ꦮꦮꦲꦺꦴꦱꦤ꧀ꦉ
꧋ꦱꦸꦱꦸꦥꦼꦲꦒꦼꦩꦶꦥꦸꦤ꧀ꦫꦗꦥꦸꦠꦿꦶꦲꦶꦁꦯꦼꦧ
꧇꧖꧇
꧋ꦉꦩ꧀ꦧꦒꦶꦥꦸꦤ꧀ꦱꦼꦂꦱꦤ꧀꧈ Quick
꧋ꦏꦥꦶꦠꦤ꧀ꦭꦗꦼꦁꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦲꦤꦔꦶꦁꦏꦸꦭꦤ꧀ꦠꦼꦤ꧀ꦧꦧ꧀ꦲꦶꦁꦏꦁꦏꦱꦸꦥꦺꦤ꧀꧈ꦲꦶꦁꦒꦶꦃꦥꦸꦤꦶꦏꦏꦸꦭꦏꦥꦼꦔꦶꦤ꧀꧈ꦱꦸꦥꦢꦺꦴꦱ꧀ꦉꦚ꧀ꦕꦁꦏꦸꦭꦭꦩꦶ꧈ꦱꦼꦂꦱꦤ꧀ Quick ꦠꦸꦩꦸꦠ꧀꧉ꦱꦧꦧ꧀ꦩꦤꦮꦶꦥꦶꦤꦸꦗꦸꦮꦺꦴꦤ꧀ꦠꦼꦤ꧀ꦧꦧꦪꦲꦒꦼꦁ꧈ꦱꦼꦂꦱꦤ꧀ Quick ꦮꦲꦸꦲꦒꦼꦁꦱꦔꦼꦠ꧀ꦥꦶꦒꦸꦤꦤꦶꦥꦸꦤ꧀꧈ꦥꦸꦤꦥꦩꦭꦶꦃꦏꦸꦭꦱꦢꦪꦏꦼꦢꦃꦩꦶꦒꦸꦤꦏꦏꦼꦤ꧀ꦝꦶꦤꦩꦶꦠ꧀ꦮꦂꦤꦶꦮꦂꦤꦶ꧉ꦲꦶꦁꦩꦺꦴꦁꦏꦥꦶꦪꦩ꧀ꦧꦏꦶꦥꦸꦤ꧀ꦮꦲꦸꦩꦔꦽꦠꦺꦴꦱ꧀ꦱꦔꦼꦠ꧀ꦝꦠꦼꦁꦧꦧ꧀ꦥꦸꦤꦶꦏ꧈ꦗꦭꦫꦤ꧀ꦤꦭꦶꦏꦢꦢꦺꦴꦱ꧀ꦥꦿꦗꦸꦫꦶꦠ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦧꦒꦶꦪꦤ꧀ꦲꦶꦁꦏꦁꦚꦼꦥꦼꦁꦧꦧ꧀ꦥꦸꦤꦶꦏ꧉ꦲꦩꦶꦭꦩꦤꦮꦶꦥꦚ꧀ꦗꦼꦤꦼꦔꦤ꧀ꦏꦏꦭꦶꦃꦲꦚꦺꦴꦤ꧀ꦝꦺꦴꦔꦶ꧈ꦏꦸꦭꦲꦸꦤ꧀ꦢꦔꦶꦥꦸꦤ꧀ꦭꦤ꧀ꦏꦸꦭꦥꦶꦠꦏꦼꦤꦤꦶꦥꦸꦤ꧀꧈ꦥꦸꦤꦥꦥꦶꦪꦩ꧀ꦧꦏꦶꦥꦸꦤ꧀ꦥꦸꦫꦸꦤ꧀ꦠꦸꦩꦸꦠ꧀꧉ꦏꦶꦤ꧀ꦠꦼꦤ꧀ꦏꦸꦭꦱꦼꦂꦱꦤ꧀ Quick ꦮꦲꦸꦢꦺꦫꦺꦁꦠꦼꦧꦶꦃꦱꦏꦶꦁꦔꦿꦶꦏꦶ꧉
