꧋ꦯꦼꦩꦂ꧇ ꦲꦫ꧈ꦠ꧉ꦲꦤꦏ꧀ꦭꦺꦴꦫꦺꦴ꧈ꦒꦼꦩ꧀ꦧ꧀ꦭꦸꦁꦭꦺꦴꦫꦺꦴ꧈ꦏꦧꦺꦃꦏꦧꦺꦃꦥꦝꦔꦿꦶꦠꦶꦏ꧀ꦩꦫꦁꦮꦺꦴꦁꦠꦸꦮ꧈ꦮꦺꦴꦁꦠꦸꦮꦲꦭꦲꦭꦩꦭꦠ꧀ꦠꦶ꧈ꦮꦺꦴꦁꦠꦸꦮꦮꦗꦶꦧ꧀ꦢꦶꦒꦸꦒꦸꦠꦸꦠꦸꦂꦫꦼ꧉
꧋ꦓꦫꦺꦁ꧇ ꦱꦶꦁꦢꦶꦒꦸꦒꦸꦏꦸꦮꦶꦫꦏ꧀ꦥꦶꦠꦸꦠꦸꦂꦱꦶꦁꦧꦼꦕꦶꦏ꧀꧈ꦢꦸꦢꦸꦥꦶꦠꦸꦠꦸꦂꦱꦶꦁꦲꦺꦴꦫꦲꦺꦴꦫ꧉ꦭꦩꦸꦤ꧀ꦲꦤꦮꦺꦴꦁꦠꦸꦮꦩꦸꦭꦁꦩꦫꦁꦲꦤꦏ꧀ꦏꦼꦱꦸꦥꦪꦔ꧀ꦭꦏꦺꦴꦤ꧀ꦤꦶꦲꦭ꧈ꦲꦶꦏꦸꦥꦤ꧀ꦠꦼꦱ꧀ꦢꦶꦪꦸꦤ꧀ꦢꦁꦔꦏꦼꦩꦭꦲꦼꦏꦠ꧀ꦮꦤꦏꦶꦫꦸꦤ꧀꧈ꦏꦉꦧꦺꦤ꧀ꦢꦶꦒꦢꦫꦸꦗꦏ꧀ꦥꦺꦴꦭꦺꦴ꧉
꧋ꦯꦼꦩꦂ꧇ ꦭꦃ꧈ꦲꦶꦏꦶꦧꦺꦴꦕꦃꦪꦺꦤ꧀ꦮꦶꦱ꧀ꦏꦸꦂꦱꦸꦱ꧀ꦲꦺꦴꦭꦺꦃꦲꦼꦱꦼꦏꦺꦴꦭꦃ꧉ꦲꦶꦛꦶꦏ꧀ꦲꦶꦛꦶꦏ꧀ꦲꦉꦥ꧀ꦔꦽꦏꦺꦱ꧀ꦮꦺꦴꦁꦠꦸꦮ꧉ꦏꦸꦫꦁꦏꦧꦼꦤꦼꦂꦫꦤ꧀ꦱꦛꦶꦛꦶꦏ꧀ꦧꦲꦼ꧈ꦮꦶꦱ꧀ꦥꦝꦔꦸꦩꦤ꧀ꦲꦸꦩꦤ꧀꧉ꦲꦶꦪ꧈ꦩꦸꦤꦶꦪꦩꦤꦺꦃ꧉... ꦢꦏ꧀ꦱꦸꦥꦠꦤ꧀ꦤꦶꦏꦺꦴꦮꦼ꧉
