23
Mungguh sedjatinė R.M. Ng. Kriḍawasana iku darah ngaluhur. Tumrap bebrajan Pak Ģeḍé ing Blora mau isih diarani ndara sapupu tekuk. Nanging tangèh Pak Geḍé kagungan pambegan gumeḍé, kumingsùn apa déné kumandara. Embuh keprijé, njatané pambegané Pak Geḍé ing Blora susila, welas-asih marang sapepaḍané tumitah, ḍemen tetulung banḍa-bau marang sapa baé kang ambutuhaké pitulungané. Kerep maḍangaké pepeteng, nguḍari reruwed ing désa. Ambungahaké kang paḍa nemu kasusahan, nenuntun marang tindak karahajon. Sarèhné Pak Geḍé prijaji kang blatèr, mula ora kéwran ing agal-alus, bisa mandjing adjur-adjèr. Tuwa-anom kang pada sowan ora ana kang ditampik. Ulihé saka dalem Kriḍawasanan mesţi anggawa pepaḍang kang gawé pamaremé déwé-déwé.
Dalasan botjah-botjah tjilik pada ora ketjuwan anggoné pada sowan Pak Geḍé, amarga pada olèh piwulang betjik apik, pepiridan saka dedongéngan warna-warna, utawa paḍa diwulang tembang matjapat, tengahan lan tembang geḍé. Sing paḍa kepéngin bisa andjogèd, pada olèh piwulang aḍeḍasar wewaton kang bener. Wong-wong tuwa kang mrelokaké sowan pada njuwun saraséhan ngèlmu kasampurnaning pati lan urip, minangka antep-anteping tjetjekelané ḍéwé-ḍéwé. Déné para djedjaka ing désa lan tanggadésa pada sowan njuwun wulang djogèd lan pentjak.
Bab pentjak mula dadi ulig-uligané Pak Geḍé ing Blora. Pamulangé mau nganggo pamanti-wanti marang para muridé kabèh, adja pisan-pisan' kabudajan Kedjawan kang adi-luhung mau dianggo ugal-ugalan lan sesongaran. Betjiké mung menawa kanggo ngreksa kaslametané ḍéwé, utamané kanggo ngajomi bebeneran lan mitulungi sapa baé kang ambutuhaké. Sapá kang nerak pepatjuh mau bakal ora diparengake ambatjutaké pasinaoné. Kedjaba iku ana piwulangé Pak Geḍé kang kudu paḍa diéstokaké, jaiku pada kawadjibaké ora sungkanan marang samubarang gawé kang dadi sesanggané. Ora kena ngemohi panggawéan kasar-alus. Apa baé kang wis dadi kuwadjibané, kudu digarap nganti rampung tanpa anggresah. Uga pada diwadjibaké tetulung andjaga katentremaning ḍukuhé kang paḍa didunungi. Mula para muridé Pak Geḍé kerep kanggo rerasan betjik lan kanggo tetuladan,
