40.
Baris Ngarab wus mijil gumulung kadya
sungapan waudadi
tata barisira
Sultan Kamidil Ngalam
ginarebeg ing para ji
wus aneng papan
munggwing amparan manik
41.
Lajeng nitih pun Askarduwijan mangsah
kawrat kaprabon jurit
prapteng rananggana
Sultan Kamidil Ngalam
mider ing papan sesirig
asumbar sumbar
sapa arsa ngemasi.
42.
Heh ya sapa tan wruha wong Jaminambar
yengsun Surayengbumi
turasing dipatya
Ngabdul Muntalip Mekah
kang peputra nama Hasim
Hasim kang putra
Seh Ngabdul Manap yekti
43.
Ngabdul Manap kang putra Bagendha Kasah
Kasah ingkang sesiwi
Mahaprabu Kelan
narpati wiratama
trah Kures prawirengjurit
heh Saesalam
metuwa kene jurit.
44.
Aja ngemungaken ngedu para nata
tanpa wekas ing jurit
payo Saesalam
heh padha aprang muka
arok bandawala pati
atepung jangga
singa tiwas ngemasi.
