꧋ꦏꦸꦤ꧀ꦱꦸꦭ꧀ꦏꦫꦗꦤ꧀ꦮꦭꦤ꧀ꦢꦶꦲꦶꦁꦗꦼꦢ꧀ꦢꦃꦔꦠꦸꦂꦫꦶꦲꦸꦤꦶꦔꦝꦠꦼꦁꦦꦩꦉꦤ꧀ꦠꦃ꧈ꦲꦮꦶꦠ꧀ꦱꦏꦶꦁꦏꦠꦿꦁꦔꦤ꧀ꦲꦶꦁꦏꦁꦏꦭꦶꦩꦿꦃꦲꦏꦼꦤ꧀ꦢꦼꦤꦶꦁꦩꦤ꧀ꦠꦿꦶꦲꦸꦫꦸꦱ꧀ꦱꦤ꧀ꦗꦗꦃꦲꦤ꧀ꦱꦗꦮꦶꦤꦶꦁꦏꦫꦗꦤ꧀ꦲꦼꦗꦱ꧀꧈ꦩꦿꦠꦼꦭꦏ꧀ꦲꦏꦼꦤ꧀꧈ꦧꦶꦭꦶꦃꦱꦢꦪꦠꦶꦪꦁꦲꦶꦁꦏꦁꦱꦤꦺꦱ꧀ꦆꦱ꧀ꦭꦩ꧀꧈ꦢꦶꦥꦸꦤ꧀ꦲꦮꦶꦱ꧀ꦱꦶꦩꦊꦧꦼꦠ꧀ꦲꦶꦁꦠꦤꦃꦱꦸꦕꦶ꧉ꦩꦤ꧀ꦠꦿꦶꦗꦗꦃꦲꦤ꧀꧈ꦄꦧ꧀ꦢꦸꦭ꧀ꦭꦃꦢꦩ꧀ꦩ꧀ꦭꦸꦗꦶꦔꦺꦔꦼꦠ꧀ꦠꦏꦼꦤ꧀꧈ꦧꦶꦭꦶꦃꦮꦺꦴꦤ꧀ꦠꦼꦤ꧀ꦫꦏꦾꦠ꧀ꦱꦏꦶꦁꦥꦥꦽꦤ꧀ꦠꦃꦲꦤ꧀꧈ꦲꦶꦁꦏꦁꦫꦸꦩꦶꦪꦶꦤ꧀ꦤꦶꦥꦸꦤ꧀ꦱꦤꦺꦱ꧀ꦆꦱ꧀ꦭꦩ꧀꧈ꦤꦔꦶꦁꦭꦸꦩꦼꦧꦼꦠ꧀ꦆꦱ꧀ꦭꦩ꧀꧈ꦩꦺꦴꦁꦏꦏꦥꦼꦔꦶꦤ꧀ꦩꦊꦧꦼꦠ꧀ꦝꦠꦼꦁꦠꦤꦃꦱꦸꦕꦶ꧈ꦱꦸꦥꦢꦺꦴꦱ꧀ꦚꦸꦮꦸꦤ꧀ꦥꦭꦶꦭꦃꦫꦸꦩꦶꦪꦶꦤ꧀ꦝꦠꦼꦁꦦꦩꦉꦤ꧀ꦠꦃꦲꦼꦗꦱ꧀꧉ꦦꦩꦉꦤ꧀ꦠꦃꦮꦲꦸꦲꦶꦁꦏꦁꦧꦝꦼꦩꦿꦶꦏ꧀ꦱꦠꦼꦩꦼꦤ꧀ꦤꦶꦁꦏꦲꦆꦱ꧀ꦭꦩ꧀ꦩꦤ꧀ꦤꦶꦥꦸꦤ꧀꧉ꦥꦿꦤꦠꦤ꧀ꦥꦸꦤꦶꦏꦲꦶꦁꦒꦶꦃꦠꦸꦩꦶꦤ꧀ꦢꦏ꧀ꦏꦁꦒꦼꦧꦺꦴꦁꦱꦌꦫꦺꦴꦥꦃꦲꦶꦁꦏꦁꦔꦏꦼꦤ꧀ꦱꦩ꧀ꦥꦸꦤ꧀ꦩꦚ꧀ꦗꦶꦁꦆꦱ꧀ꦭꦩ꧀꧉
