꧋ꦠꦸꦮꦤ꧀ꦏꦥ꧀ꦠꦶꦤ꧀꧇ꦱꦲꦸꦥꦩꦶꦲꦁꦒꦺꦤ꧀ꦥꦚ꧀ꦗꦼꦤꦼꦔꦤ꧀ꦤꦤ꧀ꦠꦸꦤ꧀ꦥꦸꦤꦶꦏꦏꦭꦮꦶꦔꦶ꧈ꦏꦸꦭꦧꦺꦴꦠꦼꦤ꧀ꦧꦝꦼꦥꦸꦫꦸꦤ꧀ꦚꦒꦲꦶ꧉ꦲꦁꦒꦺꦤꦶꦥꦸꦤ꧀ꦩꦁꦱꦸꦭꦶꦩꦏꦠꦼꦤ꧀ꦥꦸꦤꦶꦏꦏꦠꦶꦔꦭ꧀ꦱꦼꦩꦸꦲꦶꦱꦶꦤ꧀꧉ꦤꦔꦶꦁꦱꦥꦸꦤꦶꦏꦏꦸꦭꦥꦸꦫꦸꦤ꧀ꦲꦔꦽꦩ꧀ꦧꦒ꧀ꦥꦿꦏꦮꦶꦱ꧀ꦥꦸꦤꦶꦏ꧈ꦱꦩꦤ꧀ꦠꦼꦤ꧀ꦮꦲꦸꦩꦤꦮꦶꦥꦿꦺꦴꦥꦼꦱꦺꦴꦂ Higgs ꦲꦶꦁꦒꦶꦃꦏꦂꦱꦠꦸꦩꦸꦠ꧀ꦲꦔꦽꦩ꧀ꦧꦒ꧀꧉ꦏꦗꦮꦶꦥꦸꦤꦶꦏꦏꦸꦭꦚꦸꦮꦸꦤ꧀ꦏꦠꦿꦔꦤ꧀ꦲꦶꦁꦏꦁꦭꦁꦏꦸꦁꦕꦼꦛ꧈ꦭꦤ꧀ꦩꦭꦶꦃꦲꦶꦁꦱꦢꦺꦫꦺꦔꦶꦥꦸꦤ꧀ꦏꦸꦭꦩꦠꦸꦂꦧꦭꦏ꧈ꦧꦶꦭꦶꦃꦏꦸꦭꦢꦺꦫꦺꦁꦥꦲꦩ꧀ꦱꦔꦼꦠ꧀ꦝꦠꦼꦁꦏꦱꦒꦼꦢꦤ꧀ꦮꦂꦤꦶꦠꦶꦒꦲꦶꦁꦏꦁꦏꦝꦮꦸꦲꦏꦼꦤ꧀ꦢꦼꦤꦶꦁꦠꦸꦮꦤ꧀ꦥꦿꦺꦴꦥꦼꦱꦺꦴꦂꦮꦲꦸ꧉ꦭꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦲꦱꦿꦶꦁꦏꦸꦭꦭꦩ꧀ꦥꦲꦶꦤꦼꦩ꧀ꦧꦼꦱꦥꦿꦏꦮꦶꦱ꧀꧉
꧋ꦏꦸꦭꦥꦶꦠꦏꦺꦤ꧀꧇ꦠꦸꦮꦤ꧀ꦏꦥ꧀ꦠꦶꦤ꧀꧈ꦥꦸꦤꦥꦏꦶꦤ꧀ꦠꦼꦤꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦥꦩ꧀ꦧꦼꦔꦤꦶꦥꦸꦤ꧀ꦩꦤꦮꦶꦏꦸꦭꦚꦸꦮꦸꦤ꧀ꦥꦿꦶꦏ꧀ꦱ꧈ꦥꦸꦤꦥꦲꦥꦚ꧀ꦗꦼꦤꦼꦔꦤ꧀ꦧꦝꦼꦧꦺꦴꦠꦼꦤ꧀ꦏꦂꦱꦚꦒꦲꦶ꧈ꦲꦸꦥꦩꦶꦲꦁꦒꦺꦤ꧀ꦏꦸꦭꦤꦤ꧀ꦠꦸꦤ꧀ꦥꦚ꧀ꦗꦼꦤꦼꦔꦤ꧀ꦥꦸꦤꦶꦏꦏꦭꦮꦶꦔꦶ꧉
