Kaca:Serat Kandha Ringgit Tiyang Lampahan Mintaraga (Buku I).pdf/49

37

	ingadhep sagunging wasi jejanggan manguyu. Sang Pandhita akathah pamitranira ingkang para resi, samya mangèstu dhumateng Sang Pandhita. Ingkang sowan tengah lèr ngajeng punika, lelurahing para cantrik, wasta pun Cantrik Danakarti, wétanira punika pun Wasi Sonyasubrastha, kilènira punika pun Jejanggan Anungswara. Pepak ingkang para cantrik guntung sowan sadaya, wondéné Ki Lurah Semar saanakira inggih sowan wonten ngarsanira sang tapa, teka mangkana pangunadikanira Sang Pandhita, "ikibocah cantrik wasi jejanggan manguyu, pepak padha séba kabeh, semuné padha bungah sarta lega atiné, ingsun lagi mudhar
63	semadiningsun." Wondéné yitnanira pun Cantrik Danakarti, "i, i, i, iki Sang Adi Panembahan, lagi pinuju mudhar dènya semadi, akarsa lenggah sajroning guwa, animbali kancaku cantrik jejanggan manguyu, semuné bakal ana karsané, andhawuhaké marang aku, utawa menyang kancaku, dak-sawang- sawang kaya lejar penggalihé," yekti mangkana yitnanira Cantrik Danakarti. GANGSA GESANG, SUWUK, LAGON, POCAPAN (58), GANGSA PLAJARAN, REP. Sébetbyar wau ta, sapengkerira cantrik Wasi Lebuguntung,tuwin Ki Lurah Semar saanakipun, lah ing ngriku kasaru praptanira Tumenggung Mamangmurka, tanapi Lurah Togog Saraita,
64	dumrojog tanpa larapan. GANGSA GESANG, REP. Wau ta sadhatengira pun Tumenggung Mamangmurka,wonten ngarsanira Sang Begawan Suciptahening, ya mangkana yitnanira pun Tumenggung Mamangmurka, "éhahé, nyata wingit temen Begawan Suciptahening, pantes yèn kaloka kajana priya, gentur kasutapané, manther téjané angenguwung, dak-kedhèp aké cat katon cat ora, ya muga-muga kersa aparing pangèstu marang Kangjeng Déwaji." Wondéné yitnanira Ki Lurah Togog Saraita, "kepriyé kersané Mas Tumenggung Mamangmurka iki, wanguné ora ngrujuki kang dadi tuturku, bakal nemu apa baé." Wondéné yitnanira Sang Begawan Suciptahening, "iki buta sekanegara Ngimataka, semuné ora persaja lakuné," yekti mangkana
65	pangudasmaranira Sang Begawan Mintaraga.