Kaca iki wis divalidasi
- Eseme pait madu
— Madu iku rasane legi, mangka dianggep isih pait, tegese legi banget utawa manis banget.
— Eseme manis banget. - Lakune rindhik kirik digitik
— Playune kirik digitik iku banter, mangka dianggep isih rindhik, tegese luwih dening banter. - Suwe mijet wohing ranti
— Mijet wohing ranti iku sedhela banget (gampang), mangka isih dianggep suwe, tegese luwih dening gampang (sedhela banget).
— (samubarang gawe) kang gampang (sedhela) banget ditindakake. - Rasane legi butrawali
— Butrawali iki pait, mangka dianggep luwih dening legi, tegese pait banget rasane.
— Rasane pait banget. - Cahyane abang dluwang
— Dluwang iku warnane putih. Putihing dluwang dianggep luwih dening abang, tegese luwih dening putih (= aclum)
— Cahyane aclum banget. - Anggone memitran renggang gula kumepyur pulut
— Tangkepaning lirangan gula Jawa iku kraket banget (saya kraket manawa rada jemek), mangka dianggep isih renggang, tegese kraket banget (ora tau pisah)
-Anggone memitran raket banget sasat ora tau pisah. - Tatune arang kranjang
— Kranjang iku bolongane (matane) kerep tur rata, mangka dianggep luwih dening arang, tegese kerep banget.
— Tatune kerep banget (rata ing awak) - Lungguhe anteng kitiran
— Kitiran, mubeng, dianggep luwih dening anteng, tegesetansah obah
— Lungguhe tansah obah (rongeh)
31