꧋ꦠꦸꦮꦤ꧀ꦏꦥ꧀ꦠꦶꦤ꧀ꦩꦁꦱꦸꦭꦶꦱꦂꦠꦏꦠꦶꦔꦭ꧀ꦱꦁꦱꦪꦲꦶꦱꦶꦤ꧀꧈ꦠꦼꦩ꧀ꦧꦸꦔꦶꦥꦸꦤ꧀꧇ꦎ꧈ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦥꦩ꧀ꦧꦼꦔꦤꦶꦥꦸꦤ꧀꧈ꦝꦺꦴꦏ꧀ꦠꦼꦂ꧉ꦮꦢꦺꦴꦱꦶꦥꦸꦤ꧀ꦩꦏꦠꦼꦤ꧀꧇ꦏꦭꦮꦶꦔꦶꦏꦸꦭꦧꦝꦼꦠꦩ꧀ꦥꦶꦮꦫꦶꦱꦤ꧀ꦠꦶꦠꦶꦭꦫꦤꦶꦥꦸꦤ꧀ꦥꦩꦤ꧀ꦏꦸꦭꦲꦶꦁꦏꦁꦢꦸꦩꦢꦏꦤ꧀ꦤꦤ꧀ꦝꦁꦱꦏꦶꦠ꧀ꦱꦔꦼꦠ꧀꧉ꦥꦿꦩꦶꦭꦱꦏꦶꦁꦲꦶꦁꦄꦥꦿꦶꦏꦃꦏꦶꦢꦸꦭ꧀ꦏꦸꦭꦤꦸꦤ꧀ꦠꦼꦤ꧀ꦮꦁꦱꦸꦭ꧀ꦩꦿꦶꦏꦶ꧉ꦮꦸꦱꦤꦢꦶꦤ꧀ꦠꦼꦤ꧀ꦥꦸꦤꦶꦏꦏꦸꦭꦩꦶꦉꦁꦮꦂꦠꦺꦴꦱ꧀꧈ꦧꦶꦭꦶꦃꦥꦸꦤ꧀ꦥꦩꦤ꧀ꦥꦸꦤꦶꦏꦱꦩ꧀ꦥꦸꦤ꧀ꦏꦒꦸꦔꦤ꧀ꦒꦂꦮ꧈ꦱꦭꦃꦱꦠꦸꦁꦒꦶꦭꦶꦁꦮꦤꦺꦴꦢꦾꦢꦼꦢꦼꦧꦁꦱꦭꦸꦲꦸꦂ꧈ꦲꦁꦒꦺꦤꦶꦥꦸꦤ꧀ꦤꦶꦏꦃꦏꦭꦪꦤ꧀ꦝꦼꦝꦼꦩꦶꦠꦤ꧀꧉ꦭꦤ꧀ꦩꦭꦶꦃꦲꦤꦶꦭꦂꦲꦤꦏ꧀ꦱꦠꦸꦁꦒꦶꦭ꧀꧉ꦱꦲꦸꦥꦩꦶꦱꦢꦺꦫꦺꦔꦶꦥꦸꦤ꧀ꦠꦶꦭꦂꦢꦺꦴꦚꦥꦸꦤ꧀ꦥꦩꦤ꧀ꦧꦺꦴꦠꦼꦤ꧀ꦢꦩꦼꦭ꧀ꦱꦼꦫꦠ꧀ꦲꦶꦁꦏꦁꦩꦿꦠꦼꦭꦏꦏꦼꦤ꧀ꦧꦧ꧀ꦥꦩ꧀ꦧꦒꦼꦤꦶꦥꦸꦤ꧀ꦮꦫꦶꦱꦤ꧀꧈ꦠꦩ꧀ꦠꦸꦭꦉꦮꦲꦸꦲꦶꦁꦏꦁꦧꦝꦼꦤꦩ꧀ꦥꦶꦱꦢꦪꦮꦫꦶꦱꦤꦶꦥꦸꦤ꧀꧉ꦏꦗꦮꦶꦥꦸꦤꦶꦏꦮꦺꦴꦤ꧀ꦠꦼꦤ꧀ꦩꦭꦶꦃꦲꦶꦁꦏꦁꦲꦢꦩꦼꦭ꧀ꦕꦸꦮꦤꦶꦁꦩꦤꦃꦏꦸꦭ꧉ꦏꦭꦮꦶꦔꦶꦏꦸꦭꦠꦏ꧀ꦱꦶꦃꦒꦝꦃꦥꦔꦶꦤ꧀ꦠꦼꦤ꧀꧈ꦧꦶꦭꦶꦃꦏꦸꦭꦧꦝꦼꦲꦺꦁꦒꦭ꧀ꦫꦧꦶ꧈ꦤꦔꦶꦁꦭꦉꦲꦺꦱ꧀ꦠꦿꦶꦲꦶꦁꦏꦁꦏꦼꦥꦼꦔꦶꦤ꧀ꦭꦏꦶꦏꦭꦶꦲꦤ꧀ꦠꦶꦪꦁꦲꦶꦁꦏꦁꦢꦢꦺꦴꦱ꧀ꦮꦫꦶꦱꦶꦥꦸꦤ꧀ꦠꦸꦮꦤ꧀ Anthony Orme ꦤꦩ꧀ꦥꦶꦏ꧀ꦝꦠꦼꦁꦏꦥ꧀ꦠꦶꦤ꧀ Oliver Orme ꦲꦶꦁꦏꦁꦏꦱꦸꦒꦶꦲꦤꦶꦥꦸꦤ꧀ꦤꦩꦸꦁꦥꦔꦗꦶ 10.000 ꦥꦺꦴꦤ꧀ꦱꦼꦠꦺꦂꦭꦶꦁ꧉
꧋ꦱꦱꦩ꧀ꦥꦸꦤꦶꦥꦸꦤ꧀ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀ꦠꦸꦮꦤ꧀ꦏꦥ꧀ꦠꦶꦤ꧀ꦭꦗꦼꦁꦩꦼꦚꦠ꧀ꦱꦏꦶꦁꦥꦭꦶꦁꦒꦶꦲꦤꦶꦥꦸꦤ꧀꧈ꦭꦸꦩꦩ꧀ꦥꦃꦝꦠꦼꦁꦥꦸꦁꦏꦱꦤꦶꦁꦏꦩꦂꦱꦠꦸꦁꦒꦶꦭꦶꦥꦸꦤ꧀ꦩꦭꦶꦃ꧉
꧋ꦠꦸꦮꦤ꧀ꦥꦿꦺꦴꦥꦼꦱꦺꦴꦂꦔꦤ꧀ꦢꦶꦏ꧇ꦩꦼꦱꦏꦏꦼꦠꦼꦩꦼꦤ꧀ꦠꦸꦮꦤ꧀ꦏꦥ꧀ꦠꦶꦤ꧀ꦲꦶꦏꦸ꧈ꦢꦺꦤꦺꦔꦤ꧀ꦠꦶꦢꦶꦩꦗꦤꦤꦶꦢꦼꦤꦶꦁꦮꦺꦴꦁꦮꦢꦺꦴꦤ꧀꧉ꦱꦱꦩ꧀ꦥꦸꦤꦶꦥꦸꦤ꧀ꦭꦗꦼꦁꦮꦶꦕꦤ꧀ꦠꦼꦤ꧀ꦱꦺꦴꦫ꧈ꦲꦮꦶꦠ꧀ꦠꦸꦮꦤ꧀ꦏꦥ꧀ꦠꦶꦤ꧀ꦮꦁꦱꦸꦭ꧀ꦩꦭꦶꦃꦤꦔꦶꦁꦲꦏꦸꦲꦺꦴꦫꦩꦔꦼꦂꦠꦶꦩꦫꦁꦏꦉꦥ꧀ꦩꦸ꧈ꦝꦺꦴꦏ꧀ꦠꦼꦂ꧈ꦢꦺꦤꦺꦱꦫꦶꦫꦩꦸꦲꦔꦽꦩ꧀ꦧꦸꦒꦶꦲꦏꦸꦭꦤ꧀ꦠꦸꦮꦤ꧀ꦏꦥ꧀ꦠꦶꦤ꧀꧈ꦔꦗꦏ꧀ꦲꦔ꧀ꦭꦏꦺꦴꦤꦶꦥꦒꦮꦼꦪꦤ꧀ꦏꦁꦲꦩ꧀ꦧꦼꦧꦪꦤꦶꦲꦶꦏꦸ꧉