꧋ꦓꦫꦺꦁ꧇ ꦮꦛꦃ꧈ꦮꦛꦃ꧈ꦮꦛꦃ꧉ꦲꦶꦏꦶꦤꦺꦏ꧀ꦥꦿꦶꦪꦪꦶꦱꦼꦥꦸꦃ꧉ꦒꦸꦭꦁꦒꦸꦭꦔꦤ꧀ꦤꦼꦩꦸꦁꦲꦉꦥ꧀ꦚꦸꦥꦠ꧀ꦠꦤ꧀ꦤꦶꦲꦤꦏ꧀꧉ꦲꦺꦴꦫꦲꦶꦭꦺꦴꦏ꧀ꦭꦺꦴ꧈ꦚꦸꦥꦠ꧀ꦠꦤ꧀ꦤꦶꦲꦤꦏ꧀ꦏꦸꦮꦼ꧉
꧋ꦦꦼꦠꦿꦸꦏ꧀꧇ ꦲꦶꦪ꧈ꦕꦶꦏ꧀ꦧꦺꦤ꧀꧈ꦪꦺꦤ꧀ꦫꦩꦱꦶꦢꦚꦸꦥꦠ꧀ꦠꦤ꧀ꦤꦶ꧉ꦲꦪꦺꦴꦥꦝaudientie ꦚꦁꦲꦼꦁꦒꦺꦴꦤ꧀ꦤꦼꦢꦲꦺꦴꦏꦼ꧈ꦏꦉꦧ꧀ꦧꦺꦤ꧀ꦫꦩꦢꦶꦱꦶꦠꦃꦢꦲꦺꦴꦏꦼ꧉
꧋ꦯꦼꦩꦂ꧇ ꦲꦶ꧈ꦲꦶ꧈ꦲꦶ꧉ꦉꦩ꧀ꦧꦸꦒ꧀ꦒꦼꦥꦠꦶꦁꦕ꧀ꦭꦼꦩꦺꦴꦁ꧈ꦩꦸꦁꦥꦝꦩꦔꦫꦃꦥꦠꦶꦤꦼꦮꦺꦴꦁꦠꦸꦮ꧉ꦲꦥꦏꦺꦴꦮꦼꦥꦝꦠꦼꦒꦪꦺꦤ꧀ꦲꦏꦸꦏꦥꦶꦂꦫꦤ꧀꧈ꦲꦥꦏꦺꦴꦮꦼꦩꦼꦤ꧀ꦠꦭ꧈ꦪꦺꦤ꧀ꦲꦏꦸꦩꦠꦶꦏꦭꦶꦉꦤ꧀꧉
꧋ꦓꦫꦺꦁ꧇ ꦭꦺꦴ꧈ꦪꦲꦺꦴꦫꦠꦼꦒꦔꦺꦴꦤꦺꦴ꧈ꦤꦶꦁꦲꦏꦸꦫꦏ꧀ꦏꦺꦴꦝꦶꦱꦶꦏ꧀ꦏꦶ꧉ꦩꦲꦸꦱ꧀ꦭꦶꦫꦤꦼꦫꦩ꧈ꦫꦏ꧀ꦲꦉꦥ꧀ꦚꦸꦥꦠ꧀ꦠꦤ꧀ꦤꦶꦲꦏꦸꦏꦫꦺꦴꦱꦶꦦꦼꦠꦿꦸꦏ꧀꧉ꦲꦥꦚꦸꦥꦠ꧀ꦠꦤ꧀ꦤꦶꦲꦶꦏꦸꦲꦺꦴꦫꦤꦿꦗꦁꦲꦂꦠꦶꦏꦼꦭ꧀ꦱꦶꦁꦲꦸꦤꦶꦤꦼꦩꦁꦏꦼꦤꦼ꧇ꦱꦶꦫꦲꦗꦤꦼꦒꦏ꧀ꦲꦏꦼꦲꦤꦏ꧀꧉.. ꦢꦢꦶꦪꦺꦤ꧀ꦏꦺꦴꦮꦼꦱꦶꦢꦚꦸꦥꦠ꧀ꦠꦤ꧀ꦤꦶ꧈ꦲꦶꦏꦸꦠꦼꦠꦼꦥ꧀ꦤꦿꦗꦁꦲꦁꦒꦼꦂ꧉ꦩꦤꦸꦠ꧀ꦲꦢꦶꦊꦏꦸꦢꦸꦢꦶꦱꦼꦏꦺꦴꦉꦱ꧀꧈ꦠꦼꦫꦸꦱ꧀ꦢꦶꦥꦿꦺꦥꦺꦤ꧀ꦠꦶꦦ꧀꧉