꧋ꦏꦸꦭꦭꦗꦼꦁꦩꦤ꧀ꦛꦸꦏ꧀꧈ꦱꦧꦧ꧀ꦩꦧ꧀ꦩꦤꦮꦶꦤꦶꦠꦶꦏ꧀ꦏꦮꦺꦴꦤ꧀ꦠꦼꦤꦤꦶꦥꦸꦤ꧀ꦏꦭꦱꦼꦂꦱꦤ꧀ Quick ꦥꦱꦸꦭꦪꦤ꧀ꦏꦭꦶꦪꦤ꧀ꦲꦒꦺꦤ꧀ꦥꦸꦭꦶꦱꦶꦥꦿꦏꦮꦶꦱ꧀ꦧꦁꦏꦼꦮꦲꦸ꧈ꦏꦢꦺꦴꦱ꧀ꦏꦛꦃꦒꦸꦤꦤꦶꦥꦸꦤ꧀꧉ꦲꦶꦁꦱꦫꦺꦃꦤꦶꦁꦭꦶꦁꦒꦶꦃꦏꦸꦭꦕꦏꦼꦠ꧀ꦲꦶꦁꦏꦺꦴꦫꦶ꧈ꦏꦸꦭꦲꦩ꧀ꦧꦶꦏꦏꦏꦼꦤ꧀ꦏꦺꦴꦫꦶꦏꦥꦶꦠꦤ꧀ Orme ꧉ꦱꦉꦁꦏꦺꦴꦫꦶꦮꦲꦸꦏꦧꦶꦏꦏ꧀꧈ꦧꦺꦴꦠꦼꦤ꧀ꦔꦶꦤ꧀ꦠꦼꦤ꧀ꦩꦤꦮꦶꦱꦼꦂꦱꦤ꧀ Quick ꦲꦶꦁꦏꦁꦏꦭꦥꦸꦤꦶꦏꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦔꦢꦼꦒ꧀ꦱꦺꦤ꧀ꦝꦺꦤ꧀ꦲꦶꦁꦲꦶꦤꦼꦥꦶꦁꦏꦺꦴꦫꦶꦝꦮꦃꦩꦊꦧꦼꦠ꧀꧈ꦏꦢꦺꦴꦱ꧀ꦝꦮꦲꦶꦁꦉꦕꦏꦗꦼꦁꦝꦮꦃꦲꦶꦁꦱꦶꦠꦶ꧉
꧋ꦏꦥꦶꦠꦤ꧀ Orme ꦱꦗꦏ꧀ꦧꦺꦴꦠꦼꦤ꧀ꦏꦒꦺꦠ꧀ꦱꦂꦠꦭꦗꦼꦁꦲꦭꦺꦴꦏ꧀꧇ꦲꦼꦭꦺꦴ꧉ꦢꦺꦤꦺꦱꦼꦂꦱꦤ꧀ Quick ꦭꦗꦼꦁꦔꦢꦼꦒ꧀ꦲꦚ꧀ꦗꦼꦗꦼꦂꦏꦢꦺꦴꦱ꧀ꦥꦠꦿꦥꦶꦁꦱꦫꦝꦝꦸꦝꦠꦼꦥꦔꦒꦼꦔꦶꦥꦸꦤ꧀꧉ꦏꦥꦶꦠꦤ꧀ Orme ꦤꦸꦤ꧀ꦠꦼꦤ꧀ꦥꦶꦠꦏꦺꦤ꧀ꦱꦼꦉꦁ꧇ꦲꦤꦲꦥꦏꦺꦴꦮꦼꦲꦤꦲꦶꦁꦏꦼꦤꦼ꧇ꦲꦼ꧉