꧋ꦏꦸꦭꦩꦁꦱꦸꦭꦶ꧇ꦲꦥꦲꦁꦒꦺꦴꦤ꧀ꦏꦸꦩꦠꦸꦂꦩꦲꦸꦲꦺꦴꦫꦠꦼꦫꦁ꧉ꦱꦼꦢꦾꦏꦸꦩꦸꦁꦲꦉꦥ꧀ꦲꦤꦸꦭꦸꦔꦶꦲꦤꦏ꧀ꦏꦸ꧉ꦱꦩꦺꦴꦤꦺꦴꦲꦶꦏꦸꦩꦤꦮꦝꦺꦮꦺꦏꦼꦲꦶꦱꦶꦃꦲꦸꦫꦶꦥ꧀꧉ꦤꦔꦶꦁꦏꦶꦫꦏꦸꦲꦶꦪꦲꦶꦱꦶꦃꦲꦸꦫꦶꦥ꧀ꦲꦸꦒ꧉ꦩꦫꦒꦭꦶꦲꦼꦤ꧀ꦝꦼꦮꦼ꧈ꦠꦸꦮꦤ꧀ Higgs꧈ꦏꦥꦿꦶꦪꦼꦱꦲꦸꦥꦩꦏꦁꦱꦫꦶꦫꦲꦤꦤ꧀ꦝꦁꦏꦱꦸꦱꦲꦤ꧀ꦏꦪꦲꦏꦸ꧈ꦪꦲꦶꦏꦸꦱꦲꦸꦥꦩꦱꦫꦶꦫꦩꦸꦲꦺꦴꦫꦏꦒꦸꦔꦤ꧀ꦱꦤꦏ꧀ꦱꦢꦸꦭꦸꦂꦏꦗꦧꦩꦸꦁꦥꦸꦠꦿꦱꦶꦗꦶ꧈ꦩꦺꦴꦁꦏꦧꦚ꧀ꦗꦸꦂꦢꦶꦕꦺꦴꦭꦺꦴꦁꦢꦼꦤꦶꦁꦮꦺꦴꦁꦲꦭꦱꦤ꧀꧈ꦭꦤ꧀ꦩꦤꦺꦃꦱꦮꦶꦱꦼꦱꦫꦶꦫꦩꦸꦲꦁꦒꦺꦴꦭꦺꦏꦶꦔꦤ꧀ꦠꦶꦥꦶꦫꦁꦥꦶꦫꦁꦠꦲꦸꦤ꧀꧈ꦧꦚ꧀ꦗꦸꦂꦩꦶꦉꦁꦱ꧀ꦮꦫꦤꦼ꧈ꦲꦩꦿꦶꦏ꧀ꦱꦤꦶꦫꦸꦥꦤꦼ꧈ꦱꦂꦠꦮꦸꦤꦶꦔꦪꦺꦤ꧀ꦧꦺꦴꦕꦃꦩꦲꦸꦮꦶꦱ꧀ꦢꦶꦮꦱ꧈ꦤꦔꦶꦁꦱꦫꦶꦫꦩꦸꦲꦺꦴꦫꦧꦶꦱꦩꦶꦠꦸꦭꦸꦔꦶꦩꦫꦁꦏꦁꦥꦸꦠꦿꦏꦁꦏꦺꦴꦏ꧀ꦲꦶꦩ꧀ꦥꦶꦲꦶꦩ꧀ꦥꦶꦔꦤ꧀ꦠꦶꦥꦶꦫꦁꦥꦶꦫꦁꦠꦲꦸꦤ꧀ꦭꦮꦱꦼꦲꦶꦏꦸ꧈ꦱꦂꦠꦏꦁꦲꦉꦥ꧀ꦏꦺꦴꦏ꧀ꦧꦼꦭꦤꦶꦔꦤ꧀ꦠꦶꦠꦸꦩꦼꦏꦲꦶꦁꦥꦠꦶ꧈ꦤꦔꦶꦁꦱꦤꦭꦶꦏꦧꦚ꧀ꦗꦸꦂꦲꦶꦭꦁꦏꦸꦮꦤꦺꦤ꧀ꦩꦸꦭꦤ꧀ꦏꦠꦽꦱ꧀ꦤꦤ꧀ꦩꦸꦩꦫꦁꦏꦁꦥꦸꦠꦿꦩꦲꦸ꧈ꦩꦸꦁꦩꦂꦒꦮꦼꦢꦶꦩꦫꦁꦱ꧀ꦮꦫꦤꦼꦮꦺꦴꦁꦮꦺꦴꦁꦲꦭꦱꦤ꧀ꦏꦁꦥꦝꦤꦼꦥ꧀ꦱꦸꦲꦶꦏꦸ꧉ꦱꦫꦶꦫꦩꦸꦩꦸꦁꦧꦚ꧀ꦗꦸꦂꦲꦁꦒꦭꦶꦃ꧇ꦲꦺꦴꦚ꧀ꦕꦠꦤꦧꦼꦧꦪꦲꦶꦏꦶ꧈ꦱꦸꦥꦪꦲꦗꦤꦼꦩꦲꦶꦠꦶꦮꦱ꧀꧉ꦱꦫꦶꦫꦩꦸꦧꦶꦱꦲꦁꦒꦭꦶꦃꦝꦼꦮꦼ꧈ꦪꦺꦤ꧀ꦮꦺꦴꦁꦏꦁꦏꦪꦩꦼꦁꦏꦺꦴꦤꦺꦴꦲꦶꦏꦸꦮꦺꦴꦁꦗꦶꦫꦶꦃ꧈ꦏꦁꦧꦶꦱꦏꦠꦸꦭꦸꦔꦤ꧀ꦲꦸꦫꦶꦥꦼ꧈ꦱꦂꦠꦩꦁꦒꦺꦴꦤ꧀ꦲꦶꦁꦥꦢꦸꦤꦸꦔꦤꦶꦁꦧꦺꦴꦁꦱꦭꦶꦪꦏꦁꦲꦸꦒꦥꦝꦗꦶꦫꦶꦃꦗꦶꦫꦶꦃ꧈ꦥꦶꦫꦁꦥꦶꦫꦁꦩꦶꦭ꧀ꦢꦺꦴꦲꦼꦱꦏꦥꦁꦒꦺꦴꦤꦤꦼꦲꦤꦏꦼꦩꦲꦸ꧉
꧋ꦠꦸꦮꦤ꧀ꦥꦿꦺꦴꦥꦼꦱꦺꦴꦂ꧇ꦲꦶꦪꦧꦼꦕꦶꦏ꧀꧈ꦱꦏꦧꦺꦲꦼꦏꦱꦸꦱꦲꦤ꧀ꦭꦤ꧀ꦏꦢꦢꦼꦪꦤ꧀ꦏꦁꦏꦺꦴꦏ꧀ꦝꦮꦸꦲꦏꦼꦩꦲꦸꦢꦏ꧀ꦲꦸꦥꦩꦏꦏꦼꦠꦸꦩꦶꦧꦩꦫꦁꦲꦮꦏ꧀ꦏꦸ꧈ꦤꦔꦶꦁꦲꦥꦥꦲꦼꦢꦲꦼ꧉ꦱꦲꦸꦥꦩꦱꦫꦶꦫꦩꦸꦲꦔꦶꦫꦩꦤꦮꦮꦺꦴꦁꦭꦶꦪꦲꦺꦴꦫꦧꦏꦭ꧀ꦲꦔ꧀ꦭꦏꦺꦴꦤꦶꦏꦪꦏꦁꦮꦶꦱ꧀ꦏꦺꦴꦏ꧀ꦭꦏꦺꦴꦤꦶꦩꦲꦸ꧈ꦲꦶꦏꦸꦏ꧀ꦭꦶꦫꦸꦧꦔꦼꦠ꧀꧈ꦭꦤ꧀ꦩꦤꦺꦃꦩꦤꦮꦱꦫꦶꦫꦩꦸꦔꦤ꧀ꦠꦶꦲꦤꦼꦩꦲꦶꦠꦶꦮꦱ꧀꧈ꦱꦏꦧꦺꦲꦼꦥꦒꦮꦼꦪꦤ꧀ꦏꦁꦮꦶꦱ꧀ꦏꦺꦴꦏ꧀ꦭꦏꦺꦴꦤꦶꦲꦶꦏꦸ꧈ꦠꦸꦩꦿꦥꦼꦩꦫꦁꦏꦁꦥꦸꦠꦿꦲꦺꦴꦫꦲꦤꦥꦲꦼꦢꦲꦼ꧈ꦩꦭꦃꦧꦶꦱꦲꦸꦒꦲꦚ꧀ꦗꦭꦫꦶꦠꦶꦮꦱꦼ꧉
