ꦱꦼꦫꦠ꧀ꦢꦩꦂꦮꦸꦭꦤ꧀/02

2. Durma ꦢꦸꦂꦩ

꧄(1) ꦧꦥꦥꦠꦶꦃꦩꦤꦶꦫꦏꦢꦾꦥꦸꦤꦥ(bapa patih manira kadya punapa)꧈ ꦫꦺꦃꦲꦶꦱꦸꦤ꧀ꦤꦿꦠꦸꦲꦺꦱ꧀ꦠꦿꦶ(rèh i[ng]sun ratu èstri)꧈ ꦲꦒꦼꦤ꧀ꦠꦺꦤꦶꦫꦩ(agentèni rama)꧈ ꦠꦸꦭꦸꦱ꧀ꦗꦼꦤꦼꦁꦩꦤꦶꦫ(tulus jeneng manira)꧈ ꦲꦸꦩꦠꦸꦂꦉꦏꦾꦤꦥꦠꦶꦃ(umatur rekyana patih)꧈ ꦲꦤꦸꦲꦸꦤ꧀ꦢꦸꦏ(anuhun duka)꧈ ꦥꦸꦏꦸꦭꦸꦤ꧀ꦥꦤ꧀ꦢꦸꦏꦗꦶ(pukulun panduka ji)

꧄(2) ꦗꦁꦏꦤꦶꦥꦸꦤ꧀​ꦲꦶꦁꦏꦁꦠꦥꦏꦶꦤꦏꦶꦤ(jangkanipun ingkang tapa kina-kina)꧈ ꦲꦗꦂꦭꦮꦤ꧀ꦮꦮꦱꦶꦃ(ajar lawan wewasi{h} )꧈ ꦩꦶꦮꦃꦏꦁꦧꦸꦗꦁꦒ(miwah kang bujangga)꧈ ꦧꦸꦪꦸꦠ꧀ꦭꦤ꧀ꦥꦫꦩꦺꦤꦏ꧀(buyut lan para ménak) ꦲꦤꦢꦺꦤꦺꦏꦔ꧀ꦮꦸꦱ꧀ꦭꦸꦮꦶꦃ(anadéné kang wus luwih)꧈ ꦱꦩꦶꦲꦗꦁꦏ(sami ajangka)꧈ ꦠꦸꦭꦸꦱ꧀ꦥꦤ꧀ꦢꦸꦏꦲꦗꦶ(tulus panduka aji)

꧄(3) ꦲꦁꦔꦤ꧀ꦢꦶꦏꦮꦲꦸꦱꦁꦥꦿꦧꦸꦮꦤꦺꦴꦢꦾ(angandika wau Sang Prabu Wanodya)꧈ ꦤꦒꦫꦩꦗꦥꦲꦶꦠ꧀(nagara Majapait) ​ꦒꦼꦩꦃꦲꦼꦤ꧀ꦢꦶꦧꦥ(gemah endi bapa)꧈ ꦩꦁꦏꦺꦭꦚ꧀ꦗꦩꦤ꧀ꦏꦶꦤ꧀ꦤ(mangké lan jaman kina)꧈ ꦭꦤ꧀ꦮꦺꦴꦁꦕꦶꦭꦶꦲꦏꦺꦃꦲꦼꦤ꧀ꦢꦶ(lan wong cili[k] akèh endi)꧈ ꦏꦭꦶꦪꦤ꧀ꦏꦶꦤ꧀ꦤ(kalihan kina)꧈ ꦩꦠꦸꦂꦉꦏꦾꦤꦥꦠꦶ(matur rekyana pati[h])

꧄(4) ꦒꦼꦩꦃꦩꦁꦏꦶꦤ꧀ꦥꦸꦏꦸꦭꦸꦤ꧀ꦭꦮꦤ꧀ꦤꦶꦁꦏꦸꦤ(gemah mangkin pukulun lawan ing kuna)꧈ ꦠꦤ꧀ꦤꦥꦶꦮꦢꦾꦲꦭꦶꦠ꧀(tanapi wadya alit) ꦏꦭꦤꦺꦥꦸꦤꦶꦏ(kalané punika)꧈ ꦲꦶꦁꦱꦠꦶꦔꦭ꧀ꦏꦮꦸꦭ(ing satingal kawula)꧈ ꦲꦱꦸꦏꦱꦸꦒꦶꦃꦮꦺꦴꦁꦕꦶꦭꦶ(asuka sugih wong cili[k])꧈ ꦱꦁꦥꦿꦧꦸꦏꦼꦤ꧀ꦚ(Sang Prabu Kenya) ꦩꦺꦱꦼꦩ꧀ꦱꦗꦿꦺꦴꦤ꧀ꦤꦶꦁꦔꦠꦶ(mèsem sajroning ati)꧈

