76
koela ingkang baḍé nglawan. Soewawi sami mangkat ḍateng Toerjantapada, sampéjan sampoen soemelang!" Sareng Empoe Palot mireng temboengipoen Kèn Angrok, bingahing manahipoen boten kénging ingoetjap, sampoen roemaos kasamboetan. Sadoemoeginipoen ing Toerjantapada, Kèn Angrok noenten winoelang ngèlmi darmakantjana minangka gandjaranipoen. Boten antawis dangoe sampoen njakoep sapiwoelanging goeroenipoen, malah kasagedanipoen boten kawon kalijan goeroenipoen. Kèn Angrok ladjeng kapenḍet anak ḍateng Empoe Palot. Inggih poenika wiwitanipoen patapan Toerjantapada kawastanan Asramabapa.
Katjarijos lelampahanipoen Kèn Angrok, sareng sampoen mbapa ḍateng Empoe Palot. Sarèhning Empoe Palot roemaos jèn kasagedanipoen dèrèng nama sampoerna, Kèn Angrok noenten kapoerih ḍateng Kabalon, magoeroe ḍateng boejoet Kabalon, perloe njampoernakaken kasagedanipoen ngèlmi darmakantjana. Poenapa malih wineling, wangsoelipoen ḍateng Asramabapa, kapoerih mbekta kantjana ingkang katilar ing kaboejoetan roemijin.
Kèn Angrok boten lenggana, énggal mangkat ḍateng Kabalon. Sadoemoeginipoen ingrikoe, boten dipoen pitadjeng ḍateng tetijang ing Kabalon, tansah dipoen soedjanani, ndadosaken nepsoenipoen Kèn Angrok, ladjeng aprasapa: „Panepènmoe moega-moega katekanana embang." Kèn Angrok noenten kinemboelan ing tijang katah, sinoedoekan baḍé dipoen pedjahi. Kèn Angrok boten kalajatan, énggal loemadjeng ngoengsèkaken gesang dateng Ki boejoet ing Kabalon. Sawarnining tijang tapa ingrikoe ladjeng kerig, tjantrik, tjèkèl, wewasi, djedjanggan saha adjar, sadaja sami gègèran medal sarwi mbekta paloe gangsa mboedjeng Kèn Angrok. Sareng sampoen katjepeng, noenten ginebagan baḍé dipoen pedjahi. Doemadakan wonten soewara doemeling saking awang-awang: „Hèh sira para tapa, wong ikoe adja sira patèni, awit ikoe poetra ningsoen, doeroeng toetoeg lelakoné ing madyapada."
Sareng para tapa mireng swara ngoewoeh-oewoeh tanpa sangkan, Kèn Angrok énggal dipoen toeloengi, boten dangoe sampoen ènget malih, poelih paripoerna kadi wingi oeni. Kèn