꧋ꦏꦭꦩꦶꦁꦒꦸꦏꦼꦥꦼꦁꦏꦼꦂ꧈ꦱꦮꦼꦤꦺꦃꦲꦶꦁꦧꦺꦴꦁꦱꦡꦶꦪꦺꦴꦁꦲ꧀ꦮꦲꦶꦁꦭꦺꦴꦗꦶꦏꦼꦕꦶꦭ꧀꧈ꦔꦪꦺꦴꦓꦾ꧈ꦲꦩꦼꦗꦃꦲꦶꦧꦥꦏ꧀ꦏꦶꦥꦸꦤ꧀ꦏꦸꦮꦭꦺꦴꦤ꧀꧈ꦏꦤ꧀ꦛꦶꦢꦶꦥꦸꦤ꧀ꦥꦶꦱ꧀ꦠꦸꦭ꧀꧈ꦗꦭꦂꦫꦤ꧀ꦱꦏꦶꦁꦥꦱꦸꦭꦪꦤ꧀ꦉꦩ꧀ꦧꦒ꧀꧉ꦠꦶꦪꦁꦲꦶꦁꦏꦁꦢꦶꦥꦸꦤ꧀ꦥꦶꦱ꧀ꦠꦸꦭ꧀ꦤꦤ꧀ꦝꦁꦠꦠꦸꦲꦶꦁꦱꦸꦏꦸꦤꦶꦥꦸꦤ꧀ꦏꦶꦮ꧈ꦭꦗꦼꦁꦏꦊꦧꦼꦠ꧀ꦠꦏꦼꦤ꧀ꦝꦠꦼꦁꦒꦿꦶꦪꦱꦏꦶꦠ꧀ꦥꦼꦠꦿꦺꦴꦤꦼꦭ꧀ꦭꦃ꧉ꦠꦶꦪꦁꦲꦶꦁꦏꦁꦩꦿꦗꦪꦢꦶꦥꦸꦤ꧀ꦠꦲꦤ꧀ꦲꦶꦁꦥꦸꦭꦶꦱꦶ꧉
꧋ꦲꦶꦁꦏꦁꦯꦶꦤꦸꦲꦸꦤ꧀ꦲꦶꦁꦯꦸꦫꦏꦂꦠ꧈ꦱꦩ꧀ꦥꦸꦤ꧀ꦤꦼꦠꦼꦥ꧀ꦥꦏꦼꦤ꧀꧈ꦲꦶꦁꦏꦁꦏꦲꦁꦏꦠ꧀ꦢꦢꦺꦴꦱ꧀ꦮꦂꦒꦫꦺꦏ꧀ꦱꦼꦫꦠ꧀ꦥꦸꦂꦱꦶꦠꦼꦂꦏꦁꦗꦼꦁꦦꦔꦼꦫꦤ꧀ꦲꦔꦨꦺꦲꦶ꧈ꦮꦢꦤꦤꦶꦁꦥꦸꦠꦿꦱꦤ꧀ꦠꦤꦢꦊꦩ꧀꧉ꦎꦤ꧀ꦢꦼꦂꦥꦸꦂꦱꦶꦠꦼꦂ꧈ꦏꦁꦗꦼꦁꦦꦔꦼꦫꦤ꧀ꦲꦂꦪꦕꦏꦿꦟꦶꦔꦿꦠ꧀꧈ꦏꦢꦺꦴꦱ꧀ꦢꦺꦤꦺꦮꦏꦶꦭ꧀ꦭꦶꦁꦥꦏꦼꦩ꧀ꦥꦭ꧀ꦭꦤ꧀ꦤꦂꦥꦮꦤ꧀ꦢꦮ꧉ꦥꦫꦮꦂꦒ꧇ꦫꦢꦺꦤ꧀ꦠꦸꦩꦼꦁꦒꦸꦁꦯꦸꦫꦢꦶꦥꦸꦫ꧈ꦱꦏꦶꦁꦒꦺꦴꦭꦺꦴꦁꦔꦤ꧀ꦥꦥꦽꦤ꧀ꦠꦃꦲꦤ꧀ꦤꦒꦫꦶ꧉ꦬꦢꦺꦤ꧀ꦠꦸꦩꦼꦁꦒꦸꦁꦯꦱ꧀ꦠꦿꦮꦢꦤ꧈ꦒꦺꦴꦭꦺꦴꦁꦔꦤ꧀ꦥꦔꦿꦺꦃꦥꦿꦗ꧉ꦩꦱ꧀ꦔꦧꦺꦲꦶꦩꦂꦡꦱꦸꦮꦶꦒ꧀ꦤ꧈ꦒꦺꦴꦭꦺꦴꦁꦔꦤ꧀ꦲꦧ꧀ꦢꦶꦢꦊꦩ꧀꧈ꦩꦱ꧀ꦯꦸꦢꦂꦩꦤ꧀ꦩꦂꦡꦢꦶꦲꦂꦗ꧈(ꦥꦂꦠꦶꦏꦼꦭꦶꦂ)ꦱꦏꦶꦁꦒꦺꦴꦭꦺꦴꦁꦔꦤ꧀ꦏꦮꦸꦭ꧉