꧄(5) ꦏꦺꦤ꧀ꦤꦥꦠꦶꦃꦲꦸꦩꦠꦸꦂꦫꦗꦗꦸꦮꦶꦠ(kèn apatih umatur raja juwita)꧈ ꦥꦸꦏꦸꦭꦸꦤ꧀​ꦥꦤ꧀ꦢꦸꦏꦗꦶ(pukulun panduka ji)꧈ ꦏꦮꦸꦭꦠꦩꦶꦪꦤ(kawula tamian)꧈ ꦮꦺꦴꦤ꧀ꦠꦼꦤ꧀ꦠꦼꦁꦔꦃꦱꦩꦸꦢꦿ(wonten tengah samudra)꧈ ꦧꦲꦶꦠꦏꦥꦭ꧀ꦏꦏꦭꦶꦃ(baita kapal kekalih)꧈ ꦲꦶꦁꦏꦁꦥꦺꦴꦠꦸꦱ꧀ꦱꦤ꧀(ingkang potusan) ꦫꦠꦸꦮꦤ꧀ꦝꦤ꧀ꦭꦤ꧀ꦤꦁꦒꦿꦶꦱ꧀(Ratu Wandhan lan Anggris)

꧄(6) ꦱꦼꦗꦤꦶꦥꦸꦤ꧀ꦥꦸꦏꦸꦭꦸꦤ꧀ꦤꦂꦫꦲꦁꦔ꧀ꦭꦩꦂ(sejanipun pukulun arsa anglamar)꧈ ꦲꦁꦔꦼꦧꦸꦤ꧀ꦤꦼꦧꦸꦤ꧀ꦤꦺꦤ꧀ꦗꦶꦁ(angebun-ebun énjing)꧈ ꦣꦠꦼꦁꦱꦿꦶꦤꦭꦺꦤ꧀ꦢꦿ(dhateng sri naléndra)꧈ ꦲꦁꦔꦠꦸꦂꦫꦶꦧꦫꦤ(angaturi barana)꧈ ꦏꦛꦃꦲꦺꦱꦭꦮꦺꦏꦼꦛꦶ(kathahé salawé kethi)꧈ ꦩꦸꦒꦏꦠꦸꦂꦫ(muga katura)꧈ ꦥꦸꦏꦸꦭꦸꦤ꧀ꦥꦤ꧀ꦢꦸꦏꦗꦶ(pukulun pandukaji)꧈

꧄(7) ꦲꦁꦔꦤ꧀ꦢꦶꦏꦮꦲꦸꦱꦁꦥꦿꦧꦸꦮꦤꦺꦴꦢꦾ(angandika wau Sang Prabu Wanodya)꧈ ꦲꦶꦁꦱꦸꦤ꧀ꦠꦤ꧀ꦤꦂꦱꦏꦿꦩꦶ(ingsun tan arsa krami)꧈ ꦔꦼꦤ꧀ꦢꦶꦲꦤꦧꦥ(ngendi ana bapa)꧈ ꦲꦺꦱ꧀ꦠꦿꦶꦭꦸꦩꦸꦃꦲꦶꦁꦥꦿꦶꦪ(èstri lumuh ing priya)꧈ ꦧꦺꦤ꧀ꦗꦁꦩꦤ꧀ꦤꦶꦫꦲꦏꦿꦩꦶ(bénjang manira akrami)꧈ ꦪꦺꦤ꧀ꦤꦁꦱꦭ꧀ꦠꦶꦁꦔꦭ꧀(yèn angsal tingal) ꦲꦶꦏꦁꦥꦤꦸꦗꦸꦔꦠꦶ(ikang panuju ngati)꧈

