ꦱꦼꦫꦠ꧀ꦗꦪꦊꦁꦏꦫꦮꦸꦭꦁ/08

꧁ꦢꦸꦂꦩ꧂

꧄ꦱꦩ꧀ꦥꦸꦤ꧀ꦩꦶꦱꦃ​ꦫꦃꦲꦝꦺꦤ꧀ꦗꦪꦊꦁ​ꦏꦫ꧉​​ꦏꦭ꧀ꦥ​ꦏꦭ꧀ꦥꦶꦏꦁꦭꦷꦁ​꧉​​ꦏꦏꦸꦏꦸꦥ꧀ꦫꦫꦺꦏ꧉​​ꦏꦏꦁ​​ꦥꦤ꧀ꦮꦸꦱ꧀ꦏꦥꦶꦱꦃ꧉​​ꦭꦃ​ꦲꦶꦁꦔꦪꦺꦴꦏ꧀ꦡꦼꦏ​ꦱꦶꦗꦷ꧉​​ꦩꦸꦥꦸꦁ​​ꦏꦠꦶꦁꦔꦭ꧀꧉​​ꦲꦗꦝꦺꦃ​ꦲꦤ꧀ꦤꦸꦠꦸꦠꦷ꧉​​

꧄ꦱꦶꦒꦿ​ꦩꦫ​ꦏꦭꦶꦲꦺ​ꦱꦩꦶ​ꦲꦁꦔꦸꦕꦥ꧀꧉​​ꦛꦺꦴꦭꦺ​ꦗꦸꦏ꧀ꦗꦫꦶꦠ꧀ꦑꦼꦂꦫꦷꦱ꧀꧉​​ꦱꦺꦭꦺꦃꦲꦼꦤ꧀ꦤ​ꦲꦺꦁ​ꦒꦭ꧀꧉​​ꦠꦶꦁ​ꦒꦭ꧀ꦊꦤ꧀ꦩꦭꦪꦸꦮ꧉​​ꦲꦺꦩꦤ꧀ꦩꦠꦶ​ꦮꦺꦴꦁ​​ꦔꦩ꧀ꦧꦼꦤ꧀ꦛꦷꦁ​꧉​​ꦲꦁꦔꦸꦂꦫꦿꦸꦫꦶꦥ꧉​​ꦧꦒꦸꦱ꧀ꦩꦸ​ꦧꦺꦴꦕꦃ​ꦠꦺꦴꦭꦷꦃ꧉​​

꧄ꦭꦶꦁ​​ꦱꦸꦗꦭ꧀ꦩ​ꦥꦤ꧀ꦩꦺꦴꦁ​ꦱ​ꦤꦺꦴꦫ​ꦥꦱꦿꦃꦲ꧉​​ꦮꦱ꧀ꦡꦿꦏꦭꦮꦤ꧀ꦏꦼꦫꦷꦱ꧀꧉​​ꦪꦺꦤ꧀ꦤꦿꦫꦺ​ꦲꦸꦫꦏ꧀ꦏꦤ꧀꧉​​ꦪꦺꦤ꧀ꦏꦪ​ꦱꦶ​ꦱꦸꦗꦭ꧀ꦩ꧉​​ꦤꦺꦴꦫ​ꦔꦶꦥꦶ​ꦠꦶꦁ​ꦒꦭ꧀ꦏꦼꦂꦫꦷꦱ꧀꧉​​ꦪꦺꦤ꧀ꦩꦱꦶꦃ​ꦒꦱꦁ​꧉​​ꦩꦼꦤ꧀ꦤꦮ​ꦠ​ꦪꦺꦤ꧀ꦩꦠꦷ꧉​​

