ꦲꦶꦥꦔꦿꦲꦺꦴꦱ꧀꧈ꦧꦶꦭꦶꦃꦱꦶꦤ꧀ꦠꦼꦤ꧀ꦤꦏꦼꦩꦮꦺꦴꦤ꧀ꦱꦒꦼꦢ꧀ꦥꦥꦁꦒꦶꦃꦲꦤ꧀ꦏꦭꦶꦪꦤ꧀ꦥꦫꦥꦔꦒꦼꦁꦔꦶꦁꦤꦒꦫꦶ꧉ꦱꦢꦪꦮꦲꦸ꧈ꦠꦸꦩꦿꦥ꧀ꦠꦶꦠꦶꦪꦁ꧈ꦲꦶꦁꦏꦁꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦤꦶꦥꦸꦤ꧀ꦥꦶꦪꦩ꧀ꦧꦏ꧀ꦧꦺꦴꦠꦼꦤ꧀ꦲꦥꦁꦏꦠ꧀ꦲꦒꦼꦁ꧈ꦱꦩ꧀ꦥꦸꦤ꧀ꦠꦼꦩ꧀ꦠꦸꦲꦢꦩꦼꦭ꧀ꦒꦸꦩꦸꦤ꧀ꦤꦶꦁꦩꦤꦃꦲꦶꦥꦸꦤ꧀꧈ꦲꦤꦔꦶꦁꦲꦶꦁꦏꦁꦩꦏꦠꦼꦤ꧀ꦮꦲꦸꦧꦺꦴꦠꦼꦤ꧀ꦊꦉꦱ꧀ꦧꦧꦂꦥꦶꦱꦤ꧀꧉ꦏꦮꦺꦴꦤ꧀ꦠꦼꦤ꧀ꦤꦤ꧀ꦥꦢꦶꦤ꧀ꦠꦼꦤ꧀ꦤꦤ꧀ꦲꦶꦁꦏꦁꦱꦪꦼꦏ꧀ꦠꦺꦴꦱ꧀꧈ꦥꦸꦤꦶꦏꦥꦫꦲꦸꦠꦸꦱ꧀ꦱꦤ꧀ꦮꦲꦸꦧꦺꦴꦠꦼꦤ꧀ꦱꦩꦶꦲꦔꦸꦤꦶꦁꦔꦤꦶ꧉ꦭꦤ꧀ꦠꦸꦩꦿꦥ꧀ꦠꦶꦠꦶꦪꦁ꧈ꦲꦶꦁꦏꦁꦢꦸꦢꦸꦤꦸꦁꦱꦲꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦔꦿꦶꦏꦸ꧈ꦲꦁꦒꦺꦤ꧀ꦤꦶꦥꦸꦤ꧀ꦱꦒꦼꦢ꧀ꦥꦥꦁꦒꦶꦃꦲꦤ꧀ꦏꦭꦶꦪꦤ꧀ꦥꦔꦒꦼꦁꦔꦶꦁꦤꦒꦫꦶ꧈ꦭꦁꦏꦸꦁꦲꦔꦺꦭ꧀ꦠꦶꦤꦶꦩ꧀ꦧꦁꦏꦭꦶꦪꦤ꧀ꦄꦩ꧀ꦠꦼꦤꦂꦲꦶꦤ꧀ꦢꦶꦪꦲꦶꦁꦥꦸꦤ꧀ꦢꦶꦏꦼꦩꦮꦺꦴꦤ꧀꧉
꧋ꦠꦶꦠꦶꦪꦁꦏꦺꦴꦩ꧀ꦩꦸꦤꦶꦱ꧀ꦱꦏꦶꦁꦱꦗꦮꦶꦤꦶꦁꦤꦒꦫꦶꦫꦸꦱ꧀ꦲꦶꦁꦏꦁꦱꦩꦶꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦥꦽꦭꦸꦲꦩꦶꦒꦠꦺꦴꦱ꧀ꦱꦏꦼꦤ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦤꦶꦥꦸꦤ꧀꧈ꦥꦸꦤꦶꦏꦲꦶꦁꦏꦁꦏꦛꦃꦱꦼꦱꦼꦉꦥ꧀ꦥꦤ꧀ꦤꦶꦥꦸꦤ꧀ꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦔꦿꦶꦏꦸꦲꦶꦁꦒꦶꦃꦤꦩꦸꦁꦱꦏꦼꦝꦶꦏ꧀ꦱꦔꦼꦠ꧀꧉ꦮꦺꦴꦤ꧀ꦠꦼꦤ꧀ꦲꦶꦁꦏꦶꦛꦩꦺꦴꦱ꧀ꦏꦺꦴꦠꦸꦮꦤ꧀ Baars ꦲꦸꦒꦶꦲꦱꦿꦶꦁꦥꦥꦁꦒꦶꦃꦲꦤ꧀ꦏꦭꦶꦪꦤ꧀ꦱꦼꦩꦲꦎꦤ꧀ꦠꦸꦮꦶꦤ꧀ꦯꦤꦱꦲꦠꦸꦮꦤ꧀ Baars ꦠꦤ꧀ꦱꦃꦒꦸꦩꦸꦤ꧀꧈ꦢꦺꦤꦺꦏꦭꦶꦃꦏꦭꦶꦃꦲꦶꦥꦸꦤ꧀ꦠꦼꦏꦤꦩꦸꦁꦱꦏꦼꦝꦶꦏ꧀ꦱꦔꦼꦠ꧀ꦱꦼꦱꦼꦉꦥ꧀ꦥꦤ꧀ꦤꦶꦥꦸꦤ꧀ꦧꦧ꧀ꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦤꦒꦫꦶꦫꦸꦱ꧀꧉ꦠꦶꦪꦁꦏꦏꦭꦶꦃꦮꦲꦸꦱꦧꦼꦤ꧀ꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦱꦩꦶꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦤ꧀ꦠꦺꦴꦂꦫꦶꦁꦥꦏꦼꦩ꧀ꦥꦭ꧀ꦭꦤ꧀ꦏꦺꦴꦩ꧀ꦩꦸꦤꦶꦱ꧀ꦲꦶꦁꦏꦁꦤꦸꦁꦒꦶꦭ꧀ꦢꦩꦼꦭ꧀꧈ꦲꦶꦁꦔꦿꦶꦏꦸꦥꦢꦩꦼꦭ꧀ꦭꦤ꧀ꦤꦶꦥꦸꦤ꧀ꦲꦩꦲꦺꦴꦱ꧀ꦱꦶꦏꦺꦴꦫꦤ꧀ꦱꦲꦲꦤꦩ꧀ꦥꦺꦤ꧀ꦤꦶꦱꦼꦫꦠ꧀ꦱꦼꦫꦠ꧀꧉ꦗꦭꦂꦫꦤ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦩꦲꦺꦴꦱ꧀ꦱꦼꦫꦠ꧀ꦱꦼꦫꦠ꧀ꦏꦧꦂꦮꦲꦸ꧈ꦭꦗꦼꦁꦱꦩꦶꦲꦁꦱꦭ꧀ꦥꦮꦂꦠꦺꦴꦱ꧀ꦮꦂꦤꦶꦮꦂꦤꦶꦱꦏꦶꦁꦲꦶꦤ꧀ꦢꦶꦪ꧈ꦲꦶꦁꦏꦁꦤꦸꦤ꧀ꦠꦼꦤ꧀ꦱꦩꦶꦢꦶꦥꦸꦤ꧀ꦥꦼꦛꦶꦏ꧀ꦏꦶꦱꦲꦭꦗꦼꦁꦏꦢꦩꦼꦭ꧀ꦏꦢꦺꦴꦱ꧀ꦢꦼꦤꦼꦱꦼꦫꦠ꧀ꦥꦭꦥꦸꦂꦫꦤ꧀꧉ꦥꦩꦁꦒꦺꦤ꧀ꦤꦶꦥꦸꦤ꧀ꦱꦱꦉꦁꦔꦤ꧀ꦏꦭꦶꦪꦤ꧀ꦏꦺꦴꦚ꧀ꦕꦏꦚ꧀ꦕꦤꦶꦥꦸꦤ꧀ꦲꦶꦁꦏꦁꦱꦩꦶꦲꦱ꧀ꦭꦶꦱꦏꦶꦁꦤꦒꦫꦶꦱꦤꦺꦱ꧀ꦲꦶꦁꦱꦗꦮꦶꦤꦶꦁꦤꦒꦫꦶꦫꦸꦱ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦱꦭꦃꦱꦠꦸꦁꦒꦶꦭ꧀ꦭꦶꦁꦲꦺꦴꦠꦺꦭ꧀꧉ꦢꦢꦺꦴꦱ꧀ꦒꦼꦱꦁꦔꦶꦥꦸꦤ꧀ꦮꦲꦸꦥꦿꦱꦱꦠ꧀ꦩꦶꦪꦩ꧀ꦧꦏ꧀ꦏꦶ꧉ꦝꦠꦼꦁꦥꦿꦤꦠꦤꦶꦥꦸꦤ꧀ꦕꦫꦫꦸꦱ꧀ꦲꦶꦁꦏꦁꦱꦗꦠꦶ꧈ꦲꦶꦁꦒꦶꦭ꧀ꦲꦶꦁꦒꦶꦭ꧀ꦭꦶꦁꦱꦼꦱꦼꦉꦥ꧀ꦥꦤ꧀ꦤꦶꦥꦸꦤ꧀ꦲꦶꦁꦒꦶꦃꦤꦩꦸꦁꦱꦏꦶꦁꦱꦼꦱꦼꦫꦠ꧀ꦠꦤ꧀ꦏꦼꦩꦮꦺꦴꦤ꧀꧈ꦲꦶꦁꦏꦁꦩꦏꦠꦼꦤ꧀ꦮꦲꦸꦢꦼꦢꦼꦱꦠꦸꦁꦒꦶꦭ꧀ꦭꦶꦁꦥꦱꦼꦏ꧀ꦱꦺꦤ꧀꧈ꦧꦶꦭꦶꦃꦭꦗꦼꦁꦱꦩꦶꦚꦸꦩꦼꦉꦥ꧀ꦥꦶꦏꦢꦺꦴꦱ꧀ꦥꦸꦤ꧀ꦢꦶꦥꦤꦶꦤ꧀ꦢꦏ꧀ꦏꦶꦥꦸꦤ꧀꧈ꦲꦸꦠꦮꦶꦩꦭꦶꦃꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦔꦿꦶꦏꦸꦲꦶꦁꦏꦁꦱꦪꦼꦏ꧀ꦠꦺꦴꦱꦾꦼꦏ꧀ꦠꦺꦴꦱ꧀ꦱꦶꦥꦸꦤ꧀꧈ꦱꦲꦮꦺꦴꦃꦲꦶꦁꦥꦿꦤꦠꦤ꧀ꦮꦲꦸ꧉ꦩꦼꦁꦒꦃꦱꦼꦱꦼꦉꦥ꧀ꦥꦤ꧀ꦤꦶꦥꦸꦤ꧀ꦠꦸꦩꦿꦥ꧀ꦥꦔꦸꦮꦱꦤ꧀ꦤꦶꦁꦤꦒꦫꦶꦲꦚꦼꦥꦼꦁꦏꦧꦸꦢꦪꦤ꧀꧈ꦫꦢꦿꦢ꧀ꦠꦸꦩꦿꦥ꧀ꦲꦺꦏꦺꦴꦤꦺꦴꦩꦶ꧈ꦥꦸꦤꦥꦩꦭꦶꦃꦩꦼꦁꦒꦃꦲꦶꦁꦥꦿꦤꦠꦤ꧀ꦤꦶꦁꦏꦺꦴꦩ꧀ꦩꦸꦤꦶꦱ꧀꧈ꦥꦸꦤꦶꦏꦧꦺꦴꦠꦼꦤ꧀ꦭꦁꦏꦸꦁꦏꦛꦃꦠꦶꦤꦶꦩ꧀ꦧꦁꦮꦫꦢꦶꦤ꧀ꦤꦶꦥꦸꦤ꧀ꦠꦶꦪꦁꦆꦤ꧀ꦝꦺꦴꦤꦼꦱꦶꦪꦃ꧈ꦲꦶꦁꦏꦁꦲꦁꦒꦩ꧀ꦧꦂꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦲꦶꦁꦔꦿꦶꦏꦏꦢꦺꦴꦱ꧀ꦢꦼꦤꦼꦲꦶꦁꦏꦁꦱꦩ꧀ꦥꦸꦤ꧀ꦏꦠꦼꦫꦁꦔꦏꦼꦤ꧀ꦢꦼꦤꦶꦁꦱꦱꦶꦱꦶꦃꦏꦼꦩꦮꦺꦴꦤ꧀꧉
꧋ꦥꦩꦁꦒꦶꦃꦲꦶꦥꦸꦤ꧀ꦱꦏꦛꦃꦲꦶꦁꦠꦶꦪꦁꦩꦺꦴꦚ꧀ꦕ꧈ꦏꦺꦴꦩ꧀ꦩꦸꦤꦶꦱ꧀ꦱꦲꦠꦶꦠꦶꦪꦁꦲꦶꦁꦏꦁꦱꦩꦶꦚꦺꦴꦤ꧀ꦝꦺꦴꦁꦧ꧀ꦒꦶꦝꦠꦼꦁꦏꦺꦴꦩ꧀ꦩꦸꦤꦶꦱ꧀꧈ꦲꦶꦁꦏꦁꦱꦩꦶꦔꦸꦩ꧀ꦧꦫꦮꦺꦴꦤ꧀ꦠꦼꦤ꧀ꦲꦶꦁꦤꦒꦫꦶꦫꦸꦱ꧀ꦥꦽꦭꦸꦱꦩꦶꦲꦚꦩ꧀ꦧꦸꦠ꧀ꦢꦩꦼꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦥꦁꦒꦲꦺꦴꦠ꧀ꦠꦤ꧀ꦥꦁꦒꦲꦺꦴꦠ꧀ꦠꦤ꧀ꦲꦶꦁꦔꦿꦶꦏꦸ꧈ꦥꦸꦤꦶꦏꦮꦫꦢꦶꦤ꧀ꦱꦩꦶꦲꦚꦫꦶꦪꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦁꦥꦁꦒꦼꦱꦁꦔꦤ꧀ꦤꦶꦥꦸꦤ꧀ꦠꦶꦪꦁꦲꦶꦁꦔꦿꦶꦏꦉꦏꦲꦺꦴꦱ꧀ꦱꦔꦼꦠ꧀꧈ꦢꦢꦺꦴꦱ꧀ꦧꦧꦂꦥꦶꦱꦤ꧀ꦧꦺꦴꦠꦼꦤ꧀ꦲꦤꦺꦴꦕꦺꦴꦒ꧀ꦒꦶ꧈ꦏꦢꦺꦴꦱ꧀ꦲꦶꦁꦏꦁꦏꦱꦼꦢꦾꦏ꧀ꦲꦏꦼꦤ꧀꧉ꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦠꦶꦠꦶꦪꦁꦮꦲꦸꦏꦛꦃꦠꦶꦪꦔꦶꦁꦥꦸꦤ꧀ꦧꦺꦴꦁꦱꦫꦸꦱ꧀꧈ꦲꦶꦁꦏꦁꦱꦸꦮꦲꦸꦤꦶꦥꦸꦤ꧀ꦱꦩꦶꦩꦁꦒꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦄꦩꦼꦫꦶꦏꦃꦱꦲꦲꦶꦁꦎꦱ꧀ꦠꦿꦭꦶ꧈ꦲꦤꦔꦶꦁꦱꦧꦶꦧꦂꦫꦶꦥꦸꦤ꧀ꦒꦼꦒꦼꦂꦫꦤ꧀ꦲꦶꦁꦤꦒꦫꦶꦫꦸꦱ꧀꧈ꦗꦭꦂꦫꦤ꧀ꦱꦏꦶꦁꦲꦁꦒꦺꦤ꧀ꦤꦶꦥꦸꦤ꧀ꦱꦩꦶꦚꦺꦴꦤ꧀ꦝꦺꦴꦁꦔꦶꦝꦠꦼꦁꦥꦥꦽꦤ꧀ꦠꦃꦲꦤ꧀ꦲꦺꦁꦒꦭ꧀꧈ꦮꦸꦱꦤꦭꦗꦼꦁꦮꦁꦱꦸꦭ꧀ꦝꦠꦼꦁꦠꦤꦃꦮꦸꦠꦃꦫꦃꦲꦶꦥꦸꦤ꧀ꦩꦭꦶꦃ꧉ꦢꦢꦺꦴꦱ꧀ꦠꦶꦠꦶꦪꦁꦮꦲꦸꦲꦶꦁꦒꦶꦃꦱꦩꦶꦱꦒꦼꦢ꧀ꦲꦩꦤ꧀ꦝꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦤꦒꦫꦶꦏꦭꦲꦶꦁꦗꦩꦤ꧀ꦫꦸꦩꦶꦪꦶꦤ꧀ꦏꦭꦶꦪꦤ꧀ꦲꦶꦁꦗꦩꦤ꧀ꦱꦩꦁꦏꦼ꧈ꦥꦸ
