PAMULANGAN LUHUR KAPRADJURITAN ING DJAMAN MATARAM
Ing wantjḭ djam sekawan sonten srengēngē sampun suda
bentēripun, ramē swaranipun tijang sami reresik, njapu latar
ngisēni djembangan utawi kulah baḏē kadamel adus. Margi ageng ing Mataram ketingal regeng, djalaran kaṯah tijang
langkung, sekeḏap-sekeḏap ketingal wonten prijantun numpak kapal, panganggēnipun sarwa singset, sarwi abebangkol, tanganipun kiwa njepengi apus ingkang tengen amanḏi waos, wangunipun angadjrihi, ing semu kados tijang baḏē mangsah djurit. Nanging manawi dipun waspaosaken, ingkang wonten putjuking waos wau dēdē lelanḏep, awujud ubel-ubel sindjang kawangun saē, inggih punika ingkang nama watang. Regenging margi saha ramēning kiṯa boten anggumunaken, amargi nalika semanten pinudju dinten Sabtu, para satrija, para senapati saha para ingkang kalebet golonganing pradjurit sami watangan wonten ing alun-alun.
Ing alun-alun kaṯah tijang; ingkang sami numpak kapal wau tata djēdjēr wonten satjelaking ringin kurung, sawenēh wonten ingkang mijambak. Ing wingking rantap para santana utawi abdi, ugi sami numpak kapal, pratanḏanipun satrija utawi pangageng, ingkang Sinuwun Kangdjeng Sunan mijos, ladjeng lenggah wonten ing bangsal pangrawit.
Tengara kaungelaken, munten wiwit watangan. Para ingkang numpak kapal anggebrag kapalipun, mider akekalangan, miling-miling ngupados tanḏing, sareng sampun angsal, ladjeng
ubeng-ubengan kados sawung ērēk, sarta tansah wawas-winawas apusing kenḏali katjangkolaken ing bankol ladjeng angunda unda watang. Tumumten ingkang satunggal angingeraken kapalipun nradjang anamakaken watang, ingkang kaangkah ḏaḏa. Satunggalipun prajitna, ḏawahing watang tinangkis sami watang
kumropjak adamel kagēting kapal, sanalika kupingipun andjepiping,mripatipun murub,ing semu kados murina,dēnē bendaranipun kaḏawahan ing dedamel, ambekos kados akēn tumunten amalesa. Ingkang numpaki sabar ing manah,dērēng nijat males manawi dērēng patitis ing pamawas. Kados makaten sagolongan-sagolonganipun ingkang sami adjar tanding, watang-winatang wegig-wegig, adamel sanengipun ingkang sami ni-