꧄ꦭꦶꦁꦔꦶꦁ​​ꦏꦭ꧀ꦥ​ꦫꦫꦺ​ꦲꦶꦏꦶ​ꦥꦼꦏ꧀ꦱ​ꦭꦤ꧀ꦕꦁ​꧉​​ꦝꦼꦊꦁ​​ꦏꦼꦩꦶꦠ꧀ꦡꦤ꧀ꦩꦩꦷ꧉​​ꦲꦩ꧀ꦧꦼꦏꦤ꧀ꦤꦶꦁ​​ꦧꦫꦠ꧀꧉​​ꦏꦁ​​ꦧꦶꦫꦸ​ꦩꦪ​ꦩꦪ꧉​​ꦲꦤ꧀ꦝꦺꦴꦒ꧀ꦒꦶꦁ​​ꦱꦸꦂꦪ​ꦏꦁ​​ꦲꦧꦿꦷꦠ꧀꧉​​ꦲꦠꦶꦤꦶꦁ​​ꦩꦺꦒ꧉​​ꦲꦶꦏꦶ​ꦱꦶꦪꦸꦁꦔꦶꦁ​​ꦭꦁꦔꦶꦠ꧀꧉

꧄​​ꦏꦁ​​ꦔꦏꦸꦤꦶꦁ​ꦔꦶꦏꦶ​ꦒꦭꦶꦒꦤ꧀ꦤꦶꦁ​​ꦠꦺꦗ꧉​​ꦲꦶꦪ​ꦏꦁ​​ꦥꦸꦠꦶꦃ​ꦲꦶꦏꦷ꧉​​ꦏꦁ​​ꦲꦠꦶꦤꦶꦁ​​ꦩꦺꦒ꧉​​ꦏꦁ​​ꦝꦝꦸ​ꦒꦼꦧꦾꦂ​ꦒꦼꦧꦾꦂ꧉​​ꦩꦸꦱ꧀ꦛꦶꦏꦤ꧀ꦤꦶꦁ​​ꦏꦶꦭꦠ꧀ꦛꦛꦷꦠ꧀꧉​​ꦏꦱꦼꦏ꧀ꦡꦺꦤ꧀ꦤꦶꦁꦮꦁ​꧉​​ꦲꦒꦤ꧀ꦕꦁ​​ꦠꦤ꧀ꦥ​ꦠꦤ꧀ꦝꦷꦁ꧉

꧄​​ꦱꦁ​​ꦏꦭ꧀ꦥꦶꦏ​ꦲꦁꦔ꧀ꦭꦶꦁ​​ꦥꦤ꧀ꦱꦂꦮꦶ​ꦲꦤ꧀ꦤꦼꦤ꧀ꦡꦏ꧀꧉​​ꦛꦺꦴꦭꦺ​ꦏꦺꦴ​ꦲꦗ​ꦮꦤ꧀ꦤꦷ꧉​​ꦫꦺꦪꦁ​​ꦔꦸꦝꦸꦝ꧀ꦩꦼꦤ꧀ꦚꦤ꧀꧉​​ꦩꦺꦱꦼꦩ꧀ꦱꦶꦫ​ꦱꦸꦗꦭ꧀ꦩ꧉​​ꦏꦭ꧀ꦥꦶꦏꦂꦱ​ꦤꦼꦤ꧀ꦝꦭ꧀ꦏꦼꦂ​ꦫꦷꦱ꧀꧉​​ꦏꦭ꧀ꦥ​ꦪꦸꦤ꧀ꦤꦼꦤ꧀ꦝꦭ꧀꧉​​ꦱꦧꦸꦏ꧀ꦡꦶꦤꦁ​ꦏꦶꦱ꧀ꦏꦭꦷꦃ꧉​​