꧋ꦦꦼꦠꦿꦸꦏ꧀꧇ ꦮꦝꦸꦃ꧈ꦏꦺꦴꦮꦼꦱꦲꦶꦏꦶꦠꦼꦏꦮꦶꦱ꧀ꦲꦥꦭ꧀ꦩꦼꦚꦁꦮꦺꦠ꧀꧈ꦲꦥꦮꦶꦱ꧀ꦱꦶꦢꦱꦼꦏꦺꦴꦭꦃꦩꦼꦚꦁ꧇ ꦲꦸꦏꦼꦱꦼꦏꦸꦭ꧀꧈ꦕꦭꦺꦴꦤ꧀ꦩꦉꦏ꧀ꦩꦺꦱ꧀ꦠꦼꦂ꧈ꦔꦺꦴꦤꦺꦴꦏꦲꦼ꧉
꧋ꦓꦫꦺꦁ꧇ ꦩꦼꦱ꧀ꦛꦶ ꦠ꧉ꦩꦭꦃꦲꦏꦸꦮꦶꦱ꧀ꦝꦸꦂꦭꦺꦴꦥꦼꦤ꧀ꦔꦮꦼꦌꦱ꧀ ꦭꦃ꧈ꦮꦺꦴꦁꦥꦸꦠꦿꦤꦼꦫꦩ꧉ꦫꦏ꧀ꦲꦶꦪ꧇ ꦠ꧇ ꦩ꧉
꧋ꦯꦼꦩꦂ꧇ ꦲꦶꦪꦧꦼꦤꦼꦂ꧉ꦲꦶꦏꦸꦧꦺꦴꦕꦃꦧꦒꦸꦱ꧀꧈ꦔꦼꦠꦺꦴꦏ꧀ꦲꦺꦠꦺꦴꦏ꧀ꦲꦏꦼꦲꦺꦴꦭꦺꦃꦲꦼꦢꦶꦫꦒꦢꦶꦮꦺꦴꦁꦠꦸꦮ꧉ꦏꦕꦁꦩꦺꦴꦁꦱꦤꦶꦁꦒꦭ꧀ꦭꦭꦚ꧀ꦗꦂꦫꦤ꧀꧈ꦧꦥꦏ꧀ꦤꦼꦢꦢꦶꦥꦿꦶꦪꦪꦶꦒꦼꦝꦼ꧈ꦲꦤꦏ꧀ꦏꦼꦕꦭꦺꦴꦤ꧀ꦩꦺꦴꦱ꧀ꦠꦼꦂ꧉
꧋ꦓꦫꦺꦁ꧇ ꦱ꧀ꦭꦶꦫꦩꦸ꧇ ꦏ꧀ꦭꦺꦝꦼꦁ꧈ꦩ꧉ꦩꦺꦴꦱ꧀ꦠꦼꦂꦩꦺꦴꦤꦺꦴꦫꦏ꧀ꦧꦁꦱꦤꦼꦧꦸꦩ꧀ꦧꦸ꧈ꦢꦢꦶꦒꦺꦱꦺꦃꦏꦫꦺꦴꦩꦺꦱ꧀ꦠꦼꦂ꧉ꦤꦺꦏ꧀ꦩꦺꦱ꧀ꦠꦼꦂꦏꦸꦮꦶꦠꦸꦏꦁꦲꦢꦺꦴꦭ꧀ꦏꦂꦕꦶꦱ꧀ꦥꦱꦂ꧈ꦢꦢꦶꦒꦮꦼꦪꦤ꧀ꦤꦼꦔ꧀ꦭꦸꦩ꧀ꦥꦸꦏ꧀ꦲꦏꦼꦝꦸꦮꦶꦠ꧀꧉
