ꦏꦧꦂꦮꦂꦤꦶꦮꦂꦤꦶ
꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀
꧋ꦲꦶꦁꦝꦸꦱꦸꦤ꧀ꦒꦸꦩꦼꦭꦂꦏꦶꦢꦸꦭ꧀꧈ꦝꦶꦱ꧀ꦠꦿꦶꦏ꧀ꦱꦸꦩ꧀ꦥꦾꦸꦃ(ꦨꦚꦸꦩꦱ꧀)ꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦝꦸꦏꦸꦤ꧀ꦤꦩ꧇ꦏꦾꦲꦶꦲꦗꦶꦩꦸꦲꦩꦢ꧀ꦪꦸꦱꦸꦥ꧀꧉ꦱꦊꦧꦼꦠ꧀ꦠꦶꦥꦸꦤ꧀ꦱꦮꦠꦮꦶꦱ꧀ꦩꦁꦱꦏꦼꦩꦮꦺꦴꦤ꧀꧈ꦤꦩꦤꦶꦁꦝꦸꦏꦸꦤ꧀ꦮꦲꦸꦏꦱꦸꦮꦸꦂꦱꦔꦼꦠ꧀꧈ꦔꦤ꧀ꦠꦺꦴꦱ꧀ꦥꦶꦤ꧀ꦠꦼꦤ꧀ꦥꦶꦤ꧀ꦠꦼꦤ꧀ꦲꦺꦮꦸꦠꦶꦪꦁꦱꦏꦶꦁꦥꦸꦤ꧀ꦢꦶꦥꦸꦤ꧀ꦢꦶꦤꦒꦫꦶꦝꦠꦼꦁꦔꦿꦶꦏꦸꦥꦽꦭꦸꦗꦗꦩ꧀ꦥꦶ꧉ꦧꦺꦴꦠꦼꦤ꧀ꦔꦼꦩꦸꦁꦔꦏꦼꦤ꧀ꦠꦶꦠꦶꦪꦁꦱꦶꦠꦶꦏꦼꦩꦮꦺꦴꦤ꧀꧈ꦩꦏꦠꦼꦤ꧀ꦲꦸꦒꦶꦧꦁꦱꦮꦭꦤ꧀ꦢꦶꦱꦲꦡꦶꦪꦺꦴꦁꦲ꧀ꦮ꧉ꦲꦶꦁꦒꦶꦃꦏꦛꦃꦲꦶꦁꦏꦁꦱꦩꦶꦗꦗꦩ꧀ꦥꦶꦝꦠꦼꦁꦏꦾꦲꦶꦝꦸꦏꦸꦤ꧀ꦮꦲꦸ꧉ꦏꦧꦂꦫꦶꦥꦸꦤ꧀ꦏꦾꦲꦶꦝꦸꦏꦸꦤ꧀ꦮꦲꦸꦧꦺꦴꦠꦼꦤ꧀ꦥꦸꦫꦸꦤ꧀ꦤꦩ꧀ꦥꦶꦲꦺꦥꦃꦲꦤ꧀ꦧꦧꦂꦥꦶꦱꦤ꧀꧉
꧋ꦱꦏꦶꦁꦯꦸꦫꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦨꦪꦭꦭꦶꦭꦤ꧀ꦠꦩ꧀ꦥꦶꦂꦏꦭꦩꦊꦩ꧀ꦱ꧀ꦭꦱꦲꦶꦁꦏꦁꦏꦥꦼꦁꦏꦼꦂꦥꦸꦤꦶꦏꦮꦺꦴꦤ꧀ꦠꦼꦤ꧀ꦭꦶꦤ꧀ꦝꦸꦭꦩ꧀ꦥꦃꦲꦶꦥꦸꦤ꧀ꦩꦔꦶꦭꦺꦤ꧀꧈ꦢꦔꦸꦤꦶꦥꦸꦤ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ 12 ꦱꦼꦏꦺꦴꦤ꧀꧈ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦗꦭꦂꦫꦤ꧀ꦤꦶꦁꦭꦶꦤ꧀ꦝꦸꦮꦲꦸꦱꦏꦶꦁꦉꦢꦶꦩꦼꦫꦦꦶ꧉