꧄ꦏꦭ꧀ꦥ​ꦏꦭ꧀ꦥꦶꦏ​ꦲꦤ꧀ꦤꦸꦧꦿꦸꦏ꧀ꦭꦶꦤꦸꦩ꧀ꦥꦠ꧀ꦡꦤ꧀꧉​​ꦏꦺꦔꦼꦭ꧀ꦏꦱꦩ꧀ꦥꦺ​ꦱꦶꦏꦷꦭ꧀꧉​​ꦩꦸꦂꦝꦤ꧀ꦤꦶꦁ​​ꦝꦸꦂꦗꦤ꧉​​ꦱꦽꦁꦔꦼꦤ꧀ꦤꦤꦫꦶꦏ꧀ꦏꦠ꧀ꦒ꧉​​ꦏꦭꦶꦃ​ꦲꦁ​ꦒꦺꦴꦕꦺꦴ​ꦲꦤ꧀ꦤꦶꦠꦷꦂ꧉​​ꦏꦤ꧀ꦡꦸꦤ꧀ꦤ​ꦒꦤ꧀ꦕꦁ​꧉​​ꦏꦶ​ꦱꦸꦗꦭ꧀ꦩ​ꦮꦸꦱ꧀ꦮꦱꦷꦱ꧀꧉​​

꧄ꦚꦤ꧀ꦝꦏ꧀ꦏꦪꦸ​ꦱꦸꦗꦭ꧀ꦩ​ꦲꦤ꧀ꦤꦸꦗꦸ​ꦲꦁ​ꦒꦱ꧀꧉​​ꦥꦶꦤꦸꦥꦸꦃ​ꦥꦺꦴꦏ꧀ꦏꦶꦁꦗꦫꦷ꧉​​ꦏꦿꦶꦱ꧀ꦏꦭ꧀ꦥ​ꦩꦊꦱꦠ꧀꧉​​ꦏꦭ꧀ꦥꦶꦏ​ꦤꦸꦝꦸꦏ꧀ꦭꦶꦮꦠ꧀꧉​​ꦥꦁ​ꦒꦼꦭꦁꦔꦤ꧀ꦤꦺ​ꦏꦒꦶꦠꦷꦏ꧀꧉​​ꦏꦿꦶꦱ꧀ꦒꦶꦒꦭ꧀ꦱꦩꦾ꧉​​ꦥꦶꦤꦸꦥꦸ​ꦤꦸꦝꦸꦏ꧀ꦩꦭꦷꦃ꧉

꧄ꦥꦶꦤ꧀ꦤꦉꦁꦔꦤ꧀ꦏꦩ꧀ꦥꦾꦏ꧀ꦏꦭꦶꦃ​ꦥꦸꦠꦸꦁ​​ꦏꦿꦶꦤ꧀ꦚ꧉​​ꦔꦿꦱꦸꦏ꧀ꦥꦉꦁ​​ꦏꦒꦶꦠꦷꦏ꧀ꦩꦸꦏꦤ꧀ꦤꦺ​ꦲꦝꦸꦱ꧀ꦫꦃ꧉​​ꦏꦭꦶꦃ​ꦧꦶꦔꦸꦁ​​ꦭꦸꦩꦗꦂ꧉​​ꦫꦝꦺꦤ꧀ꦡꦁ​ꦒꦶꦤ꧀ꦤꦱ꧀ꦩꦼꦒꦠ꧀ꦡꦷ꧉​​ꦏꦫꦺꦴ​ꦩꦤ꧀ꦝꦼꦒ꧀ꦒ꧉​​ꦪꦺꦤ꧀ꦡꦤ꧀ꦩꦤ꧀ꦝꦼꦒ꧀ꦧꦶꦭꦲꦷ꧉