꧋ꦯꦼꦩꦂ꧇ ꦭꦃ꧈ꦲꦶꦏꦸꦥꦼꦥꦼꦛꦶꦁꦔꦤ꧀ꦤꦶꦁꦲꦤꦏ꧀ꦭꦤꦁ꧉ꦥꦶꦤ꧀ꦠꦼꦂꦔ꧀ꦭꦸꦩ꧀ꦥꦸꦏ꧀ꦲꦏꦼꦝꦸꦮꦶꦠ꧀꧈ꦏꦼꦤꦏꦁꦒꦺꦴꦔꦸꦭꦸꦂꦮꦺꦴꦁꦠꦸꦮ꧉
꧋ꦦꦼꦠꦿꦸꦏ꧀꧇ ꦲꦺꦭꦺꦴ꧈ꦠꦼꦏꦩꦺꦭꦶꦏ꧀ꦏꦼꦥꦿꦶꦧꦢꦶ꧉ꦝꦸꦮꦶꦠ꧀ꦏꦁꦢꦶꦏ꧀ꦭꦸꦩ꧀ꦥꦸꦏ꧀ꦲꦏꦼꦲꦶꦏꦸꦫꦏ꧀ꦏꦒꦸꦔꦤ꧀ꦤꦶꦁꦤꦒꦫ꧈ꦲꦺꦴꦫꦏꦼꦤꦢꦶꦪꦁꦒꦺꦴꦱꦏꦂꦱꦏꦂꦱꦤꦺꦏꦶ꧉ꦱꦼꦠꦿꦺꦁꦥꦼꦂꦝꦸꦧ꧀ꦭꦼꦁ꧈ꦢꦶꦪꦸꦭꦸꦂꦫꦏꦼꦚꦁꦮꦺꦴꦁꦠꦸꦮ꧉ꦱꦧꦧ꧀ꦩꦺꦱ꧀ꦠꦼꦂꦫꦼꦮꦶꦱ꧀ꦩꦔꦤ꧀ꦒꦗꦶꦃ꧈ꦱꦱꦱꦶꦠꦼꦭꦸꦁꦥꦸꦭꦸꦃꦗꦼꦗꦼꦒ꧀꧉.. ꦱ꧀ꦭꦶꦫꦩꦸꦏꦸꦮꦶꦏꦼꦤꦲꦸꦏꦶꦭ꧀꧈ꦫꦩ꧉ꦤꦺꦏ꧀ꦲꦤꦏ꧀ꦏꦼꦫꦢꦩꦔ꧀ꦭꦂꦱꦛꦶꦛꦶꦏ꧀ꦧꦲꦼ꧈ꦮꦸꦱ꧀ꦏꦸꦩꦼꦕꦼꦂꦲꦺꦴꦭꦺꦃꦲꦼꦲꦉꦥ꧀ꦩꦸꦥꦸ꧉ꦤꦔꦶꦁꦏꦺꦴꦱꦺꦴꦏ꧀ꦧꦭꦶꦤꦼ꧈ꦪꦺꦤ꧀ꦭꦸꦥꦸꦠ꧀ꦱꦛꦶꦛꦶꦏ꧀ꦧꦲꦼ꧈ꦩꦱ꧀ꦛꦶꦢꦶꦥꦼꦂꦏ꧀ꦭꦉꦁ꧉ꦩꦫ꧈ꦲꦥꦲꦢꦶꦭ꧀ꦲꦶꦏꦸ꧉
(ꦧꦝꦼꦏꦱꦩ꧀ꦧꦼꦠ꧀ꦠꦤ꧀)
꧋ꦥꦸꦤ꧀꧈R.S.꧉ꦑꦂꦠꦮꦂꦢꦪ꧉