꧋ꦮꦁꦱꦸꦭꦤꦶꦥꦸꦤ꧀ꦱꦼꦂꦱꦤ꧀ Quick ꧇ ꦗꦒꦶ꧈ꦧꦤ꧀ꦢꦫꦏꦥꦶꦠꦤ꧀꧈ꦲꦩꦂꦒꦶꦥꦸꦭꦶꦱꦶꦮꦲꦸꦒꦼꦢ꧀ꦲꦸꦒꦶꦭꦗꦼꦁꦒꦝꦃꦥꦩꦁꦒꦶꦃꦭꦶꦪꦱꦂꦠꦤꦸꦤ꧀ꦠꦼꦤ꧀ꦮꦁꦱꦸꦭ꧀ꦩꦭꦶꦃ꧉ꦥꦸꦤꦥꦮꦺꦴꦤ꧀ꦠꦼꦤ꧀ꦝꦮꦸꦃꦱꦤꦺꦱ꧀ꦱꦤꦺꦱꦶꦥꦸꦤ꧀꧇ꦧꦤ꧀ꦢꦫ꧉
꧋ꦮꦁꦱꦸꦭꦤꦶꦥꦸꦤ꧀ꦏꦥꦶꦠꦤ꧀ Orme ꧇ ꦲꦶꦪ꧈ꦲꦏꦸꦱꦸꦩꦼꦢꦾꦩꦼꦚꦁꦠꦤꦃꦄꦥꦿꦶꦏꦃꦠꦼꦔꦃ꧈ꦏꦥꦤ꧀ꦲꦁꦒꦺꦴꦤ꧀ꦩꦸꦱꦝꦶꦪꦤꦸꦭꦶꦧꦶꦱꦩꦁꦏꦠ꧀꧉
꧋ꦱꦼꦂꦱꦤ꧀ Quick ꦩꦠꦸꦂ꧇ ꦩꦤꦮꦶꦠꦶꦤ꧀ꦢꦏ꧀ꦥꦚ꧀ꦗꦼꦤꦼꦔꦤ꧀ꦩꦶꦪꦺꦴꦱ꧀ Egypte
ꦩꦁꦏꦠꦥꦸꦤ꧀ꦧꦲꦶꦠꦧꦼꦚ꧀ꦗꦶꦁꦲꦺꦚ꧀ꦗꦶꦁꦱꦺꦴꦤ꧀ꦤ꧀꧉ꦩꦤꦮꦶꦠꦶꦤ꧀ꦢꦏ꧀ꦥꦚ꧀ꦗꦼꦤꦼꦔꦤ꧀ꦩꦶꦪꦺꦴꦱ꧀ Tunis ꦧꦼꦚ꧀ꦗꦶꦁꦱꦼꦠꦸꦮꦚ꧀ꦕꦶꦗꦩ꧀ 7.15 ꦏꦼꦢꦃꦱꦩ꧀ꦥꦸꦤ꧀ꦱꦝꦶꦪꦮꦺꦴꦤ꧀ꦠꦼꦤ꧀ꦲꦶꦁꦠꦠ꧀ꦱꦶꦪꦸꦤ꧀ Charing Cross꧈ꦲꦤꦔꦶꦁꦱꦫꦺꦃꦤꦶꦁꦥꦚ꧀ꦗꦼꦤꦼꦔꦤ꧀ꦧꦝꦼꦲꦩ꧀ꦧꦼꦏ꧀ꦠꦝꦶꦤꦩꦶꦠ꧀ꦠꦸꦮꦶꦤ꧀ꦱꦚ꧀ꦗꦠꦏꦛꦃ꧈ꦠꦩ꧀ꦠꦸꦤꦶꦥꦸꦤ꧀ꦩꦸꦫꦶꦃꦒꦩ꧀ꦥꦶꦭꦶꦁꦥꦩ꧀ꦧꦼꦏ꧀ꦠꦤꦶꦥꦸꦤ꧀꧈ꦲꦶꦁꦒꦶꦃꦧꦝꦼꦫꦒꦶꦢꦔꦸꦲꦁꦒꦺꦤꦶꦥꦸꦤ꧀ꦔꦼꦥꦏ꧀ꦲꦼꦥꦏꦶꦧꦫꦁꦧꦫꦁꦮꦲꦸ꧉
꧋ꦏꦥꦶꦠꦤ꧀ Orme
ꦥꦶꦠꦏꦺꦤ꧀ꦏꦤ꧀ꦛꦶꦲꦚ꧀ꦗꦼꦔꦺꦏ꧀꧇ꦏꦺꦴꦮꦼꦮꦼꦫꦸꦃꦲꦥꦲꦶꦁꦧꦧ꧀ꦲꦶꦏꦶ꧇ꦲꦼ꧉
꧋ꦱꦼꦂꦱꦤ꧀ Quick ꦲꦩꦁꦱꦸꦭꦶ꧇ꦏꦺꦴꦫꦶꦤꦶꦁꦒꦿꦶꦪꦲꦶꦁꦏꦁꦱꦩ꧀ꦥꦸꦤ꧀ꦏꦮꦏ꧀ꦩꦏꦠꦼꦤ꧀ꦥꦸꦤꦶꦏ꧈ꦤꦸꦠꦸꦥꦶꦥꦸꦤ꧀ꦧꦺꦴꦠꦼꦤ꧀ꦥꦠꦺꦴꦱꦤꦼꦠꦼꦥ꧀꧉ꦭꦤ꧀ꦧꦤ꧀ꦢꦫꦥꦸꦤꦶꦏ(ꦱꦂꦮꦶꦔꦕꦸꦔꦶꦠꦸꦮꦤ꧀ꦥꦿꦺꦴꦥꦼꦱꦺꦴꦂ
Higgs)ꦏꦒꦸꦔꦤ꧀ꦱ꧀ꦮꦫꦲꦶꦁꦏꦁꦱꦏꦭꦁꦏꦸꦁꦧꦤ꧀ꦠꦱ꧀꧈ꦔꦤ꧀ꦠꦺꦴꦱ꧀ꦱꦒꦼꦢ꧀ꦧꦧ꧀ꦭꦱ꧀ꦢꦸꦩꦸꦒꦶꦥꦸꦤ꧀ꦢꦶꦥꦸꦤ꧀ꦢꦶ꧉ꦏꦸꦭꦧꦺꦴꦠꦼꦤ꧀ꦱꦸꦩꦼꦢꦾꦔꦮꦺꦴꦤ꧀ꦲꦮꦺꦴꦤ꧀ꦝꦠꦼꦁꦱ꧀ꦮꦫꦥꦚ꧀ꦗꦼꦤꦼꦔꦤ꧀꧇ꦧꦤ꧀ꦢꦫ꧈ꦲꦩꦂꦒꦶꦱ꧀ꦮꦫꦲꦶꦁꦏꦁꦕꦼꦛꦥꦸꦤꦶꦏꦱꦠꦸꦁꦒꦶꦭꦶꦁꦏꦤꦸꦒꦿꦲꦤ꧀ꦲꦒꦼꦁ꧈ꦱꦩꦤ꧀ꦠꦼꦤ꧀ꦥꦸꦤꦶꦏꦩꦤꦮꦶꦏꦺꦴꦫꦶꦤꦶꦥꦸꦤ꧀ꦤꦸꦠꦸꦥ꧀ꦊꦉꦱ꧀꧉ꦏꦭꦥꦸꦥꦸꦤꦶꦏꦱꦤꦢꦾꦤ꧀ꦥꦺꦴꦭꦠꦤꦶꦥꦸꦤ꧀ꦱꦼꦂꦱꦤ꧀ Quick ꦧꦺꦴꦠꦼꦤ꧀ꦲꦺꦮꦃꦧꦧꦂꦥꦶꦱꦤ꧀꧈ꦤꦔꦶꦁꦥꦤ꧀ꦢꦶꦫꦔꦶꦁꦩꦿꦶꦥꦠ꧀ꦲꦶꦁꦱꦔꦤ꧀ꦝꦥꦶꦁꦲꦭꦶꦱ꧀ꦏꦤ꧀ꦢꦼꦭ꧀ꦏꦼꦠꦶꦔꦭ꧀ꦲꦁꦒꦼꦒꦫꦥ꧀꧉
꧋ꦩꦶꦉꦁꦮꦶꦚ꧀ꦕꦤ꧀ꦠꦼꦤꦶꦥꦸꦤ꧀ꦱꦼꦂꦱꦤ꧀ Quick ꦩꦏꦠꦼꦤ꧀ꦮꦲꦸ꧈ꦏꦸꦭꦱꦢꦪꦭꦗꦼꦁꦱꦩꦶꦒꦸꦩꦸꦗꦼꦁꦭꦠꦃ꧈ꦩꦏꦠꦼꦤ꧀ꦲꦸꦒꦶꦥꦿꦺꦴꦥꦼꦱꦺꦴꦂ Higgs꧉