꧋ꦏꦸꦭꦩꦁꦱꦸꦭꦶꦩꦭꦶꦃ꧇ꦏꦁꦩꦁꦏꦺꦴꦤꦺꦴꦲꦶꦏꦸꦲꦏꦸꦲꦺꦴꦫꦮꦼꦫꦸꦃ꧉ꦲꦏꦸꦲꦶꦪꦮꦶꦱ꧀ꦱꦸꦮꦼꦲꦩꦶꦏꦶꦂꦩꦶꦏꦶꦂ꧈ꦤꦔꦶꦁꦠꦤ꧀ꦱꦃꦲꦺꦴꦫꦧꦶꦱꦕꦺꦴꦤ꧀ꦝꦺꦴꦁꦏꦫꦺꦴꦥꦶꦏꦶꦫꦤ꧀ꦏꦸꦝꦼꦮꦼ꧉ꦯꦁꦫꦗꦥꦸꦠꦿꦶ Macqueda ꦲꦸꦒꦲꦩꦤꦃꦩꦤꦃ꧈ꦱꦠꦼꦩꦃꦲꦔ꧀ꦭꦲꦶꦫꦏꦼꦗꦁꦗꦶ꧈ꦏꦶꦫꦏꦸꦲꦺꦴꦫꦔꦁꦒꦺꦴꦥꦫꦶꦁꦮꦼꦫꦸꦃꦝꦶꦱꦶꦏ꧀ꦩꦫꦁꦥꦫꦥꦁꦒꦼꦝꦼꦏꦁꦮꦗꦶꦧ꧀ꦔꦠꦸꦫꦶꦥꦩꦿꦪꦺꦴꦒꦩꦫꦁꦥꦚ꧀ꦗꦼꦤꦼꦔꦤꦼ꧈ꦥꦔꦤ꧀ꦢꦶꦏꦤꦼꦩꦁꦏꦼꦤꦼ꧇ꦠꦸꦮꦤ꧀ꦝꦺꦴꦏ꧀ꦠꦼꦂ꧈ꦏꦸꦭꦱꦩ꧀ꦥꦼꦪꦤ꧀ꦠꦸꦭꦸꦔꦶ꧈ꦏꦸꦭꦲꦶꦁꦒꦶꦃꦧꦝꦼꦩꦶꦠꦸꦭꦸꦔꦶꦝꦠꦼꦁꦱꦩ꧀ꦥꦼꦪꦤ꧀꧉ꦱꦩ꧀ꦥꦼꦪꦤ꧀ꦠꦸꦭꦸꦔꦶꦧꦺꦴꦁꦱ Abati ꦱꦏꦶꦁꦧꦼꦧꦪꦲꦶꦁꦏꦁꦱꦮꦚ꧀ꦕꦶꦮꦚ꧀ꦕꦶꦱꦒꦼꦢ꧀ꦤ꧀ꦝꦠꦼꦔꦶ꧈ꦏꦸꦭꦧꦝꦼꦲꦩ꧀ꦧꦸꦢꦶꦢꦪꦱꦸꦥꦢꦺꦴꦱ꧀ꦲꦶꦁꦏꦁꦥꦸꦠꦿꦱꦒꦼꦢ꧀ꦲꦺꦴꦚ꧀ꦕꦠ꧀ꦱꦏꦶꦁꦮꦼꦮꦼꦁꦏꦺꦴꦤꦶꦁꦧꦺꦴꦁꦱ Fung꧉ꦏꦸꦭꦱꦒꦃꦚꦸꦏꦤꦶꦒꦚ꧀ꦗꦫꦤ꧀ꦲꦒꦼꦁꦝꦠꦼꦁꦱꦩ꧀ꦥꦼꦪꦤ꧀ꦭꦤ꧀ꦝꦠꦼꦁꦠꦶꦪꦁꦠꦶꦪꦁꦲꦶꦁꦏꦁꦧꦝꦼꦱꦩ꧀ꦥꦼꦪꦤ꧀ꦧꦼꦏ꧀ꦠꦩꦿꦶꦏꦶ꧉