꧋ꦲꦸꦥ꧀ꦧꦶꦫꦺꦴꦥꦏꦂꦪꦤ꧀ꦥꦺꦴꦱ꧀ꦱꦸꦏꦥꦮꦂꦠꦺꦴꦱ꧀꧈ꦧꦶꦭꦶꦃꦮꦶꦮꦶꦠ꧀ꦠꦁꦒꦭ꧀ 1 ꦗꦤꦸꦮꦫꦶꦔꦗꦼꦁꦥꦸꦤꦶꦏ꧈ꦏꦼꦔꦶꦁꦔꦶꦤ꧀ꦠꦸꦤ꧀ꦤꦏꦼꦤ꧀ꦥꦺꦴꦱ꧀ꦮꦶꦱꦼꦭ꧀(ꦲꦶꦁꦒꦶꦃꦥꦺꦴꦱ꧀ꦮꦶꦱꦼꦭ꧀ꦭꦶꦩꦿꦃꦲꦸꦠꦮꦶꦥꦺꦴꦱ꧀ꦮꦶꦱꦼꦭ꧀ꦲꦶꦁꦏꦁꦭꦸꦩꦩ꧀ꦥꦃꦠꦶꦭ꧀ꦒꦩ꧀)ꦝꦠꦼꦁꦠꦤꦃꦲꦶꦗꦱ꧀꧉ꦲꦶꦱꦺꦤꦶꦱꦺꦤ꧀ꦤꦤꦶꦁꦥꦺꦴꦱ꧀ꦮꦶꦱꦼꦭ꧀ꦮꦲꦸꦏꦼꦢꦃꦩꦮꦶꦧꦱꦆꦔ꧀ꦒꦿꦶꦱ꧀꧈ꦭꦤ꧀ꦲꦂꦠꦲꦶꦁꦏꦁꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦏꦼꦢꦃꦩꦤꦸꦠ꧀ꦕꦫꦤꦶꦥꦸꦤ꧀ꦲꦔꦶꦤ꧀ꦠꦸꦤ꧀ꦤꦏꦼꦤ꧀ꦲꦂꦠꦆꦔ꧀ꦒꦿꦶꦱ꧀꧈ꦲꦶꦁꦒꦶꦃꦥꦸꦤꦶꦏꦩꦮꦶꦲꦂꦠꦥꦺꦴꦤ꧀ꦆꦔ꧀ꦒꦿꦶꦱ꧀꧉ꦏꦛꦃꦏꦛꦃꦲꦶꦥꦸꦤ꧀ꦲꦂꦠꦲꦶꦁꦏꦁꦏꦼꦔꦶꦁꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦝꦠꦼꦁꦲꦶꦗꦱ꧀ f 480,-꧉
꧋ꦮꦶꦮꦶꦠ꧀ꦠꦤ꧀ꦤꦶꦥꦸꦤ꧀ꦮꦸꦭꦤ꧀ꦝꦼꦱꦺꦩ꧀ꦧꦼꦂꦏꦥꦼꦁꦏꦼꦂꦲꦶꦁꦝꦸꦱꦸꦤ꧀ꦏꦼꦝꦸꦔ꧀ꦮꦔꦶꦤ꧀꧈ꦄꦥ꧀ꦝꦺꦭꦶꦁꦦꦸꦂꦮꦏꦼꦂꦠ(ꦨꦚꦸꦩꦱ꧀)ꦮꦺꦴꦤ꧀ꦠꦼꦤ꧀ꦠꦶꦪꦁ 10 ꦥꦼꦗꦃꦗꦭꦂꦫꦤ꧀ꦱꦶꦤꦼꦫꦁꦲꦶꦁꦱꦱꦏꦶꦠ꧀ꦭꦺꦴꦁꦥꦺꦱ꧀꧉ꦏꦗꦮꦶꦥꦸꦤꦶꦏꦲꦸꦒꦶꦮꦺꦴꦤ꧀ꦠꦼꦤ꧀ꦠꦶꦪꦁ 