꧄​​ꦒꦸꦒꦸꦥ꧀ꦥꦗꦿꦶꦃ​ꦏꦭꦶꦃ​ꦩꦼꦤ꧀ꦝꦏ꧀ꦤꦼꦩ꧀ꦧꦃ​ꦤꦼꦩ꧀ꦧꦃ꧉​​ꦲꦤ꧀ꦤꦸꦮꦸꦤ꧀ꦒꦼꦱꦁ​​ꦒꦸꦱꦠ꧀ꦡꦷ꧉​​ꦫꦝꦺꦤ꧀ꦤ​ꦔꦤ꧀ꦢꦶꦏ꧉​​ꦥꦩꦤ꧀ꦤꦗ​ꦱꦁ​ꦱꦪ꧉​​ꦱꦸꦤ꧀ꦡꦏꦺꦴꦤ꧀ꦤꦶ​ꦱꦶꦫ​ꦏꦭꦷꦃ꧉​​ꦥꦫꦤ꧀ꦥꦸꦂꦮꦤ꧀ꦡ꧉​​ꦲꦩ꧀ꦧꦼꦒꦺꦒꦭ꧀ꦭꦶꦁ​​ꦔꦸꦤꦷ꧉

꧄​​ꦠꦸꦂꦫꦶꦁ​​ꦏꦭ꧀ꦥ​ꦠꦤ꧀ꦮꦺꦴꦤ꧀ꦡꦼꦤ꧀ꦡꦸꦱ꧀ꦡꦸꦱ꧀ꦏꦮꦸꦭ꧉​​ꦲꦩ꧀ꦧꦼꦧꦺꦒꦭ꧀ꦗꦼꦁ​​ꦒꦸꦱ꧀ꦡꦷ꧉​​ꦥꦸꦂꦮꦩ꧀ꦧ​ꦲꦶꦁ​​ꦏꦶꦤ꧉​​ꦲꦁꦭꦩ꧀ꦥꦃꦲꦶ​ꦝꦸꦂꦗꦤ꧉​​ꦏꦮꦸꦭ​ꦏꦮꦺꦴꦤ꧀ꦤꦗꦸꦝꦷ꧉​​ꦒꦼꦭꦂ​ꦥꦤ꧀ꦡꦼꦭꦱ꧀꧉​​ꦫꦗꦏꦪ​ꦧꦉꦱꦷꦃ꧉​​

꧄ꦤꦸꦤ꧀ꦡꦼꦤ꧀ꦏꦸꦭ​ꦩꦤ꧀ꦝꦼꦠ꧀ꦢꦂꦧꦺꦏ꧀ꦡꦶꦪꦁ​​ꦭꦶꦪꦤ꧀꧉​​ꦝꦂꦧꦺꦤ꧀ꦤꦶꦁ​​ꦩꦶꦠꦿ​ꦏꦩ꧀ꦧꦷꦭ꧀꧉​​ꦩꦾꦁ​​ꦝꦂꦧꦺꦤ꧀ꦤꦶꦁ​​ꦏꦝ꧀ꦢꦁ​꧉​​ꦠꦶꦪꦁ​​ꦱꦼꦥꦸꦃ​ꦏꦃ​ꦲꦭꦥ꧀꧉​​ꦩꦭꦃ​ꦩꦼꦩꦤ꧀ꦢꦸꦁ​​ꦔꦶꦁ​​ꦒꦸꦱ꧀ꦡꦷ꧉​​ꦱꦪ​ꦧꦭꦤ꧀ꦛꦃ꧉​​ꦠꦼꦩꦃ​ꦧꦺꦒꦭ꧀ꦡ​ꦒꦸꦱ꧀ꦡꦷ꧉

꧄ꦔꦸꦤꦶ​ꦱꦁ​ꦏꦶꦁ​​ꦥꦁ​ꦒꦸꦫꦁ​ꦱꦁꦔꦶꦁ​​ꦏꦁ​​ꦩꦤ꧀ꦤꦃ꧉​​ꦱꦉꦁ​​ꦏꦫꦲꦺꦴꦱ꧀ꦧꦁ​ꦏꦷꦠ꧀꧉​ꦲꦸꦒꦸꦁꦔꦤ꧀ꦤꦧꦸꦔꦃ꧉​​ꦠꦸꦩꦤ꧀ꦱꦿꦶꦁꦔꦁ​ꦱꦭ꧀ꦒꦼꦭꦂ꧉​​ꦮꦺꦴꦁ​​ꦱꦼꦝꦸꦱꦸꦤ꧀ꦏꦸꦭ​ꦮꦽꦝꦷ꧉​​ꦲꦩꦼꦩꦭꦶꦁꦔ꧉​​ꦩꦸꦩꦸꦫꦶꦪ​ꦲꦶꦁ​​ꦏꦩꦷ꧉