꧋ꦏꦥꦶꦠꦤ꧀ Orme ꦥꦶꦠꦏꦺꦤ꧀꧇ꦢꦢꦶꦏꦺꦴꦮꦼꦒꦼꦊꦩ꧀ꦩꦶꦭꦸꦠꦼꦩꦼꦤꦤ꧀꧉ꦲꦤꦔꦶꦁꦏꦺꦴꦮꦼꦲꦺꦭꦶꦔ꧈ꦪꦺꦤ꧀ꦏꦁꦧꦏꦭ꧀ꦢꦶꦭꦏꦺꦴꦤꦶꦲꦶꦏꦶꦲꦩ꧀ꦧꦧꦪꦤꦶꦧꦔꦼꦠ꧀꧈ꦧꦶꦱꦲꦸꦒꦲꦤ꧀ꦢꦢꦺꦏꦏꦼꦠꦶꦮꦱ꧀ꦩꦸ꧉
꧋ꦱꦼꦂꦱꦤ꧀ Quick ꦲꦩꦁꦱꦸꦭꦶ꧇ꦲꦶꦁꦥꦥꦿꦔꦤ꧀ꦥꦸꦤꦶꦏꦏꦢꦺꦴꦱ꧀ꦏꦢꦺꦴꦱ꧀ꦲꦶꦁꦒꦶꦃꦲꦩ꧀ꦧꦧꦪꦤꦶ꧉ꦏꦭꦮꦺꦴꦤ꧀ꦠꦼꦤ꧀ꦥꦤꦼꦩ꧀ꦥꦸꦲꦶꦁꦩꦼꦁꦱꦃ꧈ꦱꦢꦪꦱꦩꦶꦥꦼꦗꦃ꧈ꦲꦶꦁꦏꦁꦒꦼꦱꦁꦤꦩꦸꦁꦥꦚ꧀ꦗꦼꦤꦼꦔꦤ꧀꧈ꦏꦸꦭꦠꦸꦮꦶꦤ꧀ꦩꦠꦿꦸꦱ꧀ꦱꦠꦸꦁꦒꦭ꧀꧉ꦚꦸꦮꦸꦤ꧀ꦥꦔꦥꦸꦤ꧀ꦠꦼꦤ꧀ꦧꦤ꧀ꦢꦫ꧈ꦱꦗꦠꦺꦴꦱꦶꦥꦸꦤ꧀ꦧꦧꦪꦥꦸꦤꦶꦏꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀꧈ꦭꦲꦶꦫꦶꦁꦠꦶꦪꦁꦥꦸꦤꦶꦏꦩꦤꦮꦶꦱꦩ꧀ꦥꦸꦤ꧀ꦩꦁꦱꦤꦶꦥꦸꦤ꧀꧈ꦭꦤ꧀ꦥꦼꦗꦲꦶꦥꦸꦤ꧀ꦲꦶꦁꦒꦶꦃꦩꦤꦮꦶꦱꦩ꧀ꦥꦸꦤ꧀ꦝꦮꦃꦏꦭꦩꦁꦱꦤꦶꦥꦸꦤ꧀꧉ꦢꦢꦺꦴꦱ꧀ꦥꦸꦤꦥꦲꦶꦁꦏꦁꦧꦝꦼꦏꦠꦶꦤ꧀ꦢꦏꦏꦼꦤ꧀ꦲꦶꦁꦲꦤ꧀ꦠꦮꦶꦱꦶꦁꦭꦲꦶꦂꦭꦤ꧀ꦥꦼꦗꦃꦮꦲꦸꦧꦺꦴꦠꦼꦤ꧀ꦥꦽꦭꦸꦏꦉꦩ꧀ꦧꦒ꧀꧉ꦏꦸꦭꦭꦗꦼꦁꦮꦶꦕꦤ꧀ꦠꦼꦤ꧀꧇ꦲꦫꦢꦼꦊꦔꦼꦤ꧀꧈ꦲꦏꦸꦏꦧꦺꦃꦥꦚ꧀ꦕꦺꦤ꧀ꦕꦺꦴꦕꦺꦴꦒ꧀ꦧꦔꦼꦠ꧀ꦏꦫꦺꦴꦏꦤ꧀ꦝꦩꦸꦏꦸꦮꦶ꧉