꧄(8) ꦩꦶꦭꦤꦶꦥꦸꦤ꧀ꦤꦶꦁꦱꦸꦤ꧀ꦠꦤ꧀ꦤꦂꦱꦲꦏꦿꦩ(milanipun ingsun tan arsa akrama)꧈ ꦪꦺꦤ꧀ꦤꦶꦁꦱꦸꦤ꧀ꦤꦤꦶꦔꦭ꧀ꦭꦶ(yèn ingsun aningali)꧈ ꦩꦤ꧀ꦠꦿꦶꦩꦗꦊꦁꦏ(mantri Majalengka)꧈ ꦲꦶꦁꦏꦁꦏꦪꦏꦺꦴꦩ꧀ꦧꦭ(ingkang kaya kombala)꧈ ꦏꦁꦱꦩꦶꦲꦒꦼꦁꦲꦲꦶꦁꦒꦶꦭ꧀(kang sami ageng ainggil) ꦏꦁꦱꦶꦩ꧀ꦧꦂꦣꦣ(kang simbar dhadha)꧈ ꦭꦶꦂꦢꦸꦭꦸꦥꦣꦲꦶꦱ꧀ꦠꦿꦶ(lir dulu padha istri)꧈

꧄(9) ꦧꦭꦺꦏ꧀ꦏꦼꦤ꧀ꦤꦲꦸꦠꦸꦱ꧀ꦱꦤ꧀ꦤꦺꦫꦠꦸꦮꦤ꧀ꦝ(balèkena utusané Ratu Wandha[n])꧈ ꦏꦭꦮꦤ꧀ꦤꦿꦠꦸꦲꦁꦒꦿꦶꦱ꧀(kalawan Ratu Anggris) ꦏꦫꦺꦴꦧꦭꦺꦏ꧀ꦏꦼꦤ꧀ꦤ(karo balèkena)꧈ ꦲꦶꦁꦱꦸꦤ꧀ꦠꦤ꧀ꦤꦂꦱꦏꦿꦩ(ingsun tan arsa krama)꧈ ꦱꦸꦩꦁꦏꦺꦪꦤ꧀ꦤꦿꦠꦸꦱꦸꦒꦶꦃ(sumangkéyan ratu sugih)꧈ ꦔꦠꦸꦂꦫꦶꦧꦿꦤ(ngaturi brana)꧈ ꦲꦶꦁꦱꦸꦤ꧀ꦥꦸꦒꦶꦃꦥꦿꦶꦧꦢꦶ(ingsun sugih pribadi)꧈

꧄(10) ꦧꦥꦥꦠꦶꦃꦲꦭꦃꦱꦶꦫꦢꦺꦤ꧀ꦥꦿꦪꦠ꧀ꦤ(bapa patih alah sira dèn prayatna)꧈ ꦩꦤꦮꦶꦲꦁꦔꦭꦤ꧀ꦤꦶ(manawi angalani)꧈ ꦧꦠꦸꦂꦗꦒꦧꦺꦭ(batur jagabéla)꧈ ꦭꦮꦤ꧀ꦮꦺꦴꦁꦏꦗꦶꦤꦼꦩ꧀ꦩꦤ꧀(lawan wong kajineman) ꦧꦠꦸꦂꦏꦸꦮꦺꦴꦁꦢꦸꦫꦥꦠꦶ(baturku wong Durapati)꧈ ꦭꦃꦲꦸꦤ꧀ꦝꦁꦔꦤ꧀ꦤ(lah undhangana)꧈ ꦏꦧꦺꦃꦢꦶꦥꦸꦤ꧀ꦤꦒꦼꦭꦶꦱ꧀(kabèh dipun agelis)

꧄(11) ꦠꦶꦩ꧀ꦧꦭ꧀ꦭꦤꦲꦶꦁꦏꦁꦲꦠꦸꦁꦒꦸꦠꦩ꧀ꦥꦶꦁꦔꦤ꧀(timbalana ingkang atunggu tampingan) ꦱꦏꦺꦃꦩꦤ꧀ꦕꦤꦼꦒꦫꦶ(sakèh mancanegari)꧈ ꦱꦶꦲꦢꦶꦥꦠꦶꦢꦲ(Si {A}dipati Daha)꧈ ꦲꦕꦲꦺꦴꦱ꧀ꦤꦒꦒꦩꦤ꧀ (acaosa gegaman) ꦥꦠꦿꦺꦴꦭ꧀ꦭꦤꦠꦼꦥꦶꦱ꧀ꦮꦶꦫꦶꦁ(patrolana tepis wiring)꧈ ꦫꦏ꧀ꦱꦠꦩ꧀ꦥꦶꦁꦔꦤ꧀(raksa tampingan) ꦥꦣꦢꦶꦁꦔꦠꦶꦲꦠ꧀ꦠꦶ(padha dingati-ati)꧈