꧋ꦏꦸꦩꦶꦱꦶꦥꦩꦿꦶꦏ꧀ꦱꦥꦺꦊꦩ꧀ꦒꦩ꧀ꦧꦂꦲꦶꦝꦸꦥ꧀꧈ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦿꦤꦠꦤ꧀꧈ꦱꦸꦥꦢꦺꦴꦱ꧀ꦥꦺꦊꦩ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦥꦿꦶꦏ꧀ꦱ꧈ꦠꦸꦩꦸꦤ꧀ꦠꦼꦤ꧀ꦏꦥꦼꦤ꧀ꦝꦼꦠ꧀ꦠꦢꦼꦤꦶꦁꦲꦶꦁꦏꦁꦒꦝꦃ꧈ꦥꦸꦤꦶꦏꦩꦶꦤꦺꦴꦁꦏꦥꦼꦥꦺꦔꦼꦠ꧀ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦩꦁꦒꦶꦃꦧꦧꦪꦏꦢꦺꦴꦱ꧀ꦲꦶꦁꦏꦁꦱꦩ꧀ꦥꦸꦤ꧀꧈ꦏꦼꦧꦼꦱ꧀ꦩꦺꦤ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦏꦥꦭ꧀ꦏꦿꦺꦱꦼꦂꦗꦼꦦꦤ꧀꧈ Ohi ꦲꦶꦁꦏꦁꦧꦝꦼꦝꦠꦼꦁꦲꦶꦁꦲꦶꦤ꧀ꦝꦶꦪꦔꦿꦶꦏꦶꦮꦶꦮꦶꦠ 30 ꦗꦤꦸꦮꦫꦶꦢꦸꦩꦸꦒꦶ 2 ꦥꦺꦧꦿꦸꦮꦫꦶꦩꦁꦒꦺꦤ꧀ꦲꦶꦁꦥꦫꦏ꧀ꦏꦤ꧀꧈ꦮꦶꦮꦶꦠ꧀ 5 ꦢꦸꦩꦸꦒꦶ 8 ꦥꦺꦧꦿꦸꦮꦫꦶ꧈ꦲꦶꦁꦯꦸꦫꦧꦪ꧈ꦠꦸꦮꦶꦤ꧀ 9 ꦢꦸꦩꦸꦒꦶ 13 ꦥꦺꦧꦿꦸꦮꦫꦶꦲꦶꦁꦡꦚ꧀ꦗꦸꦁꦪꦸꦏ꧀꧉