꧋ꦱꦩ꧀ꦥꦸꦤ꧀ꦮꦶꦮꦶꦠ꧀ꦏꦭꦏꦁꦗꦼꦁꦤꦧꦶꦯꦸꦊꦩꦤ꧀꧈ꦲꦩꦫꦶꦔꦏꦼꦤ꧀ꦥꦸꦤꦶꦏ(ꦩꦏꦠꦼꦤ꧀ꦲꦠꦸꦫꦶꦥꦸꦤ꧀ꦱꦼꦂꦱꦤ꧀ Quick ꦱꦫꦤꦤꦸꦢꦶꦔꦶꦱꦸꦱꦸꦥꦼꦤꦶꦥꦸꦤ꧀ꦤꦉꦤ꧀ꦢꦿꦥꦸꦠꦿꦶꦲꦶꦁꦯꦧ꧈ꦲꦶꦁꦏꦁꦒꦸꦩ꧀ꦭꦼꦛꦏ꧀ꦲꦶꦁꦩꦼꦗ)ꦝꦠꦼꦁꦠꦶꦪꦁꦲꦺꦱ꧀ꦠꦿꦶꦥꦸꦤꦶꦏ꧈ꦱꦩ꧀ꦥꦸꦤ꧀ꦏꦛꦃꦱꦔꦼꦠ꧀ꦲꦶꦁꦏꦁꦚꦺꦴꦤ꧀ꦝꦺꦴꦔꦶꦝꦠꦼꦁꦉꦩ꧀ꦧꦒ꧀ꦏꦸꦭꦮꦲꦸ꧉ꦲꦤꦔꦶꦁꦏꦸꦭꦚꦸꦮꦸꦤ꧀ꦥꦔꦥꦸꦤ꧀ꦠꦼꦤ꧀ꦧꦤ꧀ꦢꦫꦏꦥꦶꦠꦤ꧀꧈ꦏꦢꦺꦴꦱ꧀ꦥꦸꦤ꧀ꦢꦶꦥꦿꦤꦠꦤꦶꦥꦸꦤ꧀ꦧꦭꦺꦴꦚ꧀ꦗꦏꦸꦭ꧉ꦲꦶꦁꦒꦶꦃꦊꦉꦱ꧀ꦏꦸꦭꦥꦸꦤꦶꦏꦧꦺꦴꦠꦼꦤ꧀ꦲꦁꦒꦝꦲꦶꦧꦠꦶꦃ꧈ꦲꦤꦔꦶꦁꦏꦸꦭꦠꦏ꧀ꦱꦶꦃꦲꦁꦒꦝꦲꦶꦱꦝꦺꦫꦺꦏ꧀ꦲꦺꦱ꧀ꦠꦿꦶꦏꦭꦶꦃ꧈ꦲꦶꦁꦏꦁꦥꦁꦒꦼꦱꦔꦤꦶꦥꦸꦤ꧀ꦒꦸꦩꦤ꧀ꦠꦸꦁꦮꦺꦴꦤ꧀ꦠꦼꦤ꧀ꦲꦶꦁꦏꦸꦭ꧉ꦲꦶꦁꦩꦺꦴꦁꦏꦥꦺꦤ꧀ꦱꦶꦪꦸꦤꦶꦁꦱꦫꦝꦝꦸꦥꦸꦤꦶꦏꦩꦸꦱ꧀ꦤꦤꦶꦥꦸꦤ꧀ꦲꦶꦁꦒꦶꦃꦤꦩꦸꦁꦏꦭꦶꦪꦤ꧀ꦧꦢꦤꦶꦥꦸꦤ꧀ꦥꦶꦪꦩ꧀ꦧꦏ꧀꧉ꦧꦤ꧀ꦢꦫꦱꦩ꧀ꦥꦸꦤ꧀ꦥꦶꦱꦤ꧀ꦥꦶꦱꦤ꧀ꦲꦩꦁꦒꦭꦶꦃ꧈ꦪꦺꦤ꧀ꦏꦸꦭꦥꦸꦤꦶꦏꦲꦁꦒꦝꦲꦤꦏꦩꦼꦭꦶꦏꦤ꧀꧉
꧋ꦮꦁꦱꦸꦭꦤꦶꦥꦸꦤ꧀ꦏꦥꦶꦠꦤ꧀ Orme ꧇ ꦲꦶꦪꦧꦼꦕꦶꦏ꧀꧈ꦲꦤꦔꦶꦁꦥꦶꦫꦥꦚ꧀ꦗꦭꦸꦏ꧀ꦩꦸ꧉
