴꦱ꧀ꦕꦫꦤꦶꦥꦸꦤ꧀ꦠꦶꦪꦁꦔꦼꦭꦺꦠ꧀ꦠꦶꦏꦼꦮꦤ꧀ꦥꦸꦤꦶꦏ꧈ꦭꦤ꧀ꦗꦭꦂꦫꦤ꧀ꦧꦼꦤ꧀ꦠꦺꦂꦱꦔꦼꦠ꧀꧈ꦲꦁꦒꦺꦤ꧀ꦤꦶꦥꦸꦤ꧀ꦔꦼꦭꦺꦠ꧀ꦠꦶꦲꦶꦁꦒꦶꦃꦩꦁꦏꦼꦭ꧀ꦭꦏꦼꦤ꧀꧉
꧋ꦢꦔꦸꦢꦔꦸꦲꦶꦁꦒꦶꦃꦫꦩ꧀ꦥꦸꦁ꧈ꦮꦕꦸꦕꦭ꧀ꦭꦶꦥꦸꦤ꧀ꦭꦗꦼꦁꦏꦒꦤ꧀ꦠꦸꦁꦔꦏꦼꦤ꧀ꦲꦶꦁꦱꦚ꧀ꦗꦠ꧈ꦲꦶꦁꦏꦁꦭꦗꦼꦁꦏꦥꦶꦏꦸꦭ꧀ꦒꦼꦒꦼꦤ꧀ꦠꦺꦴꦱ꧀ꦱꦤ꧀ꦲꦶꦁꦠꦶꦪꦁꦏꦭꦶꦃ꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦸꦭꦱꦢꦪꦭꦗꦼꦁꦱꦩꦶꦔꦺꦴꦩ꧀ꦧꦼꦠꦺꦴꦪꦱꦏꦶꦁꦒꦼꦤ꧀ꦢꦸꦭ꧀ꦥꦱꦔꦺꦴꦤ꧀꧈ꦩꦭꦃꦏꦸꦭꦱꦸꦩꦼꦉꦥ꧀꧈ꦧꦶꦭꦶꦃꦥꦿꦺꦴꦥꦼꦱꦺꦴꦂ Higgs ꦥꦸꦤꦶꦏ꧈ꦔꦸꦩ꧀ꦧꦃꦫꦃꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦫꦲꦶꦠꦸꦮꦶꦤ꧀ꦲꦶꦁꦠꦔꦤ꧀꧈ꦩꦮꦶꦠꦺꦴꦪꦤꦶꦥꦸꦤ꧀ꦱꦔꦸꦮꦲꦸ꧉ꦱꦭꦗꦼꦁꦔꦶꦥꦸꦤ꧀ꦏꦸꦭꦱꦢꦪꦭꦗꦼꦁꦧꦶꦝꦭ꧀ꦮꦁꦱꦸꦭ꧀ꦝꦠꦼꦁꦥꦏꦩ꧀ꦥꦸꦁꦔꦤ꧀꧈ꦲꦤꦔꦶꦁꦱꦤꦢꦾꦤ꧀ꦏꦸꦭꦱꦢꦪꦔꦿꦸꦩꦲꦺꦴꦱ꧀ꦱꦶꦱꦸꦩꦼꦉꦥ꧀ꦪꦼꦏ꧀ꦠꦺꦴꦱ꧀ꦝꦠꦼꦁꦩꦂꦒꦶꦤꦶꦥꦸꦤ꧀꧈ꦲꦺꦮꦢꦺꦤꦺꦠꦼꦠꦼꦭꦱꦔꦼꦠ꧀꧈ꦧꦶꦭꦶꦃꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦒꦝꦃꦥꦔꦶꦤ꧀ꦠꦼꦤ꧀ꦲꦶꦤ꧀ꦠꦼꦤ꧀ꦏꦼꦢꦃꦝꦠꦼꦁꦥꦸꦤ꧀ꦢꦶꦤꦼꦂꦫꦶꦁꦭꦩ꧀ꦥꦃꦮꦲꦸ꧈ꦗꦭꦂꦫꦤ꧀ꦏꦭꦥꦁꦏꦠ꧀ꦠꦶꦥꦸꦤ꧀ꦏꦼꦱꦼꦱ꧈ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦁꦒꦝꦃꦥꦶꦏꦶꦫꦤ꧀ꦲꦩ꧀ꦧꦼꦏ꧀ꦠꦏꦺꦴꦩ꧀ꦥꦱ꧀꧈ꦢꦺꦤꦺꦱꦽꦔꦼꦔꦼꦲꦶꦁꦏꦁꦥꦢꦠ꧀ꦠꦤ꧀ꦱꦺꦴꦏ꧀ꦏꦸꦭꦲꦁꦒꦼꦥꦤ꧀ꦢꦺꦴꦩꦤ꧀꧈ꦏꦭꦥꦸꦤꦶꦏꦔꦸꦩ꧀ꦥꦼꦠ꧀ꦮꦺꦴꦤ꧀ꦠꦼꦤ꧀ꦱꦮꦶꦁꦏꦶꦔꦶꦁꦥꦼꦝꦸꦠ꧀ꦲꦶꦁꦏꦁꦔꦤꦺꦃꦲꦤꦺꦃꦲꦶꦥꦸꦤꦶꦏ꧉ꦥꦸꦠꦸꦱ꧀ꦱꦶꦁꦉꦩ꧀ꦧꦒ꧀꧈ꦏꦸꦭꦱꦢꦪꦭꦗꦼꦁꦮꦁꦱꦸꦭ꧀ꦝꦠꦼꦁꦒꦸꦩꦸꦏ꧀ꦥꦱꦶꦂꦥꦁꦒꦼꦤ꧀ꦤꦤ꧀ꦤꦶꦥꦸꦤ꧀ꦤꦭꦶꦏꦏꦸꦭꦱꦢꦪꦩꦼꦗꦃꦲꦶꦱꦶꦔꦧꦫꦺꦴꦁꦮꦲꦸ꧈ꦱꦭꦗꦼꦁꦔꦶꦥꦸꦤ꧀ꦧꦝꦼꦔꦼꦠꦸꦠ꧀ꦠꦲꦏꦼꦤ꧀ꦠꦥꦏ꧀ꦏꦶꦁꦱꦸꦏꦸꦏꦸꦭꦱꦢꦪꦲꦶꦁꦔꦗꦼꦁ꧉ꦲꦶꦁꦏꦁꦩꦏꦠꦼꦤ꧀ꦮꦲꦸꦱꦗꦏ꧀ꦏꦶꦥꦸꦤ꧀ꦠꦶꦤ꧀ꦢꦏ꧀ꦥꦿꦱꦗꦱꦔꦼꦠ꧀꧈ꦗꦭꦂꦫꦤ꧀ꦱꦏꦶꦁꦔꦿꦶꦏꦸꦠꦼꦧꦶꦃꦲꦶꦁꦒꦸꦩꦸꦏ꧀ꦮꦲꦸꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ꦱꦠꦼꦔꦃꦥꦭ꧀꧉
꧋ꦱꦉꦁꦭꦩ꧀ꦥꦃꦏꦸꦭꦏꦤ꧀ꦛꦶꦠꦼꦠꦼꦏꦼꦤ꧀ꦤꦤ꧀꧈ꦗꦭꦂꦫꦤ꧀ꦮꦕꦸꦕꦭ꧀ꦭꦶꦁꦱꦶꦔꦧꦫꦺꦴꦁꦮꦲꦸꦲꦮꦿꦠ꧀ꦱꦔꦼꦠ꧀꧈ꦱꦢꦸꦩꦸꦒꦶꦤꦶꦁꦒꦸꦩꦸꦏ꧀ꦲꦶꦁꦏꦁꦏꦱꦼꦢꦾꦏ꧀ꦲꦏꦼꦤ꧀꧈ꦠꦼꦠꦼꦭꦥꦸꦤꦶꦏꦢꦼꦢꦼꦒꦸꦩꦸꦏ꧀ꦏꦶꦥꦸꦤ꧀꧉ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦏꦸꦭꦚꦸꦩꦼꦉꦥ꧀ꦥꦶꦧꦶꦭꦶꦃꦏꦸꦭꦱꦢꦪꦏꦼꦭꦶꦤ꧀ꦠꦸ꧈ꦭꦗꦼꦁꦱꦩꦶꦉꦉꦩ꧀ꦧꦒ꧀ꦒꦤ꧀꧈ꦭꦒꦺꦏ꧀ꦒꦸꦩꦸꦏ꧀ꦥꦸꦤ꧀ꦢꦶ꧈ꦏꦼꦢꦃꦲꦶꦥꦸꦤ꧀ꦱꦲꦭꦗꦼꦁꦔꦼꦤꦼꦂꦲꦶꦁꦥꦽꦤꦃꦱꦤꦺꦱ꧀꧈ꦲꦤꦔꦶꦁꦥꦶꦤꦁꦒꦶꦃꦲꦶꦥꦸꦤ꧀ꦱꦩꦶꦏꦼꦩꦮꦺꦴꦤ꧀꧉
꧋ꦢꦢꦺꦴꦱ꧀ꦏꦭꦥꦸꦤꦶꦏ꧈ꦏꦸꦭꦱꦢꦪꦱꦩꦶꦏꦼꦱꦱꦂꦮꦺꦴꦤ꧀ꦠꦼꦤ꧀ꦲꦶꦁꦱꦒꦤ꧀ꦠꦼꦤ꧀ꦮꦼꦝꦶ꧉