꧋ꦲꦒꦺꦤ꧀ꦥꦸꦭꦶꦱꦶꦠꦶꦪꦁꦱꦶꦠꦶꦲꦶꦁꦥꦼꦏꦼꦤ꧀ꦏꦺꦴꦗ꧈ꦡꦚ꧀ꦗꦸꦁꦥꦿꦶꦪꦸꦏ꧀꧈ꦥꦧꦼꦤ꧀ꦏꦭꦶꦪꦤ꧀ꦩꦤ꧀ꦠꦿꦸꦱ꧀ꦧꦺꦴꦁꦱꦩꦢꦸꦫ꧉ꦲꦒꦺꦤ꧀ꦩꦶꦒꦸꦤꦏ꧀ꦲꦏꦼꦤ꧀ꦥꦼꦝꦁ꧈ꦔꦤ꧀ꦠꦺꦴꦱ꧀ꦲꦤꦠꦺꦴꦤ꧀ꦤꦶꦠꦶꦪꦁꦩꦢꦸꦫꦮꦲꦸ꧈ꦮꦸꦱꦤꦲꦶꦁꦏꦁꦤꦤ꧀ꦝꦁꦠꦠꦸꦏꦧꦼꦏ꧀ꦠꦝꦠꦼꦁ C.B.Z.꧉
꧋ꦏꦾꦲꦶꦦꦼꦤ꧀ꦛꦺꦠ꧀꧈ꦝꦸꦏꦸꦤ꧀ꦲꦶꦁꦏꦭꦱ꧀ꦱꦤ꧀꧈ꦔꦪꦺꦴꦓꦾ꧈ꦲꦶꦁꦏꦁꦩꦶꦱꦸꦮꦸꦂ꧈ꦏꦫꦩ꧀ꦥꦸꦁꦔꦤ꧀ꦱꦏꦶꦁꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦔꦪꦺꦴꦓꦾ꧈ꦏꦲꦸꦏꦸꦩ꧀ꦏꦸꦚ꧀ꦗꦫ 5 ꦢꦶꦤ꧀ꦠꦼꦤ꧀꧈ꦗꦭꦂꦫꦤ꧀ꦏꦊꦥꦠ꧀ꦠꦤ꧀ꦲꦁꦒꦶꦪꦂꦫꦏꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦥꦁꦒꦼꦤ꧀ꦤꦤ꧀ꦔꦿꦶꦏꦸꦧꦝꦼꦠꦸꦮꦸꦃꦱꦱꦏꦶꦠ꧀ꦤꦸꦭꦂ꧈ꦤꦔꦶꦁꦱꦶꦤ꧀ꦠꦼꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦝꦠꦼꦁꦲꦶꦁꦔꦿꦶꦏꦸꦧꦺꦴꦠꦼꦤ꧀ꦧꦝꦼꦏꦠꦿꦗꦁꦲꦶꦁꦱꦱꦏꦶꦠ꧀꧉
꧋ꦏꦮꦶꦱꦸꦝꦗꦸꦩꦼꦤꦼꦁꦧꦸꦥꦠꦶꦲꦶꦁꦦꦱꦸꦫꦸꦮꦤ꧀꧈ꦫꦢꦺꦤ꧀ꦩꦱ꧀ꦥꦚ꧀ꦗꦶꦢꦂꦡꦱꦸꦒꦺꦴꦤ꧀ꦢ꧈ꦥꦠꦶꦃꦮꦢꦤꦲꦶꦁꦦꦿꦧꦭꦶꦁꦒ꧉ꦲꦁꦱꦭ꧀ꦱꦼꦱꦼꦧꦸꦠ꧀ꦠꦤ꧀ꦠꦸꦩꦼꦁꦒꦸꦁ꧉