5 ꦩꦭꦶꦃꦲꦶꦁꦏꦁꦏꦼꦔꦶꦁꦱꦱꦏꦶꦠ꧀ꦮꦲꦸ꧉ꦗꦭꦂꦫꦤ꧀ꦱꦏꦶꦁꦥꦸꦤꦶꦏꦭꦗꦼꦁꦮꦺꦴꦤ꧀ꦠꦼꦤ꧀ꦠꦶꦪꦁ 20 ꦲꦶꦁꦏꦁꦭꦗꦼꦁꦢꦶꦥꦸꦤ꧀ꦧꦫꦏ꧀꧈ꦱꦲꦲꦶꦁꦦꦸꦂꦮꦏꦼꦂꦠꦭꦗꦼꦁꦢꦶꦥꦸꦤ꧀ꦠꦼꦠꦼꦥ꧀ꦥꦏꦼꦤ꧀꧈ꦧꦶꦭꦶꦃꦲꦶꦁꦔꦿꦶꦏꦸꦮꦺꦴꦤ꧀ꦠꦼꦤ꧀ꦱꦱꦏꦶꦠ꧀ꦤꦸꦭꦂ꧉
꧋ꦱꦏꦶꦁꦔꦪꦺꦴꦓꦾꦏꦂꦠꦏꦮꦂꦠꦺꦴꦱ꧀ꦱꦏꦼꦤ꧀꧈ꦧꦶꦭꦶꦃꦲꦶꦁꦝꦸꦱꦸꦤ꧀ꦱꦊꦧꦼꦠ꧀ꦠꦶꦥꦸꦤ꧀ꦏꦭꦸꦫꦲꦤ꧀ꦥꦚ꧀ꦗꦠꦤ꧀꧈ꦝꦼꦥꦺꦴꦏ꧀꧈ꦧꦺꦴꦗꦺꦴꦁ꧈ꦩꦔꦸꦤ꧀ꦤꦤ꧀꧈ꦠꦸꦮꦶꦤ꧀ꦠꦪꦸꦧꦤ꧀꧈ꦏꦧꦸꦥꦠꦺꦤ꧀ꦲꦢꦶꦏꦂꦠ(ꦑꦸꦭꦺꦴꦤ꧀ꦥꦿꦒ)ꦱꦩꦁꦏꦼꦱꦮꦼꦒ꧀ꦲꦸꦱꦸꦩ꧀ꦲꦸꦊꦂꦏꦭꦥ꧈ꦲꦸꦊꦂꦮꦲꦸꦱꦩꦶꦤꦼꦝꦤ꧀ꦤꦶꦧꦭꦫꦏ꧀ꦱꦂꦠꦩꦁꦒꦂ꧉ꦠꦶꦪꦁꦠꦶꦪꦁꦲꦁꦒꦺꦤ꧀ꦤꦶꦥꦸꦤ꧀ꦱꦩꦶꦔꦽꦱꦶꦏ꧀ꦏꦶꦲꦩꦲꦸꦊꦂꦏꦫꦶꦒꦼꦤ꧀ꦤꦏꦼꦤ꧀ꦩꦤ꧀ꦠꦿꦶꦠꦤꦶ꧈ꦩꦭꦃꦔꦤ꧀ꦠꦺꦴꦱ꧀ꦏꦧꦶꦪꦤ꧀ꦠꦸꦩꦤ꧀ꦠꦿꦶꦠꦤꦶꦔꦪꦺꦴꦓꦾ꧈ꦩꦤꦮꦶꦲꦩꦲꦸꦊꦂꦮꦲꦸꦧꦺꦴꦠꦼꦤ꧀ꦠꦸꦩꦸꦤ꧀ꦠꦼꦤ꧀ꦲꦶꦕꦭ꧀꧈ꦱꦩ꧀ꦥꦸꦤ꧀ꦠꦩ꧀ꦠꦸꦲꦢꦩꦼꦭ꧀ꦏꦥꦶꦠꦸꦤ꧀ꦤꦤ꧀ꦤꦶꦥꦸꦤ꧀ꦠꦶꦪꦁꦥꦝꦸꦱꦸꦤ꧀ꦤꦤ꧀ꦔꦿꦶꦏꦸ꧉
꧋ꦱꦏꦶꦁꦔꦪꦺꦴꦓꦾꦏꦧꦂꦫꦶꦥꦸꦤ꧀ꦱꦩꦁꦏꦼꦮꦺꦴꦤ꧀ꦠꦼꦤ꧀ꦱꦱꦏꦶꦠ꧀ꦏꦸꦕꦶꦁ꧉ꦲꦶꦁꦏꦩ꧀ꦥꦸꦁꦯꦸꦂꦪꦺꦁꦗꦸꦫꦶꦠ꧀ꦠꦤ꧀ꦱꦊꦧꦼꦠ꧀ꦠꦶꦥꦸꦤ꧀ꦠꦶꦒꦁꦢꦶꦤ꧀ꦠꦼꦤ꧀ꦏꦼꦩꦮꦺꦴꦤ꧀꧈ꦮꦺꦴꦤ꧀ꦠꦼꦤ꧀ꦏꦸꦕꦶꦁ 20 ꦲꦶꦁꦏꦁꦱꦩꦶꦥꦼꦗꦃ꧉ꦮꦶꦮꦶꦠ꧀ꦠꦶꦥꦸꦤ꧀ꦏꦸꦕꦶꦁꦮꦲꦸꦱꦏꦶꦠ꧀ꦧꦼꦤ꧀ꦠꦺꦂ꧈ꦭꦗꦼꦁꦔꦶꦊꦂ꧈ꦧꦺꦴꦠꦼꦤ꧀ꦢꦺꦴꦪꦤ꧀ꦥꦸꦤꦥꦥꦸꦤꦥ꧈ꦢꦔꦸꦢꦔꦸꦤꦶꦥꦸꦤ꧀ꦠꦶꦒꦁꦢꦶꦤ꧀ꦠꦼꦤ꧀ꦭꦗꦼꦁꦥꦼꦗꦃ꧉