꧄(12) ꦱꦶꦒꦿꦧꦸꦧꦂꦥꦿꦧꦸꦮꦤꦺꦴꦢꦾꦱꦶꦤꦺꦧ(sigra bubar Prabu Wanodya sinéba)꧈ ꦩꦊꦧꦼꦠ꧀ꦢꦊꦩ꧀ꦥꦸꦫꦶ(malebet dalem puri)꧈ ꦏꦢꦶꦧꦿꦮꦶꦗꦪ(kadi Brawijaya)꧈ ꦢꦶꦥꦸꦤ꧀ꦤꦶꦫꦶꦁꦧꦶꦪꦢ(dipun iring biyada)꧈ ꦩꦸꦁꦱꦶꦫꦶꦏ꧀ꦏꦫꦠꦸꦲꦺꦱ꧀ꦠꦿꦶ(mung sirika ratu èstri)꧈ ꦢꦠꦤ꧀ꦏꦮꦂꦤ꧀ꦤ(datan kawarna)꧈ ꦲꦶꦏꦁꦩꦊꦧꦸꦥꦸꦫꦶ(ikang malebu puri)꧈

꧄(13) ꦲꦭꦸꦮꦂꦫꦤ꧀ꦱꦒꦸꦁꦔꦶꦁꦩꦤ꧀ꦠꦿꦶꦲꦱꦺꦧ(aluwaran sagunging mantri aséba)꧈ ꦏꦶꦥꦠꦶꦃꦩꦸꦤ꧀ꦢꦸꦂꦩꦸꦭꦶꦃ(ki patih mundur mulih)꧈ ꦲꦶꦁꦔꦶꦫꦶꦁꦥꦸꦠꦿꦤ꧀ꦚ(ingiring putranya)꧈ ꦫꦃꦲꦢꦺꦤ꧀ꦭꦪꦁꦱꦺꦠꦿ(Rahadèn Layangsétra)꧈ ꦏꦭꦮꦤ꧀ꦭꦪꦁꦏꦸꦩꦶꦠꦶꦂ(kalawan Layangkumitir)꧈ ꦤꦶꦲꦤ꧀ꦗꦼꦱ꧀ꦩꦫ(Ni Anjesmara)꧈ ꦥꦸꦠꦿꦤꦺꦏꦁꦮꦸꦫꦒꦶꦭ꧀(putrané kang wuragil)

꧄(14) ꦱꦏꦭꦁꦏꦸꦁꦲꦪꦸꦤꦺꦤꦶꦲꦤ꧀ꦗꦼꦱ꧀ꦩꦫ(sakalangkung ayuné Ni Anjesmara)꧈ ꦮꦱꦶꦱ꧀ꦱꦭꦶꦫꦶꦁꦏꦂꦢꦶ(wasis saliring kardi)꧈ ꦮꦶꦒ꧀ꦚꦩꦼꦩꦫꦢ(wignya memarada)꧈ ꦤꦺꦴꦁꦏꦺꦠ꧀ꦲꦤꦼꦤꦸꦤ꧀​ꦫꦺꦤ꧀ꦢ(nongkèt anenun rénda)꧈ ꦤꦼꦤꦸꦤ꧀ꦤꦭꦸꦱ꧀​ꦔꦤ꧀ꦠꦶꦃꦲꦭꦶꦠ꧀ (nenun alus ngantih alit) ꦠꦤ꧀ꦥꦢꦺꦴꦁꦢꦺꦴꦩꦤ꧀ (tanpa dongdoman) ꦭꦩꦸꦤ꧀ꦢꦩꦼꦭ꧀ꦏꦸꦭꦩ꧀ꦧꦶ(lamun damel kulambi)꧉

↑ ↑ ↑

← 01

03 →