꧇꧔꧇
꧋ꦥꦿꦺꦴꦥꦼꦱꦺꦴꦂ Higgs ꦮꦶꦕꦤ꧀ꦠꦼꦤ꧀ꦏꦩꦶꦱꦺꦴꦱꦺꦴꦊꦤ꧀꧇ꦏꦁꦲꦤ꧀ꦢꦢꦺꦏ꧀ꦲꦏꦼꦱꦧꦧ꧀꧈ꦲꦶꦏꦶꦲꦺꦴꦫꦭꦶꦪ꧈ꦲꦩꦂꦒꦒꦸꦩꦸꦏ꧀ꦒꦸꦩꦸꦏ꧀ꦥꦚꦏꦶꦠ꧀ꦲꦶꦏꦸꦫꦸꦥꦤꦼꦥꦝꦧꦲꦼ꧈ꦏꦪꦢꦼꦤꦼꦩꦸꦠꦾꦫꦏꦭꦸꦁꦔꦶꦁꦧꦁꦏꦼꦒꦫꦶꦁ꧈ꦢꦢꦶꦲꦶꦪꦲꦔꦺꦭ꧀ꦧꦔꦼꦠ꧀ꦲꦁꦒꦺꦴꦤ꧀ꦤꦶꦁꦲꦉꦥ꧀ꦩꦼꦫꦸꦃꦲꦶꦱꦶꦗꦶꦱꦶꦗꦶꦤꦼ꧉Adams꧈ꦒꦼꦤ꧀ꦢꦸꦭ꧀ꦏꦸꦮꦶꦲꦸꦭꦸꦁꦤ꧈ꦲꦮꦶꦠ꧀ꦔꦼꦭꦏ꧀ꦏꦸꦧꦔꦼꦠ꧀꧉
꧋ꦏꦸꦭꦲꦩꦁꦱꦸꦭ꧀ꦭꦶꦕꦼꦏꦏ꧀꧇ꦲꦺꦴꦫꦏꦼꦤ꧈ꦲꦮꦶꦠ꧀ꦱꦝꦼꦭꦲꦼꦁꦏꦱ꧀ꦧꦲꦼꦏꦺꦴꦮꦼꦧꦏꦭ꧀ꦔꦼꦭꦏ꧀ꦩꦤꦺꦃ꧉
꧋ꦥꦿꦺꦴꦥꦼꦱꦺꦴꦂ Higgs ꦥꦶꦠꦏꦺꦤ꧀꧇ꦭꦺꦴꦲꦥꦏꦉꦥ꧀ꦩꦸ꧉ꦎ꧈ꦲꦶꦪ꧈ꦲꦏꦸꦮꦶꦱ꧀ꦔꦽꦠꦶ꧉ꦲꦤꦔꦶꦁꦏꦁꦩꦁꦏꦺꦴꦤꦺꦴꦏꦸꦮꦶꦫꦏ꧀ꦲꦺꦴꦩꦺꦴꦁꦏꦺꦴꦱꦺꦴꦁ꧈ꦮꦺꦴꦁ Zeu ꦫꦏ꧀ꦲꦶꦪꦧꦏꦭ꧀ꦲꦁꦒꦺꦴꦭꦺꦏ꧀ꦏꦶ꧈ꦕꦶꦭꦏꦕꦶꦭꦏꦤꦼꦲꦏꦸꦏꦧꦺꦃꦏꦸꦢꦸꦔꦼꦤ꧀ꦠꦺꦤꦶꦱꦱꦸꦫꦸꦥ꧀ꦥꦶꦁꦱꦽꦔꦼꦔꦼ꧉
꧋ꦏꦭꦤꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀ꦥꦸꦤꦶꦏ꧈ꦲꦮꦤꦶꦥꦸꦤ꧀ꦭꦗꦼꦁꦏꦼꦧꦏ꧀ꦱꦸꦮꦫꦲꦩ꧀ꦧꦽꦔꦼꦔꦼꦁꦔꦤꦺꦃꦲꦤꦺꦃꦲꦶ꧈ꦲꦶꦁꦏꦁꦧꦺꦴꦠꦼꦤ꧀ꦱꦒꦼꦢ꧀ꦢꦶꦥꦸꦤ꧀ꦕꦶꦛꦏ꧀ꦲꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦱꦼꦱꦼꦫꦠ꧀ꦠꦤ꧀꧈ꦭꦤ꧀ꦱꦧꦧ꧀ꦱꦧꦧ꧀ꦧꦶꦥꦸꦤ꧀ꦱꦏꦶꦁꦒꦼꦒꦺꦴꦱꦺꦴꦏ꧀ꦏꦤ꧀ꦤꦶꦁꦥꦱꦶꦂꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦪꦸꦠ꧉ꦏꦸꦭꦱꦢꦪꦭꦗꦼꦁꦱꦩꦶꦤꦺꦴꦭꦺꦃ꧈ꦱꦸꦩꦼꦢꦾꦚꦠꦏ꧀ꦲꦏꦼꦤ꧀꧈ꦱꦏꦶꦁꦥꦸꦤ꧀ꦢꦶꦥꦶꦤꦁꦏꦤꦶꦁꦱꦸꦮꦫꦮꦲꦸ꧈ꦱꦲꦱꦏꦶꦁꦏꦠꦼꦧꦶꦃꦲꦤ꧀ꦭꦗꦼꦁꦱꦸꦩꦼꦉꦥ꧀꧈ꦮꦺꦴꦤ꧀ꦠꦼꦤ꧀ꦩꦼꦒꦱꦏꦭꦁꦏꦸꦁꦏꦤ꧀ꦢꦼꦭ꧀ꦱꦔꦼꦠ꧀꧈ꦲꦩꦸꦫꦸꦒ꧀ꦒꦶꦏꦤ꧀ꦛꦶꦫꦶꦏꦠ꧀ꦱꦔꦼꦠ꧀꧈ꦭꦤ꧀ꦢꦶꦥꦸꦤ꧀ꦥꦔꦗꦼꦁꦔꦶꦲꦸꦤ꧀ꦢꦼꦂꦫꦤ꧀ꦲꦔꦶꦤ꧀꧉ꦥꦿꦺꦴꦥꦼꦱꦺꦴꦂ Higgs ꦲꦶꦁꦏꦁꦫꦲꦶꦤꦶꦥꦸꦤ꧀ꦱꦸꦭꦏ꧀ꦲꦧꦿꦶꦠ꧀꧈ꦲꦤꦔꦶꦁꦭꦗꦼꦁꦱꦮꦠꦮꦶꦱ꧀ꦥꦸꦕꦼꦠ꧀꧈ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦮꦼꦭ꧈ꦥꦿꦏꦫꦮꦼꦝꦶ꧈ꦱꦸꦱꦃꦲꦶꦏꦶ꧉ꦪꦏꦸꦮꦶꦥꦏꦺꦴꦭꦺꦃꦲꦼꦮꦺꦴꦁꦏꦶꦤꦺꦏ꧀ꦲꦉꦥ꧀ꦤꦼꦥ꧀ꦱꦸꦧꦲꦼ꧉ꦲꦺꦴꦫ Adams꧈ꦲꦶꦏꦶꦫꦏ꧀ꦱꦭꦃꦩꦸ꧈ꦗꦭꦂꦫꦤ꧀ꦮꦶꦔꦶꦱꦺꦴꦉꦲꦺꦴꦫꦏꦭꦮꦤ꧀ꦱꦼꦤꦼꦁꦔꦶꦁꦲꦠꦶꦏꦸ꧈ꦏꦺꦴꦮꦼꦲꦤ꧀ꦢꦺꦴꦏꦺꦴꦏ꧀ꦏꦶꦲꦸꦪꦃꦲꦤꦲꦶꦁꦥꦔꦤ꧀ꦏꦸ(ꦥꦿꦺꦴꦥꦼꦱꦺꦴꦂ Higgs ꦥꦸꦤꦶꦏꦱꦗꦠꦺꦴꦱ꧀ꦱꦶꦥꦸꦤ꧀ꦒꦸꦒꦺꦴꦤ꧀ꦠꦸꦲꦺꦴꦤ꧀ꦱꦔꦼꦠ꧀꧈ꦲꦶꦁꦏꦁꦩꦏꦠꦼꦤ꧀ꦥꦸꦤꦶꦏꦩꦶꦭꦔꦤꦺꦃꦲꦤꦺꦃꦲꦶ꧈ꦲꦶꦔꦠꦱ꧀ꦱꦶꦥꦸꦤ꧀ꦠꦶꦪꦁꦲꦶꦁꦒꦶꦭ꧀ꦏꦮꦿꦸꦃꦲꦶꦥꦸꦤ꧀ꦩꦏꦠꦼꦤ꧀)ꦏꦥꦿꦶꦪꦼꦱꦲꦶꦏꦶꦥꦺꦴꦏꦭ꧀ꦏꦸꦏꦧꦺꦃ꧈ꦲꦥꦲꦺꦴꦫꦧꦼꦕꦶꦏ꧀ꦲꦔ꧀ꦒ꧀ꦭꦼꦛꦏ꧀ꦲꦤꦲꦶꦁꦱꦶꦱꦶꦃꦲꦶꦁꦒꦸꦩꦸꦏ꧀ꦏꦤꦧꦲꦼꦔꦤ꧀ꦠꦶꦥꦿꦏꦫꦤꦼꦭꦶꦮꦠ꧀꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