꧋ꦲꦏꦸꦩꦁꦱꦸꦭꦶ꧇ꦩꦤꦮꦏꦁꦩꦁꦏꦺꦴꦤꦺꦴꦲꦶꦏꦸꦲꦺꦴꦫꦒꦩ꧀ꦥꦁꦧꦶꦱꦤꦼꦏꦭꦏꦺꦴꦤ꧀꧈ꦲꦮꦶꦠ꧀ꦧꦏꦭ꧀ꦲꦺꦴꦫꦲꦤꦮꦺꦴꦁꦏꦁꦥꦿꦕꦪꦩꦫꦁꦕꦫꦶꦠꦏꦸ꧉ꦧꦉꦁꦱꦁꦫꦗꦥꦸꦠꦿꦶꦩꦶꦉꦁꦲꦠꦸꦂꦏꦸꦏꦁꦏꦪꦩꦁꦏꦺꦴꦤꦺꦴꦩꦲꦸ꧈ꦧꦚ꧀ꦗꦸꦂꦲꦔ꧀ꦭꦺꦴꦭꦺꦴꦱ꧀ꦲꦒꦼꦩꦼꦲꦭꦶꦲꦭꦶꦏꦫꦗꦤ꧀꧈ꦪꦲꦶꦏꦸꦲꦭꦶꦲꦭꦶꦏꦁꦏꦺꦴꦏ꧀ꦏꦤ꧀ꦛꦺꦴꦔꦶꦲꦶꦏꦸ꧈ꦥꦿꦺꦴꦥꦼꦱꦺꦴꦂ꧉ꦯꦁꦫꦗꦥꦸꦠꦿꦶꦤꦸꦭꦶꦔꦤ꧀ꦢꦶꦏꦩꦁꦏꦼꦤꦼ꧇ꦱꦸꦱꦸꦥꦼꦥꦸꦤꦶꦏꦢꦶꦥꦸꦤ꧀ꦲꦒꦼꦩ꧀ꦢꦼꦤꦶꦁꦥꦫꦊꦭꦸꦲꦸꦂꦏꦸꦭ꧈ꦮꦶꦮꦶꦠ꧀ꦗꦩꦤꦶꦥꦸꦤ꧀ꦥꦸꦠꦿꦶ Macqueda꧈ꦫꦗꦥꦸꦠꦿꦶꦲꦶꦁꦯꦼꦧ꧉ꦩꦤꦮꦶꦮꦺꦴꦤ꧀ꦠꦼꦤ꧀ꦱꦭꦃꦱꦠꦸꦁꦒꦶꦭꦶꦁꦧꦺꦴꦁꦱꦱꦩ꧀ꦥꦼꦪꦤ꧀ꦲꦶꦁꦏꦁꦥꦶꦤ꧀ꦠꦼꦂ꧈ꦥꦶꦪꦩ꧀ꦧꦏꦶꦥꦸꦤ꧀ꦧꦝꦼꦱꦒꦼꦢ꧀ꦩꦲꦺꦴꦱ꧀ꦲꦱ꧀ꦩꦤꦶꦥꦸꦤ꧀ꦫꦗꦥꦸꦠꦿꦶꦲꦶꦁꦯꦼꦧꦮꦲꦸ꧈ꦲꦶꦁꦏꦁꦏꦱꦼꦫꦠ꧀ꦲꦶꦁꦱꦸꦱꦸꦥꦼꦥꦸꦤꦶꦏ꧈ꦱꦂꦠꦱꦒꦼꦢ꧀ꦚꦸꦩꦼꦉꦥꦶꦧꦶꦭꦶꦃꦕꦫꦶꦪꦺꦴꦱ꧀ꦏꦸꦭꦥꦸꦤꦶꦏꦧꦺꦴꦠꦼꦤ꧀ꦢꦺꦴꦫ꧉ꦱꦸꦮꦮꦶꦱꦸꦱꦸꦥꦼꦥꦸꦤꦶꦏꦱꦩ꧀ꦥꦼꦪꦤ꧀ꦧꦼꦏ꧀ꦠꦩꦶꦤꦺꦴꦁꦏꦥꦱꦏ꧀ꦱꦺꦤꦶꦁꦕꦫꦶꦪꦺꦴꦱ꧀ꦱꦩ꧀ꦥꦼꦪꦤ꧀ꦝꦠꦼꦁꦩꦶꦠꦿꦩꦶꦠꦿꦱꦩ꧀ꦥꦼꦪꦤ꧀꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
