Kaca iki wis divalidasi
- Raine putih terus ing cangkemė, aran bramakokap, manuk iku kuriu arep weruh getihé kang ngingu.
- Yèn awan bengi muni, aran durgangerik, adoh rijekiné kang ngingu, kerep tukaran lan anak bojo, sarta kerep kepatèn.
- Muni tengah wengi aran durganguwuh, kang ngingu suda rijekiné wayang wuyung lanang wadon gentèn lara.
- Laklakan karo putih, aran sengkalapipit, kang ngingu tansah bencèng pikir kerep padu.
- Yen laré salembar putih ana ing geger, aran sanggabuwana, adoh rijekiné lan kang ngingu kerep susah, atiné mbesiwit klèru tampa.
- Brumbun wuluné, aran lemburuwan, kang ngingu kerep lara.
- Pundhak putih aran cendhalasabda, kang ngingu wicarané ala. Manuk mau yèn kanggo mikat kerep oléhan.
- Gentané semu iren, aran wisnutinundhung, apa sasedyané kang ngingu ora katurutan lan kerep keluputan.
Tangguhing manuk brekutut.
- Ules wungu terus ing gentané, iku tangguh Pajajaran.
- Ules ijo dumeling teris ing gentané, iku turuné Ki Jaka Mangu tangguh Majapahit.
- Abang sikilé terus ing gentané sarta ing tlapukané, ngemprit gantil sawangané (memper manuk prigantil utawa kudasih pasemone) iku tangguh Tuban.
- Sikil semu putih terus marang gentané, cucuk cendhak, iku tangguh Mataram.
- Sikil blawus terus marang gentané sarta talapukané, iku tangguh Pajang.
- Sikil putih semu klawu terus ing gentané, sarta talapukané, iku tangguh Sedayu.
- Sikil semu abang terus ing gentané sarta talapukané, nanging abangé enom, iku tangguh Demak. Manuk brekutut padha ndhuwèni tangguh ora bèda karo wesi aji.
Loloh tambané manuk brekutut.
- Supaya bungkak (énggal muni), kemukus 2, trasi abang sawatara, godhong lampes 3 lembar, uyah sawatara kapipis, lolohna.
- Supaya adhem lan sareh, kléyang katu 3 lembar, sawang, trasi abang, ketumbar, lenga klentik lan uyah, akèh sathithike nyawatara sapantesé, kapipis lolohna.
185
