Kaca iki wis divalidasi
• St. Iesmaniasita - Mawar Mawar Ketiga
31
MUJIYA SOKUR
sawarnaning kasangsayan
sawarnaning kacuwan
kaya upamane rina kang tansah kepyuran
tajem-tajeming dhuhkita
kaya upamane alas ketiga
siyaga ngobar dahana
o, tumengaa atiku
sapanen jembaring langit kang biru
banjur mujiya sokur
atas sarating pandadaran
kang kapasrahake ana pundhakmu
sawarnaning kabegjan
sawarnaning kabungahan
kaya upamane lintang-lintang kang gumebyar
padha ngliling ayuning rembulan
kaya upamane sijuru mbebedhag
jemparinge patitis ngenani
o, tumungkula atiku
leremna ombaking dhadha ana aruming bumi
(dimen ora kelangan asal lan arahing laku)
banjur mujiya sokur
dene tangan-tangan kang ringkih
pinarcaya nampa nugraha linuwih
□ Agustus 1967
