Kaca:Djodo Kang Pinasti.pdf/24

II. PAK GEDÉ ING BLORA

 Satjedaking désa kradjan Karangpandan, ana dukuh kang kewilang rada gedé, diarani dukuh ing Blora. Sanadjan mung dukuh baé, nanging ana omahé gedong magrong-magrong, jaiku
omah kongsén sawidjining opséter tebu bawah ing Tasikmadu, sawidjining pabrik qula kagungan pradja Mangkunagaran. Ora pati adoh saka omah gedong iku, ana sawidjining omah manéh kang rada njelé menawa ditanding karo omah padukuhan ing kono.
 Omah iku gedé-tjiliké sedengan, asri, amarga saka betjiking tata-rakité omah-omah kang anduwéni. Platarané ombér, ing sisih kiwa lan tengen ditanduri kekembangan mantjawarna, kajata : kembang mawar, mlati, gundul, kertas lan kembang srengéngé (purbanegara), nedeng pada megar pating prelok angresepaké. Ing kiwa lan tengening omah let wetara telung méter saka tritis, ditanduri palawidja lan pala gumantung. Déné saburining pawon, ditanduri djanganan, ketéla rambat lan katjang landjaran (gléjor).
 Omah iku dalemé Radén Mas Ngabéi Kridawasana, pensijunan Panéwu Kondang ing Kabupatén Wanagiri. (Sekretaris Kabupatén). Bareng wis kéndel saka pandamelan bandjur dedalem ing dukuh Blora kono, kang wis disadijakaké sadurungé pénsijun. Kelumrahé R.M.Ng. Kridawasana ana ing dukuh lan tangga désa kang tjedak, disebut ,,Pak Gedé". Wis kelumrah menawa bebrajan désa ana kléruné nganggo sawidjining tetembungan, kaja déné sesebutan pak gedé ing kéné. Lungguhing tembung pak gedé iku, ateges: uwa, nanging bebrajan désa njebut pak gedé ing kéné, marang sapa baé kang wis tuwa lan kena diadjéni. Mangkono mau betéké anggoné arep ngluhuraké marang wong kang pada disebut mangkono, Mula aran mungguh menawa wong sadukuh Blora pada njebut Pak Gedé marang R.M.Ng. Kridawasana mau, amarga gedé lelabuhané marang sapepadané ana ing bebrajan padukuhan apa déné tangga désané.