꧄​​ꦭꦶꦁ​​ꦫꦃꦲꦝꦾꦤ꧀ꦗꦮꦤ꧀ꦤꦺ​ꦪꦪꦶ​ꦱꦸꦗꦭ꧀ꦩ꧉​​ꦲꦭ​ꦲꦶꦁ​​ꦮꦺꦴꦁ​​ꦲꦗꦸꦝꦷ꧉​​ꦠꦭꦸꦠꦸꦃꦲꦶꦁ​​ꦥꦿꦗ꧉​​ꦠꦼꦩꦃ​ꦧꦼꦧꦠꦺꦴꦃ​ꦏꦭꦃ꧉​​ꦲꦶꦁ​ꦏꦁ​​ꦠꦤ꧀ꦢꦸꦮꦺ​ꦥꦏꦂꦠꦷ꧉​​ꦪꦼꦏ꧀ꦡꦶ​ꦲꦭꦩ꧀ꦥꦃ꧉​​ꦝꦸꦱ꧀ꦛ​ꦔꦿꦸꦱꦏ꧀ꦮꦺꦴꦁꦕꦶꦭꦷꦏ꧀꧉

꧄​​ꦤꦝꦾꦤ꧀ꦱꦸꦝꦒꦂ​ꦮꦺꦴꦁ​​ꦏꦿꦶꦪ​ꦭꦩꦸꦤ꧀ꦏꦭꦃ꧉​​ꦗꦸꦝꦶ​ꦲꦶꦪ​ꦩꦺꦠ꧀ꦱꦶꦭꦷꦧ꧀꧉​​ꦧꦼꦕꦶꦏ꧀ꦏꦺ​​ꦲꦶꦁꦥꦿꦗ꧉​​ꦲꦗ​ꦤ​ꦮꦺꦴꦁ​​ꦠꦺꦴꦠꦺꦴꦲꦤ꧀꧉​​ꦪ​ꦠ​ꦏꦁ​​ꦝꦸꦂꦗꦤ​ꦏꦭꦷꦃ꧉​​ꦱꦶꦤꦸꦁ​​ꦏꦼꦤ꧀ꦕꦤ꧉​​ꦲꦮꦼꦠꦫ​ꦫꦺꦴꦁ​​ꦠꦲꦷꦭ꧀꧉​

꧄ꦲꦶꦏꦸ​ꦥꦩꦤ꧀ꦏꦂꦪꦤ꧀ꦤꦼꦤ꧀ꦥꦼꦥꦉꦩ꧀ꦩꦶꦫ꧉​​ꦲꦗ​ꦝꦸꦂꦗꦤ​ꦩꦤ꧀ꦤꦶꦁ​꧉​​ꦥꦺꦴꦩ​ꦗ​ꦠꦺꦴꦠꦺꦴꦮꦤ꧀꧉​​ꦏꦭ꧀ꦥ​ꦏꦭ꧀ꦥꦶꦏ​ꦤꦼꦩ꧀ꦧꦃ꧉​​ꦲꦩꦶꦠ꧀ꦡꦸꦂ​ꦩꦸꦗꦶ​ꦲꦶꦁ​​ꦔꦠꦷ꧉​​ꦭꦸꦔ​ꦏꦼꦂꦫꦱ꧉​​ꦮꦶꦫꦁꦔꦿꦺꦴꦁꦔꦶꦫꦺꦁ​​ꦔꦠꦷ꧉​​

꧅ ꦚ꧀ꦖ ꧅

↑ ↑ ↑

← 07

09 →