꧋ꦤꦸꦱꦸꦭ꧀ꦭꦶꦏꦠꦿꦁꦔꦤ꧀ꦲꦶꦁꦧꦧ꧀ꦥꦮꦂꦠꦺꦴꦱ꧀ꦏꦢꦸꦂꦗꦤꦤ꧀ꦲꦶꦁꦱꦊꦧꦼꦠ꧀ꦠꦶꦁꦏꦼꦝꦠꦺꦴꦤ꧀ꦯꦸꦫꦏꦂꦠ꧉ꦲꦶꦁꦏꦁꦏꦥꦼꦤ꧀ꦝꦼꦠ꧀ꦲꦶꦁꦢꦸꦂꦗꦤ꧈ꦧꦂꦭꦶꦪꦤ꧀ꦉꦉꦁꦒꦤ꧀ꦤꦶꦁꦥꦸꦱꦏꦢꦊꦩ꧀ꦮꦲꦺꦴꦱ꧀ꦏꦁꦗꦼꦁꦏꦾꦲꦶꦧꦝꦸꦝꦏ꧀꧈ꦱꦫꦤꦢꦶꦥꦸꦤ꧀ꦕꦸꦥ꧀ꦭꦶꦏ꧀ꦏꦶ꧉ꦊꦉꦱ꧀ꦥꦔꦲꦺꦴꦱ꧀ f 20,000,-꧉ꦥꦸꦭꦶꦱꦶꦥꦔꦿꦺꦃꦥꦿꦗꦲꦶꦁꦒꦺꦴꦭ꧀ꦱꦩ꧀ꦥꦸꦤ꧀ꦲꦁꦱꦭ꧀ꦠꦶꦠꦶꦏ꧀ꦱꦲꦔꦿꦩ꧀ꦥꦱ꧀ꦱꦸꦱꦸꦥꦼꦧꦂꦭꦶꦪꦤ꧀ꦲꦶꦁꦏꦁꦢꦶꦥꦸꦤ꧀ꦲꦁꦒꦼꦠꦶꦪꦁꦤꦩꦉꦱꦢꦶꦏꦿꦩ꧈ꦲꦶꦁꦏꦩ꧀ꦥꦸꦁꦗꦒꦱꦸꦫꦤ꧀꧉ꦄꦧ꧀ꦢꦶꦢꦊꦩ꧀ꦲꦶꦁꦏꦁꦒꦝꦃꦕꦼꦕꦼꦥꦼꦁꦔꦤ꧀ꦧꦺꦴꦠꦼꦤ꧀ꦥꦔ꧀ꦭꦶꦁꦮꦸꦗꦸꦢ꧀ꦢꦶꦁꦧꦂꦭꦶꦪꦤ꧀꧉
꧋ꦩꦊꦩ꧀ꦔꦲꦢ꧀ꦲꦶꦁꦏꦁꦏꦥꦼꦁꦏꦼꦂ꧈ꦄꦱꦶꦱ꧀ꦠꦺꦤ꧀ꦮꦢꦤꦲꦶꦁꦡꦸꦭꦸꦁ꧈ꦔꦪꦺꦴꦓꦾ꧈ꦲꦢꦩꦼꦭ꧀ꦏꦼꦛꦺꦴꦥꦿꦏ꧀ꦢꦂꦩꦮꦺꦴꦤ꧀ꦠꦼꦤ꧀ꦲꦶꦁꦝꦸꦱꦸꦤ꧀ꦠꦁꦏꦶꦭ꧀꧉ꦲꦁꦱꦭ꧀ꦲꦁꦱꦭꦤꦶꦥꦸꦤ꧀ꦲꦶꦁꦏꦁ 45%꧈ꦏꦢꦂꦩꦏ꧀ꦲꦏꦼꦤ꧀ꦝꦠꦼꦁꦥꦏꦼꦩ꧀ꦥꦭ꧀ꦭꦤ꧀ꦲꦱ꧀ꦠꦒꦶꦤꦲꦶꦁꦨꦤ꧀ꦠꦸꦭ꧀꧉
꧋ꦲꦶꦁꦱꦥꦸꦤꦶꦏꦉꦢꦶꦏꦶꦢꦸꦭ꧀꧈ꦔꦪꦺꦴꦓꦾ꧈ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦶꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦥꦶꦪꦩ꧀ꦧꦏ꧀꧈ꦩꦁꦒꦺꦤ꧀ꦤꦶꦥꦸꦤ꧀ꦩꦤꦸꦠ꧀ꦥꦸꦤ꧀ꦢꦶꦲꦶꦁꦏꦁꦧꦝꦼꦢꦶꦥꦸꦤ꧀ꦫꦩ꧀ꦥꦸꦁꦔꦶ꧈ꦲꦶꦁꦒꦶꦃꦥꦸꦤꦶꦏꦲꦶꦁꦏꦝꦶꦱ꧀ꦠꦿꦶꦏ꧀ꦏꦤ꧀꧇ꦮꦟꦱꦫꦶ꧈ꦯꦼꦩꦤꦸ꧈ꦦ꧀ꦭꦪꦼꦤ꧀꧈ꦥꦥꦿꦶꦏ꧀ꦱꦤ꧀ꦤꦶꦥꦸꦤ꧀ꦱꦧꦼꦤ꧀ꦲꦶꦁꦢꦶꦤ꧀ꦠꦼꦤ꧀ꦉꦧꦺꦴꦱꦼꦠꦸ꧉ꦥꦸꦤꦶꦏꦲꦢꦩꦼꦭ꧀ꦏꦩꦪꦫꦤ꧀ꦤꦶꦥꦸꦤ꧀ꦠꦶꦠꦶꦪꦁꦲꦶꦁꦉꦢꦶ꧉
꧋ꦏꦭꦏꦥꦶꦁ 22 ꦮꦸꦭꦤ꧀ꦥꦸꦤꦶꦏꦥꦏꦼꦩ꧀ꦥꦭ꧀ꦭꦤ꧀ꦤꦶꦥꦸꦤ꧀ꦥꦫꦥꦸꦁꦒꦮꦥꦒꦤ꧀ꦠꦺꦱ꧀ꦱꦤ꧀ꦥꦁꦔꦪꦺꦴꦓꦾ꧈ꦢꦩꦼꦭ꧀ꦥꦉꦥꦠ꧀ꦠꦤ꧀ꦮꦂꦒ꧈ꦩꦁꦒꦺꦤ꧀ꦲꦶꦁꦥꦩꦸꦭꦁꦔꦤ꧀ꦲꦢꦶꦢꦂꦩ꧈ꦔꦽꦩ꧀ꦧꦒ꧀ꦥꦶꦭꦶꦃꦲꦤ꧀ꦥꦔꦿꦺꦃ꧈ꦲꦶꦁꦏꦁꦏꦥꦶꦭꦶꦃꦠꦸꦮꦤ꧀ꦯꦸꦂꦪꦥꦿꦤꦠ꧈ꦥꦔꦪꦺꦴꦩ꧀ꦩꦤ꧀꧈ꦠꦸꦮꦤ꧀ꦕꦏꦿꦲꦩꦶꦟꦠ꧈ꦥꦔꦂꦱꦠꦸꦮꦤ꧀ꦢꦿꦶꦪꦮꦺꦴꦁꦯ꧈ꦩꦸꦝꦥꦔꦂꦱ꧈ꦔꦿꦁꦏꦼꦥ꧀ꦥꦔꦿꦺꦃꦥꦢꦶꦤ꧀ꦠꦼꦤ꧀ꦤꦤ꧀꧉ꦠꦸꦮꦤ꧀ꦉꦏ꧀ꦱꦢꦶꦥꦸꦠꦿ꧈ꦥꦤꦶꦠꦿ꧉ꦠꦸꦮꦤ꧀ꦯꦱ꧀ꦠꦿꦲꦠ꧀ꦩꦗ꧈ꦲꦂꦢꦤ꧉
꧋ꦩꦸꦫꦶꦃꦩꦶꦒꦸꦤꦤ꧀ꦤꦶꦝꦠꦼꦁꦒꦺꦴꦭꦺꦴꦁꦔꦤ꧀ꦱꦤꦺꦱ꧀꧈ꦲꦶꦁꦱꦥꦸꦤꦶꦏꦎꦂꦒꦤ꧀ꦤꦶꦥꦸꦤ꧀ B.O.꧉ꦧꦝꦼꦢꦶꦥꦸꦤ꧀ꦲꦺꦮꦃꦲꦶꦱꦏꦼꦝꦶꦏ꧀꧈ꦱꦲꦤꦼꦠꦼꦥ꧀ꦥꦏꦼꦤ꧀ꦲꦏꦁꦢꦢꦺꦴꦱ꧀ꦱꦼꦠꦥ꧀ꦉꦝꦏ꧀ꦱꦶ꧇ꦝꦺꦴꦏ꧀ꦠꦼꦂꦯꦸꦥꦩ꧈ꦠꦸꦮꦤ꧀ꦯꦸꦥꦢ꧀ꦩ꧈ꦟꦶꦠꦶꦤꦒꦫꦠꦸꦮꦶꦤ꧀ꦫꦟꦸꦄꦠ꧀ꦩꦗ꧉ꦎꦂꦒꦤ꧀ꦮꦲꦸꦧꦝꦼꦏꦮꦼꦢꦭ꧀ꦭꦏꦼꦤ꧀ꦱꦮꦸꦭꦤ꧀ꦏꦥꦶꦁꦏꦭꦶꦃ꧉
꧋ꦥꦔꦢꦶꦭ꧀ꦭꦤ꧀ꦭꦤ꧀ꦢꦿꦢ꧀ꦲꦶꦁꦯꦸꦭꦶꦏꦶ꧈ꦲꦤ꧀ꦝꦮꦃꦲꦏꦼꦤ꧀ꦏꦫꦩ꧀ꦥꦸꦁꦔꦤ꧀ꦲꦸꦏꦸꦩ꧀ꦥꦼꦗꦃꦝꦠꦼꦁꦥꦱꦏꦶꦠ꧀ꦠꦤ꧀ꦤꦩꦭꦸꦮꦶ꧈ꦗꦭꦂꦫꦤ꧀ꦏꦊꦥꦠ꧀ꦠꦤ꧀ꦲꦩꦼꦗꦃꦲꦶꦧꦺꦴꦗꦺꦴꦤꦶꦥꦸꦤ꧀ꦏꦥꦭꦧꦮꦃꦦꦝꦁꦗꦥꦁ꧉ꦏꦭꦫꦸꦩꦶꦪꦶꦤ꧀ꦭꦸꦮꦶꦱꦩ꧀ꦥꦸꦤ꧀ꦤꦠꦼꦢꦶꦥꦸꦤ꧀ꦲꦸꦏꦸꦩ꧀ 2 ꦠꦲꦸꦤ꧀ꦗꦭꦂꦫꦤ꧀ꦔꦤꦶꦪꦪꦏꦥꦭꦥꦥꦽꦤ꧀ꦠꦃꦲꦤ꧀꧈ꦏꦮꦶꦱ꧀ꦥꦲꦺꦴꦱ꧀꧉
ꦥꦮꦂꦠꦺꦴꦱ꧀ꦱꦏꦶꦁꦉꦝꦏ꧀ꦱꦶ
꧋ꦠꦸꦮꦤ꧀ꦩꦸꦃꦲꦩꦢ꧀ꦲꦶꦁꦩꦭꦁ꧉ꦲꦶꦁꦏꦁꦥꦚ꧀ꦗꦼꦤꦼꦁꦔꦤ꧀ꦢꦔꦺꦴꦏ꧀ꦲꦏꦼꦤ꧀꧈ꦲꦶꦁꦏꦁꦔꦼꦢꦭ꧀ꦭꦏꦼꦤ꧀ꦏꦤ꧀ꦠꦺꦴꦂꦥꦔꦼꦕꦥ꧀ꦥꦤ꧀ De Unie ꦲꦶꦁꦨꦼꦠꦮꦶ꧉
꧋ꦊꦁꦒꦤ꧀ꦤꦤ꧀ꦤꦺꦴꦩꦼꦂ 555 ꦲꦶꦁꦡꦭꦸꦤ꧀꧉ꦲꦶꦁꦏꦁꦥꦿꦪꦺꦴꦒꦶꦥꦶꦪꦩ꧀ꦧꦏ꧀ꦔꦶꦤ꧀ꦠꦸꦤ꧀ꦤꦤꦒꦩ꧀ꦧꦂꦫꦶꦥꦸꦤ꧀ꦏꦼꦩꦮꦺꦴꦤ꧀꧉