꧋ꦮꦺꦴꦤ꧀ꦠꦼꦤ꧀ꦏꦧꦂꦧꦶꦭꦶꦃꦲꦶꦁꦔꦪꦺꦴꦓꦾꦧꦝꦼꦲꦺꦁꦒꦭ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦏꦽꦠꦼꦒ꧀ꦠꦶꦩ꧀ꦧꦁ꧈ꦲꦶꦁꦒꦶꦃꦥꦸꦤꦶꦏꦏꦁꦒꦼꦚꦸꦩꦼꦉꦥ꧀ꦥꦶꦮꦮꦿꦠ꧀ꦠꦶꦥꦸꦤ꧀ꦠꦸꦠꦸꦩ꧀ꦥꦏ꧀ꦏꦤ꧀ꦲꦶꦁꦏꦁꦭꦁꦏꦸꦁꦲꦶꦁꦔꦿꦶꦏꦸ꧈ꦏꦁꦒꦼꦤꦶꦩ꧀ꦧꦁꦏꦭꦶꦪꦤ꧀ꦮꦮꦿꦠ꧀ꦠꦲꦸꦤ꧀ꦏꦥꦼꦁꦏꦼꦂꦲꦶꦁꦏꦁꦱꦩ꧀ꦥꦸꦤ꧀ꦏꦠꦩ꧀ꦠꦺꦴꦏ꧀ꦲꦏꦼꦤ꧀꧉
꧋ꦱꦮꦼꦤꦺꦃꦲꦶꦁꦩꦸꦫꦶꦢ꧀ H.I.S. ꦲꦶꦁꦦꦝꦁ꧈ꦢꦶꦥꦸꦤ꧀ꦥꦫꦶꦏ꧀ꦱꦲꦶꦁꦲꦸꦥ꧀ꦗꦏ꧀ꦱꦲꦶꦁꦧꦧ꧀ꦲꦁꦒꦺꦤ꧀ꦤꦶꦥꦸꦤ꧀ꦏꦢꦏ꧀ꦮꦔꦼꦩꦺꦴꦂꦫꦶꦠꦼꦠꦼꦝꦤ꧀ꦲꦸꦠꦮꦶꦠꦺꦴꦪꦥꦔꦺꦴꦩ꧀ꦧꦺꦤꦶꦁꦒꦸꦫꦸꦤꦶꦥꦸꦤ꧀꧈ꦲꦶꦁꦏꦁꦢꦶꦥꦸꦤ꧀ꦩꦺꦴꦫꦏꦼꦤ꧀ꦲꦮꦂꦤꦶ꧇ꦏꦂꦧꦺꦴꦭ꧀꧈ꦲꦂꦱꦺꦤꦶꦏꦸꦩ꧀꧈ꦠꦸꦮꦶꦤ꧀ꦏꦂꦧꦶꦠ꧀꧉ꦲꦶꦁꦏꦁꦏꦢꦏ꧀ꦮꦩꦸꦏꦶꦂ꧉
꧋ꦏꦺꦴꦁꦒꦿꦺꦱ꧀ꦪꦺꦴꦁꦪꦦꦲꦶꦁꦏꦁꦏꦥꦶꦁꦱꦢꦱꦲꦶꦁꦯꦼꦩꦫꦁ꧈ꦲꦶꦁꦏꦁꦲꦤ꧀ꦢꦠꦼꦁꦔꦶꦧꦺꦴꦠꦼꦤ꧀ꦏꦶꦫꦁꦠꦶꦪꦁ 1000꧈ꦉꦩ꧀ꦧꦒ꧀ꦒꦶꦥꦸꦤ꧀ꦚꦼꦤꦼꦁꦔꦏꦼꦤ꧀꧉ꦠꦸꦮꦤ꧀ꦢꦼꦭꦶꦪꦤ꧀꧈ꦮꦏꦶꦭ꧀ꦏꦺꦴꦩꦶꦠꦼꦠꦩꦸ꧈ꦔꦠꦸꦂꦫꦶꦱꦸꦒꦼꦁꦝꦠꦼꦁꦥꦫꦠꦩꦸꦠꦸꦮꦶꦤ꧀ꦲꦔꦸꦚ꧀ꦗꦸꦏ꧀ꦲꦏꦼꦤ꧀ꦥꦤꦸꦮꦸꦤ꧀ꦝꦠꦼꦁꦏꦩꦶꦫꦃꦲꦤ꧀ꦢꦊꦩ꧀ꦏꦁꦗꦼꦁꦓꦸꦱ꧀ꦠꦶꦦꦔꦼꦫꦤ꧀ꦲꦢꦶꦥꦠꦶꦲꦂꦪꦩꦁꦏꦸꦟꦒꦫ꧈ꦲꦶꦁꦧꦧ꧀ꦏꦥꦉꦁꦔꦶꦥꦸꦤ꧀ꦗꦸꦩꦼꦤꦼꦁꦥꦔꦪꦺꦴꦩ꧀ꦩꦤ꧀꧈ꦥꦸꦤꦶꦏꦢꦶꦥꦸꦤ꧀ꦥꦺꦔꦼꦠ꧀ꦠꦶꦲꦶꦁꦥꦏꦼꦩ꧀ꦥꦭ꧀ꦭꦤ꧀꧉ꦱꦭꦗꦼꦁꦔꦶꦁꦉꦩ꧀ꦧꦒ꧀ꦒꦶꦥꦸꦤ꧀ꦫꦩꦼꦲꦢꦩꦼꦭ꧀ꦒꦩ꧀ꦧꦶꦫꦤꦶꦁꦩꦤꦃ꧉ꦱꦠꦩꦠ꧀ꦠꦶꦁꦥꦶꦝꦠꦺꦴꦭꦗꦼꦁꦫꦶꦁꦒꦶꦠ꧀ꦠꦤ꧀꧈ꦲꦺꦚ꧀ꦗꦶꦁꦔꦶꦥꦸꦤ꧀ꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦲꦸꦭꦃꦫꦒꦠꦸꦮꦶꦤ꧀ꦩꦶꦠꦺꦴꦁꦠꦺꦴꦤ꧀ꦤꦏꦼꦤ꧀ꦏꦒꦸꦤꦤ꧀ꦲꦺꦱ꧀ꦠꦿꦶ꧈ꦱꦭꦗꦼꦁꦔꦶꦥꦸꦤ꧀ꦲꦤ꧀ꦢꦸꦩꦸꦒꦺꦏ꧀ꦲꦏꦼꦤ꧀ꦏꦺꦴꦁꦒꦿꦺꦱ꧀ꦩꦭꦶꦃ꧉
꧋ꦲꦶꦃꦠꦶꦪꦫꦶꦥꦸꦤ꧀ P.K.O. ꦔꦪꦺꦴꦓꦾꦏꦂꦠꦧꦧ꧀ꦲꦁꦒꦺꦤ꧀ꦤꦶꦥꦸꦤ꧀ꦧꦝꦼꦢꦩꦼꦭ꧀ꦏ꧀ꦭꦶꦤꦶꦏ꧀꧈ꦱꦥꦸꦤꦶꦏꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦮꦂꦠꦺꦴꦱ꧀꧈ꦲꦁꦱꦭ꧀ꦥꦫꦶꦁꦔꦤ꧀ꦥꦚ꧀ꦗꦸꦫꦸꦁꦱꦏꦶꦁꦯꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦮꦶꦕꦏ꧀ꦱꦤꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦯꦸꦲꦸꦤ꧀ꦤꦤ꧀ f 1000,- ꦱꦏꦶꦁꦯꦩ꧀ꦥꦼꦪꦤ꧀ꦢꦊꦩ꧀ꦲꦶꦁꦏꦁꦯꦶꦤꦸꦲꦸꦤ꧀ꦏꦁꦗꦼꦁꦯꦸꦭ꧀ꦠꦤ꧀ f 1000,- ꦠꦸꦮꦶꦤ꧀ꦱꦏꦶꦁꦏꦁꦗꦼꦁꦓꦸꦱ꧀ꦠꦶꦦꦔꦼꦫꦤ꧀ꦲꦢꦶꦦꦠꦶꦲꦂꦪꦦꦏꦸꦲꦄꦭꦩ꧀ f 1000,- ꦮꦫꦒꦢ꧀ꦢꦶꦁꦏ꧀ꦭꦶꦤꦶꦏ꧀ꦮꦲꦸꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ f 5000,- ꦤꦸꦤ꧀ꦠꦼꦤ꧀ꦧꦝꦼꦢꦶꦥꦸꦤ꧀ꦒꦫꦥ꧀꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀ꦱꦏꦶꦁꦡꦼꦒꦭ꧀꧈ꦱꦏꦶꦁꦏꦥꦉꦁꦔꦶꦥꦸꦤ꧀ꦠꦸꦮꦤ꧀ꦄꦱꦶꦱ꧀ꦠꦺꦤ꧀ꦉꦱꦶꦝꦺꦤ꧀ J.B. Hartelust ꦲꦶꦁꦏꦁꦧꦝꦼꦭꦺꦫꦺꦃ꧈ꦲꦔ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦥꦉꦥꦠ꧀ꦠꦤ꧀ꦔꦽꦩ꧀ꦧꦒ꧀ꦧꦧ꧀ꦲꦤꦒ꧀ꦒꦸꦭꦁꦔꦶꦭꦶꦤ꧀ꦠꦃꦝꦫꦠ꧀꧉ꦲꦶꦁꦏꦁꦱꦩꦶꦥꦉꦥꦠ꧀ꦠꦤ꧀꧇ꦠꦸꦮꦤ꧀ H.D.Schouten ꦒꦸꦫꦸH.I.S.꧈ D.J.Wolterbeek ꦄꦥ꧀ꦝꦺꦭꦶꦁꦱꦺꦥ꧀ S.C.S., R.W. ꦯꦱꦿꦲꦢꦶꦏꦸꦱꦸꦩ꧈ꦏꦺꦴꦤ꧀ꦠꦿꦺꦴꦭꦶꦂꦥꦒꦤ꧀ꦠꦺꦴꦱ꧀ꦱꦤ꧀ꦓꦸꦥꦼꦂꦩꦺꦤ꧀ R.M. ꦲꦸꦡꦂꦪ꧈ꦄꦩ꧀ꦠꦼꦤꦂꦱꦼꦤ꧀ꦠꦿꦊꦏꦱ꧀ Mr. ꦯꦸꦂꦪꦤꦤ꧀ꦝꦶꦏ꧈ꦎꦤ꧀ꦢꦼꦂꦥꦸꦂꦱꦶꦠꦼꦂꦭꦤ꧀ꦢꦿꦢ꧀ Mr.ꦨꦼꦱꦂꦠꦸꦮꦶꦤ꧀ Mr. ꦯꦱ꧀ꦠꦿꦩꦸꦭꦾꦤꦠꦸꦮꦶꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀꧉ꦲꦶꦁꦏꦁꦧꦝꦼꦢꦢꦺꦴꦱ꧀ꦱꦺꦏꦽꦠꦫꦶꦱ꧀ꦠꦸꦮꦤ꧀ D. Kapteyn꧉
